ثُوذَارْثْ س أَرُّوحْ إِقدّْسنْ
8
1 خنِّي وَارْ ذِينِّي بُو لْحِيسَابْ ڒخُّو خْ ينِّي ذِي يشُّو لْمَاسِيحْ، إِنِّي إِڭُّورنْ وَارْ إِدْجِي ذڭْ وبْرِيذْ ن أَرِّيمثْ ثَامذْنُوبْثْ. 2 مِينْزِي شَّارِيعَا ن أَرُّوحْ ن ثُوذَارْثْ ذِي يشُّو لْمَاسِيحْ، أَقَا ثْفكّْ أَشْ زِي شَّارِيعَا ن دّنْبْ ذ ڒْموْثْ. ▪ 3 مِينْزِي مِينْ وَارْ ثْزمَّارْ شَّارِيعَا مَاغَارْ ثُوغَا ثضْعفْ س أَرِّيمثْ إِفنَّانْ، أَربِّي أَمْ د-إِسّكّْ مِّيسْ ذِي أَرِّيمثْ يَاروْسنْ ذِي دّنْبْ، ؤُشَا مَانْ أَيَا خْ سِّيبّثْ ن دّنْبْ، أَقَا إِحَاسبْ دّنْبْ ذِي أَرِّيمثْ، ▪ 4 حِيمَا أَذْ ذَايْنغْ ثتّْوَاكمّڒْ ثَاسڭْذَا ن شَّارِيعَا، ذڭْ إِنِّي إِڭُّورنْ وَارْ إِدْجِي ذڭْ وبْرِيذْ ن أَرِّيمثْ ثَامذْنُوبْثْ مَاشَا ذڭْ وبْرِيذْ ن أَرُّوحْ. 5 مِينْزِي إِنِّي إِدْجَانْ ذِي أَرِّيمثْ ثَامذْنُوبْثْ تّڭّنْ نّيّثْ نْسنْ ذِي أَرِّيمثْ ثَامذْنُوبْثْ، مَاشَا إِنِّي ن أَرُّوحْ تّڭّنْ ت ذِي أَرُّوحْ. ▪ 6 مِينْزِي نّيّثْ ن أَرِّيمثْ ثَامذْنُوبْثْ ذ ڒْموْثْ، مَاشَا نّيّثْ ن أَرُّوحْ ذ ثُوذَارْثْ ذ ڒهْنَا. 7 مِينْزِي نّيّثْ ن أَرِّيمثْ ثَامذْنُوبْث ذ ڒعْذَاوَاثْ إِ أَربِّي مِينْزِي وَارْ ثتّڭّْ شَا أَرَّايْ إِ شَّارِيعَا ن أَربِّي، مَاغَارْ وَارْ ذ أَسْ ثْزمَّارْ. 8 إِنِّي إِدْجَانْ ذِي أَرِّيمثْ ثَامذْنُوبْثْ وَارْ إِزمَّارنْ أَذْ أَرْضَانْ أَربِّي. 9 مَاشَا كنِّيوْ وَارْ ثدْجِيمْ شَا ذِي أَرِّيمثْ ثَامذْنُوبْثْ، مَاشَا ذِي أَرُّوحْ مَاڒَا إِزْذغْ ذَايْومْ أَرُّوحْ ن أَربِّي. مَاشَا مَاڒَا حذْ وَارْ غَارسْ بُو أَرُّوحْ ن لْمَاسِيحْ، ذ ونِّي وَارْ إِتِّيڒِي نّسْ. ▪
10 مَاڒَا ذَايْومْ لْمَاسِيحْ، أَقَا أَرِّيمثْ ثَامذْنُوبْثْ ثمُّوثْ زِي سِّيبّثْ ن دّْنُوبْ، مَاشَا أَرُّوحْ إِدَّارْ زِي سِّيبّثْ ن ثْسڭْذَا.
11 مَاڒَا أَرُّوحْ ن ونِّي د-إِسّْنكَّارنْ يشُّو زِي ثَادَّارْثْ ن إِمتِّيننْ إِزْذغْ ذَايْومْ، أَقَا ونِّي د-إِسّْنكَّارنْ لْمَاسِيحْ زڭْ إِمتِّيننْ أَذْ إِسّدَّارْ عَاوذْ أَرِّيمَاثْ نْومْ إِفنَّانْ س أَرُّوحْ نّسْ إِ إِزدّْغنْ ذَايْومْ. ▪
12 خنِّي، أَ أَيْثْمَا، نشِّينْ س ؤُمَارْوَاسْ، وَارْ إِدْجِي إِ أَرِّيمثْ ثَامذْنُوبْثْ حِيمَا أَذْ ندَّارْ خْ ڒحْسَابْ ن أَرِّيمثْ ثَامذْنُوبْثْ،
13 مِينْزِي مَاڒَا ثدَّارمْ خْ ڒحْسَابْ ن أَرِّيمثْ ثَامذْنُوبْثْ، أَذْ ثمْثمْ، مَاشَا مَاڒَا ثنْغِيمْ ڒخْذَايمْ ن أَرِّيمثْ س أَرُّوحْ، أَذْ ثدَّارمْ.
14 مِينْزِي مَارَّا إِنِّي إِتّْوَانذْهنْ س أَرُّوحْ ن أَربِّي، نِيثْنِي ذ أَرَّاوْ ن أَربِّي. ▪
15 مِينْزِي كنِّيوْ وَارْ ثكْسِيمْ شَا أَرُّوحْ ن ثسْمُوغِي ونِّي كنِّيوْ إِ غَا يَارّنْ ذ إِسمْغَانْ حِيمَا أَذْ زَّايسْ ثڭّْوذمْ عَاوذْ، مَاشَا أَقَا ثكْسِيمْ أَرُّوحْ إِ زِي نتّْوَاقْبڒْ ذ أَرَّاونْ، إِ زِي نتّْڒَاغَا: ’ثَابَابَاثْ، بَابَاثْنغْ!‘ ▪
16 أَرُّوحْ نِّي سِيمَانْثْ نّسْ إِشهّذْ أَكْ-ذ أَرُّوحْ نّغْ بلِّي نشِّينْ ذ أَرَّاونْ ن أَربِّي. ▪
17 مَاڒَا نشِّينْ ذ أَرَّاونْ، أَقَا أَنغْ عَاوذْ ذ إِوْرِيثنْ، إِوْرِيثنْ ن أَربِّي ذ إِوْرِيثنْ أَكْ-ذ يشُّو لْمَاسِيحْ، مَاغَارْ مَاڒَا نْودّبْ أَكِيذسْ، أَذْ نتّْوَاعُودْجِي أَكِيذسْ عَاوذْ. ▪
أَعُودْجِي إِ د غَا يَاسنْ
18 أَقَا حسّْبغْ أَودّبْ إِ خَانغْ إِتّكّنْ إِضَا، وَارْ إِسْذِيهدْجْ شَا أَذْ إِتّْوَاعْبَارْ س ؤُعُودْجِي إِ د غَا إِتّْوَاسّضْهَارنْ ذَايْنغْ. ▪
19 مِينْزِي مَارَّا مِينْ د-إِتّْوَاخڒْقنْ إِخزَّارْ س ؤُسِيثمْ ذ ؤُرَاجِي غَارْ ؤُسَارْڭبْ ن وَارَّاونْ ن أَربِّي. 20 مِينْزِي مَارَّا مِينْ د-إِتّْوَاخڒْقنْ أَقَا إِتّْوَاڭّْ ذِي ڒْبَاطڒْ، وَارْ إِدْجِي س ڒْخَاضَارْ، مَاشَا زِي سِّيبّثْ ن ونِّي ث إِڭِّينْ سَاذُو، 21 س ؤُسِيثمْ بلِّي ؤُڒَا ذ مَارَّا مِينْ د-إِتّْوَاخڒْقنْ أَذْ إِتّْوَافكّْ سِيمَانْثْ نّسْ عَاوذْ زِي ثسْمُوغِي إِ ڒْغشّْ غَارْ ثِيڒلِّي ن ؤُعُودْجِي ن وَارَّاونْ ن أَربِّي. 22 أَقَا نسّنْ بلِّي مَارَّا مِينْ د-إِتّْوَاخڒْقنْ إِزهَّارْ جْمِيعْ س ؤُنزْبَارْ ن ثَارْوَا أَڒْ أَسّْ-أَ.
23 وَارْ إِدْجِي نِيثْنِي وَاهَا، مَاشَا ؤُڒَا ذ نشِّينْ إِنِّي غَارْ ثدْجْ ذَايْنغْ ثْمنْزُوثْ ن أَرُّوحْ، نْزهَّارْ عَاوذْ ذڭْ إِخفْ نّغْ، نتّْرَاجَا أَذْ نتّْوَاقْبڒْ ذ مِّيسْ ؤُ مَاحنْذْ أَذْ نتّْوَافكّْ زِي أَرِّيمثْ نّغْ. ▪ 24 س ؤُينِّي ندَّارْ ذڭْ ؤُسِيثمْ نِّي. مَاشَا أَسِيثمْ إِتّْبَاننْ وَارْ إِدْجِي ذ أَسِيثمْ، مِينْزِي مِينْ إِتّْبَاننْ إِ حذْ، مَامّشْ إِ غَا يڭّْ أَذْ ذَايسْ إِسِّيثمْ عَاذْ؟ 25 مَاشَا مَاڒَا نسِّيتِّيمْ ذِي مِينْ وَارْ نتّْوِيڒِي، أَقَا نتّْرَاجَا ث س ضّْبَارْ. 26 ذِي مَانْ أَيَا إِتِّيعَاوَانْ أَنغْ أَرُّوحْ عَاوذْ مَانِي نضْعفْ، مِينْزِي وَارْ نسِّينْ شَا مَامّشْ ذ أَنغْ إِ غَا إِشُووَّارْ أَذْ نژَّادْجْ، مَاشَا أَرُّوحْ سِيمَانْثْ نّسْ إِتّْژَادْجْ ذِي طّْوعْ نّغْ س زّْهِيرْ وَارْ إِنطْقنْ. ▪
27 مَاشَا ونِّي إِتّْبقّْشنْ ذڭْ وُوڒَاونْ إِسّنْ مِينْ إِدْجَانْ ذ نّيّثْ ن أَرُّوحْ، أَقَا إِتّْژَادْجْ ذِي طّْوعْ ن إِمْقدَّاسنْ أَمْ مَامّشْ ث إِخْسْ أَربِّي. 28 نشِّينْ نسّنْ أَقَا أَربِّي إِعَاونْ إِنِّي إِتّخْسنْ ذِي كُوڒْشِي، أَقَا إِنِّي إِتّْوَاڒَاغَانْ عْلَاحْسَابْ مِينْ إِخْسْ نتَّا. 29 مِينْزِي إِنِّي إِزْوَارْ إِسّنْ إِ-ثنْ، أَقَا إِزْوَارْ إِعدْجمْ إِ-ثنْ حِيمَا أَذْ أَرْوسنْ ذِي صِّيفثْ ن مِّيسْ حِيمَا أَذْ يِيڒِي نتَّا ذ أَمنْزُو جَارْ وَاطَّاسْ ن وَاوْمَاثنْ. ▪ 30 ؤُشَا إِنِّي نتَّا إِزَّارْ إِعدْجمْ إِ-ثنْ، أَقَا ذ إِنِّي خْ ذ إِڒَاغَا عَاوذْ، ؤُ إِنِّي خْ ذ إِڒَاغَا، أَقَا ذ إِنِّي إِسڭّذْ عَاوذْ، ؤُ إِنِّي إِسڭّذْ أَقَا ذ إِنِّي إِسّْعُودْجْ عَاوذْ.
ثَايْرِي ن لْمَاسِيحْ
31 مِينْ إِ غَا نِينِي خنِّي ذِي مَانْ أَيَا؟ مَاڒَا أَربِّي أَكِيذْنغْ وِي ذ أَنغْ إِ غَا إِضَادّنْ؟ ▪ 32 ونِّي وَارْ إِشطَّارنْ شَا خْ مِّيسْ مَاشَا إِوْشَا إِ-ث ذِي طّْوعْ نّغْ مَارَّا، مَايمِّي وَارْ ذ أَنغْ إِتِّيشْ كُوڒْشِي أَكْ-ذ مِّيسْ عَاوذْ؟ ▪ 33 وِي إِ غَا إِكْسِينْ ثَانْفُوتْشْ إِ ينِّي إِتّْوَافَارْزنْ زِي أَربِّي؟ أَربِّي ذ ونِّي إِتّْسڭَّاذنْ. ▪ 34 وِي إِ غَا إِقْضَانْ ڒْحُوكْمْ؟ لْمَاسِيحْ إِمُّوثْ ؤُ إِكَّارْ-د ؤُ نتَّا إِقِّيمْ غَارْ ؤُفُوسِي ن أَربِّي ؤُ إِتّْژَادْجْ إِ نشِّينْ. ▪ 35 مِينْ ذ أَيِي غَا إِبْضَانْ خْ ثَايْرِي ن لْمَاسِيحْ؟ مَا ڒْمحْنثْ نِيغْ ڒْحبْسْ نِيغْ أَذَارّشْ نِيغْ ڒَاژْ نِيغْ ثُوعَارْينْثْ نِيغْ لْخَاطَارْ نِيغْ سِّيفْ؟ 36 أَمْ مَامّشْ ثُورَا:
”أَقَا خْ سِّيبّثْ نّكْ نتّْوَانغْ كُوڒْ أَسّْ،
نتّْوَاحْسبْ أَمشْنَاوْ إِحُوڒِييّنْ إِ ثْغَارْصْثْ.“ ▪
37 مَاشَا ذِي مَانْ أَيَا مَارَّا نذْوڒْ كْثَارْ زڭْ إِنِّي إِغلّْبنْ س ونِّي ذ أَنغْ إِخْسنْ. 38 أَقَا نشّْ تّْوَاسْقنْعغْ بلِّي نِيغْ ڒْموْثْ نِيغْ ثُوذَارْثْ نِيغْ لْمَالَاكَاثْ نِيغْ ڒْحُوكَّامْ نِيغْ صُّولَاطَاثْ نِيغْ مِينْ ن يِيضَا نِيغْ مِينْ إِ د غَا يَاسنْ 39 نِيغْ ڒُوعْڒَا نِيغْ رَادْجَاغْ نِيغْ ؤُڒَا ذ إِشْثْ ن ڒْحَاجّثْ نّغْنِي زِي مِينْ د-إِتّْوَاخڒْقنْ ثْزمَّارْ أَذْ أَيِي ثبْضَا خْ ثَايْرِي ن أَربِّي ثنِّي ذِي سِيذِيثْنغْ، يشُّو لْمَاسِيحْ.