‏1 أَوَاڒْ ن سِيذِي إِ د-يُوسِينْ غَارْ مِيخَا، أَمُورَاشْثِي، ذڭْ وُوسَّانْ ن يُوثَامْ ذ أَحَازْ ذ حِيزْقِييَا، إِجدْجِيذنْ ن يَاهُوذَا، أَوَاڒْ إِ إِژْرَا خْ سَامَارْيَا ذ ؤُرْشَالِيمْ.

‏2 ”سْڒمْ-د، مَارَّا كنِّيوْ، أَ ڒڭْنُوسْ،

إِڒِيمْ ثْفثْنمْ، أَ شمْ، ثَامُّورْثْ ذ ؤُعمَّارْ نّسْ!

سِيذِي إِنُو، سِيذِي، أَذْ يِيڒِي ذ أَشهَّاذْ خَاومْ،

سِيذِي إِنُو زِي زَّاوشْثْ نّسْ إِقدّْسنْ. ^▪  

‏3 مَاغَارْ خْزَارمْ، سِيذِي إِفّغْ-د زڭْ ومْشَانْ نّسْ ن ثْزذِّيغْثْ،

ؤُ نتَّا أَذْ د-إِهْوَا ؤُ أَذْ إِصُورْفْ خْ ڒڭْعُوذِي ن ثمُّورْثْ. ^▪  

‏4 إِذُورَارْ أَذْ فسْينْ سَاذُو نّسْ،

ؤُ ثِيغْزُورِينْ أَذْ تّْوَابْضَانْثْ،

أَمْ شّْمعْ زَّاثْ إِ وُوذمْ ن ثْمسِّي،

أَمْ وَامَانْ نِّي د-إِتّْوَافَارّْغنْ زِي ثيْسَارْثْ. ^▪  

‏5 أَيَا مَارَّا إِتّمْسَارْ زِي سِّيبّثْ ن ؤُخطُّو ن يَاعْقُوبْ،

ؤُ زِي سِّيبّثْ ن دّْنُوبْ ن ثَادَّارْثْ ن إِسْرَائِيل.

مِينْ إِدْجَانْ ذ خطُّو ن يَاعْقُوبْ؟

مَا وَارْ إِدْجِي ذ سَامَارْيَا؟

ؤُ مِينْ دْجَانْ ذ ڒڭْعُوذِي ن يَاهُوذَا؟

مَا وَارْ ثدْجِي ذ ؤُرْشَالِيمْ؟

‏6 نشّْ أَذْ أَرّغْ سَامَارْيَا ذ ڒْخَارْبثْ ذڭْ إِيَّارْ،

ذ أَمَارْجُوعْ مَانِي إِ غَا ژُّونْ ثَازَايَارْثْ،

ؤُ نشّْ أَذْ نْضَارغْ إِژْرَا نّسْ ذِي ثغْزُورْثْ،

ؤُ أَذْ عَارِّيغْ خْ ذْسُوسَا نّسْ.

‏7 مَارَّا ڒخْيَاڒَاثْ نّسْ إِنقْشنْ أَذْ تّْوَاڒذْدْجنْثْ

ؤُ مَارَّا ڒْمُونثْ نّسْ ن فَارْقْ-شّْغڒْ أَذْ ت سّْشمْضنْ س ثْمسِّي،

ؤُ مَارَّا ڒخْيَاڒَاثْ نّسْ إِنقْشنْ أَذْ ثنْثْ أَردّْدْجغْ نشّْ،

\qt مَاغَارْ نتَّاثْ ثْيَاروْ إِ-ثنْثْ زِي ڒْمُونثْ ن فَارْقْ-شّْغڒْ،

ؤُ نِيثنْثِي أَذْ د-ذوْڒنْثْ عَاوذْ ذْ ڒْمُونثْ ن فَارْقْ-شّْغڒْ.“

‏8 ”خْ ؤُيَا أَذْ شضْنغْ ؤُ أَذْ وْثغْ أَڭجْذُورْ،

أَذْ ؤُيُورغْ س ڒحْفَا ذ أَعَارْيَانْ،

أَذْ سّْمِيعْوغْ أَمْ وُوشَّاننْ ن ڒخْڒَا،

ؤُ أَذْ سْغُويّغْ أَمْ يسِّيسْ ن نّْعَامثْ. ^▪  

‏9 مَاغَارْ إِيزِّيمنْ نّسْ نقّنْ،

مَاغَارْ أَيَا يُوسَا-د أَڒْ يَاهُوذَا،

إِوسّعْ ڒْحُوكْمْ أَڒْ ثِيوُّورَا ن ڒْڭنْسْ إِنُو،

أَڒْ ؤُرْشَالِيمْ.

‏10 وَارْ تّْبَارّْحمْ شَا مَانْ أَيَا ذِي جَاثْ،

إِمطَّاونْ، لَّ، وَارْ ثتّْرُومْ.

ذِي بَايْثْ-لِيئَافْرَا زُوزَّارغْ ؤُشَاڒْ خْ يِيخفْ إِنُو. ^▪  

‏11 عْذُو، شمْ ثنِّي إِزدّْغنْ ذِي شَافِيرْ،

ذ أَعَارْيَانْ ؤُ س ڒحْيَا.

ثنِّي إِزدّْغنْ ذِي صَانَانْ وَارْ ثفّغْ شَا.

ثَاغُويِّيثْ ن وشْضَانْ ن بَايْثْ-هَا-إِطْصِيلْ

ثكّسْ زَّايْومْ أَبذِّي نّسْ أَكِيذْومْ. ^▪  

‏12 مَاغَارْ ثنِّي إِزدّْغنْ ذِي مَارُوثْ،

ثتّقْنُونُّويْ غَارْ مَارَّا ثِيغمُّورَا ذِي طّْوعْ ن ڒْخَارْ،

مِينْزِي أَقَا إِهْوَا-د ڒْغَارْ ن سِيذِي،

أَڒْ ثَاوَّارْثْ ن ؤُرْشَالِيمْ. ^▫  ▪  

‏13 حزّْممْ إِيْسَانْ ن ثَازْڒَا زَّاثْ إِ ؤُكَارُّو،

أَ شمْ، ثنِّي إِزدّْغنْ ذِي لَاخِيشْ!

نتَّاثْ ذ بطُّو ن دّنْبْ ن يدْجِيسْ ن صِيهْيُونْ،

مَاغَارْ ذَايكْ تّْوَافنْ إِخطَّانْ ن إِسْرَائِيل.

‏14 س ؤُينِّي أوْشْ أَرِّيغَالُوثنْ ن ؤُمْسبْضِي

إِ مُورَاشَاثْ-جَاثْ!

ثُوذْرِينْ ن أَكْزِيبْ أَذْ ذوْڒنْثْ ذ ڒْغشّْ

إِ إِجدْجِيذنْ ن إِسْرَائِيل.

‏15 عَاوذْ نشّْ أَذْ أَمْ د-أَوْيغْ أَوْرِيثْ،

أَ شمْ ثنِّي إِزدّْغنْ ذِي مَارِيشَا!

أَعُودْجِي ن إِسْرَائِيل أَذْ د-يَاسْ أَڒْ غَارْ عَاذُولَّامْ.

‏16 أڭّْ إِخفْ نّمْ ذ ثَاقشَّارْثْ ؤُ حفّْ إِ إِخفْ نّمْ

ذِي سِّيبّثْ ن إِحنْجِيرنْ نّمْ إِعِيزّنْ.

أَرّْ ثَاقشَّارْثْ نّمْ ذ ثَامقّْرَانْثْ

أَمشْنَاوْ أَڭِيذرْ،

مِينْزِي تّْوَاوْينْ زَّايمْ غَارْ ثْمحْبَاسْثْ.“