‏1 مِينْزِي نسّنْ، بلِّي، خْمِي إِ غَا ثفْنَا ثَادَّارْثْ نّغْ ن ثمُّورْثْ إِ يدْجَانْ ذ أَرِّيمثْ، أَذْ غَارْنغْ يِيڒِي إِجّْ ن ڒبْنِي ن أَربِّي إِ ڒبْذَا ذڭْ إِجنْوَانْ، إِشْثْ ن ثَادَّارْثْ وَارْ ثتّْوَاڭّْ شَا س إِفَاسّنْ. ^▪   ‏2 خْ مَانْ أَيَا إِ نْزهَّارْ ؤُ ذَايْنغْ مژْرِي حِيمَا أَذْ نَارْضْ ثَازذِّيغْثْ نّغْ ثنِّي إِدْجَانْ زڭْ ؤُجنَّا، ^▪   ‏3 مَاعْلِيكْ قَاعْ إِ غَا نِيڒِي نْيَارْضْ، وَارْ نڭُّورْ أَذْ نتّْوَافْ ذ إِعرْيَاننْ. ^▪   ‏4 مَاشَا مِينْ مَّا غَا نكّْ عَاذْ ذِي ثَادَّارْثْ-أَ، أَذْ نقِّيمْ نْزهَّارْ س دّْقڒْ نّسْ، مِينْزِي وَارْ نخْسْ أَذْ ت نجّْ مَاشَا نخْسْ أَذْ ت نْيَارْضْ، حِيمَا مِينْ إِفنَّانْ أَذْ إِتّْوَاصَارْذْ زِي ثُوذَارْثْ. ^▪   ‏5 ونِّي ذ أَنغْ د-إِسّْوجْذنْ إِ مَانْ أَيَا ذ نتَّا ذ أَربِّي ونِّي ذ أَنغْ إِوْشِينْ أَرُّوحْ نّسْ ذ ڒْعَارْپُونْ. ^▪  

‏6 س ؤُينِّي نسّنْ ؤُ غَارْنغْ تِّيقّثْ، أَقَا خنِّي مِينْ غَا نكّْ نْزدّغْ ذِي أَرِّيمثْ، أَذْ نِيڒِي نڭّْوجْ خْ سِيذِيثْنغْ، ‏7 - مِينْزِي س لْ-إِيمَانْ إِ نڭُّورْ، وَارْ إِدْجِي س مِينْ إِتّْبَاننْ - ، ^▪   ‏8 س ؤُينِّي نتِّيقَّا ؤُشَا ذَايْنغْ مژْرِي، مَاحنْذْ أَذْ نسْمحْ ذِي أَرِّيمثْ حِيمَا أَذْ نزْذغْ أَكْ-ذ سِيذِيثْنغْ. ‏9 نتّْشطَّارْ حِيمَا أَذْ أَسْ أَرْضَانْ، مَا ندْجْ نڭّْوجْ خْ ثَادَّارْثْ نِيغْ ذِي ثَادَّارْثْ.

‏10 مِينْزِي إِتّْخصَّا أَنغْ مَارَّا إِذْنغْ أَذْ نضْهَارْ زَّاثْ إِ ڒْكُورْسِي ن شّْرعْ ن لْمَاسِيحْ، حِيمَا كُوڒْ إِجّنْ أَذْ إِطّفْ عْلَاحْسَابْ مِينْ إِڭَّا ڒَامِي ث ثُوغَا ذِي أَرِّيمثْ، ثْشُونِي نِيغْ ثُوعفّْنَا. ^▪  

‏11 س ؤُينِّي، أَمْ نسّنْ أَقَا إِتّْخصَّا أَذْ نڭّْوذْ زِي سِيذِيثْنغْ، أَقَا نَارزُّو أَذْ نسّقْنعْ إِوْذَانْ، مَاشَا غَارْ أَربِّي أَقَا نشِّينْ نتّْوَاسّنْ غَارسْ، ؤُشَا سِّيثِيمغْ أَقَا نتّْوَاسّنْ غَارْومْ عَاوذْ ذِي ثْنفْسشْثْ نْومْ.

‏12 وَارْ نتّْوصِّي شَا إِخفْ نّغْ ثْوَاڒَا نّغْنِيثْ، مَاشَا أَذْ أَومْ نوْشْ لْفُورْصَا إِ ؤُسمْغَارْ ذَايْنغْ زَّاثْ إِ ينِّي إِسّمْغَارَانْ ذِي مِينْ إِتّْبَاننْ، وَارْ إِدْجِي ذِي مِينْ إِدْجَانْ ذڭْ وُوڒْ. ^▪  

‏13 مِينْزِي مَاڒَا ثُوغَا نتّخْڒفْ، أَقَا مَانْ أَيَا إِ أَربِّي، مَاڒَا ثُوغَا أَنغْ س ڒعْقڒْ أَقَا مَانْ أَيَا إِ كنِّيوْ.

‏14 مَاغَارْ ثَايْرِي ن لْمَاسِيحْ ثْعَارّنْ أَنغْ، مَاحنْذْ أَذْ نْخَارّصْ أَمُّو: مَاڒَا إِجّنْ إِمُّوثْ خْ مَارَّا، أَقَا مَارَّا ثمُّوثْ أَكِيذسْ.

‏15 أَقَا نتَّا إِمُّوثْ خْ مَارَّا، حِيمَا إِنِّي إِدَّارنْ، وَارْ دَّارنْ شَا عَاذْ إِ إِخفْ نْسنْ، مَاشَا إِ ونِّي إِمُّوثنْ ذ ونِّي د-إِتّْوَاسْنكَّارنْ إِ نِيثْنِي. ^▪  

‏16 أَمنِّي زِي سَّا ذ ثْسَاونْثْ وَارْ نسِّينْ شَا ؤُڒَا ذ إِجّْ عْلَاحْسَابْ أَرِّيمثْ ثَامذْنُوبْثْ. مَاڒَا ثُوغَا نسّنْ لْمَاسِيحْ عْلَاحْسَابْ أَرِّيمثْ، ڒخْذنِّي وَارْ إِتِّيڒِي عَاذْ نسّنْ ث أَمُّو ڒخُّو. ^▪  

‏17 س ؤُينِّي مَاڒَا حذْ ذِي لْمَاسِيحْ إِ إِدْجْ، أَقَا نتَّا إِتّْوَاخْڒقْ-د جْذِيذْ. خنِّي مِينْ إِدْجَانْ ذ أَقْذِيمْ إِعْذُو. ^▪  

‏18 مَارَّا إِذْوڒْ ذ جْذِيذْ س أَربِّي ونِّي ذ أَنغْ إِسّصْڒحْ أَكِيذسْ س لْمَاسِيحْ ؤُشَا إِوْشْ أَنغْ ثَاسخَّارْثْ ن وصْڒَاحْ، ^▪  

‏19 مِينْزِي أَربِّي ثُوغَا إِسّصْڒحْ دُّونشْثْ أَكْ-ذ ڒمْغَارثْ نّسْ ذِي لْمَاسِيحْ ذِي مَانِي وَارْ ذ أَسنْ إِحْسِيبْ شَا إِخطَّانْ نْسنْ ؤُشَا إِسَّارْسْ ذَايْنغْ أَوَاڒْ ن وصْڒَاحْ. ^▪  

‏20 أَمُّو إِ ندْجْ ذ إِمْسكَّانْ ن لْمَاسِيحْ، أَخْمِي خَاومْ د-إِڒَاغَا أَربِّي زَّايْنغْ. س يِيسمْ ن لْمَاسِيحْ نتّْڒَاغَا خَاومْ: ”رُوحمْ أَذْ ثتّْوَاصڒْحمْ أَكْ-ذ أَربِّي!“ ^▪   ‏21 مَاغَارْ ونِّي وَارْ إِسِّيننْ شَا دّنْبْ، إِڭَّا إِ-ث ذ دّنْبْ إِ كنِّيوْ، حِيمَا أَذْ نذْوڒْ ذ ثَاسڭْذَا ن أَربِّي ذَايسْ. ^▪