‏1 ڒخْذنِّي إِتّْوَانْذهْ يشُّو غَارْ ڒخْڒَا زِي أَرُّوحْ حِيمَا أَذْ إِتّْوَاجَارّبْ زڭْ إِبْڒِيسْ. ^▫  ▪   ‏2 أَوَارْنِي ڒَامِي ثُوغَا إِژُومّْ أَربْعِينْ ن وُوسَّانْ ذ أَربْعِينْ ن دْجْيَاڒِي، يُوسَا أَسْ-د جُّوعْ. ‏3 يُوسَا-د غَارسْ ؤُمْجَارَّابْ، إِنَّا أَسْ: ”مَاڒَا شكْ ذ مِّيسْ ن أَربِّي، إِنِي إِ إِژْرَا أَيَا أَذْ ذوْڒنْ ذ أَغْرُومْ!“ ‏4 يَارَّا-د خَاسْ إِنَّا: ”أَقَا ثُورَا:

’بْنَاذمْ وَارْ إِدَّارْ س وغْرُومْ وَاهَا،

مَاشَا زِي كُوڒْ أَوَاڒْ إِ د-إِتّكّنْ زڭْ ؤُقمُّومْ ن أَربِّي.‘ “ ^▪  

‏5 ڒخْذنِّي يِيوْيِي ث إِبْڒِيسْ غَارْ ثنْذِينْثْ إِقدّْسنْ ؤُشَا إِسّْڭعّذْ إِ-ث غَارْ طَّارْفْ ن ثْزقَّا ن زَّاوشْثْ ثَامقّْرَانْثْ، ‏6 إِنَّا أَسْ: ”مَاڒَا شكْ ذ مِّيسْ ن أَربِّي، إِوَا نْضَارْ إِخفْ نّكْ غَارْ وَادَّايْ، مِينْزِي أَقَا ثُورَا:

’أَذْ يُومُورْ لْمَالَاكَاثْ نّسْ خَاكْ،

أَذْ شكْ كْسِينْ خْ إِفَاسّنْ نْسنْثْ،

حِيمَا أَضَارْ نّكْ وَارْ إِنڭّحْ شَا أَژْرُو.‘ “ ^▪  

‏7 يشُّو إِنَّا أَسْ: ”ثُورَا عَاوذْ:

’وَارْ تّْجَارَّابْ سِيذِي، أَربِّي نّكْ!‘ “ ^▪  

‏8 يِيوْيِي ث عَاوذْ إِبْڒِيسْ غَارْ وذْرَارْ يُوعْڒَانْ أَطَّاسْ، إِسّْشنْ أَسْ مَارَّا ثِيڭلْذِيوِينْ ن دُّونشْثْ ذ ؤُعُودْجِي نْسنْثْ، ‏9 ؤُشَا إِنَّا أَسْ: ”أَذْ أَشْ وْشغْ مَارَّا مَانْ أَيَا، مَاڒَا ثوْضِيذْ أَيِي غَارْ إِضَارنْ، أَذْ أَيِي ثْسجْذذْ!“

‏10 إِنَّا أَسْ يشُّو: ”رُوحْ، أَ شِّيطَانْ، مِينْزِي ثُورَا:

’سِيذِي، أَربِّي نّكْ، ؤُمِي غَا ثْسجْذذْ

ؤُ إِ نتَّا وحّْذسْ ؤُمِي غَا ثْسخَّارذْ.‘ “ ^▫  ▪  

‏11 ڒخْذنِّي إِجَّا إِ-ث إِبْڒِيسْ ؤُشَا خْزَارْ، لْمَالَاكَاثْ ؤُسِينْثْ-إِ-د، ثُوغَا سخَّارنْثْ أَسْ.

‏12 ڒَامِي إِسْڒَا يشُّو بلِّي يُوحَانَّا ثُوغَا إِتّْوَاسلّمْ، إِرُوحْ غَارْ لْجَالِيلْ. ^▪  

‏13 إِجَّا نَّاصِيرَا ؤُشَا يُوسَا-د غَارْ كَافَارْنَاحُومْ ثنِّي غَارْ طَّارْفْ ن ڒبْحَارْ ذِي ثمُّورْثْ ن زِيپُولُونْ ذ نَافْثَالِي ؤُشَا إِزْذغْ ذِينْ،

‏14 حِيمَا أَذْ إِتّْوَاكمّڒْ مِينْ إِتّْوَانَّانْ زڭْ ؤُنَابِي إِشَاعْيَا ؤُمِي إِنَّا:

‏15 ”ثَامُّورْثْ ن زِيپُولُونْ ذ ثمُّورْثْ ن نَافْثَالِي ذڭْ وبْرِيذْ ن ڒبْحَارْ،

غَارْ ؤُجمَّاضْ ن لْ'ؤُرْذُونْ، لْجَالِيلْ ن ڒڭْنُوسْ، ^▪  

‏16 ڒْڭنْسْ إِ إِقِّيمنْ ذِي ثَادْجسْثْ إِژْرَا ثَافَاوْثْ ثَامقّْرَانْثْ،

ؤُ خْ ينِّي إِزذْغنْ ذِي ثمُّورْثْ ذ ثِيڒِي ن ڒْموْثْ،

أَقَا ثنْقَارْ-د خَاسنْ ثْفَاوْثْ.“ ^▪  

‏17 زِي سِّينْ إِبْذَا يشُّو إِتّْبَارّحْ، إِنَّا: ”ثُوبمْ مِينْزِي ثَاڭلْذِيثْ ن إِجنْوَانْ أَقَا ثُوذسْ-د.“ ^▪  

‏18 ڒَامِي ثُوغَا يشُّو إِڭُّورْ خْ ثْمَا ن ڒبْحَارْ ن لْجَالِيلْ، إِژْرَا ثْنَاينْ ن وَاوْمَاثنْ، شِيمْعُونْ ؤُمِي قَّارنْ بُوطْرُوسْ، إِسمْ وَانِيثَا إِخْسْ أَذْ يِينِي ’ذ أَژْرُو‘، ذ أَنْذْرَاوُوسْ ؤُمَاسْ، ثُوغَا نطَّارنْ ثْرَاشَّا ذِي ڒبْحَارْ مِينْزِي نِيثْنِي ذ إِنيْمَارنْ ن إِسڒْمَانْ. ^▪  

‏19 إِنَّا أَسنْ يشُّو: ”ضْفَارمْ أَيِي-ذ، أَذْ كنِّيوْ أَرّغْ ذ إِنيْمَارنْ ن إِوْذَانْ.“ ‏20 سَّارْسنْ ذغْيَا ثِيرَاشِّيوِينْ نْسنْ، ضْفَارنْ ث.

‏21 ڒَامِي يعْذُو زِي سِّينْ ثْسَاونْثْ، إِژْرَا ثْنَاينْ ن وَاوْمَاثنْ نّغْنِي، يَاعْقُوبْ مِّيسْ ن زَابْذِي ذ ؤُمَاسْ يُوحَانَّا، ثُوغَا أَثنْ أَكْ-ذ بَابَاثْسنْ زَابْذِي ذِي ثْغَارَّاپُوثْ، عدّْڒنْ ثِيرَاشِّيوِينْ نْسنْ ؤُشَا نتَّا إِڒَاغَا خَاسنْ. ‏22 ذغْيَا سمْحنْ ذِي ثْغَارَّاپُوثْ ؤُ ذِي بَابَاثْسنْ، ضْفَارنْ ث.

‏23 ثُوغَا إِتّنّضْ ذِي ثمُّورْثْ ن لْجَالِيلْ مَارَّا، إِسّڒْمَاذْ ذِي ثمْزِيذَاوِينْ نْسنْ، إِتّْبَارّحْ س ڒخْبَارْ أَصبْحَانْ ن ثْڭلْذِيثْ ؤُشَا إِسّْڭنْفَا كُوڒْ ڒهْڒَاشْ ذ كُوڒْ ڒعْيُوبَاثْ إِ إِدْجَانْ ذِي ڒْڭنْسْ. ‏24 إِفّغْ ڒخْبَارْ خَاسْ ذِي سُورِييَا مَارَّا، ؤُشَا إِوْينْ-د غَارسْ مَارَّا إِمهْڒَاشْ إِنِّي غَارْ إِدْجْ عْڒَامْ كُوڒْ ڒهْڒَاشْ ذ ڒحْرِيقْ، إِمَارْيَاحنْ ذ ينِّي إِتّْبَارْكِيكِّيضنْ ذ إِنعْضَابنْ، ؤُشَا إِسّْڭنْفَا إِ-ثنْ. ‏25 ضْفَارنْ ث-إِ-د أَطَّاسْ ن ڒْغَاشِي زِي لْجَالِيلْ، زِي ذِيكَاپُولِيسْ، زِي ؤُرْشَالِيمْ، زِي يَاهُوذِييَّا ؤُ زڭْ ؤُجمَّاضْ ن لْ'ؤُرْذُونْ.