ڒْكنْزْ ذِي ڒقْشُوعْ ن ثْڒَاخْثْ
4
1 س ؤُينِّي ثَاسخَّارْثْ إِ ذ أَنغْ إِتّْوَاڭّنْ وَارْ ذ أَنغْ ثسِّيحڒْ شَا، زِي سِّيبّثْ ن أَرّحْمثْ إِ خَانغْ إِدْجَانْ. 2 مَاشَا أَقَا ننْضَارْ ثِيمسْڒَايِينْ إِنُّوفَارنْ إِسّحْشِيمنْ، وَارْ نڭُّورْ شَا س ثحْرَايْمشْثْ ؤُ عَاوذْ وَارْ نتّْژُووَّارْ شَا أَوَاڒْ ن أَربِّي، مَاشَا أَقَا نسَّارْڭبْ إِخفْ نّغْ أَمْ نَارزّمْ ثَاوَّارْثْ ن ثِيذتّْ إِ قَاعْ ثَانفْسشْثْ ن إِوْذَانْ زَّاثْ إِ أَربِّي. ▪ 3 مَاشَا مَاڒَا ڒخْبَارْ أَصبْحَانْ نّغْ عَاذْ إِڒحّفْ، أَقَا إِتّْڒحَّافْ إِ ينِّي إِ غَا إِودَّارنْ، ▪ 4 إِ ينِّي إِسّْذَارْغڒْ أَسنْ أَربِّي ن دُّونشْثْ-أَ ڒعْقڒْ نْسنْ، حِيمَا خنِّي وَارْ خَاسنْ ثَارقّْ طّْيَا ن ڒخْبَارْ أَصبْحَانْ ن ؤُعُودْجِي ن لْمَاسِيحْ ونِّي إِدْجَانْ ذ صِّيفثْ ن أَربِّي. ▪
5 مِينْزِي وَارْ نتّْبَارّحْ شَا إِخفْ نّغْ، مَاشَا لْمَاسِيحْ يشُّو، سِيذِيثْنغْ، مَاشَا نشِّينْ س إِخفْ نّغْ ذ إِمْسخَّارنْ نْومْ ذِي طّْوعْ ن يشُّو. 6 مِينْزِي أَربِّي ذ ونِّي إِنَّانْ: ”أَذْ ثَارقّْ ثْفَاوْثْ زِي ثَادْجسْثْ!“، أَقَا ذ ونِّي إِسّْرُوغَانْ ؤُڒَاونْ نّغْ، حِيمَا أَذْ أَنغْ إِسَّارْغْ س ثُوسّْنَا ن ؤُعُودْجِي ن أَربِّي ذڭْ وُوذمْ ن يشُّو لْمَاسِيحْ. ▪
7 مَاشَا غَارْنغْ ڒْكنْزْ-أَ ذِي ڒقْشُوعْ ن ثْڒَاخْثْ، حِيمَا خنِّي ڒمْغَارثْ ن جّهْذْ أَذْ ثِيڒِي ن أَربِّي، وَارْ ثدْجِي زَّايْنغْ. ▪ 8 مَاغَارْ نتّْوَازِييَّارْ ذِي مَارَّا، مَاشَا وَارْ نتّْوَاجيّفْ، أَقَا شَّاثنْ أَنغْ، مَاشَا وَارْ نتّْوَاحْكمْ شَا. 9 نتّْوَاذَارّشْ، مَاشَا وَارْ نتّْوَاسْمحْ، أَقَا نمّنْضَارْ، مَاشَا وَارْ نتّْوَاهلّكْ.
10 أَقَا نَاربُّو ڒْموْثْ ن يشُّو ڒبْذَا ذِي أَرِّيمثْ، حِيمَا ؤُڒَا ذ ثُوذَارْثْ ن يشُّو أَذْ ثتّْوَاسضْهَارْ ذِي أَرِّيمثْ نّغْ. ▪
11 مِينْزِي مَاڒَا نشِّينْ، إِنِّي إِدَّارنْ، أَقَا نتّْوَاسلّمْ إِ ڒْموْثْ ذِي طّْوعْ ن يشُّو، أَذْ ثسّضْهَارْ ؤُڒَا ذ ثُوذَارْثْ ن يشُّو ذِي أَرِّيمثْ نّغْ إِتّْمتَّانْ. ▪
12 أَمُّو خنِّي ثْخدّمْ ڒْموْثْ ذَايْنغْ، مَاشَا ثُوذَارْثْ ذَايْومْ.
13 أَمْ غَارْنغْ أَرُّوحْ ن لْ-إِيمَانْ ذ إِجّْ أَمْ مَامّشْ ثُورَا: ”أَقَا ؤُمْنغْ، خْ ؤُينِّي سِّيوْڒغْ!“، أَقَا نتَّامنْ نشِّينْ عَاوذْ، خْ ؤُينِّي نسَّاوَاڒْ عَاوذْ، ▪
14 ؤُشَا نسّنْ بلِّي ونِّي د-إِسّْنكَّارنْ سِيذِيثْنغْ يشُّو، أَذْ أَنغْ د-إِسّْنكَّارْ عَاوذْ أَكْ-ذ يشُّو ؤُشَا أَذْ أَنغْ إِڭّْ أَكِيذْومْ زَّاثسْ. ▪
15 مِينْزِي مَارَّا ثِيمسْڒَايِينْ-أَ تّْوَاڭّنْثْ ذِي طّْوعْ نْومْ، حِيمَا أَذْ يَارْنِي أَرْضَا إِ وَاطَّاسْ، ؤُشَا أَذْ إِذْوڒْ ؤُفيّضْ ن ؤُقَاذِي إِ ؤُعُودْجِي ن أَربِّي. ▪
16 س ؤُينِّي وَارْ نْخسَّارْ شَا ؤُڒَاونْ، وَاخَّا أَمنِّي بْنَاذمْ نّغْ ن بَارَّا إِتّْوَاهلّكْ، أَقَا بْنَاذمْ ن ذَاخڒْ إِدَّاكّْوَاڒْ ذ جْذِيذْ زڭْ وَاسّْ غَارْ ونّغْنِي.
17 مَاغَارْ ڒْمحْنثْ إِفْسُوسنْ ذ ذْرُوسْ ن ڒْوقْثْ-أَ، ثتَّاوِي أَنغْ-د إِجّْ ن ڒْقدّْ ن ؤُعُودْجِي إِ وَارْ غَارسْ إِدْجِي ؤُنڭَّارْ إِ ڒبْذَا قَاعْ. ▪
18 مَاغَارْ وَارْ نْفَارّحْ شَا زِي مِينْ إِتّْوَاڒَانْ مَاشَا زِي مِينْ وَارْ إِتّْوِيڒِينْ، مِينْزِي مِينْ إِتّْوَاڒَانْ أَقَا إِ يِيشْثْ ن ڒْوقْثْ وَاهَا، مَاشَا مِينْ وَارْ إِتّْوِيڒِينْ أَقَا-ث إِ ڒبْذَا.