ڒْحُوكَّامْ ذ إِنَابِييّنْ ن إِسْرَائِيل تّْفشْڒنْ
3
1 ”خنِّي نِّيغْ نشّْ: ’سْڒمْ، أَ كنِّيوْ، إِزدْجِيفنْ ن يَاعْقُوبْ،
ؤُ كنِّيوْ، ڒْحُوكَّامْ ن ثَادَّارْثْ ن إِسْرَائِيل!
مَا وَارْ إِتّْخصِّي إِ كنِّيوْ أَذْ ثسّْنمْ ثَاسْغَارْثْ؟
2 نِيثْنِي شَارّْهنْ مِينْ إِشْنَانْ
ؤُ تّخْسنْ مِينْ إِدْجَانْ ذ أَعفَّانْ!
نِيثْنِي كّْسنْ أَسنْ ثِيڒْمشْثْ
ؤُڒَا ذ أَيْسُومْ خْ إِخْسَانْ نْسنْ.
3 وَاهْ، أَقَا أَثنْ ذ ينِّي إِتّتّنْ أَيْسُومْ ن ڒْڭنْسْ إِنُو
ؤُشَا كّْسنْ أَسنْ ثِيڒْمشْثْ ؤُشَا تَّارژَّانْ إِخْسَانْ نْسنْ.
نِيثْنِي تّْبزَّاعنْ ثنْ أَمْ ذِي مَارْمِيثَا،
أَمْ ويْسُومْ ذڭْ ؤُطنْجِيرْ.“
4 ”ڒخْذنِّي أَذْ سْغُويّنْ غَارْ سِيذِي،
مَاشَا وَارْ خَاسنْ د-إِتَّارِّي.
أَذْ خَاسنْ إِفَّارْ ؤُذمْ نّسْ ذِي ڒْوقْثْ نِّي،
زِي سِّيبّثْ ن ڒْغَارْ إِ إِڭِّينْ.“
5 ”أَمُّو إِ إِقَّارْ سِيذِي إِ إِنَابِييّنْ
إِنِّي إِتّْغَارَّانْ ڒْڭنْسْ إِنُو،
إِنِّي ؤُمِي غَارْسنْ عَاذْ مِينْ ذِي إِ غَا إِزعْفنْ س ثغْمَاسْ نْسنْ،
أَذْ ڒَاغَانْ ’ڒهْنَا!‘،
مَاشَا ضِيدّْ ن ونِّي وَارْ ذ أَسنْ إِتّڭّْ وَالُو ذڭْ ؤُقمُّومْ نْسنْ،
أَذْ خَاسْ قدّْسنْ إِجّْ ن ؤُمنْغِي. ▪
6 خْ ؤُينِّي أَذْ خَاومْ د-ثوْضَا دْجِيڒثْ بْڒَا ثَامژْرِيوْثْ،
ؤُ أَذْ خَاومْ د-إِوْضَا ثَادْجسْثْ بْڒَا ثَاڭزَّانْثْ
ؤُشَا أَذْ ثغْڒِي ثْفُوشْثْ خْ إِنَابِييّنْ
ؤُ أَذْ إِبَّارْشنْ وَاسّْ ثِيوَا نْسنْ. ▪
7 إِمْوَاڒَاونْ أَذْ سّضْحَانْ،
ؤُ إِڭزَّاننْ أَذْ ذوْڒنْ زوْغْونْ س ڒحْيَا،
ؤُ نِيثْنِي مَارَّا أَذْ ذْڒنْ شّْنَابَارْ نْسنْ،
مِينْزِي ثْوَارِّيثْ ن أَربِّي وَارْ د-ثتِّيسْ شَا.
8 مَاشَا نشّْ شُّورغْ س جّهْذْ
ن أَرُّوحْ ن سِيذِي،
ؤُ س ڒْحقّْ ذ ثرْيَاسْثْ،
حِيمَا أَذْ بَارّْحغْ إِ يَاعْقُوبْ خْ ؤُخطُّو نّسْ
ؤُ إِ إِسْرَائِيل خْ دّنْبْ نّسْ.“
9 ”سْڒمْ خنِّي غَارْ مَانْ أَيَا، أَ إِزدْجِيفنْ ن ثَادَّارْثْ ن يَاعْقُوبْ
ؤُ كنِّيوْ إِمقّْرَاننْ ن ثَادَّارْثْ ن إِسْرَائِيل،
إِنِّي إِشَارّْهنْ ڒْحقّْ،
ؤُ سّْفَارَّاغنْ مَارَّا مِينْ إِدْجَانْ إِسڭّمْ، ▪
10 إِنِّي إِبنَّانْ صِيهْيُونْ س إِذَامّنْ،
ؤُ ؤُرْشَالِيمْ س ڒْغشّْ. ▪
11 إِزدْجِيفنْ نّسْ تّْضبَّارَانْ دّْعَاوِي إِ أَرّشْوثْ،
إِكهَّاننْ نّسْ سّڒْمَاذنْ س ڒْمُونثْ،
ؤُ إِكهَّاننْ نّسْ تّْڭزَّاننْ س تّْمنْيَاثْ.
أَقَا نِيثْنِي تّْشَاڒنْ خْ سِيذِي خْمِي قَّارنْ:
’مَا وَارْ إِدْجِي سِيذِي ذِي ڒْوسْثْ نّغْ؟
وَارْ ذ أَنغْ إِڒقّفْ ڒْغَارْ.‘
12 خْ ؤُيَا، أَقَا-ت زَّايْومْ،
أَقَا أَذْ شَارْزنْ صِيهْيُونْ أَمْ إِجّْ ن ييَّارْ،
أَذْ ثذْوڒْ ثنْذِينْثْ ن ؤُرْشَالِيمْ ذ إِشْثْ نْ ڒْخَارْبثْ،
ؤُ أَذْرَارْ ن ثَادَّارْثْ ذ ڒڭْعُوذِي ن وزْغَارْ.“ ▫