مِيخَا إِژْرَا ثُوعفّْنَا إِ إِدْجَانْ ذِي ڒْڭنْسْ
7
1 ”ؤُشْثْ إِنُو، مَاغَارْ نشّْ أَقَا أَيِي أَمشْنَاوْ غَارْ ثْميْرَا ن ثِينِي ن ؤُنبْذُو،
أَمشْنَاوْ غَارْ ثْوَاڒَا وِيسّْ ثْنَاينْ ن وڒْقَاضْ ن ؤُضِيڒْ .
وَارْ ذِينْ ؤُڒَا ذ إِجّْ ن ؤُزكُّونْ ن ؤُضِيڒْ إِ مَاشَّا.
ڒعْمَارْ إِنُو ذَايسْ مژْرِي ن ڒْبَاشُورْ قْبڒْ ڒْوقْثْ.
2 ثَامخْسِيوْثْ إِشوَّارنْ وَارْ ثقِّيمْ ذِي ثمُّورْثْ،
ؤُشَا وَارْ ذِينْ ؤُڒَا ذ إِجّْ ن ؤُصبْحَانْ جَارْ إِوْذَانْ.
نِيثْنِي مَارَّا تّْحَامَانْ خْ إِذَامّنْ،
إِجّنْ إِيمَّارْ ونّغْنِي س ثْرَاشَّا. ▪
3 إِفَاسّنْ نْسنْ وجْذنْ س ثْنَاينْ مَاحنْذْ أَذْ ڭّنْ ڒْغَارْ.
ڒْحَاكمْ إِتَّارْ ؤُ ڒْقَاضِي إِتّڭّْ إِ-ت ذِي طّْوعْ ن ؤُخدْجصْ،
ؤُ ونِّي أَمقّْرَانْ إِسَّاوَاڒْ عْلَاحْسَابْ مژْرِي أَعفَّانْ ن ڒعْمَارْ نّسْ
ؤُ أَمُّو إِ سّْفَارْغنْ نِيثْنِي ثَامسْڒَاشْثْ. ▪
4 ونِّي زَّايْسنْ ذ أَصبْحَانْ أَطَّاسْ أَقَا-ث أَمْ إِجّْ ن شْبَارْقْ ن إِسنَّاننْ،
ونِّي ذ أَصْذِيقْ ن وُوڒْ قَاعْ زَّايْسنْ أَقَا-ث مَاهُو خْ إِجّْ ن وفْرَايْ ن شْبَارْقْ أَكْ-ذ إِسنَّاننْ.
أَسّْ ن إِعسَّاسنْ نّكْ، أَسّْ ن ؤُخدْجصْ، يُوسَا-د.
ڒخُّو أَذْ نْخڒْعنْ.“
مِيخَا أَذْ إِرَاجَا أَسنْجمْ ن سِيذِي
5 ”وَارْ ثُومِينذْ ذڭْ إِجّْ ن ؤُمدُّوكّڒْ،
وَارْ ثتّشْڒذْ خْ ؤُمدُّوكّڒْ نّكْ إِعِيزّنْ.
حْضَا ثِيوُّورَا ن ؤُقمُّومْ نّكْ
زِي ثنِّي إِدْجَانْ غَارْ وحْسِينْ نّكْ.
6 مَاغَارْ مِّيسْ إِسّحْقَارَا بَابَاسْ،
يدْجِيسْ ثتّْضَادَّا يمَّاسْ،
ثَاسْڒِيثْ خْ لَالَّاسْ،
ڒْعذْيَانْ ن إِجّْ ن ورْيَازْ أَقَا ذ أَيْثْبَابْ ن ثَادَّارْثْ نّسْ.“ ▪
7 ”مَاشَا نشّْ أَذْ خْزَارغْ غَارْ سِيذِي،
أَذْ رَاجِيغْ أَربِّي ن ؤُسنْجمْ إِنُو.
أَربِّي إِنُو أَذْ غَارِي د-إِسڒْ.“
8 ”وَارْ ذ أَيِي سْفَارّحْ، أَ ثَامْغَارْثْ نِّي ذ ڒعْذُو إِنُو!
مَاغَارْ مَاڒَا وْضِيغْ، أَذْ كَّارغْ عَاوذْ،
مَاڒَا قِّيمغْ ذِي ثَادْجسْثْ،
أَذْ يِيڒِي سِيذِي ذ ثَافَاوْثْ إِ نشّْ.
9 نشّْ أَذْ كْسِيغْ أَسْخضْ ن سِيذِي،
مِينْزِي نشّْ خْضِيغْ أَكِيذسْ،
غَارسْ أَڒْ خَافِي إِ غَا إِوّثْ نتَّا خْ دّعْوثْ إِنُو
ؤُ أَذْ أَيِي يَاغْ ثَاسْغَارْثْ إِنُو.
نتَّا أَذْ أَيِي إِسُّوفّغْ غَارْ ثْفَاوْثْ،
نشّْ أَذْ ژَترغْ ثَاسڭْذَا نّسْ. ▪
10 ثَامْغَارْثْ ثنِّي ذ ڒعْذُو إِنُو أَذْ ثْژَارْ أَيَا.
مْڒِي ذ أَسْ إِ غَا ثْذڒْ ڒحْيَا إِ ثنِّي ذ أَيِي إِقَّارنْ:
’مَانِي إِدْجْ سِيذِي، أَربِّي نّكْ؟‘
ثِيطَّاوِينْ إِنُو أَذْ غَارسْ خْزَارنْثْ!
ڒخُّو أَذْ ثتّْوَادّزْ نتَّاثْ،
أَمْ ؤُبدْجَاعْ ذِي زّْنَاقِي.“ ▪
11 ”ذڭْ وَاسّْ إِ ذِي إِ غَا إِبْنَا نتَّا ڒحْيُوضْ نّكْ عَاوذْ،
ذڭْ وَاسّْ نِّي أَذْ تّْرَاحْ ثوْصيّثْ غَارْ ڒَاڭّْوَاجْ أَطَّاسْ.
12 ذڭْ وَاسّْ نِّي أَذْ د-أَسنْ،
زِي أَشُّورْ ذ ثْندَّامْ ن مِيصْرَا،
ؤُ زِي مِيصْرَا أَڒْ إِغْزَارْ ن لْفُورَاطْ،
ؤُ زِي ڒبْحَارْ أَڒْ ڒبْحَارْ ؤُ زڭْ وذْرَارْ أَڒْ وذْرَارْ نّغْنِي.
13 مَاشَا دُّونشْثْ أَذْ ثذْوڒْ ذ ڒْخَارْبثْ،
زِي سِّيبّثْ ن إِمزْذَاغْ نّسْ،
زِي سِّيبّثْ ن ڒْغِيدْجثْ ن ثْمڭَّا نْسنْ.“ ▪
14 ”أَرْوسْ ڒْڭنْسْ نّكْ س ثغَّارْشْثْ نّكْ،
ؤُدْجِي ن ثسْغَارْثْ نّكْ،
ثنِّي إِدْجَانْ وحّْذسْ ذڭْ وزْغَارْ،
ذِي ڒْوسْثْ ن كَارْمِيلْ.
أجّْ إِ-ثنْثْ أَذْ أَروْسنْ ذِي بَاشَانْ ذ جِيلْعَاذْ،
أَمْ ذڭْ وُوسَّانْ ن وشْحَاڒْ ؤُيَا. ▪
15 نشّْ أَذْ أَسْ سّشّْنغْ لْمُوعْجِيزَاثْ،
أَمْ ذڭْ وُوسَّانْ ڒَامِي د-ثفّْغذْ زِي ثمُّورْثْ ن مِيصْرَا. ▪
16 ڒڭْنُوسْ ڭُّورْ أَذْ ث ثْوَاڒِينْ،
ؤُ أَذْ سّضْحَانْ زِي سِّيبّثْ ن مَارَّا ثِيزمَّارْ نْسنْ،
نِيثْنِي أَذْ سَّارْسنْ أَفُوسْ خْ ؤُقمُّومْ،
إِمزُّوغنْ نْسنْ ڭُّورْ أَذْ دُّوهْشَارنْ.
17 نِيثْنِي أَذْ ڒسْحنْ ثَاعجَّاجْثْ أَمْ ؤُفِيغَارْ،
أَذْ د-فّْغنْ زِي لْپُورْجَاثْ نْسنْ أَمْ إِمُودَّارْ ن ثمُّورْثْ إِتّْپُوعنْ.
أَذْ د أَسنْ تَّارْجِيجنْ غَارْ سِيذِي، أَربِّي نّغْ،
ؤُ أَذْ زَّايكْ ڭّْوذنْ.“ ▪
ثَايْرِي ن أَربِّي ذ أَرّحْمثْ نّسْ
18 ”مَانْ ونْ إِدْجَانْ ذ أَربِّي أَمْ شكْ، ونِّي إِغفَّارنْ ڒْمُوعْصِييّثْ،
ونِّي إِعدُّونْ خْ ؤُخطُّو ن مِينْ إِقِّيمنْ زِي ثسْغَارْثْ نّسْ؟
نتَّا وَارْ إِمنّعْ إِ ڒبْذَا ذڭْ وغْضَابْ نّسْ،
مَاغَارْ يَارْضَا أَسْ ثَامخْسِيوْثْ إِشوَّارنْ. ▪
19 نتَّا أَذْ خَانغْ يَارْحمْ عَاوذْ،
نتَّا أَذْ إِعْفسْ خْ ڒْمُوعْصِييّثْ نّغْ،
وَاهْ، شكْ أَذْ ثنْضَارذْ مَارَّا دّْنُوبْ نْسنْ
ذِي ڒَادْجَاغْ ن ڒبْحَارْ.
20 إِڒِي شكْ أَذْ ثسّشْنذْ ڒَامَانْ إِ يَاعْقُوبْ
ؤُ ثَامخْسِيوْثْ إِشوَّارنْ إِ إِبْرَاهِيمْ،
أَمْ مَامّشْ ثجِّيدْجذْ إِ إِبَابَاثنْ نّغْ
زڭْ وُوسَّانْ ن مشْحَاڒْ ؤُيَا.“