‏1 ڒَامِي إِژْرَا يشُّو ڒْغَاشِي، يُوڒِي غَارْ وذْرَارْ ؤُشَا أَوَارْنِي ڒَامِي ذِينْ إِقِّيمْ، ؤُسِينْ-د غَارسْ إِمحْضَارنْ نّسْ. ‏2 ؤُشَا يَارْزمْ أَقمُّومْ نّسْ، إِسّڒْمذْ إِ-ثنْ، إِنَّا:

‏3 ”سّعْذْ ن يِينِّي أَرُّوحْ نْسنْ إِزْڒضْ،

مِينْزِي ثَاڭلْذِيثْ ن إِجنْوَانْ أَقَا-ت إِ نِيثْنِي. ^▪  

‏4 سّعْذْ ن يِينِّي إِتّشْضِيننْ،

مِينْزِي نِيثْنِي أَذْ تّْوَاعزَّانْ. ^▪  

‏5 سّعْذْ ن إِمْوَاضْعنْ،

مِينْزِي نِيثْنِي أَذْ وَارْثنْ ثَامُّورْثْ. ^▪  

‏6 سّعْذْ ن يِينِّي إِتّْڒَاژَانْ ذ ينِّي إِتّْفَاذنْ غَارْ ثْسڭْذَا،

مِينْزِي نِيثْنِي أَذْ جِّيوْننْ. ^▪  

‏7 سّعْذْ ن يِينِّي يَارحّْمنْ،

مِينْزِي أَذْ غَارْسنْ ثِيڒِي أَرّحْمثْ.

‏8 سّعْذْ ن يِينِّي إِ غَارْ إِدْجْ ؤُڒْ إِزْذِيڭْ،

مِينْزِي نِيثْنِي أَذْ ژَترنْ أَربِّي. ^▪  

‏9 سّعْذْ ن يِينِّي إِتّڭّنْ ڒهْنَا،

مِينْزِي نِيثْنِي أَذْ تّْوَاسمَّانْ أَرَّاوْ ن أَربِّي.

‏10 سّعْذْ ن يِينِّي إِنّحْصَارنْ خْ سِّيبّثْ ن ثْسڭْذَا،

مِينْزِي ثَاڭلْذِيثْ ن إِجنْوَانْ أَذْ غَارْسنْ ثِيڒِي. ^▪  

‏11 سّعْذْ إِ كنِّيوْ مَاڒَا تّْعَايَارنْ ؤُ تّْذَارَّاشنْ خَاومْ

ؤُشَا أَذْ خَاومْ إِنِينْ عْڒَامْ كُوڒْ أَوَاڒنْ إِعفَّاننْ خْ سِّيبّثْ إِنُو،

وَاخَّا سّْخَارِّيقنْ. ^▪  

‏12 فَارْحمْ، سْڒِيوڒْومْ،

مِينْزِي ڒْمُونثْ نْومْ ذ ثَامقّْرَانْثْ ذڭْ إِجنْوَانْ،

مِينْزِي أَمُّو إِ ثُوغَا إِتّْذَارَّاشنْ إِنَابِييّنْ،

إِنِّي قْبڒْ نْومْ.“ ^▪  

‏13 ”كنِّيوْ ذ ثَامدْجَاحْثْ ن ثمُّورْثْ. مَاشَا مَاڒَا ثَامدْجَاحْثْ إِخْسَارْ ؤُڒذِّي نّسْ، مَامّشْ إِ غَا نڭّْ أَذْ ت نَارّْ ذ ثَامدْجَاحْثْ؟ وَارْ ثْنفّعْ عَاذْ إِ وَالُو حَاشَا أَذْ ثمّنْضَارْ غَارْ بَارَّا، أَذْ خَاسْ عفْسنْ إِوْذَانْ.“ ^▪  

‏14 ”كنِّيوْ ذ ثَافَاوْثْ ن دُّونشْثْ. ثَانْذِينْثْ إِ إِتّْوَابْنَانْ خْ وذْرَارْ، وَارْ ثْزمَّارْ أَذْ ثقِّيمْ ثنُّوفَّارْ.

‏15 وَارْ سّْرقِّينْ ڒفْنَارْ ؤُشَا أَذْ ث سَّارْسنْ سَاذُو ڒْمُوذْ، مَاشَا أَذْ ث سَّارْسنْ خْ ڒْمرْفعْ، مَاحنْذْ أَذْ يَارْغْ إِ مَارَّا إِنِّي إِدْجَانْ ذِي ثَادَّارْثْ. ^▪  

‏16 جّمْ ثَافَاوْثْ نْومْ أَذْ ثَارْغْ إِ إِوْذَانْ، حِيمَا أَذْ ژَترنْ ڒخْذَايمْ نْومْ إِشْنَانْ، أَذْ سُّوعْڒَانْ بَابَاثْومْ إِ إِدْجَانْ ذڭْ إِجنْوَانْ.“ ^▪  

‏17 ”أَقَا أَذْ أَومْ إِتّْغِيڒْ أَقَا ؤُسِيغْ-د حِيمَا أَذْ سّْبطّْڒغْ شَّارِيعَا ن مُوسَا نِيغْ إِنَابِييّنْ. نشّْ وَارْ د-ؤُسِيغْ شَا حِيمَا أَذْ سّْبطّْڒغْ، مَاشَا حِيمَا أَذْ كمّْڒغْ. ^▫  

‏18 س ثِيذتّْ، نشّْ أَذْ أَومْ إِنِيغْ: أَڒْ إِ غَا إِفْنَا ؤُجنَّا ذ ثمُّورْثْ، وَارْ إِفنِّي ؤُڒَا ذ إِجّْ ن ڒْحَارْفْ نِيغْ ذ ثَانقِّيطْ زِي شَّارِيعَا أَڒْ غَا إِعْذُو كُوڒْشِي. ^▪  

‏19 ونِّي إِ غَا إِسّْبطّْڒنْ زِي ثْوصَّا أَيَا إِشْثنْ، وَاخَّا ذ ثَامژْيَانْثْ، ؤُشَا إِسّڒْمَاذْ إِوْذَانْ أَمُّو، أَذْ إِتّْوَاسمَّا ذ أَمژْيَانْ ذِي ثْڭلْذِيثْ ن إِجنْوَانْ، مَاشَا ونِّي زَّايْسنْثْ إِڭِّينْ ؤُ إِسّڒْمَاذْ إِ-ثنْثْ، نتَّا أَذْ إِتّْوَاسمَّا ذ أَمقّْرَانْ ذِي ثْڭلْذِيثْ ن إِجنْوَانْ. ^▪   ‏20 مِينْزِي نشّْ أَذْ أَومْ إِنِيغْ: مَاڒَا ثَاسڭْذَا نْومْ وَارْ ثْمقَّارْ شَا خْ ثنِّي ن إِمْسڒْمَاذنْ ن إِذْلِيسنْ ؤُ ثنِّي ن إِفَارِيسِييّنْ، س ثِيذتّْ وَارْ ثتِّيذْفمْ شَا غَارْ ثْڭلْذِيثْ ن إِجنْوَانْ!“

‏21 أَقَا ثسْڒِيمْ بلِّي إِتّْوَانَّا إِ ڒجْذُوذْ: ’وَارْ نقّْ!‘، ؤُ: ’ونِّي إِنقّنْ، أَذْ إِتّْوَاحَاسبْ!‘ ^▪   ‏22 مَاشَا نشّْ أَذْ أَومْ إِنِيغْ: ’مَارَّا ونِّي إِتّْخيَّاقنْ خْ ؤُمَاسْ بْڒَا سِّيبّثْ، نْهْڒَا مَا أَذْ خَاسْ إِتّْوَاحَاكمْ!‘، ؤُ ونِّي إِقَّارنْ إِ ؤُمَاسْ: ’أَذْ خَاكْ سُّوسْفغْ!‘، أَذْ خَاسْ ثحْكمْ لْمحْكَامَا ثَامقّْرَانْثْ ن وُوذَاينْ، ؤُ ونِّي إِقَّارنْ: ’أَ أَپُوهَاڒِي!‘ أَذْ إِتّْوَاحَاكمْ، أَذْ يَاذفْ غَارْ ثْمسِّي ن جَاهنّمَا. ‏23 مَاڒَا ثْقدّْمذْ ثَاوْهِيبْثْ نّكْ خْ ؤُعَالْطَارْ مِينْ خفْ سَّارْسنْ ثِيغَارْصَا ذ ثوْهِيبِينْ، ؤُشَا ذِينِّي ثْعقْڒذْ بلِّي ؤُمَاشْ أَقَا-ث شَا خَاكْ، ‏24 أجّْ ثَاوْهِيبْثْ نّكْ ذِينْ زَّاثْ إِ ؤُعَالْطَارْ، رُوحْ أَمزْوَارُو، ثْصڒْحذْ أَكْ-ذ ؤُمَاشْ، خنِّي ذْوڒْ-د، ؤُشَا أوْشْ ثَاوْهِيبْثْ نّكْ. ‏25 أڭّْ ذغْيَا ثَادُّوكّْڒِيثْ أَكْ-ذ وغْرِيمْ نّكْ ؤُمِي شكْ عَاذْ أَكِيذسْ ذڭْ وبْرِيذْ، حِيمَا أَغْرِيمْ نّكْ وَارْ شكْ إِتِّيوِي غَارْ ڒْقَاضِي، خنِّي ڒْقَاضِي أَذْ شكْ يَاوِي غَارْ ؤُمْخَازْنِي ؤُشَا أَذْ ثمّنْضَارذْ ذِي ڒحْبسْ. ^▪   ‏26 س ثِيذتّْ نشّْ أَذْ أَشْ إِنِيغْ: وَارْ د-ثفّْغذْ سّنِّي، أَڒْ غَا ثْخدْجْصذْ أَصُولْذِي أَنڭَّارُو.“

‏27 أَقَا ثسْڒِيمْ بلِّي إِتّْوَانَّا: ’وَارْ زنِّي شَا!‘، ^▪   ‏28 مَاشَا نشّْ أَذْ أَومْ إِنِيغْ، مَارَّا ونِّي إِ غَا إِخْزَارنْ غَارْ ثمْغَارْثْ س نّشْوثْ، أَقَا إِزْنَا أَكِيذسْ ذڭْ وُوڒْ نّسْ. ^▪   ‏29 مَاڒَا ثسّغْوَا شكْ ثِيطّْ نّكْ ثَافُوسشْثْ، قسّْ إِ-ت، نْضَارْ إِ-ت خَاكْ. إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّكْ خْ ؤُوطُّو ن أَرِّيمثْ نّكْ مَارَّا ذِي جَاهنَّامَا. ^▪   ‏30 مَاڒَا إِسّغْوَا شكْ أَفُوسْ نّكْ أَفُوسِي، قسّْ إِ-ث، نْضَارْ إِ-ث خَاكْ، مِينْزِي إِحْڒَا أَشْ مَاڒَا إِودَّارْ إِجّْ ن طَّارْفْ ن أَرِّيمثْ نّكْ وَاهَا خْ ؤُوطُّو ن أَرِّيمثْ نّكْ مَارَّا ذِي جَاهنَّامَا.“

‏31 ”أَقَا إِتّْوَانَّا عَاوذْ: ’ونِّي إِ غَا إِدْجْفنْ إِ ثمْغَارْثْ نّسْ، أَذْ أَسْ إِوْشْ ثَابْرَاثْ ن وَادْجَافْ‘. ^▪   ‏32 مَاشَا نشّْ أَذْ أَومْ إِنِيغْ: ’مَارَّا ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي زِي سِّيبّثْ ن فَارْقْ-شّْغڒْ، إِتَّارَّا ت أَذْ ثزْنَا ؤُشَا ونِّي إِ غَا إِمڒْشنْ ثنِّي ؤُمِي إِدْجْفنْ، أَقَا نتَّا إِزْنَا.‘ “ ^▪  

‏33 ”أَقَا ثسْڒِيمْ عَاوذْ بلِّي إِتّْوَانَّا إِ ڒجْذُوذْ: ’وَارْ ثجَّادْجِيذْ س ژُورْ، مَاشَا أڭّْ مِينْ ثجِّيدْجذْ إِ سِيذِي!‘ ^▪   ‏34 مَاشَا نشّْ أَذْ أَومْ إِنِيغْ: ’وَارْ ثجَّادْجَامْ عمَّارْصْ، ؤُڒَا غَارْ ؤُجنَّا مِينْزِي نتَّا ذ ڒْعَارْشْ ن أَربِّي، ^▪   ‏35 ؤُڒَا غَارْ ثمُّورْثْ مِينْزِي نتَّاثْ ذ ثَانبْذَاثْ سَاذُو إِضَارنْ نّسْ، ؤُڒَا غَارْ ثنْذِينْثْ ن ؤُرْشَالِيمْ مِينْزِي نتَّاثْ ذ ثَانْذِينْثْ ن ؤُجدْجِيذْ ذ أَمقّْرَانْ، ^▪   ‏36 وَارْ ثجَّادْجَامْ ؤُڒَا غَارْ ؤُزدْجِيفْ نّكْ مِينْزِي وَارْ ثْزمَّارذْ أَذْ ثَارّذْ ؤُڒَا ذ إِجّْ ن ؤُژطُّو ن ؤُشُووَّافْ ذ أَشمْڒَاڒْ نِيغْ ذ أَبَارْشَانْ. ‏37 أَذْ إِقِّيمْ وَاوَاڒْ نّكْ ’وَاهْ!‘ ذ ’وَاهْ!‘، ’لَّ!‘ ذ ’لَّ!‘. مَانَا كْثَارْ زِي مَانْ أَيَا، أَقَا نتَّا زڭْ ؤُمْعفَّانْ.“

‏38 ”أَقَا ثسْڒِيمْ بلِّي إِتّْوَانَّا: ’ثِيطّْ س ثِيطّْ ذ ثِيغْمسْثْ س ثغْمسْثْ!‘، ^▪   ‏39 مَاشَا نشّْ أَذْ أَومْ إِنِيغْ، وَارْ ثتّمْعَاڒَامْ شَا أَكْ-ذ إِجّْ ن ؤُعفَّانْ، مَاشَا ونِّي إِ غَا إِسّقّْڒنْ أَمڭِّيزْ نّكْ أَفُوسِي، سڒْقَا-يْ-أَسْ ؤُڒَا ذ ونّغْنِي. ^▪   ‏40 مَاڒَا ذِينْ حذْ إِخْسْ أَذْ كِيكْ إِڭّْ شّْرعْ ؤُشَا نتَّا أَذْ خَاكْ إِكّسْ ثْشَامِيرْ نّكْ، أجّْ إِ-ث أَذْ إِكْسِي ؤُڒَا ذ أَجدْجَابْ. ‏41 ونِّي خَاكْ إِڭِّينْ بزّزْ حِيمَا أَذْ كِيذسْ ثُويُورذْ إِجّْ ن كِيلُومِيثْرْ، ؤُيُورْ أَكِيذسْ ثْنَاينْ. ‏42 مَانْ ونْ ذ أَشْ إِ غَا إِتَّارنْ شَا ن ڒْحَاجّثْ، أوْشْ أَسْ ت، ؤُ ونِّي يَارزُّونْ أَذْ خَاكْ يَارْضڒْ، وَارْ ذ ث تَّارَّا أَمنِّي.“ ^▪  

‏43 ”أَقَا ثسْڒِيمْ بلِّي إِتّْوَانَّا: ’أَذْ ثخْسذْ أَمْقَارّبْ نّكْ، أَذْ ثْشَارْهذْ ڒعْذُو نّكْ!‘ ^▪   ‏44 مَاشَا نشّْ أَذْ أَومْ إِنِيغْ: ’خْسمْ ڒْعذْيَانْ نْومْ ؤُ بَارْكمْ إِنِّي كنِّيوْ إِنعّْڒنْ، ڭّمْ ثْشُونِي إِ ينِّي كنِّيوْ إِشَارّْهنْ، ژَّادْجمْ إِ ينِّي خَاومْ إِڭِّينْ بزّزْ ذ ينِّي خَاومْ إِتّْذَارَّاشنْ، ^▪   ‏45 حِيمَا أَذْ ثِيڒِيمْ ذ ثَارْوَا ن بَابَاثْومْ إِ إِدْجَانْ ذڭْ إِجنْوَانْ، مِينْزِي نتَّا إِسّْنقَّارْ ثَافُوشْثْ نّسْ خْ إِعفَّاننْ ذ إِصبْحَاننْ، يَارخُّو-د إِ ونْژَارْ حِيمَا أَذْ إِوّثْ خْ إِمْسڭَّاذنْ ؤُ خْ ينِّي وَارْ إِسڭّْذنْ. ‏46 مِينْزِي مَاڒَا ثخْسمْ إِنِّي كنِّيوْ إِتّخْسنْ، مَانْ أَرْبحْ إِ غَارْومْ؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ ^▫  ▪   ‏47 مَاڒَا ثْسدْجْممْ خْ وَاوْمَاثنْ نْومْ وَاهَا، مِينْ إِ ثتّڭّمْ كْثَارْ خْ ونّغْنِي؟ مَا وَارْ تّڭّنْ أَيْثْ ن ضَّارِيبَا ؤُڒَا أَمُّو؟ ‏48 إِڒِيمْ ثْكمّْڒمْ أَمْ مَامّشْ إِكْمڒْ ؤُڒَا ذ بَابَاثْومْ إِ إِدْجَانْ ذڭْ إِجنْوَانْ.“ ^▪