‏1 ”حْضَامْ، وَارْ ثْصدَّاقمْ زَّاثْ إِ إِوْذَانْ حِيمَا أَذْ كنِّيوْ ژَترنْ. مَاڒَا أَمْيَا، وَارْ غَارْومْ إِتِّيڒِي بُو ڒَاجَارْ زِي بَابَاثْومْ إِ إِدْجَانْ ذڭْ إِجنْوَانْ. ‏2 مَاڒَا ثْصدّْقذْ، وَارْ ت تّڭّْ ذِي ڒْپُوقْ أَمْ مَامّشْ ث تّڭّنْ إِمْنَافْقنْ ذِي ثمْزِيذَاوِينْ ؤُ ذِي زّْنَاقِي، حِيمَا أَذْ ثنْ شنْعنْ إِوْذَانْ. س ثِيذتّْ نشّْ أَذْ أَومْ إِنِيغْ، نِيثْنِي أَقَا ؤُفِينْ ڒَاجَارْ نْسنْ زِي بعْذَا. ^▪   ‏3 مَاشَا شكْ، خْمِي إِ غَا ثْصدّْقذْ، إِتّْخصَّا أَفُوسْ نّكْ أَزڒْمَاضْ وَارْ إِسِّينْ مِينْ إِتّڭّْ ؤُفُوسِي نّكْ، ‏4 حِيمَا صّذْقثْ نّكْ أَذْ ثِيڒِي س ثْنُوفّْرَا ؤُشَا بَابَاشْ ونِّي إِتّْوَاڒَانْ ذِي ثْنُوفّْرَا، أَذْ شكْ إِخدْجصْ س بْطَايْطَايْ.“ ^▪  

‏5 ”مَاڒَا ثژُّودْجذْ، وَارْ تِّيڒِيذْ شَا أَمْ إِمْنَافْقنْ إِنِّي ؤُمِي إِعْجبْ أَسنْ ڒْحَاڒْ أَذْ ژَّادْجنْ أَمْ بدّنْ ذِي ثمْزِيذَاوِينْ ذ ثْغمُّورَا ن زّْنَاقِي حِيمَا أَذْ ثنْ ژَترنْ إِوْذَانْ. س ثِيذتّْ نشّْ أَذْ أَومْ إِنِيغْ، أَقَا نِيثْنِي ؤُفِينْ ڒَاجَارْ نْسنْ زِي بعْذَا. ‏6 مَاشَا شكْ، مَاڒَا ثژُّودْجذْ، أَذفْ غَارْ وخَّامْ نّكْ، بلّعْ ثَاوَّارْثْ، ژَّادْجْ إِ بَابَاشْ ونِّي إِدْجَانْ ذِي ثْنُوفّْرَا ؤُشَا بَابَاشْ إِ إِتّْوَاڒَانْ ذِي ثْنُوفّْرَا ذ نتَّا إِ شكْ إِ غَا إِخدْجْصنْ س بْطَايْطَايْ. ^▪   ‏7 مَاڒَا ثژُّودْجمْ وَارْ تّْعَاوَاذمْ إِ وَاوَاڒْ إِخْوَانْ أَمشْنَاوْ مَامّشْ تّْژَادْجَانْ إِنِّي زِي ڒڭْنُوسْ، مِينْزِي إِتّْغِيڒْ أَسنْ س وَاوَاڒنْ نْسنْ أَطَّاسْ أَذْ أَسنْ إِسڒْ. ^▪   ‏8 وَارْ تِّيڒِيمْ أَمْ نِيثْنِي، مِينْزِي بَابَاثْومْ إِسّنْ مِينْ ثحْذَاجمْ قْبڒْ ذ أَسْ إِ غَا ثتَّارمْ شَا. ‏9 أَمُّو إِ غَا ثژَّادْجمْ كنِّيوْ:

’أَ بَابَاثْنغْ إِ إِدْجَانْ ذڭْ إِجنْوَانْ،

إِسمْ نّكْ أَذْ يِيڒِي إِتّْوَاقدّسْ، ^▪  

‏10 أجّْ أَذْ د-ثَاسْ ثْڭلْذِيثْ نّكْ، أَذْ يِيڒِي ڒْخَاضَارْ نّكْ،

أَمْ مَامّشْ يدْجْ ذڭْ ؤُجنَّا، أَذْ يِيڒِي عَاوذْ ذِي ثمُّورْثْ.

‏11 أوْشْ أَنغْ أَسّْ-أَ أَغْرُومْ ن كُوڒْ أَسّْ.

‏12 غْفَارْ أَنغْ إِمَارْوُوسَا نّغْ،

أَمْ مَامّشْ نْسَامحْ عَاوذْ إِ ينِّي د أَنغْ إِتُّورْسنْ،

‏13 ؤُ وَارْ ذ أَنغْ سِيذِيفْ شَا ذڭْ ؤُغكّْوِي،

مَاشَا سنْجمْ أَنغْ زڭْ ؤُمْعفَّانْ.

مِينْزِي ثَاڭلْذِيثْ ذ جّهْذْ ذ ؤُعُودْجِي أَذْ إِڒِينْ إِ شكْ

إِ ڒبْذَا قَاعْ! أَمِينْ!‘ ^▪  

‏14 مَاغَارْ مَاڒَا كنِّيوْ ثْسَامْحمْ إِ إِوْذَانْ إِ ؤُخطُّو نْسنْ، ؤُڒَا ذ بَابَاثْومْ إِ إِدْجَانْ ذڭْ ؤُجنَّا أَذْ أَومْ إِغْفَارْ. ^▪  

‏15 مَاشَا مَاڒَا كنِّيوْ وَارْ ثتّْسِيمِيحمْ إِ إِوْذَانْ إِ ؤُخطُّو نْسنْ، أَقَا ؤُڒَا ذ بَابَاثْومْ وَارْ إِغفَّارْ شَا إِعذِّيينْ نْومْ.“ ^▪  

‏16 ”ڒَامِي ثْژُومّمْ، وَارْ تّڭّمْ أَغمْپُوبْ أَبَارْشَانْ أَمْ إِمْنَافْقنْ، إِنِّي إِسّْنقْڒَابنْ أَغمْپُوبْ نْسنْ حِيمَا أَذْ ثنْ ژَترنْ إِوْذَانْ بلِّي أَقَا ژُومّنْ. س ثِيذتّْ نشّْ أَذْ أَومْ إِنِيغْ، أَقَا نِيثْنِي ؤُفِينْ ڒَاجَارْ نْسنْ زِي بعْذَا. ^▪  

‏17 مَاشَا شكْ، مَاڒَا ثْژُومّذْ، ذْهنْ أَزدْجِيفْ نّكْ ؤُشَا سِيرذْ أَغمْپُوبْ نّكْ،

‏18 حِيمَا وَارْ ثْبِينِيذْ شَا إِ إِوْذَانْ بلِّي ثْژُومّذْ، مَاشَا إِ بَابَاشْ ونِّي إِدْجَانْ ذِي ثْنُوفّْرَا، ؤُشَا بَابَاشْ إِ إِتّْوَاڒَانْ ذِي ثْنُوفّْرَا، أَقَا نتَّا إِ شكْ إِ غَا إِخدْجْصنْ.“

‏19 ”وَارْ سْمُونَامْ شَا ڒكْنُوزْ ذَا ذِي دُّونشْثْ مَانِي إِ ثنْ غَا ثشّْ ثْشِينْذَا ذ دّْرَا، ؤُ مَانِي إِ غَا سّْنُوقّْبنْ إِخوَّاننْ، أَذْ ثنْ أَشَارنْ، ^▪   ‏20 مَاشَا سْمُونمْ إِ يِيخفْ نْومْ ڒكْنُوزْ ذڭْ ؤُجنَّا مَانِي وَارْ ثنْ ثتّتّْ شَا ثْشِينْذَا ذ دّْرَا ؤُ مَانِي وَارْ سّْنُوقُّوبنْ إِخوَّاننْ، وَارْ ثنْ تَّاشَارنْ. ^▪   ‏21 مِينْزِي مَانِي إِ غَا يِيڒِي ڒْكنْزْ نّكْ، أَقَا أَذْ ذِينْ يِيڒِي ؤُڒَا ذ ؤُڒْ نّكْ.“

‏22 ”ڒفْنَارْ ن أَرِّيمثْ نتَّا ذ ثِيطّْ. مَاڒَا ثِيطّْ نّكْ أَقَا ثصْفَا، أَذْ ثِيڒِي أَرِّيمثْ نّكْ مَارَّا ذ ثَافَاوْثْ. ^▪   ‏23 مَارَا ثِيطّْ نّكْ ذ ثَاعفَّانْثْ، خنِّي أَذْ ثِيڒِي أَرِّيمثْ نّكْ مَارَّا ذ ثَادْجسْثْ. مَاڒَا ثَافَاوْثْ ثنِّي ذَايكْ ذ ثَادْجسْثْ، مشْحَاڒْ ثمْغَارْ ثَادْجسْثْ! ‏24 ؤُڒَا ذ إِجّْ وَارْ إِزمَّارْ أَذْ إِخْذمْ إِ ثْنَاينْ ن إِسِيذِيثنْ، مِينْزِي خنِّي نتَّا أَذْ إِشَارْهْ إِجّنْ، أَذْ إِخْسْ ونّغْنِي، نِيغْ أَذْ إِوقَّارْ إِجّنْ، أَذْ إِسّحْقَارْ ونّغْنِي. كنِّيوْ وَارْ ثْزمَّارمْ أَذْ ثْسخَّارمْ إِ أَربِّي ذ ثنْعَاشِينْ.“ ^▪  

‏25 ”س ؤُينِّي نشّْ أَذْ أَومْ إِنِيغْ: ’وَارْ كسِّيمْ أَمْنُوسْ ذِي ثُوذَارْثْ نْومْ مِينْ غَا ثشّمْ نِيغْ مِينْ غَا ثسْومْ ؤُڒَا إِ أَرِّيمثْ نْومْ مَامّشْ ت إِ غَا ثسّْيَارْضمْ. مَا وَارْ ثحْڒِي ثُوذَارْثْ خْ مَاشَّا نِيغْ أَرِّيمثْ خْ وَارُّوضْ؟ ^▪   ‏26 خْزَارمْ غَارْ إِجْضَاضْ ن ؤُجنَّا، أَقَا نِيثْنِي وَارْ زَارّْعنْ، وَارْ مجَّارنْ ؤُشَا وَارْ تّْخمِّيڒنْ ذِي ڒمْرَاسِي، وَاخَّا أَمنِّي بَابَاثْومْ إِ إِدْجَانْ ذڭْ إِجنْوَانْ إِ ثنْ إِسّشَّانْ. مَا كنِّيوْ وَارْ ثسّكّْوِيمْ شَا كْثَارْ أَطَّاسْ خَاسنْ؟ ^▪   ‏27 مَانْ ونْ زَّايْومْ إِزمَّارْ س ومْنُوسْ نّسْ أَذْ يَارْنِي ؤُڒَا ذ إِجّْ ن ؤُغِيڒْ ذِي ثُوزّڭَّارْثْ نّسْ؟ ‏28 ؤُ مَايمِّي ثْكسِّيمْ أَمْنُوسْ إِ وَارُّوضْ؟ خْزَارمْ مَامّشْ غمّْينْثْ ثْلِيلِّيشِينْ ذڭْ إِيَّارْ، وَاخَّا نِيثنْثِي وَارْ خدّْمنْثْ، وَارْ تّْقَارْضْشنْثْ، ^▫   ‏29 مَاشَا نشّْ أَذْ أَومْ إِنِيغْ، ؤُڒَا ذ سُولِيمَانْ ذِي مَارَّا أَعُودْجِي نّسْ وَارْ يَارْضْ شَا أَمْ إِجّنْ زَّايْسنْ. ‏30 مَاڒَا أَربِّي إِسّْيَارْضْ ڒحْثِيشْ ن إِيَّارْ إِ إِدْجَانْ أَسّْ-أَ ؤُشَا ثِيوشَّا أَذْ إِمّنْضَارْ ذِي ثفْقُونْثْ، مَا خنِّي وَارْ كنِّيوْ إِسّْيِيرّضْ أَطَّاسْ حْسنْ زَّايسْ، أَ كنِّيوْ إِ ذِي إِدْجْ ذْرُوسْ ن لْ-إِيمَانْ؟ ‏31 س ؤُينِّي وَارْ كسِّيمْ شَا أَمْنُوسْ، وَارْ قَّارمْ: ’مِينْ إِ غَا نشّْ؟‘ ؤُ: ’مِينْ إِ غَا نْسُو؟‘ نِيغْ: ’مِينْ إِ غَا نْيَارْضْ؟‘ ‏32 أَقَا ڒڭْنُوسْ أَرزُّونْ مَانْ أَيَا مَارَّا، مَاشَا بَابَاثْومْ ذڭْ ؤُجنَّا إِسّنْ بلِّي ثحْذَاجمْ مَانْ أَيَا مَارَّا. ‏33 أَرْزُومْ أَمزْوَارُو خْ ثْڭلْذِيثْ ن أَربِّي ذ ثْسڭْذَا نّسْ، ؤُشَا مَانْ أَيَا مَارَّا أَذْ غَارْومْ إِمَّارْنِي عَاوذْ. ^▪   ‏34 خنِّي وَارْ كسِّيمْ أَمْنُوسْ إِ مِينْ إِ غَا يِيڒِي ثِيوشَّا، مِينْزِي ثِيوشَّا أَذْ ثكْسِي أَمْنُوسْ إِ يِيخفْ نّسْ. إِشْفَا إِ كُوڒْ أَسّْ ثُوعفّْنَا نّسْ.“