‏1 بدُّو ن ڒخْبَارْ أَصبْحَانْ ن يشُّو لْمَاسِيحْ، مِّيسْ ن أَربِّي. ‏2 أَمْ مَامّشْ ثُورَا ذڭْ وذْلِيسْ ن ؤُنَابِي إِشَاعْيَا:

”أَقَا نشّْ أَذْ سّكّغْ زَّاثْ إِ وُوذمْ نّكْ أَرقَّاسْ إِنُو،

ونِّي إِ غَا إِسّْوجْذنْ أَبْرِيذْ نّكْ.“ ^▪  

‏3 ”ثْمِيجَّا ن ونِّي إِسْغُويُّونْ ذِي ڒخْڒَا:

’سْوجْذمْ أَبْرِيذْ ن سِيذِي،

سڭّْممْ إِمسْرَاقْ نّسْ.‘ “ ^▪  

‏4 ثُوغَا يُوحَانَّا إِسّغْضَاصْ ذِي ڒخْڒَا، إِتّْبَارّحْ س ؤُسغْضصْ ن تُّوبثْ إِ وغْفَارْ ن دّْنُوبْ. ^▪   ‏5 فّْغنْ-د غَارسْ مَارَّا جّْوَايهْ ن يَاهُوذِييَّا ذ أَيْثْ ن ؤُرْشَالِيمْ، تّْوَاسْغضْصنْ زَّايسْ ذڭْ يغْزَارْ ن لْ'ؤُرْذُونْ أَمْ نعّْمنْ س دّْنُوبْ نْسنْ. ^▪  

‏6 ثُوغَا يُوحَانَّا يَارْضْ ثَاضُوفْثْ ن إِڒغْمَانْ، إِبكّسْ س يِيجّْ ن وبْيَاسْ ن يِيڒمْ خْ ثجْعِينَّا نّسْ، ؤُ ثُوغَا إِتّتّْ إِپُورخْسنْ ذ ثَامّنْثْ ثَاحُورّشْثْ. ^▪   ‏7 ثُوغَا إِتّْبَارّحْ، إِقَّارْ: ”أَذْ د-يَاسْ أَوَارْنِي أَيِي ونِّي إِدْجَانْ كْثَارْ زَّايِي، ونِّي ؤُمِي وَارْ سْذِيهِيدْجغْ أَذْ أَضَارغْ مَاحنْذْ أَذْ فسْيغْ إِفِيڒَانْ ن سَانْذَالِييَاثْ نّسْ. ^▪   ‏8 نشّْ سّْغضْصغْ كنِّيوْ س وَامَانْ، مَاشَا نتَّا أَذْ كنِّيوْ إِسّغْضصْ س أَرُّوحْ إِقدّْسنْ.“ ^▪  

‏9 ذڭْ وُوسَّانْ نِّي يُوسَا-د يشُّو زِي نَّاصِيرَا ن لْجَالِيلْ، إِتّْوَاسغْضصْ زِي يُوحَانَّا ذڭْ يغْزَارْ ن لْ'ؤُرْذُونْ.

‏10 ذغْيَا، أَمْ د-إِڭعّذْ زڭْ وَامَانْ، إِژْرَا ؤُجنَّا يَارْزمْ ؤُشَا أَرُّوحْ أَمشْنَاوْ ثَاذْبِيرْثْ ثهْوَا-د خَاسْ. ^▪  

‏11 ثُوسَا-د إِشْثْ ن ثْمِيجَّا زڭْ إِجنْوَانْ: ”شكْ ذ مِّي إِعِيزّنْ، ذَايكْ ؤُفِيغْ أَرْضَا إِنُو.“ ^▪  

‏12 ذغْيَا إِڭوّذْ إِ-ث أَرُّوحْ غَارْ ڒخْڒَا. ^▪  

‏13 إِقِّيمْ ذِينْ ذِي ڒخْڒَا أَربْعِينْ ن وُوسَّانْ، إِجَارّبْ إِ-ث شِّيطَانْ. ثُوغَا-ث أَكْ-ذ ڒوْحُوشْ ؤُشَا سخَّارنْثْ خَاسْ لْمَالَاكَاثْ.

‏14 أَوَارْنِي ڒَامِي طّْفنْ يُوحَانَّا، يُوذفْ-د يشُّو غَارْ لْجَالِيلْ، إِتّْبَارّحْ س ڒخْبَارْ أَصبْحَانْ ن ثْڭلْذِيثْ، ^▪  

‏15 إِنَّا: ”أَقَا ڒْوقْثْ ثِيوضْ-د ؤُشَا ثْقَارّبْ-د ثْڭلْذِيثْ ن أَربِّي. ثُوبمْ، أَمْنمْ ذِي ڒخْبَارْ أَصبْحَانْ.“

‏16 أَمْ ثُوغَا إِڭُّورْ غَارْ ڒبْحَارْ ن لْجَالِيلْ، إِژْرَا شِيمْعُونْ ذ أَنْذْرَاوُوسْ ؤُمَاسْ نطَّارنْ ثْرَاشَّا ذِي ڒبْحَارْ، أَقَا نِيثْنِي ذ إِنيْمَارنْ ن إِسڒْمَانْ. ^▪  

‏17 إِنَّا أَسنْ يشُّو: ”أَسمْ-د أَوَارْنِي أَيِي ؤُشَا أَذْ كنِّيوْ أَرّغْ ذ إِنيْمَارنْ ن يوْذَانْ.“ ^▪  

‏18 ڒخْذنِّي جِّينْ ثِيرَاشِّيوِينْ نْسنْ ؤُشَا ضْفَارنْ ث. ^▪  

‏19 خنِّي أَوَارْنِي ڒَامِي إِعْذُو شْوَايْثْ سّنِّي، إِژْرَا يَاعْقُوبْ مِّيسْ ن زَابْذِي ذ ؤُمَاسْ يُوحَانَّا ذِي ثْغَارَّاپُوثْ، عذْڒنْ ثِيرَاشِّيوِينْ نْسنْ. ^▪   ‏20 إِڒَاغَا خَاسنْ ڒخْذنِّي ؤُشَا جِّينْ بَابَاثْسنْ زَابْذِي أَكْ-ذ إِخمَّاسنْ ذِي ثْغَارَّاپُوثْ، ؤُشَا ضْفَارنْ ث.

‏21 خشّنْ غَارْ كَافَارْنَاحُومْ ؤُشَا ذغْيَا إِبْذَا إِسّڒْمَاذْ ذڭْ وَاسّْ ن سّبْثْ ذِي ثمْزِيذَا. ^▪   ‏22 ثْبهْثنْ زڭْ ؤُسڒْمذْ نّسْ، مِينْزِي إِسّڒْمذْ إِ-ثنْ أَمْ ونِّي غَارْ ثدْجْ صُّولْطَا، وَارْ إِدْجِي أَمشْنَاوْ إِمْسڒْمَاذنْ ن إِذْلِيسنْ. ^▪   ‏23 ثُوغَا ذِي ثمْزِيذَا نْسنْ إِجّْ ن بْنَاذمْ ذَايسْ إِجّْ ن ڒَارْيَاحْ ذ أَمنْڭُوسْ، إِسْغُويُّو، ^▪   ‏24 إِقَّارْ: ”مِينْ ذِينْ جَارْ أَنغْ نشِّينْ ذ شكْ أَ يشُّو نَّاصِيرِي. مَا ثُوسِيذْ-د حِيمَا أَذْ أَنغْ ثسّْهلّْكذْ؟ أَقَا نشّْ سّْنغْ شكْ مِينْ ثعْنِيذْ: أَقَا شكْ ذ أَمْقدَّاسْ ن أَربِّي.“ ‏25 ؤُشَا إِعْڒمْ أَسْ يشُّو، إِنَّا أَسْ: ”سْقَارْ! فّغْ زَّايسْ!“ ‏26 إِجْبذْ إِ-ث ڒَارْيَاحْ أَمنْڭُوسْ أَمُّو ذ وَامُّو، ؤُشَا خنِّي إِفّغْ-د زَّايسْ س إِشْثْ ن ثْغُويِّيثْ ثجْهذْ. ‏27 ثْبهْثنْ مَارَّا، مّْسقْسَانْ أَكْ-ذ وَايَاوْيَا، نَّانْ: ”مَانْ أَيَا؟ مَانَا ثَاغُورِي أَيَا ن جْذِيذْ؟ مِينْزِي س صُّولْطَا يُومُورْ ؤُڒَا ذ ڒَارْيَاحْ إِمنْڭَاسْ ؤُشَا أَذْ ث طَّاعنْ.“ ‏28 ڒخْذنِّي إِفّغْ ڒخْبَارْ نّسْ غَارْ مَارَّا جّْوَايهْ إِ ذ أَسْ د-إِنّْضنْ إِ لْجَالِيلْ.

‏29 أَوَارْنِي ڒَامِي د-فّْغنْ زِي ثمْزِيذَا، رُوحنْ غَارْ ثَادَّارْثْ ن شِيمْعُونْ ذ أَنْذْرَاوُوسْ أَكْ-ذ يَاعْقُوبْ ذ يُوحَانَّا. ^▪   ‏30 ثُوغَا ثَاضكّْوَاتْشْ ن شِيمْعُونْ ثزّڒْ س ثْمسِّي، ؤُشَا نِيثْنِي سِّيوْڒنْ أَسْ خَاسْ. ‏31 إِقَارّبْ-د غَارسْ، إِشبَّارْ ذڭْ ؤُفُوسْ نّسْ، إِسّْڭعّذْ إِ-ت-إِ-د، ؤُشَا ذغْيَا ثجَّا خَاسْ ثْمسِّي ؤُشَا نتَّاثْ ثبْذَا ثتّْسخَّارْ خَاسنْ. ‏32 ڒَامِي د-ثِيوضْ ثْمذِّيثْ، ثَافُوشْثْ ثْرُوحْ أَذْ ثغْڒِي، إِوْينْ غَارسْ مَارَّا إِمهْڒَاشْ ذ إِمَارْيَاحْ. ^▪   ‏33 ثُوغَا ثَانْذِينْثْ مَارَّا ثْمُونْ غَارْ ثوَّارْثْ. ‏34 إِسّْڭنْفَا أَطَّاسْ ن إِمحْڒَاشْ س عْڒَامْ كُوڒْ ڒهْڒَاشَاثْ ؤُشَا إِسُّوفّغْ أَطَّاسْ ن ڒَارْيَاحْ إِعفَّاننْ، وَارْ إِجِّي ڒَارْيَاحْ إِعفَّاننْ أَذْ سِّيوْڒنْ، مِينْزِي سّْننْ ث.

‏35 ثِيوشَّا زِيشْ، ثُوغَا عَاذْ ذ دْجِيڒثْ، إِكَّارْ ؤُشَا إِفّغْ غَارْ إِجّْ ن ومْشَانْ إِخْڒَانْ، ثُوغَا إِتّْژَادْجْ ذِينْ. ^▪   ‏36 شِيمْعُونْ ذ ينِّي ثُوغَا أَكِيذسْ، أَرْزُونْ خَاسْ. ‏37 ڒَامِي ث ؤُفِينْ، نَّانْ أَسْ: ”مَارَّا إِوْذَانْ أَرزُّونْ خَاكْ!“ ‏38 إِنَّا أَسنْ: ”إِتّْخصَّا أَذْ نْرَاحْ غَارْ ذْشُورَاثْ ذ ثْندَّامْ يُوذْسنْ، حِيمَا أَذْ ذِينْ بَارّْحغْ عَاوذْ مِينْزِي أَقَا إِ ؤُيَا ؤُمِي د-ؤُسِيغْ.“ ^▪   ‏39 ثُوغَا إِسّڒْمَاذْ ذِي ثمْزِيذَاوِينْ نْسنْ ذِي مَارَّا لْجَالِيلْ ؤُ إِسُّوفُّوغْ شّْوَاطنْ.

‏40 يُوسَا-د غَارسْ إِجّنْ ذَايسْ ڒْبَارْصْ، إِوْضَا غَارْ إِضَارنْ نّسْ، إِتَّارْ أَسْ إِنَّا: ”مَاڒَا ثخْسذْ، إِزمَّارْ أَذْ أَيِي ثسِّيزذْڭذْ.“ ^▪   ‏41 إِزِّيدْجزْ إِ يشُّو، إِسّْوِيژّضْ أَفُوسْ نّسْ، إِحَاذَا إِ-ث، إِنَّا أَسْ: ”خْسغْ! إِوَا، ذْوڒْ ذ أَمزْذَاڭْ!“ ‏42 ذِي ثْسَاعّثْ نِّي، أَمْ ت إِنَّا، ڒخْذنِّي إِرُوحْ خَاسْ ڒْبَارْصْ ؤُشَا إِذْوڒْ إِزْذِيڭْ. ‏43 أَوَارْنِي ڒَامِي ذ أَسْ إِعْڒمْ، إِسّكّْ إِ-ث ڒخْذنِّي. ‏44 إِنَّا أَسْ: ”خْزَارْ، وَارْ تّْعِيوِيذْ ؤُڒَا إِ يِيجّنْ، مَاشَا رُوحْ، سْشنْ إِخفْ نّكْ إِ ؤُكهَّانْ ؤُشَا أوْشْ خْ ؤُسِيزْذڭْ نّكْ مِينْ يُومُورْ مُوسَا مَاحنْذْ أَذْ ثْشْهذذْ إِ نِيثْنِي.“ ^▪   ‏45 مَاشَا ڒَامِي إِرُوحْ، إِبْذَا إِتّْبَارّحْ أَطَّاسْ، إِسُّوفّغْ ڒخْبَارْ أَڒَامِي وَارْ إِزمَّارْ يشُّو أَذْ يَاذفْ ثَانْذِينْثْ س بْطَايْطَايْ، مَاشَا ثُوغَا-ث بَارَّا ذڭْ إِمُوشَانْ إِخْڒَانْ، ثُوغَا تَّاسنْ-د غَارسْ زِي كُوڒْ جّْوَايهْ.