‏1 ڒْحُوكْمْ إِسَّاڭّْوَاذنْ خْ نِينْوَا. أَذْلِيسْ ن ثْمژْرِيوْثْ ن نَاحُومْ، أَلْقُوشِي.^▫  

‏2 أَلِيفْ. - أَربِّي إِتَّاسْمنْ ؤُ سِيذِي إِنْثَاقَامْ،

سِيذِي ذ أَنقَّامْ ؤُ نتَّا ذ بَابْ ن وسْعَارْ.

سِيذِي ذ أَنقَّامْ إِ ڒْعذْيَانْ نّسْ،

نتَّا إِڭَّا ڒْعذْيَانْ جَارْ ثِيطَّاوِينْ نّسْ. ^▫  ▪  

‏3 سِيذِي غَارسْ تَّاسِيعْ ن ڒْخَاضَارْ ؤُ جّهْذْ نّسْ إِمْغَارْ

ؤُ نتَّا وَارْ إِتّْبَارِّي عمَّارْصْ ونِّي إِتّڭّنْ دّنْبْ.

بِيثْ. أَبْرِيذْ ن سِيذِي ذِي ثْحَارْيَاضْثْ ؤُ ذڭْ ؤُسمِّيضْ،

إِسيْنُوثنْ أَقَا أَثنْ ذ ثَاعجَّاجْثْ ن إِضَارنْ نّسْ. ^▫  

‏4 ڭِيملْ. - نتَّا إِوبّخْ ڒبْحَارْ، إِتَّارَّا إِ-ث يُوژغْ،

مَارَّا إِغزْرَانْ إِتّجَّا إِ-ثنْ تَّاژْغنْ.

ذَالِيثْ. بَاشَانْ ذ كَارْمَالْ سْڒَاونْ،

ؤُڒَا ذ نُّووَارْ ن لُوبْنَانْ إِسْڒَاوْ. ^▫  

‏5 هِي. - إِذُورَارْ تَّارْجِيجِينْ زَّايسْ،

ؤُ ثِيوْرِيرِينْ فسّْينْثْ،

وَاوْ. ؤُ ثَامُّورْثْ ثتّْوَاسّْڭعّذْ-د زَّاثْ إِ وُوذمْ نّسْ،

ؤُڒَا ذ مَارَّا وِي خَاسْ إِزدّْغنْ! ^▪  

‏6 زَايِينْ. - وِي إِزمَّارنْ أَذْ إِقِّيمْ إِبدّْ زَّاثْ إِ وسْخضْ نّسْ،

ؤُ وِي إِزمَّارنْ أَذْ إِكَّارْ زَّاثْ إِ ڒْحَاذُوقْ ن وغْضَابْ نّسْ؟

خِيثْ. أَسْعَارْ نّسْ إِتّْوَاكبّْ-د أَمْ ثْمسِّي

ؤُ ثِيصُوضَارْ تّْوَاقدْجْعنْثْ-إِ-د زَّايسْ.

‏7 ثِيث. - إِشْنَا سِيذِي

إِ دُّورِّي ذڭْ وَاسّْ ن ڒحْصَارثْ.

يُوذْ. نتَّا إِسّنْ مَارَّا إِنِّي غَارسْ يَارزُّونْ أَذُورِّي. ^▪  

‏8 كَافْ. - س يِيشْثْ ن ڒْحمْڒثْ إِفيّْضنْ

أَذْ يُوقَا أَمْشَانْ نّسْ

ؤُ ڒْعذْيَانْ نّسْ أَذْ ثنْ إِضْفَارْ،

غَارسْ أَڒْ غَا يَاذْفنْ غَارْ ثَادْجسْثْ.

‏9 مِيمْ. - مِينْ ثْخَارّْصمْ خنِّي خْ سِيذِي؟

نتَّا أَذْ ث يُوقَا قَاعْ.

أَغُوفِي وَارْ د-إِتِّيسْ مَارْثَاينْ.

‏10 أَقَا نِيثْنِي تّْوَامُوذنْ عَاذْ أَمشْنَاوْ شْبَارْقْ أَكْ-ذ إِسنَّاننْ،

ؤُ غلَّانْ أَمْ إِمسْشَارنْ،

أَمُّو إِ غَا تّْوَاشّنْ نِيثْنِي قَاعْ أَمشْنَاوْ أَڒُومْ يُوژْغنْ.

‏11 زَّايكْ إِ د-إِفّغْ

ونِّي إِتّْخَارّْصنْ ذِي مِينْ وَارْ إِحْڒِينْ خْ سِيذِي،

أَمْشَاوَارْ إِ وَارْ إِسكّْوِينْ وَالُو.

‏12 أَمُّو إِسِّيوڒْ سِيذِي:

وَاخَّا نِيثْنِي تّْفڒْحنْ ؤُ دْجَانْ ذڭْ وَاطَّاسْ،

وَاخَّا أَمنِّي نِيثْنِي أَذْ تّْوَاقسّنْ ؤُ نتَّا أَذْ إِعْذُو.

وَاخَّا نشّْ ڭِّيغْ خَاكْ أَغِيڒْ،

مَاشَا نشّْ وَارْ خَاكْ تّڭّغْ أَغِيڒْ عَاذْ.

‏13 ڒخُّو أَذْ أَرْژغْ أَزَايْڒُو نّسْ إِ خَاكْ إِمَّارْسنْ

ؤُ نشّْ أَذْ شَارّْڭغْ ثِيسْغُونِينْ نّكْ.

‏14 سِيذِي إِوصَّا خَاكْ،

أَقَا وَارْ زَّايكْ إِتِّيڒِي عَاذْ حذْ س يِيسمْ نّكْ.

نشّْ أَذْ قضْعغْ ڒخْيَاڒَاثْ إِنقْشنْ ذ ڒخْيَاڒَاثْ إِفسْينْ زِي ثَادَّارْثْ نّكْ.

نشّْ أَذْ ڭّغْ أَنْضڒْ نّكْ،

مَاغَارْ ؤُفِيغْ شكْ ثفْسُوسذْ.