‏1 ڒخُّو نشّْ بُولُوسْ سِيمَانْثْ إِنُو، زَاوْڭغْ كنِّيوْ س ثمْهِينْثْ ذ ڒضْرَافثْ ن لْمَاسِيحْ، نشّْ ذ ونِّي إِدْجَانْ ذ أَمذْڒُوڒْ خْمِي حْضَارغْ، مَاشَا خْمِي إِ غَا غَابغْ أَقَا أَيِي س ثرْيَاسْثْ. ‏2 مَاشَا تّْزَاوَاڭغْ كنِّيوْ، خْمِي غَارْومْ د غَا يَاسغْ، نْهْڒَا مَا أَذْ إِڒِيغْ س ثرْيَاسْثْ نِّي حسّْبغْ أَقَا-ت غَارِي، مَاحنْذْ أَذْ مّْعَارِّيغْ أَكْ-ذ إِنِّي إِحسّْبنْ أَقَا نشِّينْ ندَّارْ ذِي دّْنُوبْ ن أَرِّيمثْ.

‏3 مِينْزِي وَاخَّا نڭُّورْ ذِي أَرِّيمثْ، وَارْ نتّْمنْغِي شَا عْلَاحْسَابْ أَرِّيمثْ ثَامذْنُوبْثْ، ‏4 س مِينْزِي ڒسْنَاحْ ن ؤُمنْغِي نّغْ وَارْ دْجِينْ زِي أَرِّيمثْ ثَامذْنُوبْثْ، مَاشَا زِي جّهْذْ ن أَربِّي، ؤُ زَّايسْ إِ نْثَارَّا لْپُورْجَاثْ إِغوّْغنْ سَاذُو أَفُوسْ نّغْ. ^▪   ‏5 حِيمَا أَذْ نَاريْثرْ إِخَارِّيصنْ ذ مَارَّا ڒُوعْڒَا إِڭعّْذنْ خْ ثُوسّْنَا ن أَربِّي ؤُشَا أَذْ نْحبّسْ مَارَّا ثَاخَارّصْثْ إِ طَّاعثْ ن لْمَاسِيحْ، ‏6 ؤُشَا نكَّارْ مَاحنْذْ أَذْ ننْثَاقمْ إِنِّي وَارْ إِطِّيعنْ خْمِي إِ غَا ثِيڒِي طَّاعثْ نْومْ ثكْمڒْ.

‏7 مَا ثْخزَّارمْ غَارْ ثْمسْڒَايِينْ س وُوذمْ؟ مَاڒَا حذْ إِتِّيقّْ ذڭْ إِخفْ نّسْ بلِّي نتَّا ن لْمَاسِيحْ، خنِّي أَذْ إِخَارّصْ عَاوذْ، بلِّي أَمشْنَاوْ نتَّا ن لْمَاسِيحْ أَمنِّي عَاوذْ نشِّينْ ن لْمَاسِيحْ إِ ندْجْ. ‏8 مَاعْلِيكْ نشّْ مَاڒَا سّمْغَارغْ س شْوَايْثْ ن ؤُفيّضْ كْثَارْ ذِي تّسْرِيحْ نّغْ ثنِّي ذ أَيِي إِوْشَا سِيذِيثْنغْ، خنِّي أَذْ يِيڒِي نهْڒَا مَا أَذْ سّضْحِيغْ، مَاغَارْ نتَّا إِوْشَا أَنغْ ت إِ ڒبْنِي نْومْ، وَارْ إِدْجِي إِ وَاردّدْجْ نْومْ، ‏9 مَاشَا سّْبعّْذغْ أَيَا، حِيمَا وَارْ إِتّْغِيڒْ شَا ن إِجّْ أَقَا خْسغْ أَذْ كنِّيوْ سِّيڭّْوذغْ س ثبْرَاثْ إِنُو.

‏10 مِينْزِي أَقَا ذِينْ إِنِّي إِقَّارنْ: ”ثِيبْرَاثِينْ نّسْ قسْحنْثْ جهْذنْثْ، مَاشَا ڒْحَاضَارْ ن بْنَاذمْ س أَرِّيمثْ إِهيّفْ ؤُشَا أَوَاڒنْ نّسْ تّْوَاسحْقَارنْ.“

‏11 إِنِّي إِسَّاوَاڒنْ أَمُّو أجّْ إِ-ثنْ أَذْ عقْڒنْ، أَقَا، أَمْ مَامّشْ ندْجْ نشِّينْ ذڭْ وَاوَاڒْ س ثبْرَاثِينْ مَاڒَا وَارْ نحْضَارْ، أَمُّو إِ ندْجْ س ثْمڭَّا نّغْ خْمِي إِ غَا نحْضَارْ.

‏12 مِينْزِي وَارْ نزْعِيمْ شَا أَذْ نحْسبْ نِيغْ أَذْ نسّمْقُودَّا إِخفْ نّغْ أَكْ-ذ شَا ن يِينِّي إِسّمْغَارَانْ إِخفْ نْسنْ، مَاغَارْ ؤُمِي عْبَارنْ نِيثْنِي إِخفْ نْسنْ س يِيخفْ نْسنْ، أَقَا نِيثْنِي وَارْ فْهِيمنْ وَالُو.^▪  

‏13 مَاشَا نشِّينْ وَارْ نسّمْغَارِي شَا بَارَّا إِ ڒعْبَارْ، مَاشَا عْلَاحْسَابْ ڒعْبَارْ ن وَازَّايْ إِ ذ أَنغْ إِوْشَا أَربِّي، حِيمَا أَذْ غَارْومْ د-نَاوضْ. ^▪  

‏14 مِينْزِي وَارْ إِدْجِي أَمشْنَاوْ مَامّشْ وَارْ غَارْومْ د-نِيوضْ، مِينْزِي أَقَا نِيوضْ-د غَارْومْ س ڒخْبَارْ أَصبْحَانْ ن لْمَاسِيحْ.

‏15 أَقَا وَارْ نسّمْغَارْ شَا أَمْ نكَّا سنّجْ إِ ڒعْبَارْ س ڒخْذَايمْ ن إِنّغْنِي، مَاشَا نسِّيثِيمْ، ؤُمِي إِمقَّارْ لْ-إِيمَانْ نْومْ، أَذْ نتّْوَاوسّعْ أَطَّاسْ زَّايْومْ ذِي تَّاسِيعْ نّغْ،

‏16 حِيمَا خنِّي أَذْ نْبَارّحْ س ڒخْبَارْ أَصبْحَانْ ذڭْ إِمُوشَانْ أَغِيرِينْ خَاومْ، حِيمَا وَارْ نسّمْغَارِي شَا خْ ثسْغَارْثْ ن إِنّغْنِي، مِينْ ڭِّينْ نِيثْنِي قْبڒْ.

‏17 مَاشَا وِي إِخْسنْ أَذْ إِسّمْغَارْ، أَذْ إِسّمْغَارْ ذِي سِيذِي. ^▪  

‏18 س مِينْزِي وَارْ إِدْجِي ونِّي إِوصَّانْ خْ يِيخفْ نّسْ، مَاشَا ونِّي خَاسْ إِوصَّا سِيذِي، أَقَا ذ ونِّي إِتّْوَافنْ ذ أَمْقدْجبْ. ^▪