إِعْڒَامنْ إِ إِسْرَائِيل ؤُ إِ ڒْحُوكَّامْ نّسْ
2
1 ”ؤُشْثْ خْ ينِّي إِتّْخمَّامنْ ذِي ڒْمُوعْصِييّثْ ؤُ خْ ينِّي إِتّْخمَّامنْ ذِي ڒْغَارْ ذِي قَامَاثْ نْسنْ.
غَارْ ثفُّوثْ أَذْ ث ڭّنْ،
مَاغَارْ أَفُوسْ نْسنْ ذَايسْ أَطَّاسْ ن ثْزمَّارْ.
2 نِيثْنِي مّژْڒنْ ذڭْ إِيَّارنْ
ؤُشَا تّْكشّْضنْ ثنْ عَاوذْ،
ؤُڒَا ذ ثُوذْرِينْ، ؤُشَا تّطّْفنْ ثنْثْ.
أَمُّو إِ ڭِّينْ نِيثْنِي س ڒخْشُونشْثْ إِ ورْيَازْ ؤُ إِ ثَادَّارْثْ نّسْ،
وَاهْ، إِ كُوڒْ أَرْيَازْ ؤُ إِ ثسْغَارْثْ نّسْ.“ ▪
3 ”س ؤُينِّي، إِنَّا سِيذِي:
خْزَارْ، نشّْ ثْونِّيغْ إِجّْ ن ڒْغَارْ خْ ڒَادْجْ-أَ،
إِ زِي وَارْ ثْزمَّارمْ أَذْ ثْجبْذمْ إِرَاونْ نْومْ،
ؤُ إِ زِي وَارْ ثْزمَّارنْ أَذْ ثُويُورمْ عَاذْ س ؤُعفَّارْ،
مَاغَارْ أَذْ ثِيڒِي ذ إِشْثْ ن ڒْوقْثْ ثَاعفَّانْثْ.▪
4 ذڭْ وَاسّْ نِّي أَذْ خَاومْ سّْڭعّْذنْ إِجّْ ن لْمَاثَالْ
ؤُ أَذْ غنّْجنْ إِجّْ ن يژْرِي ن وشْضَانْ أَمْ تّْشثْشَانْ،
ؤُ أَذْ إِنِينْ: نشِّينْ نتّْوَاردّدْجْ قَاعْ!
نتَّا يَارَّا ثَاسْغَارْثْ ن ڒْڭنْسْ إِنُو غَارْ ونّغْنِي.
مَامّشْ ت إِكْسِي زَّايِي.
نتَّا إِوْشَا إِيَّارنْ نّغْ إِ ونِّي د-إِفّْغنْ زڭْ وبْرِيذْ!
5 س ؤُينِّي وَارْ غَاركْ إِتِّيڒِي ؤُڒَا ذ إِجّنْ
ونِّي إِ غَا إِنْضَارنْ أَفِيڒُو ن ڒقْيَاسْ عْلَاحْسَابْ ثَاقدُّوحْثْ
ذڭْ وڭْرَاوْ ن ڒْڭنْسْ ن سِيذِي.“ ▪
6 ” ’وَارْ سُّوفُّوغمْ أَوَاڒْ أَمُّو س ؤُكُوفُّو!‘،
أَمُّو إِ سَّاوَاڒنْ نِيثْنِي أَمْ سُّوفُّوغنْ كُوفُّو.
’خْ مَانْ أَيَا وَارْ زمَّارنْ نِيثْنِي أَذْ سُّوفّْغنْ أَوَاڒْ س ؤُكُوفُّو!‘
أَمُّو إِ غَا ثِيڒِي ڒفْضِيحثْ وَارْ ثتّْوَاكّسّْ! ▪
7 أَ كنِّيوْ، ثَادَّارْثْ ن يَاعْقُوبْ، مَا إِزمَّارْ أَذْ إِتّْوَانَّا أَيَا؟
’مَا إِجَّا شَا أَرُّوهْ ن سِيذِي وَارْ ث إِڭِّي؟‘
نِيغْ: ’مَا ثِينَا ذ ثِيمڭَّا نّسْ؟‘
مَا وَارْ تّڭّنْ وَاوَاڒنْ إِنُو ڒْخَارْ
إِ ينِّي إِڭُّورنْ س ثْسڭْذَا؟
8 مَاشَا عَاذْ إِذنَّاضْ إِكَّارْ ڒْڭنْسْ إِنُو أَمْ يِيجّْ ن ڒعْذُو.
ثكْسِيمْ أَرُّوضْ ذ ؤُبَارْثسُّو
زڭْ إِمْسبْرِيذنْ إِقفْڒنْ،
إِنِّي إِتّْعِيفّنْ ؤُمنْغِي.
9 كنِّيوْ ثسُّوفُّوغمْ ثِيمْغَارِينْ ن ڒْڭنْسْ إِنُو
زِي ثَادَّارْثْ نْسنْثْ إِعِيزّنْ.
إِحنْجِيرنْ نّسْ ثكّْسمْ أَسنْ كنِّيوْ ثَالْوِيزْثْ إِنُو إِ ڒبْذَا.
10 كَّارمْ ؤُ أَڭّْوجمْ،
مِينْزِي وَا وَارْ إِدْجِي ذ أَمْشَانْ ن أَرَّاحثْ!
مَاغَارْ أَقَا ثَامُّورْثْ ثتّْوَاسخْمجْ، أَذْ ثَاوِي أَردّدْجْ،
وَاهْ إِجّْ ن ؤُمدُّورْ وَارْ إِشْنِينْ.
11 مَاڒَا شَا ن إِجّْ إِضفَّارْ أَسمِّيضْ ؤُ إِقَّارْ إِخَارِّيقنْ، ؤُشَا إِقَّارْ:
’نشّْ أَذْ أَشْ سُّوفّْغغْ أَوَاڒنْ س ؤُكُوفُّو ذِي طّْوعْ ن بِينُو ذ شّْرَابْ!‘
أَقَا نتَّا خنِّي ذ ؤُنَابِي ن ڒْڭنْسْ نِّي إِسُّوفُّوغنْ أَوَاڒنْ س ؤُكُوفُّو.“
12 ”س ثِيذتّْ، أَ يَاعْقُوبْ، نشّْ أَذْ شكْ كْسِيغْ غَارِي قَاعْ،
نِيشَانْ نشّْ أَذْ سّْمُونغْ مِينْ إِقِّيمنْ زِي إِسْرَائِيل.
أَذْ ثنْ سّْمُونغْ أَمْ وُودْجِي ن بُوشْرَا،
أَمْ إِشْثْ ن ثْحِيمَارْثْ ذِي ڒْوسْثْ ن ثْركّْوَاسْثْ.
أَذْ ذِينْ يِيڒِي إِجّْ نْ ؤُعُورِّيشْ ن إِوْذَانْ.
13 أَمْفدْجقْ أَذْ إِزْوَارْ زَّاثْ إِ وُوذمْ نْسنْ،
نِيثْنِي أَذْ فدْجْقنْ ؤُ أَذْ عْذُونْ خْ ثوَّارْثْ،
ؤُ أَذْ زَّايسْ د-فّْغنْ.
أَجدْجِيذْ نْسنْ أَذْ إِزْوَارْ زَّاثْ إِ ؤُغمْپُوبْ نْسنْ،
ؤُ سِيذِي غَارْ ؤُزدْجِيفْ نْسنْ.“