‏1 خنِّي، أَ أَيْثْمَا، نسَّارْڭبْ إِ كنِّيوْ أَرْضَا ن أَربِّي إِ إِمّوْشنْ إِ ثْمسْمُونِينْ ذِي مَاكِيذُونِييَا، ‏2 مَاغَارْ ؤُمِي خَاسنْ د-إِكَّا ؤُقدْجبْ إِمْغَارْ ن ڒْمحْنثْ نْسنْ، ثْفيّضْ ڒفْرَاحثْ نْسنْ، ؤُ ؤُمِي ذَايْسنْ زّڒْضْ إِمْغَارنْ، يَارْنِي عَاذْ س وَاطَّاسْ إِ وَاڭْڒَا ن ثشْرِيمثْ نْسنْ، ‏3 مِينْزِي شهْذغْ، أَقَا عْلَاحْسَابْ جّهْذْ نْسنْ ؤُ عَاذْ سنّجْ إِ جّهْذْ نْسنْ، ڒَامِي تّخْسنْ س وُوڒْ نْسنْ، ‏4 أَقَا زَاوْڭنْ أَنغْ س جّهْذْ مَاحنْذْ أَذْ شَارْشنْ ذِي أَرْضَا ن ثْسخَّارْثْ إِ إِمْقدَّاسنْ. ^▪   ‏5 ؤُشَا نِيثْنِي وَارْ ڭِّينْ مِينْ ثُوغَا نسِّيثِيمْ وَاهَا، مَاشَا أَقَا وْشِينْ إِخفْ نْسنْ أَمزْوَارْ إِ سِيذِيثْنغْ، خنِّي ؤُڒَا إِ نشِّينْ عْلَاحْسَابْ مِينْ إِخْسْ أَربِّي، ‏6 أَڒَامِي نْزَاوڭْ ثِيثُوسْ، أَمشْنَاوْ مَامّشْ ثُوغَا إِبْذَا قْبڒْ، حِيمَا أَذْ إِكمّڒْ غَارْومْ ثشْرِيمثْ-أَ ن ضّْذَاقِي عَاوذْ. ‏7 مَاشَا أَمْ مَامّشْ ثْفيّْضمْ ذِي مَارَّا، - ذِي لْ-إِيمَانْ، ذڭْ وَاوَاڒْ، ذِي ثُوسّْنَا، ذِي مَارَّا شْضَارثْ - ، ؤُ س ثَايْرِي نّغْ إِ غَارْومْ إِدْجَانْ، أَذْ ثْفيّْضمْ عَاوذْ ذِي ثشْرِيمثْ-أَ ن ضّْذَاقِي نْومْ.

‏8 وَارْ دْجِيغْ تُّومُورغْ كنِّيوْ وَاهَا، مَاشَا أَرزُّوغْ أَذْ قدْجْبغْ ثِيذتّْ ن ثَايْرِي نْومْ س شْضَارثْ ن إِنّغْنِي. ‏9 مِينْزِي أَقَا ثسّْنمْ أَرْضَا ن سِيذِيثْنغْ يشُّو لْمَاسِيحْ، بلِّي إِذْوڒْ ذ أَمزْڒُوضْ ذِي طّْوعْ نْومْ، وَاخَّا ثُوغَا-ث س وَاڭْڒَا، حِيمَا كنِّيوْ أَذْ ثْذوْڒمْ ذ ثْوَاجَّارْ س زّڒْضْ نّسْ.

‏10 أَذْ كنِّيوْ وصِّيغْ مْلِيحْ، - مِينْزِي مَانْ أَيَا إِ نّْفعْ نْومْ - ، مَاحنْذْ مِينْ ثبْذَامْ أَذْ ثنْوَامْ ذڭْ ؤُسڭّْوَاسْ إِعْذُونْ، أَذْ ث ثڭّمْ عَاوذْ.

‏11 كمّْڒمْ ڒخُّو س ثْمڭَّا مِينْ ثُوغَا ثْمژّْرمْ، كمّْڒمْ أَيَا س ثْمڭَّا عْلَاحْسَابْ مِينْ إِدْجَانْ غَارْومْ.

‏12 مَاشَا مَاڒَا ذِينْ مژْرِي، أَقَا إِتّْوَاجبْ عْلَاحْسَابْ مِينْ غَارسْ، وَارْ إِدْجِي عْلَاحْسَابْ مِينْ وَارْ غَارسْ إِدْجِي. ^▪  

‏13 مِينْزِي وَارْ إِتّْڒِيقْ حِيمَا أَذْ ذِينْ ثِيڒِي ڒفْسَاسثْ إِ إِنّغْنِي ؤُ أَذْ خَاومْ يِيڒِي دّْقڒْ،

‏14 مَاشَا أجّْ أَفيّضْ نْومْ أَذْ إِعمَّارْ ڒغْبنْ نْسنْ ذِي ڒْوقْثْ-أَ، أَڒَامِي أَفيّضْ نْسنْ ذِي مَانْ أَيَا أَذْ إِعمّرْ ڒغْبنْ نْومْ، حِيمَا خنِّي أَذْ يِيڒِي ڒْمِيزَانْ،

‏15 أَمْ مَامّشْ ثُورَا:

”ونِّي إِسّْمُوننْ أَطَّاسْ،

وَارْ ذ أَسْ إِشطّْ شَا،

ذ ونِّي ثُوغَا إِيَارّْونْ ذْرُوسْ،

وَارْ ذَايسْ إِقِّيمْ ڒخْصصْ.“ ^▪  

‏16 مَاشَا أَقَاذِي إِ أَربِّي ونِّي إِڭِّينْ ذڭْ وُوڒْ ن ثِيثُوسْ شْضَارثْ ذ إِشْثنْ خَاومْ،

‏17 مِينْزِي إِقْبڒْ ثُوثْرَا نّغْ، ؤُشَا أَمْ ثُوغَا ذَايسْ أَمْنُوسْ خَاومْ، إِطّوّعْ مَاحنْذْ أَذْ غَارْومْ د-يَاسْ.

‏18 ؤُشَا نسّكّْ-د أَكِيذسْ عَاوذْ ؤُمَاثْنغْ ونِّي غَارْ إِدْجْ ؤُوقَّارْ ذِي ڒخْبَارْ أَصبْحَانْ ذِي مَارَّا ثِيمسْمُونِينْ،

‏19 ونِّي إِتّْوَافَارْزنْ عَاوذْ زِي ثْمسْمُونِينْ مَاحنْذْ أَذْ يُويُورْ أَكِيذْنغْ أَكْ-ذ ثشْرِيمثْ-أَ نْ ضّْذَاقِي إِ إِتّْوَاڭّنْ س ثْسخَّارْثْ نّغْ إِ ؤُعُودْجِي ن أَربِّي ؤُ إِ ؤُشجّعْ إِ نشِّينْ.

‏20 مَاشَا نْحطَّا مَاحنْذْ وَارْ ذ أَنغْ إِضدْجمْ حذْ مَاڒَا نْسيَّارْ ثَاشْرِيمثْ-أَ ن ضّْذَاقِي إِفيّْضنْ، ‏21 مِينْزِي مِينْ ذ أَنغْ إِشْقَانْ أَذْ إِعْذُو مْلِيحْ، وَارْ إِدْجِي وَاهَا قِيبَاتْشْ إِ أَربِّي مَاشَا عَاوذْ زَّاثْ إِ إِوْذَانْ. ^▪   ‏22 نسّكّْ عَاوذْ أَكِيذْسنْ ؤُمَاثْنغْ، ونِّي ذ أَنغْ إِسّْشَاننْ ڒبْذَا ذڭْ وَاطَّاسْ ن ثْمسْڒَايِينْ، أَقَا نتَّا إِتّْشطَّارْ، مَاشَا ڒخُّو إِتّْشطَّارْ كْثَارْ مِينْزِي نتَّا إِتّْشَاڒْ خَاومْ أَطَّاسْ. ‏23 مَاڒَا خنِّي ثِيثُوسْ ذ أَمْعَاشَارْ ذ أَمْعَاونْ إِنُو جَارْ أَومْ، ؤُ مَاڒَا خنِّي أَيْثْمَاثْنغْ إِنّغْنِي أَقَا أَثنْ ذ رُّوسُولْ ن ثْمسْمُونِينْ ؤُ ن ؤُعُودْجِي ن لْمَاسِيحْ، ^▫   ‏24 سشّْنمْ أَسنْ زِي ڒخُّو ثَايْرِي نْومْ ؤُ بلِّي أَسمْغَارْ نّغْ ذَايْونْ زَّاثْ إِ مَارَّا ثْمسْمُونِينْ أَقَا-ث ذ ثِيذتّْ.