‏1 مَا وَارْ ثسِّينمْ شَا، أَ أَيْثْمَا، سَّاوَاڒغْ أَكْ-ذ ينِّي إِسّْننْ شَّارِيعَا، أَقَا شَّارِيعَا ثْصدْجضْ خْ بْنَاذمْ مِينْ غَا يكّْ إِدَّارْ؟ ‏2 ثَامْغَارْثْ ثقّنْ غَارْ ورْيَازْ نّسْ س شَّارِيعَا مِينْ غَا يكّْ إِدَّارْ، مَاشَا مَاڒَا إِمُّوثْ ورْيَازْ نّسْ، أَقَا ثتّْوَافكّْ زِي شَّارِيعَا زِي جِّيهثْ ن ورْيَازْ نّسْ. ^▪   ‏3 مَاشَا مَاڒَا ثجَّا إِ-ث إِ ورْيَازْ نّغْنِي، مِينْ غَا يكّْ ورْيَازْ إِدَّارْ، ثتّْوَاسمَّا ثزْنَا. مَاشَا مَاڒَا إِمُّوثْ ورْيَازْ نّسْ، نتَّاثْ غَارسْ ثِيرلِّي زِي شَّارِيعَا أَقَا وَارْ ثزْنِي مَاڒَا ثمْڒشْ أَكْ-ذ ورْيَازْ نّغْنِي. ^▪   ‏4 خنِّي، أَ أَيْثْمَا، كنِّيوْ عَاوذْ أَقَا ثمُّوثمْ إِ شَّارِيعَا س أَرِّيمثْ ن لْمَاسِيحْ، حِيمَا أَذْ ثْذوْڒمْ إِ ونّغْنِي إِ ونِّي د-إِكَّارنْ زِي ثَادَّارْثْ ن إِمتِّيننْ، حِيمَا أَذْ ثوْشمْ ڒْغِيدْجثْ إِ أَربِّي. ^▪   ‏5 مِينْزِي ؤُمِي ذ أَنغْ ثُوغَا ذِي أَرِّيمثْ ثَامذْنُوبْثْ، ثُوغَا شّهْوَاثْ ن دّْنُوبْ خدّْمنْثْ ذڭْ إِغزْذِيسنْ ن أَرِّيمثْ نّغْ أَمْ تّْوَاعَارْننْثْ زِي شَّارِيعَا أَڒَامِي إِ غَا أَوْينْثْ ڒْغِيدْجثْ إِ ڒْموْثْ. ‏6 مَاشَا ڒخُّو أَقَا نتّْوَافكّْ زِي شَّارِيعَا، أَقَا نمُّوثْ خْ مِينْ ثُوغَا ذِي نتّْوَاحْبسْ، حِيمَا أَذْ نعْبذْ س ثجْذِيذثْ ن أَرُّوحْ، وَارْ إِدْجِي س ثقْذِيمْثْ ن ثِيرَا إِقدّْسنْ. ^▫  ▪  

‏7 مِينْ إِ غَا نِينِي خنِّي؟ مَا شَّارِيعَا ذ دّنْبْ؟ عمَّارْصْ! مَاشَا وَارْ سِّينغْ دّنْبْ مْغِيرْ س شَّارِيعَا وَاهَا، مَاغَارْ وَارْ سِّينغْ نّشْوثْ مَاڒَا وَارْ ثنِّي شَّارِيعَا: ”وَارْ تَّاسمْ!“ ^▪   ‏8 مَاشَا دّنْبْ يُوفَا لْفُورْصَا س ثوْصيّثْ ؤُشَا ثڭْمَا ذَايِي كُوڒْ نّشْوثْ، مِينْزِي بْڒَا شَّارِيعَا دّنْبْ إِمُّوثْ. ^▪   ‏9 زِيشْ ثُوغَا دَّارغْ بْڒَا شَّارِيعَا، مَاشَا ؤُمِي د-ثُوسَا ثوْصيّثْ، إِبْذَا دّنْبْ أَذْ إِدَّارْ، ؤُشَا مُّوثغْ.

‏10 ؤُفِيغْ بلِّي ثَاوْصيّثْ إِ إِدْجَانْ إِ ثُوذَارْثْ، ثْندّهْ غَارْ ڒْموْثْ.

‏11 مِينْزِي دّنْبْ، أَمْ يُوفَا لْفُورْصَا س ثوْصيّثْ، إِشْمثْ أَيِي ؤُشَا إِنْغَا أَيِي زَّايسْ.

‏12 خنِّي شَّارِيعَا إِقدّْسنْ ؤُ ثَاوْصيّثْ إِقدّْسنْ، ثْسڭّذْ ؤُ ثصْبحْ. ^▪  

‏13 مَا إِذْوڒْ أَيِي مِينْ إِدْجَانْ ذ أَصبْحَانْ ذ ڒْموْثْ إِنُو؟ عمَّارْصْ! مَاشَا دّنْبْ، حِيمَا أَذْ إِبَانْ دّنْبْ، إِسّڭْمَا ذَايِي ڒْموْثْ س مِينْ إِدْجَانْ ذ أَصبْحَانْ، حِيمَا أَذْ إِذْوڒْ دّنْبْ ذ دّنْبْ كْثَارْ س ثوْصِييّثْ.

‏14 أَقَا نسّنْ بلِّي شَّارِيعَا زِي أَرُّوحْ إِ ثدْجْ، مَاشَا نشّْ ذ بْنَاذمْ ذ أَمذْنُوبْ، مّنْزغْ إِ دّنْبْ، ^▪  

‏15 مِينْزِي وَارْ سِّينغْ مِينْ غَا ڭّغْ، ؤُڒَا عَاوذْ مِينْ خْسغْ، وَارْ ث تّڭّغْ، مَاشَا مِينْ شَارّْهغْ ذ مَانَاونِّي إِ تّڭّغْ. ^▪  

‏16 مَاڒَا تّڭّغْ مِينْ وَارْ تّخْسغْ، أَذْ وَافْقغْ أَكْ-ذ شَّارِيعَا، بلِّي أَقَا نتَّاثْ ثصْبحْ.

‏17 مَاشَا ڒخُّو نشّْ وَارْ تّڭّغْ مَانْ أَيَا عَاذْ، مَاشَا دّنْبْ إِ ذ أَيِي إِزدّْغنْ إِتّڭّْ إِ-ث.

‏18 مِينْزِي سّْنغْ وَارْ ذَايِي إِزدّغْ مِينْ إِشْنَانْ، إِخْسْ أَذْ يِينِي ذِي أَرِّيمثْ ثَامذْنُوبْثْ إِنُو. مِينْزِي إِهْونْ خَافِي مَاحنْذْ أَذْ خْسغْ ثْشُونِي، مَاشَا وَارْ زمَّارغْ أَذْ ت ڭّغْ. ^▪  

‏19 مِينْزِي وَارْ تّڭّغْ ثْشُونِي إِ خْسغْ، مَاشَا ڒْغَارْ إِ وَارْ تّخْسغْ شَا، ذ مَانَاونِّي إِ تّڭّغْ. ‏20 مَاڒَا تّڭّغْ مِينْ وَارْ تّخْسغْ، وَارْ إِدْجِي عَاذْ ذ نشّْ إِ إِتّڭّنْ مَانْ أَيَا، مَاشَا دّنْبْ ونِّي ذ أَيِي إِزدّْغنْ.

‏21 خنِّي تَّافغْ شَّارِيعَا أَيَا أَمْ تّخْسغْ أَذْ ڭّغْ ثْشُونِي عْلَاحْصَابْ ثَانفْسشْثْ إِنُو، أَقَا ڒْغَارْ يُوذسْ أَيِي-د. ‏22 مِينْزِي فَارْحغْ س شَّارِيعَا ن أَربِّي زِي جِّيهثْ ن بْنَاذمْ نِّي ذِي ذَاخڒْ إِنُو، ^▪   ‏23 مَاشَا تّْوَاڒِيغْ ذِينْ شَّارِيعَا نّغْنِي ذڭْ إِغزْذِيسنْ ن أَرِّيمثْ إِنُو، ثتّْمنْغَا أَكْ-ذ شَّارِيعَا ن ڒعْقڒْ إِنُو ؤُشَا ثْحبّسْ أَيِي س شَّارِيعَا ن دّنْبْ ثنِّي إِدْجَانْ ذڭْ إِغزْذِيسنْ ن أَرِّيمثْ إِنُو. ^▪   ‏24 أَيحَّاثْ مَانَا ومْشُومْ-أَ ن بْنَاذمْ إِ دْجِيغْ! وِي ذ أَيِي غَا إِسّْنجْمنْ زِي أَرِّيمثْ-أَ ن ڒْموْثْ؟ ‏25 تّْقَاذِيغْ أَربِّي، س سِيذِيثْنغْ يشُّو لْمَاسِيحْ تّْوَاسْنجْمغْ! أَمُّو أَقَا نشّْ سِيمَانْثْ إِنُو س ڒعْقڒْ إِ خدّْمغْ إِ شَّارِيعَا ن أَربِّي، مَاشَا س أَرِّيمثْ إِنُو ثَامذْنُوبْثْ إِ شَّارِيعَا ن دّنْبْ.