‏1 قَّارغْ ثِيذتّْ ذِي لْمَاسِيحْ، وَارْ سّْخَارِّيقغْ شَا، ؤُشَا ثَانفْسشْثْ إِنُو ثْشهّذْ ذَايِي س أَرُّوحْ إِقدّْسنْ، ^▪   ‏2 بلِّي غَارِي أَشْضَانْ إِمْغَارْ ذ ڒحْرِيقْ وَارْ إِتّْبذِّي ذڭْ وُوڒْ إِنُو. ‏3 أَقَا ثُوغَا تّْژَادْجِيغْ مَاعْلِيكْ ؤُفِيغْ سِيمَانْثْ إِنُو تّْوَاحَارّْمغْ زِي لْمَاسِيحْ ذِي طّْوعْ ن وَاوَامَاثنْ إِنُو، ڒَادْجْ إِنُو زِي جِّيهثْ ن أَرِّيمثْ. ^▪   ‏4 نِيثْنِي ذ إِسْرَائِيل إِيّنْ، تّْوَاقبْڒنْ ذ مِّيسْ، غَارْسنْ إِ إِدْجْ ؤُعُودْجِي، ڒْعُوهُوذْ، شَّارِيعَا، ثَاسخَّارْثْ إِ ذَايسْ إِدْجَانْ ذِي زَّاوشْثْ إِقدّْسنْ، لْوُوعُوذْ ذ ڒجْذُوذْ. ^▪   ‏5 زَّايْسنْ إِ-د إِبَانْ لْمَاسِيحْ خْ وبْرِيذْ ن أَرِّيمثْ، ونِّي ذ أَربِّي خْ مَارَّا. إِ نتَّا إِ غَا يِيڒِي ؤُسمْغَارْ ذ لْبَارَاكَاثْ، إِ ڒبْذَا قَاعْ. أَمِينْ! ^▪  

‏6 مَاشَا وَارْ إِدْجِي أَمُّو أَڒَامِي ؤُڒَا ذ أَوَاڒْ ن أَربِّي وَارْ يِيوِيضْ، مِينْزِي مَارَّا إِنِّي زِي إِسْرَائِيل وَارْ دْجِينْ شَا ذ إِسْرَائِيل. ^▪   ‏7 ؤُڒَا ذ مَارَّا نِيثْنِي وَارْ دْجِينْ شَا ذ ثَارْوَا ن إِبْرَاهِيمْ، مِينْزِي نِيثْنِي زِي زَّارِيعثْ ن إِبْرَاهِيمْ، مَاشَا إِتّْوَانَّا: ”ذِي إِسْحَاقْ أَذْ أَشْ ڒَاغَانْ زَّارِيعثْ.“ ^▪   ‏8 مَانْ أَيَا إِخْسْ أَذْ يِينِي خنِّي مَاشِي ثَارْوَا عْلَاحْصَابْ أَرِّيمثْ إِدْجَانْ ذ ثَارْوَا ن أَربِّي، مَاشَا ثَارْوَا ن لْوَاعْذْ أَذْ تّْوَاحسْبنْ ذ زَّارِيعثْ. ^▪   ‏9 مِينْزِي أَوَاڒْ ن لْوَاعْذْ ذ وَا:

”غَارْ ڒْوقْثْ-أَ أَذْ د-أَسغْ

ؤُشَا أَذْ غَارسْ يِيڒِي غَارْ سَارَا مِّيسْ!“ ^▪  

‏10 وَارْ ثدْجِي ثَانِيثَا وَاهَا، مَاشَا ؤُڒَا ذ رِيفْقَا ؤُمِي ثطّسْ أَكْ-ذ جذِّيثغْ إِسْحَاقْ. ^▪  

‏11 مِينْزِي ؤُمِي عَاذْ وَارْ د-خْڒِيقنْ إِحنْجِيرنْ نّسْ، وَارْ ڭِّينْ عَاذْ ڒْخَارْ ؤُڒَا ذ ڒْغَارْ، أَقَا إِتّْوَاسَّارْڭبْ قْبڒْ ڒِيخْضَارثْ ن أَربِّي، حِيمَا وَارْ ثتِّيڒِي ذڭْ وبْرِيذْ ن ڒخْذَايمْ مَاشَا ذڭْ وبْرِيذْ ن ونِّي إِتّْڒَاغَانْ.

‏12 مَاغَارْ إِتّْوَانَّا ذِي ثِيرَا إِقدّْسنْ:

”أَقَا أَمقّْرَانْ أَذْ إِسخَّارْ إِ ؤُمژْيَانْ!“، ^▪  

‏13 أَمْ مَامّشْ ثُورَا:

”يَاعْقُوبْ إِ خْسغْ، مَاشَا شَارْهغْ إِسُو.“ ^▪  

‏14 مِينْ إِ غَا نِينِي خنِّي؟ مَا إِقدّْ أَذْ يِيڒِي غَارْ أَربِّي مِينْ وَارْ إِسڭّْذنْ؟ عمَّارْصْ! ^▪  

‏15 خْزَارْ، نتَّا إِنَّا عَاوذْ إِ مُوسَا:

”أَذْ أَرحْمغْ وِي خْسغْ، أَذْ أَرحْمغْ،

ؤُشَا أَذْ حِينّغْ وِي خْسغْ أَذْ خَاسْ حِينّغْ.“ ^▪  

‏16 خنِّي ثَامسْڒَاشْثْ وَارْ ثقِّيمْ شَا غَارْ وِي إِتّخْسنْ ؤُڒَا غَارْ وِي إِتَّازّْڒنْ، مَاشَا غَارْ أَربِّي ونِّي يَارحّْمنْ.

‏17 مِينْزِي عْلَاحْسَابْ ثِيرَا إِقدّْسنْ نتَّا إِنَّا إِ فِيرْعُونْ:

”أَقَا إِ مَانْ أَيَا سّْنكَّارغْ-د شكْ،

حِيمَا أَذْ زَّايكْ سّشْنغْ جّهْذْ إِنُو

ؤُشَا أَذْ إِتّْوَابَارّحْ إِسمْ إِنُو ذِي مَارَّا دُّونشْثْ.“ ^▪  

‏18 خنِّي نتَّا أَذْ يَارْحمْ وِي إِخْسْ ؤُشَا أَذْ إِسّقْسحْ وِي إِخْسْ.

‏19 ڒخُّو أَذْ ثِينِيذْ: مَايمِّي إِتّْشثْشَا عَاذْ، مِينْزِي وِي إِ غَا إِمّْعَاڒَانْ أَكْ-ذ مِينْ إِخْسْ نتَّا؟

‏20 مَاشَا مِينْ ثعْنِيذْ شكْ، أَ بْنَاذمْ، ونِّي إِتّْقَاشَاحنْ أَربِّي؟ مَا مِينْ إِتّْوَاڭّنْ إِزمَّارْ أَذْ إِنِي إِ ونِّي ث إِڭِّينْ: ”مَايمِّي ذ أَيِي ثڭِّيذْ أَمُّو؟“ ^▪  

‏21 مَا وَارْ إِدْجِي غَارْ بُو-ثْڒَاخْثْ صُّولْطَا خْ ثْڒَاخْثْ حِيمَا أَذْ إِڭّْ زڭْ إِشْثْ ن ڒْعجْنثْ إِشْثْ ن ڒْقشْعثْ إِ لْكَارَامَا ؤُ ونّغْنِي إِ ؤُبهْذڒْ؟ ^▫  ▪   ‏22 مَاغَارْ أَربِّي، ونِّي ثُوغَا إِخْسْ أَذْ إِسّْشنْ أَغْضَابْ نّسْ ذ جّهْذْ نّسْ، إِسِّيوضْ لْغَاضَابْ نّسْ س وَاطَّاسْ ن تَّاسِيعْ ن ڒْخَاضَارْ خْ ڒقْشُوعْ ن وغْضَابْ إِنِّي إِتّْوَاسّْوجْذنْ مَارَّا إِ ؤُهلّكْ، ‏23 ؤُشَا إِفَارْغْ ثَايْرِي نّسْ خْ ڒقْشُوعْ ن أَرّحْمثْ إِنِّي إِزْوَارْ إِسّوْجذْ إِ-ثنْ إِ ؤُعُودْجِي إِ أَربِّي! ‏24 مَاغَارْ نشِّينْ ذ إِنِّي إِتّْوَاڒَاغَانْ، وَارْ إِدْجِي زڭْ وُوذَاينْ وَاهَا، مَاشَا عَاوذْ زِي ڒڭْنُوسْ. ‏25 أَمشْنَاوْ مَامّشْ إِتّْوَانَّا عَاوذْ ذِي حُوشِيعَا:

”أَذْ سمِّيغْ إِ ينِّي وَارْ إِدْجِينْ ذ ڒْڭنْسْ إِنُو ’ڒْڭنْسْ إِنُو!‘،

ؤُشَا إِ ينِّي وَارْ إِدْجِينْ ذ أَمْعِيزّْ ذ ’أَمْعِيزّْ!‘ “ ^▪  

‏26 أَذْ يِيڒِي ذڭْ ومْشَانْ مَانِي ذ أَسنْ إِتّْوَاڒَاغَا:

’وَارْ إِدْجِي ذ ڒْڭنْسْ إِنُو!‘،

بلِّي ذِينِّي أَذْ أَسنْ ڒَاغَانْ:

’أَرَّاونْ ن أَربِّي إِدَّارنْ!‘ ^▪  

‏27 إِشَاعْيَا إِبَارّحْ زِي جِّيهثْ ن أَيْثْ ن إِسْرَائِيل:

”مَاڒَا ثُوغَا ڒْقدّْ ن أَيْثْ ن إِسْرَائِيل أَنشْثْ ن إِجْذِي ن ڒبْحَارْ،

أَقَا مِينْ غَا إِقِّيمنْ أَذْ إِنْجمْ.“ ^▪  

‏28 ”ثَامسْڒَاشْثْ ثْبدّْ نِيشَانْ ؤُ أَذْ ثتّْوَاقْفڒْ،

سِيذِي أَذْ ت إِڭّْ خْ ثمُّورْثْ.“ ^▪  

‏29 أَمْ مَامّشْ إِزَّارْ إِشَاعْيَا إِنَّا:

”مَاعْلِيكْ سِيذِي ن ڒْعسْكَارَاثْ ن ؤُجنَّا وَارْ ذ أَنغْ إِجِّي إِنِّي إِقِّيمنْ دَّارنْ،

إِڒِي نذْوڒْ أَمشْنَاوْ سَاذُومْ ؤُ نَارْوسْ ذِي عَامُورَّا.“ ^▪  

‏30 مِينْ إِ غَا نِينِي خنِّي؟ مَا خنِّي ڒڭْنُوسْ إِنِّي وَارْ يَارزُّونْ ثَاسڭْذَا، أَقَا كْسِينْ ثَاسڭْذَا؟ إِوَا، مَاشَا ثَاسڭْذَا ثنِّي س لْ-إِيمَانْ. ‏31 مَاشَا إِسْرَائِيل نِّي إِضفَّارنْ شَّارِيعَا ن ثْسڭْذَا، وَارْ يِيوِيضْ شَا غَارْ شَّارِيعَا ن ثْسڭْذَا. ^▪   ‏32 مَايمِّي؟ مِينْزِي ثَاسڭْذَا نِّي وَارْ ثدْجِي شَا زِي لْ-إِيمَانْ مَاشَا زِي ڒخْذَايمْ ن شَّارِيعَا، مِينْزِي نِيثْنِي نْذرْفنْ ذڭْ وژْرُو ن ؤُنذْرفْ، ‏33 أَمْ مَامّشْ ثُورَا:

”أَقَا أَذْ ڭّغْ ذِي صِيهْيُونْ أَژْرُو إِ ؤُنذْرفْ ذ وژْرُو إِ ؤُنقْڒَاذْ.

مَارَّا وِي زَّايسْ إِ غَا يَامْننْ، وَارْ ڭُّورْ أَذْ إِسّضْحَا.“ ^▪