‏1 أَقَا نشِّينْ، أَمْ إِمْعَاوْننْ، نْزَاوڭْ كنِّيوْ حِيمَا أَرْضَا ن أَربِّي إِ ثطّْفمْ، وَارْ ذَايْومْ إِتّْوَاسّْبطّڒْ شَا، ^▪   ‏2 مِينْزِي إِنَّا:

”ذِي ڒْوقْثْ ن أَرْضَا سْڒِيغْ أَشْ،

ؤُشَا ذڭْ وَاسّْ ن ؤُسنْجمْ عَاوْنغْ شكْ!“

خْزَارْ، أَقَا ذَا ڒخُّو ذ ڒْوقْثْ ن أَرْضَا، خْزَارْ، أَقَا ذَا ڒخُّو ذ أَسّْ ن ؤُسنْجمْ. ^▪  

‏3 مَايمِّي إِ غَا ثوْشذْ تَّاسِيعْ إِ شَا ن يِيجّنْ ذِي شَا مَاحنْذْ أَذْ زَّايسْ إِنْقَارْضْ؟ إِتّْخصَّا وَارْ ذِينْ إِتِّيڒِي شَا ن ڒْعِيبْ ذِي ثْسخَّارْثْ نّغْ، ^▪   ‏4 مَاشَا ذِي مَارَّا نتّْوصَّا إِخفْ نّغْ أَمشْنَاوْ إِمْسخَّارنْ ن أَربِّي: ذڭْ وَاطَّاسْ ن ضّْبَارْ، ذِي ڒْمحْنثْ، ذِي ڒغْبنْ، ذِي ڒحْپُوسَاثْ، ^▪   ‏5 سَاذُو ثِييِّيثَا، ذِي سّْنَاسڒْ، ذڭْ ؤُغُووّغْ، ذِي ثَامَارَا، ذِي دْجْيَاڒِي بْڒَا إِضصْ، ذڭْ وُوسَّانْ ن ؤُژُومِّي، ‏6 ذِي ڒصْفَايثْ، ذِي ثُوسّْنَا، ذِي تَّاسِيعْ ن ڒْخَاضَارْ، ذِي ڒضْرَافثْ، ذِي أَرُّوحْ إِقدّْسنْ، ذِي ثَايْرِي بْڒَا نِّيفَاقْ، ‏7 س وَاوَاڒْ ن ثِيذتّْ، ذِي جّهْذْ ن أَربِّي، س ڒسْنَاحْ ن ثْسڭْذَا غَارْ ؤُفُوسِي ذ ؤُزڒْمَاضْ، ‏8 س ؤُعُودْجِي ذ دّدْجْ، س شّنْعثْ ثَاصبْحَانْثْ ؤُ س شّنْعثْ ثَاعفَّانْثْ، أَمْ إِغشَّاشنْ، وَاخَّا أَمنِّي ذ إِمْثِيقَّانْ، ‏9 أَخْمِي وَارْ نتّْوِيسّنْ، وَاخَّا نتّْوَاسّنْ، أَخْمِي نتّْمتَّا، ؤُ خْزَارْ، أَقَا ندَّارْ، أَخْمِي نتّْوَاعَاقبْ مَاشَا وَارْ نتّْمتِّي شَا، ^▪  

‏10 أَخْمِي نشِّينْ نفُّوڭمْ، مَاشَا نْفَارْحْ ڒبْذَا، أَخْمِي نزْڒضْ، وَاخَّا أَمنِّي نتّجَّارْ أَطَّاسْ، ؤُشَا أَخْمِي وَارْ غَارْنغْ شَا، وَاخَّا غَارْنغْ كُوڒْشِي.

‏11 أَقمُّومْ نّغْ إِنُّورْزمْ إِ كنِّيوْ، أَ إِكُورِينْثِييّنْ، ؤُڒْ نّغْ إِمْغَارْ أَطَّاسْ.

‏12 كنِّيوْ وَارْ ثتّْوَاحْصَارمْ زَّايْنغْ، مَاشَا ثتّْوَاحْصَارمْ س مِينْ إِدْجَانْ ذِي ذَاخڒْ نْومْ.

‏13 مَاشَا ڒخُّو أَذْ سِّيوْڒغْ أَخْمِي سَّاوَاڒغْ أَكْ-ذ إِحنْجِيرنْ: أَرّمْ أَيِي-د س مِينْ ثتُّورْسمْ ؤُ سْوسّْعمْ ثَايْرِي نْومْ إِ نشّْ! ^▪  

‏14 وَارْ تّْمُونمْ شَا ذڭْ ؤُزَايْڒُو أَكْ-ذ لْكُوفَّارْ، مَاغَارْ مَانْ أَشْرَاشْ إِ غَارْ ثدْجْ غَارْ ثْسڭْذَا أَكْ-ذ ثُوعفّْنَا، ؤُ مَانْ ثَامُونْثْ إِ غَارْ ثدْجْ إِ ثْفَاوْثْ أَكْ-ذ ثَادْجسْثْ؟ ^▪  

‏15 نِيغْ، مَانْ أَرْوَاسْ إِ ذِي جَارْ لْمَاسِيحْ ذ شِّيطَانْ؟ نِيغْ مَانْ ثَاسْغَارْثْ ن ڒْمُومنْ أَكْ-ذ ؤُكَافْرِيوْ؟

‏16 نِيغْ مَانْ ثَاسْغُونْثْ إِ ذِينْ جَارْ زَّاوشْثْ ن أَربِّي ذ شّْوَاطنْ؟ أَقَا كنِّيوْ ذ زَّاوشْثْ ن أَربِّي إِدَّارنْ، أَمْ مَامّشْ إِنَّا أَربِّي:

”نشّْ أَذْ زذْغغْ أَكِيذْسنْ ؤُشَا أَذْ ؤُيُورغْ جَارْ أَسنْ.

نشّْ أَذْ إِڒِيغْ ذ أَربِّي نْسنْ، نِيثْنِي أَذْ إِڒِينْ ذ ڒْڭنْسْ إِنُو. ^▪  

‏17 س ؤُينِّي، فّْغمْ-د زِي ڒْوسْثْ نْسنْ،

بْضَامْ خَاسنْ، إِقَّارْ سِيذِي.

وَارْ تّْحَاذَامْ مِينْ إِنڭْسنْ،

ؤُ نشّْ أَذْ كنِّيوْ قبْڒغْ. ^▪  

‏18 نشّْ أَذْ أَومْ إِڒِيغْ ذ بَابَاثْومْ،

كنِّيوْ أَذْ أَيِي ثِيڒِيمْ ذ إِحنْجِيرنْ ذ ثْحنْجِيرِينْ،

إِقَّارْ سِيذِي، ونِّي ذ أَمْزمَّارْ خْ كُوڒْشِي.“ ^▪