إِزْڒِي ن ؤُقَاذِي خْ ؤُسنْجمْ
25
1 ”أَ سِيذِي، شكْ ذ أَربِّي إِنُو، نشّْ أَذْ شكْ سّْعُودْجغْ، أَذْ صبّْحغْ إِسمْ نّكْ،
مَاغَارْ شكْ ثڭِّيذْ ڒعْجبْ،
أَطَّاسْ ن شّْوَارْ نّكْ زڭْ وشْحَاڒْ ؤُيَا أَقَا-ث ذ ثِيذتّْ ؤُ ذَايسْ ڒَامَانْ.
2 شكْ ثَارِّيذْ ثَانْذِينْثْ ذ أَعُورِّيشْ ن يژْرَا،
ثَانْذِينْثْ إِتّْوَاسْجهْذنْ ذ ڒْخِيرْبثْ،
ڒقْصَارْ ن إِبَارَّانِييّنْ ذ ثَانْذِينْثْ
نِّي وَارْ سّْبذِّينْ عمَّارْصْ عَاوذْ. ▪
3 س ؤُينِّي أَذْ شكْ إِسّْعُودْجْ إِجّْ ن ڒْڭنْسْ إِجْهذْ،
ثَانْذِينْثْ ن ڒڭْنُوسْ إِقسْحنْ أَطَّاسْ أَذْ زَّايكْ ثڭّْوذْ.
4 مَاغَارْ ثُوغَا شكْ ذ لْقلْعَا إِ ؤُمَارْخُو،
ذ لْقلْعَا إِ ؤُمزْڒُوضْ
خْمِي إِتّْنحْصَارْ،
شكْ ذ أَذُورِّي إِ ونْژَارْ إِشَّاثنْ،
ؤُڒَا ذ ثِيڒِي ذِي ڒحْمُو
مِينْزِي لْحَارَاجْ ن أَيْثْ ن بُو-ڒخْشُونشْثْ أَقَا-ث أَمْ ونْژَارْ إِشَّاثنْ خْ ڒْحِيضْ.
5 أَمْ ڒحْمُو ذڭْ إِجّْ ن ومْشَانْ يُوژغْ،
أَمُّو إِ غَا ثسّغْذذْ لْحَارَاجْ ن إِبَارَّانِييّنْ،
أَمْ ثِيڒِي ن ؤُسيْنُو ثسّسْمِيضْ ڒهْمُو،
أَمُّو إِ غَا إِتّْوَاسّغْذْ إِزْڒِي ن أَيْثْ ن بُو-ڒخْشُونشْثْ.“
6 ”سِيذِي ن ڒْعسْكَارَاثْ أَذْ إِسّوْجذْ خْ وذْرَارْ-أَ
إِشْثْ ن زَّارْذثْ س مَاشَّا ثشُّورْ س ثْذُونْثْ خْ وذْرَارْ-أَ
إِ مَارَّا رڭْنُوسْ،
إِشْثْ ن زَّارْذثْ س بِينُو إِصبْحنْ قَاعْ،
س مَاشَّا ثشُّورْ س ثْذُونْثْ ذ وَاذُوفْ،
س بِينُو إِصبْحنْ إِصْفَانْ.
7 نتَّا أَذْ إِبطّڒْ خْ وذْرَارْ-أَ أَڒحَّافْ
إِ زِي تّْڒحَّافنْ مَارَّا ڒڭْنُوسْ
ؤُڒَا ذ دُّورِي إِ زِي تّْوَاسْذُورَّاينْ مَارَّا ڒڭْنُوسْ.
8 نتَّا أَذْ إِصَارْضْ ڒْموْثْ إِ ڒبْذَا
ؤُشَا سِيذِي إِنُو، سِيذِي، أَذْ إِمْسحْ إِمطَّاونْ زِي مَارَّا إِغمْبَابْ
ؤُشَا أَذْ إِكّسْ ڒفْضِيحثْ ن ڒْڭنْسْ نّسْ زِي مَارَّا ثَامُّورْثْ،
مَاغَارْ أَمُّو إِ إِنَّا سِيذِي.“ ▪
9 ”ذڭْ وَاسّْ نِّي أَذْ إِنِينْ:
’أَقَا ذَا، وَا ذ أَربِّي نّغْ،
خَاسْ إِ نڭَّا أَسِيثمْ نّغْ
ؤُ نتَّا أَذْ أَنغْ إِسّنْجمْ.
وَا ذ سِيذِي نِّي خْ نڭَّا أَسِيثمْ نّغْ،
أَذْ نسْڒِيوْڒوْ، أَذْ نْفَارْحْ خْ ؤُسنْجمْ نّسْ!‘
10 مَاغَارْ أَفُوسْ ن سِيذِي أَذْ يَارْسْ خْ وذْرَارْ-أَ،
مَاشَا مُوآبَ أَذْ إِتّْوَادّزْ ذِي ثمُّورْثْ نّسْ،
أَمْ مَامّشْ إِتّْوَادّزْ ؤُڒُومْ، أَذْ إِذْوڒْ ذ ثَازُوبَاشْثْ.
11 مُوآبَ أَذْ ذَايسْ إِبزّعْ س إِفَاسّنْ نّسْ،
أَمْ ؤُفتَّاحْ ذڭْ وفْثَاحْ.
أَربِّي أَذْ إِسَّاضَارْ نّْفَاخثْ نّسْ
جْمِيعْ أَكْ-ذ مَارَّا مِينْ إِزمَّارْ أَذْ إِڭّْ س إِفَاسّنْ نّسْ. ▪
12 نتَّا أَذْ إِهْذمْ لْپُورْجْ أَكْ-ذ ڒحْيُوضْ نّكْ يُوعْڒَانْ،
أَذْ ثنْ إِسّهْوَا، أَذْ ثنْ إِمّنْضَارْ غَارْ ثمُّورْثْ، ذڭْ ؤُشَاڒْ.“