إِزْڒِي ن ثمُّورْثْ ن يَاهُوذَا
26
1 ذڭْ وَاسّْ نِّي أَذْ غنّْجنْ إِزْڒِي أَيَا ذِي ثمُّورْثْ ن يَاهُوذَا: نشِّينْ غَارْنغْ إِشْثْ ن ثنْذِينْثْ إِجهْذنْ،
نتَّا إِسّْبدّْ ’أَسنْجمْ‘ ذْ ڒحْيُوضْ ذ ڒقْوَارَاثْ. ▪
2 أَرْزْممْ ثِيوُّورَا،
مَاحنْذْ ڒْڭنْسْ أَمْسڭّذْ أَذْ د-يَاذفْ،
ونِّي إِحطَّانْ ڒَامَانْ إِ سِيذِي ڒبْذَا.
3 س ڒْبَاڒْ إِمْثنْ أَمْ ث إِدْجْ،
شكْ ثْحطِّيذْ ث ذِي ڒهْنَا،
وَاهْ ذِي ڒهْنَا، مَاغَارْ ڒْڭنْسْ إِتّْشَاڒَا خَاكْ.“
4 ”ثشْڒمْ خْ سِيذِي إِ ڒبْذَا،
مَاغَارْ ذِي سِيذِي، سِيذِي، إِ ثدْجْ ثصْضَارْثْ ن ڒبْذَا.
5 مَاغَارْ نتَّا إِتَّارَّا إِنِّي إِزدّْغنْ ذِينِّي ذِي ڒُوعْڒَا أَذْ أَضَارنْ،
ثَانْذِينْثْ يُوعْڒَانْ أَذْ ت إِسّهْوَا،
أَذْ ت إِسّهْوَا أَڒْ ثَامُّورْثْ،
أَذْ ت إِعَارْنْ ذڭْ ؤُشَاڒْ.
6 أَذْ خَاسْ إِعْفسْ ؤُضَارْ،
إِضَارنْ ن ونِّي إِتّْوَاحْصَارنْ،
ڒَاثَارَاثْ ن إِضَارنْ ن إِمزْڒَاضْ.“
7 ”أَبْرِيذْ ن ؤُمْسڭّذْ إِوَاطَا،
نِيشَانْ إِ إِدْجْ ڒَاثَارْ ن ؤُمْسڭّذْ،
شكْ ثتّْسڭَّامذْ ث.
8 ؤُڒَا ذڭْ وبْرِيذْ ن ڒحْكَامَاثْ نّكْ، أَ سِيذِي،
ثُوغَا نسِّيثِيمْ أَشْ،
ڒعْمَارْ نّغْ إِمّژْرِي ذڭْ يِيسمْ نّكْ ؤُ ذِي ڒِيذَارثْ نّكْ.
9 ثُوغَا ڒعْمَارْ إِنُو إِتّْوحَّاشْ إِ شكْ ذِي دْجِيڒثْ،
ؤُڒَا ذ بُوحْبڒْ إِنُو ذَايِي، ثُوغَا يَارزُّو خَاكْ س جّهْذْ.
مَاغَارْ مَاڒَا ڒحْكَامَاثْ نّكْ ؤُسِينْثْ-إِ-د خْ ثمُّورْثْ،
أَذْ ڒمْذنْ إِمزْذَاغْ ن ثمُّورْثْ ثَاسڭْذَا.“
10 ”مَاڒَا إِسّْشنْ بْنَاذمْ أَحِينِّي إِ ؤُعفَّانْ،
وَانِيثَا وَارْ إِڒمّذْ ثَاسڭْذَا،
مَاشَا أَذْ يڭّْ ڒْغَارْ ذِي ثمُّورْثْ إِشُّورنْ س ثْسڭْذَا،
ؤُ وَارْ إِژَارّْ أَعُودْجِي ن سِيذِي.“
11 ”أَ سِيذِي، أَفُوسْ نّكْ إِتّْوَاسْڭعَّاذْ،
مَاشَا نِيثْنِي وَارْ ث تّْوِيڒِينْ.
وَاخَّا أَمنِّي أَذْ ث ژَترنْ عَاذْ،
مَاشَا أَذْ سّضْحَانْ زڭْ وَاسَامْ نّكْ إِ ڒْڭنْسْ نّكْ،
وَاهْ، ثِيمسِّي أَذْ ثشّْ إِغْرِيمنْ نّكْ.
12 أَ سِيذِي، ڒْحُوكْمْ نّكْ خَانغْ أَذْ يِيڒِي ذ ڒهْنَا،
مَاغَارْ شكْ ثْكمّْڒذْ مَارَّا ثِيمڭَّا نّغْ ذِي طّْوعْ نّغْ.
13 أَ سِيذِي، أَربِّي نّغْ، إِسِيذِيثنْ نّغْنِي سدْجْضنْ خَانغْ.
زَّايكْ شكْ وحّْذكْ أَقَا نتِّيذَارْ إِسمْ نّكْ.
14 إِمتَّانْ وَارْ تّدَّارنْ عَاوذْ، ڒخْيَاڒَاثْ وَارْ تّتّْنكَّارنْ.
إِ ؤُيَا ثْخڒْفذْ أَسنْ س ڒْغَارْ ؤُشَا ثقْضِيذْ ثنْ.
شكْ ثكّْسذْ مَارَّا ڒْعقْرَانْ خَاسنْ.
15 أَ سِيذِي، شكْ ثَارْنِيذْ ذِي ڒْڭنْسْ-أَ،
شكْ ثَارْنِيذْ ذِي ڒْڭنْسْ-أَ،
ثتّْوَاسْعُودْجذْ ذَايسْ،
أَقَا ثسّْوسْعذْ مَارَّا إِيْمِيرنْ ن ثمُّورْثْ.“
16 ”أَ سِيذِي، ذِي ڒحْصَارثْ أَرْزُونْ خَاكْ،
زدْجْعنْ ثِيژَادْجِيثِينْ نْسنْ س ثْحسّشْثْ
ؤُمِي خَاسنْ د-يُوسَا ؤُودّبْ نّكْ.
17 أَمْ مَامّشْ ثتّْنزْبَارْ إِشْثْ ن ثمْغَارْثْ س دّيْسثْ،
ثنِّي إِڭُّورنْ أَذْ ثَارُو أَحنْجِيرْ نّسْ
ؤُ ثسْغُويُّو س ڒوْجعْ ن ثَارُوثْ نّسْ،
أَمُّو إِ ذ أَنغْ ثُوغَا نشِّينْ، أَ سِيذِي، زَّاثْ إِ ثِيطَّاوِينْ نّكْ. ▪
18 ثُوغَا نشِّينْ أَخْمِي نكْسِي س دّيْسثْ، إِمْنعْ أَنغْ ڒحْرِيقْ ن ثَارْوَا،
ثُوغَا نشِّينْ أَخْمِي نُورُو أَسمِّيضْ.
وَارْ د-نِيوِي أَسنْجمْ إِ ثمُّورْثْ،
ؤُ إِمزْذَاغْ ن دُّونشْثْ وَارْ د-تّْوَاخڒْقنْ.“
19 ”إِمتَّانْ نّكْ أَذْ دَّارنْ!
ڒْخشْبَاثْ إِنُو أَذْ بدّنْثْ!
فَاقمْ، ؤُشَا سْڒِيوڒْومْ كنِّيوْ، إِنِّي إِزدّْغنْ ذڭْ ؤُشَاڒْ!
أَقَا نّْذَا ن ثْفَاوِينْ أَمْ نّْذَا نّكْ،
ؤُشَا ثَامُّورْثْ أَذْ ثَارُو ڒخْيَاڒَاثْ ن إِمتَّانْ.“
20 ”ؤُيُورْ، أَ ڒْڭنْسْ إِنُو، أَذفْ غَارْ إِخَّامنْ نّكْ ن ذَاخڒْ،
بلّعْ ثِيوُّورَا أَوَارْنِي أَشْ.
سْنُوفَّارْ إِخفْ نّكْ ڒْقدّْ ن إِشْثْ ن ثْزحْزِيحْثْ
مَاحنْذْ أَذْ إِخْڒفْ إِ إِمزْذَاغْ ن ثمُّورْثْ ڒْمُوعْصِييّثْ نْسنْ،
ؤُشَا ثَامُّورْثْ أَذْ ثْعَارَّا إِذَامّنْ إِ خَاسْ إِتّْوَاسِّيزْڒنْ،
وَارْ ثْخمِّيڒْ عَاذْ إِنِّي خَاسْ إِتّْوَانْغنْ.“