‏1 ذڭْ وُوسَّانْ نِّي يُوسَا-د يُوحَانَّا أَمْسغْضَاصْ، ثُوغَا إِتّْبَارّحْ ذِي ڒخْڒَا ن يَاهُوذِييَّا، ^▪   ‏2 إِنَّا:

”ثُوبمْ، مِينْزِي ثَاڭلْذِيثْ ن إِجنْوَانْ أَقَا ثُوذسْ-د.“

‏3 مِينْزِي ذ وَا إِ خفْ إِتّْوَانَّانْ زڭْ ؤُنَابِي إِشَاعْيَا أَمْ إِنَّا:

”ثْمِيجَّا إِ إِتّْڒَاغَانْ ذِي ڒخْڒَا:

’سْوجْذمْ أَبْرِيذْ ن سِيذِي،

سڭّمْ إِمسْرَاقْ نّسْ.‘ “ ^▪  

‏4 يُوحَانَّا ثُوغَا يَارّضْ أَرُّوضْ ن ثَاضُوفْثْ ن إِڒغْمَانْ، إِبكّسْ إِجّْ ن وبْيَاسْ ن يِيڒمْ. ؤُشَا مَاشَّا نّسْ ثُوغَا ذ إِپُورخْسنْ ذ ثَامّنْثْ ثَاحُورّشْثْ. ^▪   ‏5 ڒخْذنِّي ثفّغْ-د غَارسْ ؤُرْشَالِيمْ ذ قَاعْ يَاهُوذِييَّا ذ مَارَّا جّْوَايهْ إِ ذ أَسْ د-إِنّْضنْ إِ لْ'ؤُرْذُونْ، ‏6 ؤُشَا تّْوَاسْغضْصنْ زَّايسْ ذڭْ إِغْزَارْ ن لْ'ؤُرْذُونْ، نعْمنْ س دّْنُوبْ نْسنْ. ^▪  

‏7 ڒَامِي إِژْرَا أَطَّاسْ ن إِفَارِيسِييّنْ ذ إِصَاذُوقِييّنْ تَّاسنْ-د مَاحنْذْ أَذْ تّْوَاسْغضْصنْ، إِنَّا أَسنْ: ”أَ ثَارْوَا ن إِفِيغْرَانْ، وِي ذ أَومْ إِمْڒنْ مَاحنْذْ أَذْ ثَاروْڒمْ زڭْ وغْضَابْ إِ د غَا يَاسنْ؟ ^▪   ‏8 ڭّمْ ڒْغِيدْجثْ إِ غَا إِڒِيقّنْ إِ تُّوبثْ. ^▪   ‏9 وَارْ تّْغِيڒمْ شَا أَذْ ثِينِيمْ ذڭْ إِخفْ نْومْ: ’إِبْرَاهِيمْ ذ جذِّيثْنغْ!‘، مِينْزِي نشّْ أَذْ أَومْ إِنِيغْ بلِّي أَربِّي إِزمَّارْ أَذْ إِسّْنكَّارْ زڭْ إِژْرَا أَيَا ثَارْوَا إِ إِبْرَاهِيمْ. ^▪  

‏10 خْزَارْ، ثَاشَاقُورْثْ ثتّْوَاسَارْسْ غَارْ إِژوْرَانْ ن ثْشجِّيرَا. كُوڒْ ثَاشجَّارْثْ إِ وَارْ إِتِّيشنْ ڒْغِيدْجثْ ثشْنَا، أَذْ ثتّْوَاقسّْ ؤُشَا أَذْ ثوْضَا ذِي ثْمسِّي. ^▫  ▪  

‏11 نشّْ أَذْ كنِّيوْ سّْغضْصغْ ذڭْ وَامَانْ إِ تُّوبثْ، مَاشَا ونِّي إِ د غَا يَاسنْ أَوَارْنِي أَيِي، نتَّا إِجْهذْ خَافِي، نشّْ وَارْ سْذِيهِيدْجغْ أَذْ كْسِيغْ سَانْذَالِييَاثْ نّسْ. أَقَا نتَّا أَذْ كنِّيوْ إِسّغْضصْ ذِي أَرُّوحْ إِقدّْسنْ ذ ثْمسِّي. ^▪  

‏12 ثَازَّارْثْ نّسْ ذڭْ ؤُفُوسْ نّسْ، أَذْ إِزُوزَّارْ أَنْذْرَارْ نّسْ قَاعْ، أَذْ إِيْرُو إِرْذنْ غَارْ ڒمْرَاسِي نّسْ، مَاشَا إِشَارْفَا أَذْ ثنْ إِسّشْمضْ س ثْمسِّي إِ وَارْ إِخسّْينْ.“

‏13 ڒخْذنِّي يُوسَا-د يشُّو زِي لْجَالِيلْ غَارْ لْ'ؤُرْذُونْ، غَارْ يُوحَانَّا، حِيمَا أَذْ إِتّْوَاسّغْضصْ زَّايسْ. ^▫  ▪  

‏14 مَاشَا يُوحَانَّا يُوڭِي أَسْ، إِنَّا: ”نشّْ حْذَاجغْ أَذْ تّْوَاسْغضْصغْ زَّايكْ. أَقَا ذ شكْ إِ غَارِي إِ د غَا يَاسنْ؟“

‏15 مَاشَا يشُّو يَارَّا-د، إِنَّا أَسْ: ”سَامْحْ أَيِي ڒخُّو، مِينْزِي أَمُّو إِ ذ أَنغْ إِتّْڒِيقْ حِيمَا أَذْ نْكمّڒْ مَارَّا ثَاسڭْذَا.“ ڒخْذنِّي إِسَامْحْ أَسْ.

‏16 أَوَارْنِي ڒَامِي إِتّْوَاسغْضصْ يشُّو، يُوڒِي-د زڭْ وَامَانْ ذغْيَا، ؤُ خْزَارْ، أَقَا تّْوَارْزْمنْ أَسْ إِجنْوَانْ ؤُشَا إِژْرَا أَرُّوحْ ن أَربِّي إِهْوَا-د أَمشْنَاوْ ثَاذْبِيرْثْ ؤُشَا ثَارْسَا خَاسْ. ^▪  

‏17 خْزَارْ، ثُوسَا-د إِشْثْ ن ثْمِيجَّا زڭْ إِجنْوَانْ، ثنَّا: ”ذ وَا ذ مِّي إِعِيزّنْ، ذَايسْ ؤُفِيغْ أَرْضَا إِنُو.“ ^▪