‏1 بُولُوسْ، ونِّي إِتّْوَاڒَاغَانْ، ذ رَّاسُولْ ن يشُّو لْمَاسِيحْ عْلَاحْسَابْ مِينْ إِخْسْ أَربِّي، ذ ثَاوْمَاثْ سُوسْثِينِيسْ، ^▫   ‏2 إِ ثْمسْمُونْثْ ن أَربِّي إِ إِدْجَانْ ذِي كُورِينْثُوسْ، إِنِّي إِتّْوَاڒَاغَانْ ذ إِمْقدَّاسنْ نِّي إِتّْوَاقدّْسنْ ذِي يشُّو لْمَاسِيحْ، ؤُ إِ مَارَّا إِنِّي مَانِي مَّا تّْڒَاغَانْ خْ يِيسمْ ن سِيذِيثْنغْ يشُّو لْمَاسِيحْ، ونِّي ذ سِيذِيثْسنْ ذ سِيذِيثْنغْ. ^▪   ‏3 أَذْ خَاومْ يِيڒِي أَرْضَا ذ ڒهْنَا زِي أَربِّي، بَابَاثْنغْ، ؤُ زِي سِيذِيثْنغْ يشُّو لْمَاسِيحْ. ^▪  

‏4 نشّْ ڒبْذَا تّْقَاذِيغْ أَربِّي إِنُو ذِي طّْوعْ نْومْ خْ أَرْضَا ن أَربِّي إِ ذ أَومْ إِمّوْشنْ ذِي يشُّو لْمَاسِيحْ. ‏5 مِينْزِي ذِي مَارَّا ثْذوْڒمْ زَّايسْ ذ تُّوجَّارْ، ذِي مَارَّا أَوَاڒْ ؤُ ذِي مَارَّا ثُوسّْنَا، ^▪   ‏6 مَاغَارْ شّْهَاذثْ ن لْمَاسِيحْ ثتّْوَاضْمنْ ذَايْومْ، ‏7 مِينْزِي ؤُڒَا ذ إِجّْ ن زّْعَافْ ن ثوْهِيبْثْ وَارْ ذَايْومْ إِقِّيمْ، أَمْ ثتّْرَاجَامْ أَسَارْڭَابْ ن سِيذِيثْنغْ يشُّو لْمَاسِيحْ، ^▪   ‏8 مِينْزِي نتَّا أَذْ كنِّيوْ إِضْمنْ عَاوذْ غَارْ ؤُنڭَّارْ حِيمَا أَذْ ثِيڒِيمْ بْڒَا ڒْعِيبْ ذڭْ وَاسّْ ن سِيذِيثْنغْ يشُّو لْمَاسِيحْ. ^▪   ‏9 أَربِّي ذ أَمْثِيقِّي، مِينْزِي كنِّيوْ ثتّْوَاڒَاغَامْ زَّايسْ غَارْ ثْمُونْثْ أَكْ-ذ مِّيسْ يشُّو لْمَاسِيحْ، سِيذِيثْنغْ. ^▪  

‏10 مَاشَا تّْزَاوْڭغْ كنِّيوْ، أَ أَيْثْمَا، س يِيسمْ ن سِيذِيثْنغْ يشُّو لْمَاسِيحْ، أَذْ ثسِّيوْڒمْ مَارَّا س إِجّْ ن وَاوَاڒْ، وَارْ ثتّمْسبْضِيمْ جَارْ أَومْ، مَاشَا إِڒِيمْ ثْمُونمْ نِيشَانْ س نّيّثْ ذ إِشْثنْ ذ ؤُخَارّصْ ذ إِجّنْ. ^▪  

‏11 مِينْزِي سَّارْڭْبنْ أَيِي، أَ أَيْثْمَا إِنُو، إِنِّي زِي ثَادَّارْثْ ن كْلُووِي، بلِّي جَارْ أَومْ إِمنْغَانْ.

‏12 خْسغْ أَذْ إِنِيغْ، أَقَا شَا زَّايْومْ قَّارنْ: ’نشّْ أَقَا أَيِي زِي بُولُوسْ!‘ ؤُ شَا نّغْنِي: ’نشّْ زِي أَپُولُّوسْ!‘ ؤُ شَا نّغْنِي عَاوذْ: ’نشّْ زِي كِيفَا!‘ ؤُ شَا زَّايْومْ قَّارنْ: ’نشّْ زِي لْمَاسِيحْ!‘ ^▪  

‏13 مَا أَقَا لْمَاسِيحْ إِتّْوَابْضَا ذ إِوثْوِيثنْ؟ مَا ثُوغَا بُولُوسْ إِتّْوَاصلّبْ ذِي سِّيبّثْ نْومْ؟ نِيغْ ثُوغَا كنِّيوْ ثتّْوَاسْغضْصمْ س يِيسمْ ن بُولُوسْ؟

‏14 نشّْ تّْقَاذِيغْ أَربِّي إِنُو وَارْ سّْغضْصغْ ؤُڒَا ذ إِجّْ مْغِيرْ كْرِيسْپُوسْ ذ خَايُوسْ وَاهَا، ^▪  

‏15 أَڒَامِي ؤُڒَا ذ إِجّنْ أَذْ يِينِي بلِّي سّْغضْصغْ ذڭْ يِيسمْ إِنُو.

‏16 عَاوذْ سّْغضْصغْ ثَاوَاشُونْثْ ن سْثِيفَانُوسْ، خنِّي وَارْ سِّينغْ شَا مَا سّْغضْصغْ حذْ نّغْنِي. ^▪  

‏17 مَاغَارْ لْمَاسِيحْ وَارْ ذ أَيِي د-إِسّكّْ حِيمَا أَذْ سّْغضْصغْ، مَاشَا حِيمَا أَذْ بَارّْحغْ س ڒخْبَارْ أَصبْحَانْ، وَارْ إِدْجِي س ثِيغِيثْ ن وَاوَاڒنْ حِيمَا وَارْ إِتّتّْوَاسّْبطّڒْ صَّالِيبْ ن لْمَاسِيحْ. ^▪  

‏18 مِينْزِي أَوَاڒْ ن صَّالِيبْ ذ ثُوبُّوهڒْيَا ذِي ثِيطَّاوِينْ ن يِينِّي إِ غَا إِودَّارنْ، مَاشَا إِ نشِّينْ، إِنِّي إِدَّارنْ، مَانْ أَيَا ذ جّهْذْ ن أَربِّي. ^▪  

‏19 مِينْزِي ثُورَا:

”أَذْ أَردّْدْجغْ ثِيغِيثْ ن إِمِيغِيسنْ

ؤُشَا أَذْ كّْسغْ ڒفْهَامثْ ن إِفهَّامنْ.“ ^▪  

‏20 مَانِي إِدْجْ ؤُمِيغِيسْ؟ مَانِي إِدْجْ ؤُمْسڒْمَاذْ ن إِذْلِيسنْ؟ مَانِي إِدْجْ بُو-ؤُمْحَارْوضْ ن دُّونشْثْ-أَ؟ مَا وَارْ إِسّْشنْ أَربِّي بلِّي ثِيغِيثْ ن دُّونشْثْ-أَ ذ ثُوبُّوهڒْيَا؟ ^▪   ‏21 وَاخَّا دُّونشْثْ ثدْجْ ذِي ثِيغِيثْ ن أَربِّي، وَارْ ثسِّينْ شَا أَربِّي زِي سِّيبّثْ ن ثِيغِيثْ ن يِيخفْ نّسْ، س ؤُينِّي ثُوغَا يَارْضَا أَربِّي أَذْ إِوْشَا ثُوذَارْثْ إِ ينِّي يُومْننْ س ثُوبُّوهڒْيَا ن ثْبَارّحْثْ. ^▪   ‏22 مِينْزِي ؤُذَاينْ تَّارنْ ڒعْڒَامَاثْ ذ إِرَامِييّنْ أَرزُّونْ ثِيغِيثْ، ^▪   ‏23 مَاشَا نشِّينْ نتّْبَارّحْ لْمَاسِيحْ ونِّي إِتّْوَاصلّْبنْ، أَقَا-ث ذ ثَاعنْكْرِيفْثْ إِ وُوذَاينْ، ذ ثُوبُّوهڒْيَا إِ إِرَامِييّنْ، ^▪   ‏24 مَاشَا إِ ينِّي إِتّْوَاڒَاغَانْ، أَمْ وُوذَاينْ أَمْ إِرَامِييّنْ، أَقَا لْمَاسِيحْ ذ جّهْذْ ن أَربِّي ذ ثِيغِيثْ ن أَربِّي. ^▪   ‏25 مِينْزِي ثُوبُّوهڒْيَا ن أَربِّي ذ ثْمِيغِيسْثْ خْ إِوْذَانْ، ؤُ ثُوضْعفْثْ ن أَربِّي ثجْهذْ خْ إِوْذَانْ.

‏26 خنِّي، أَ أَيْثْمَا، خْزَارمْ مَامّشْ ثدْجَامْ غَارْ وَاسّْ ن ثْڒَاغِيثْ نْومْ، أَقَا وَارْ ثدْجِيمْ ذ أَطَّاسْ ن إِمِيغِيسنْ عْلَاحْسَابْ بْنَاذمْ، نِيغْ ذ أَطَّاسْ ن يِينِّي غَارْ ثدْجْ صُّولْطَا نِيغْ ذ أَطَّاسْ ن ثَارْوَا ن ثَاصِيڒثْ، ^▪   ‏27 مَاشَا أَربِّي أَقَا إِفَارْزْ إِپُوحَاڒِييّنْ ن دُّونشْثْ حِيمَا أَذْ زَّايسْ إِسّحْشمْ إِمِيغِيسنْ، ؤُشَا ثُوضْعفْثْ ن دُّونشْثْ إِفَارْزْ إِ-ت أَربِّي حِيمَا أَذْ زَّايسْ إِسّحْشمْ أَيْثْ ن بُو-صُّولْطَا، ‏28 ؤُشَا ينِّي د-إِخڒْقنْ وَارْ غَارْسنْ شَا ذِي دُّونشْثْ ؤُ ينِّي إِتّْوَاسّحْقَارنْ ذ ينِّي وَارْ إِدْجِينْ ذ شَا، أَقَا إِفَارْزْ إِ-ثنْ أَربِّي حِيمَا أَذْ إِبْضڒْ إِنِّي إِدْجَانْ ذ شَا، ‏29 حِيمَا ؤُڒَا ذ إِجّْ ن بْنَاذمْ س أَرِّيمثْ ثَامذْنُوبْثْ وَارْ إِتّْفيّشْ شَا زَّاثسْ. ‏30 مَاشَا زَّايسْ إِ ثدْجَامْ كنِّيوْ، ذِي يشُّو لْمَاسِيحْ، ونِّي ذ أَنغْ إِذوْڒنْ ذ ثِيغِيثْ ن أَربِّي ذ ثْسڭْذَا ذ ثُوقدّْسِي ذ وصْڒَاحْ ^▪   ‏31 أَمْ مَامّشْ إِ يُورَا:

”أجّْ ونِّي إِسّمْغَارَانْ، أَذْ إِسّمْغَارْ ذِي سِيذِي.“ ^▪