أَوطُّو ن نِينْوَا
2
1 خْزَارْ، خْ إِذُورَارْ تَّازّْڒنْ إِضَارنْ ن ونِّي د-يِيوْينْ ڒخْبَارْ أَصبْحَانْ، ونِّي إِخبَّارنْ س ڒهْنَا.
عيّذْ ڒعْيُوذَاثْ نّكْ، أَ يَاهُوذَا،
سقْفڒْ لْوُوعُوذْ نّكْ،
مَاغَارْ ونِّي وَارْ إِسكّْوِينْ وَالُو وَارْ إِتّْغِيمِي إِژكّْوِي خَاكْ عَاذْ،
نتَّا إِنّقْضعْ مَارَّا. ▪
2 إِجّنْ ونِّي يُوژّْڒنْ خْ إِوْذَانْ س لْعُونْفْ إِ د-إِڭعّذْ خَاكْ!
عسّْ خْ لْپُورْجْ،
حْضَا أَبْرِيذْ،
سمْحضْ ثِيجْعِينَّا نّكْ،
أَرْنِي ذِي جّْهذْ نّكْ!
3 س مِينْزِي سِيذِي أَذْ د-يَارّْ ڒْعزّْ ن يَاعْقُوبْ،
أَقَا-ث ذ ڒْعزّْ ن إِسْرَائِيل.
مَاغَارْ إِكشَّاضنْ كشّْضنْ ثنْ،
ؤُ نِيثْنِي غضْڒنْ ثِيزرْمِينْ نْسنْ. ▪
4 ثْشَابَّاثْ ن ؤُسڒْقِي ن أَيْثْ ن بُو-ثغْرُوضْثْ زوْغنْثْ،
إِرْيَازنْ إِمحْضنْ بدّنْ سّْوجْذنْ إِ ؤُمنْغِي
س وَارُّوضْ أَزڭّْوَاغْ يُوژْغنْ،
غَارْ ثسِّيقْثْ ن ثْمسِّي ن وُوزَّاڒْ ن إِكَارُّوثنْ ن ؤُمنْغِي،
ذڭْ وَاسّْ إِ ذِي إِ غَا إِسّوْجذْ إِخفْ نّسْ
ؤُ ثِيشجِّيرَا ن ؤُمرْزِي أَذْ نّْهزّنْ. ▫
5 إِكَارُّوثنْ ن ؤُمنْغِي هَاجنْ ذڭْ إِبْرِيذنْ،
أَقَا ژّعْوَاضنْ زِي سَّا غَارْ ذَا ذڭْ وَازَّاينْ،
تّْوَاضْهَارنْ أَمْ إِصفْضَاونْ،
نِيثْنِي ڭمَّارنْ ذَا ذ ذِيهَا أَمْ وَاسَّامنْ.
6 نتَّا إِتّْخَارّصْ ذڭْ أَيْثْ ن جّهْذْ،
نِيثْنِي مَاشَا تّْنقْرَاضنْ أَمْ ڭُّورنْ
نِيثْنِي تَّازّْڒنْ غَارْ ڒْحِيضْ نْسنْ،
مَانِي إِبدّْ سّْقفْ ن ؤُهْجَامْ إِوْجذْ.
7 ثِيوُّورَا ن إِغزْرَانْ نُّورزْمنْثْ،
ؤُ ڒقْصَارْ أَذْ إِفْسِي.
8 أَقَا ثَامسْڒَاشْثْ ثْبدّْ نِيشَانْ!
نتَّاثْ أَذْ ثتّْوَاعَارَّا،
أَذْ ثتّْوَاسْڭعّذْ،
ؤُ ثِيسمْغِينْ نّسْ سْغُويُّونْثْ
أَمشْنَاوْ أَبَارِّي ن ثذْبِيرِينْ،
أَمْ شَّاثنْثْ ذڭْ إِذْمَارنْ نْسنْثْ. ▫
9 نِينْوَا أَمْ يِيجّْ ن ؤُيڒْمَامْ ن وَامَانْ زڭْ وَاسّْ إِ ذِي إِدْجْ.
ڒخُّو مَاشَا أَركّْوڒنْ نِيثْنِي.
بدّمْ! بدّمْ!، تّْڒَاغَانْ نِيثْنِي،
مَاشَا ؤُڒَا ذ إِجّْ وَارْ د-إِتّْنقْڒِيبْ.
10 كشّْضمْ نُّوقَارْثْ، كشّْضمْ ؤُرغْ!
وَارْ ذِينْ قطُّو إِ ڒكْنُوزْ ،
غَارْ ؤُشوَّارْ ن عْڒَامْ كُوڒْ ڒقْشُوعْ.
11 ثخْوَا، ثتّْوَاكشّضْ ؤُ ثتّْوَاردّدْجْ نتَّاثْ،
ؤُڒْ إِفْسِي ؤُشَا إِفَادّنْ فشْڒنْ،
ؤُ تّكّْسنْثْ أَسْ ثِيجْعِينَّا مَارَّا
ؤُ إِغمْبَابْ نْسنْ وَارْغنْ مَارَّا. ▪
12 مَانِي إِدْجْ ڒخُّو ڒْمَارْڭحْ ن وَايْرَاذنْ،
ذ ڒْمذْوڒْ ن وَايْرَاذنْ إِمژْيَاننْ،
مَانِي يُويُورْ ويْرَاذْ، أَقَا-ت ذ ثَايْرَاذْثْ، أَكْ-ذ ويْرَاذْ أَمژْيَانْ
أَمْ ؤُڒَا ذ إِجّْ مَا إِسّْنخْڒعْ إِ-ثنْ؟
13 مَانِي إِدْجْ ڒخُّو وَايْرَاذْ نِّي إِمزّْقنْ مِينْ حْذَاجنْ ثَارْوَا نّسْ
ؤُ إِجيّفْ إِ ثَايْرَاذِينْ نّسْ،
ذ ونِّي إِشُّورنْ إِفْرَانْ نّسْ س ؤُكشّضْ،
ذ إِمُوشَانْ نّسْ ن ؤُذُورِّي زِي مِينْ إِتّْوَاشَارّْڭنْ؟
14 خْزَارْ، نشّْ أَذْ إِڒِيغْ خَاكْ، أَمُّو إِ إِقَّارْ سِيذِي ن ڒْعسْكَارْ،
نشّْ أَذْ أَرّغْ إِكَارُّوثنْ نّكْ ذ دّخَّانْ،
ؤُ أَذْ شّغْ سِّيفْ ن ويْرَاذنْ نّكْ إِمژْيَاننْ،
ؤُ نشّْ أَذْ قضْعغْ ثَاكشَّاضْثْ نّكْ زِي ثمُّورْثْ
ؤُ عمَّارْصْ عَاذْ أَذْ ثتّْوَاسڒْ ثْمِيجَّا ن إِرقَّاسنْ نّكْ. ▫