أَشثْشِي ن سِيذِي خْ ڒْڭنْسْ نّسْ ؤُ خْ ؤُرْشَالِيمْ
6
1 ”سْڒمْ خنِّي مِينْ إِقَّارْ سِيذِي: كَّارْ، شَارّعْ زَّاثْ إِ وُوذمْ ن إِذُورَارْ،
ؤُ أجّْ ثِيوْرِيرِينْ أَذْ سْڒنْثْ إِ ثْمِيجَّا نّكْ!
2 سْڒمْ، أَ إِذُورَارْ، إِ دّعْوثْ ن سِيذِي،
ؤُڒَا ذ كنِّيوْ، ذْسُوسَا إِمثْننْ ن ثمُّورْثْ،
مِينْزِي سِيذِي غَارسْ إِشْثْ ن دّعْوثْ أَكْ-ذ ڒْڭنْسْ نّسْ
نتَّا إِڭُّورْ غَارْ ثَادَّارْثْ ن شّْرعْ أَكْ-ذ إِسْرَائِيل.“ ▪
3 ”أَ ڒْڭنْسْ إِنُو، مِينْ ذ أَشْ ڭِّيغْ،
ؤُ س مَانْثنْ إِ زِي شكْ سِّيحْڒغْ؟ شهّذْ ضِيدّْ إِنُو!
4 نشّْ نذْهغْ شكْ زِي ثمُّورْثْ ن مِيصْرَا،
زِي ثَادَّارْثْ ن ثسْمُوغِي.
نشّْ سّكّغْ-د مُوسَا ذ هَارُونْ ذ مَارْيَامْ زَّاثْ إِ ؤُغمْپُوبْ نّكْ. ▪
5 أَ ڒْڭنْسْ إِنُو، فكَّارْ مْلِيحْ ذِي ڒْغَارْ إِ ثُوغَا إِنكّْوَا أَذْ يڭّْ بَالَاكْ، أَجدْجِيذْ ن مُوآبَ،
ؤُ ذِي مِينْ خَاسْ د-يَارَّا بِيلْعَامْ، مِّيسْ ن بَاعُورْ
ؤُ ذِي مِينْ إِمْسَارنْ زِي سِيتِّيمْ أَڒْ جِيلْجَالْ،
حِيمَا أَذْ ثسّْنذْ ثِيمڭَّا إِسڭّْذنْ ن سِيذِي.“ ▪
مِينْ يَارزُّو سِيذِي زِي جَارْ ڒْڭنْسْ نّسْ؟
6 ”س مِينْ زِي غَا رَاحغْ أَذْ مّڒْقِيغْ أَكْ-ذ سِيذِي،
أَذْ أَضَارغْ زَّاثْ إِ أَربِّي يُوعْڒَانْ؟
مَا أَذْ رَاحغْ أَذْ ث مّڒْقِيغْ س ثْغَارْصَا ن وشْمَاضْ،
نِيغْ س إِينْذُوزنْ ن إِجّْ ن ؤُسڭّْوَاسْ؟ ▫
7 مَا أَذْ يَارْضَا سِيذِي س ڒُوڒُوفْ ن إِشَارِّييّنْ،
س عشْرَا ن ڒُوڒُوفْ ن ثْغزْرَاثِينْ ن زّشْثْ؟
مَا أَذْ وْشغْ أَمنْزُو إِنُو إِ ؤُخطُّو إِنُو،
ڒْغِيدْجثْ ن ؤُعذِّيسْ إِنُو إِ دّْنُوبْ ن ڒعْمَارْ إِنُو؟
8 نتَّا إِسَّارْڭبْ إِ شكْ، أَ بْنَاذمْ، مِينْ إِشْنَانْ،
ؤُ مِينْ زَّايكْ إِتّتَّارْ سِيذِي، أَقَا أَذْ ثڭّذْ ڒْخَارْ،
أَذْ ثخْسذْ ثَامخْسِيوْثْ إِشوَّارنْ،
ؤُ أَذْ ثُويُورذْ أَكْ-ذ أَربِّي نّكْ س ؤُوَاضعْ!“ ▪
أَردّدْجْ ن إِعفَّاننْ
9 ”ثْمِيجَّا ن سِيذِي ثتّْڒَاغَا إِ ثنْذِينْثْ.
إِسمْ نّكْ إِتَّاوِي-د ؤُفكِّي.
سْڒمْ إِ وعْمُوذْ ؤُ غَارْ ونِّي ث-إِ-د إِسّكّنْ!
10 مَا ذِينْ عَاذْ ڒخْزِينْ شُّورنْ س ڒْغَارْ ذِي ثَادَّارْثْ ن ؤُعفَّانْ
ؤُڒَا ذ إِجّْ ن نّْعِي ن ڒْمُوذْ ن إِفَا إِنْقصْ؟
11 مَا إِزمَّارْ أَذْ إِڒِيغْ ذ أَمزْذَاڭْ س ڒْمِيزَانَاثْ ن ڒْغَارْ،
ؤُ س يِيشْثْ ن ثشْيَارْثْ ثشُّورْ س ڒوْزْنَاثْ إِغشّنْ؟ ▪
12 أَيْثْ بُو-وَاڭْڒَا نّسْ أَقَا شُّورنْ س لْعُونْفْ،
ؤُڒَا ذ إِمزْذَاغْ نّسْ قَّارنْ إِخَارِّيقنْ
ؤُ إِڒسْ نْسنْ أَقَا إِتّْغشَّا ذڭْ ؤُقمُّومْ نْسنْ.“ ▪
13 ”خنِّي نشّْ أَقَا جَارْحغْ شمْ س ثيِّيثَا،
أَقَا ثتّْوَاردّْدْجذْ زِي سِّيبّثْ ن دّْنُوبْ نّمْ.
14 أَذْ ثشّذْ، مَاشَا وَارْ ثتّْجِيوِينذْ،
ؤُ أَذْ ذَايمْ يِيڒِي ڒَاژْ ذِي ذَاخڒْ نّمْ.
أَذْ ثفّْغذْ،
مَاشَا وَارْ ثْنجّْمذْ،
ؤُ مِينْ إِنجْمنْ،
أَذْ ث سّعْذُوغْ إِ سِّيفْ. ▪
15 ڭُّورْ أَذْ ثْزَارْعذْ، مَاشَا وَارْ ثْمجَّارذْ،
أَذْ ثدّْزذْ أَژمُّورْ، مَاشَا وَارْ ثْذهّْنذْ إِخفْ نّمْ س زّشْثْ
أَذْ ثْژمّذْ ؤُڒَا ذ بِينُو ن جْذِيذْ زڭْ ؤُضِيڒْ، مَاشَا وَارْ ڭُّورْ أَذْ ثسّْوذْ بِينُو. ▪
16 مَاغَارْ نِيثْنِي حطَّانْ ثِيوصَّا ن عُومْرِي
ؤُ مَارَّا ثِيمڭَّا ثِيعفَّانِينْ ن ثَادَّارْثْ ن أَخَابْ،
ؤُ كنِّيوْ ثْضفَّارمْ ڒشْوَارْ نْسنْ،
أَڒَامِي شمْ إِ غَا يَارّغْ إِ ؤُردّدْجْ ؤُڒَا ذ إِمزْذَاغْ نّسْ إِ ؤُسمْژِي.
أَمُّو إِ غَا يَارْپُونْ نِيثْنِي ڒْحڭْرَا ن ڒْڭنْسْ إِنُو.“ ▪