إِزْڒِي خْ إِزْڒَانْ
مّژْرِي ن ثسْڒِيثْ إِ يسْڒِي
1
1 إِزْڒِي خْ إِزْڒَانْ نِّي إِدْجَانْ ن سُولِيمَانْ. 2 ”أجّْ إِ-ث أَذْ أَيِي إِسُّوذمْ س إِسُوذِيمنْ ن ؤُقمُّومْ نّسْ،
مِينْزِي ثَايْرِي نّكْ حْسنْ زِي بِينُو.
3 ڒفْوَاحثْ ن زّشْثْ نّكْ ثشْنَا،
إِسمْ نّكْ أَمْ زّشْثْ إِزدْجْعنْ،
س ؤُيَا تّخْسنْثْ شكْ ثعْزَارِييِّينْ.
4 جْبذْ أَيِي أَوَارْنِي أَشْ، نشِّينْ أَذْ نَازّڒْ أَوَارْنِي أَشْ!
أَجدْجِيذْ إِنْذهْ أَيِي ذڭْ إِخَّامنْ نّسْ.
أجّْ أَنغْ أَذْ نَارْشقْ ؤُ أَذْ زَّايكْ نْفَارْحْ،
أَذْ نعْقڒْ خْ ثَايْرِي نّكْ
كْثَارْ خْ مِينْ غَا نعْقڒْ خْ بِينُو.
نِيشَانْ تّخْسنْثْ شكْ.“
5 ”ذ ثَابَارْشَانْثْ نشّْ، ؤُ صبْحغْ،
أَ يسِّيسْ ن ؤُرْشَالِيمْ،
أَمْ ثْقِيضُونِينْ ن قِيذَارْ،
أَمْ ڒِيزَارَاثْ ن سُولِيمَانْ.
6 وَارْ ذ أَيِي خزَّارنْثْ أَمُّو،
مِينْزِي نشّْ بَّارْشْنغْ،
مِينْزِي ثسّشْمضْ أَيِي ثْفُوشْثْ،
إِحنْجِيرنْ ن يمَّا ثُوغَا خيّْقنْ خَافِي،
جِّينْ أَيِي أَذْ حْضِيغْ إِمَارْجَاعنْ ن ؤُضِيڒْ.
أَمَارْجعْ ن يِيخفْ إِنُو وَارْ ث حْضِيغْ شَا.“
7 ”شكْ، ونِّي إِتّخْسْ بُوحْبڒْ إِنُو، إِنِي أَيِي،
مَانِي ثَاركّْوسذْ،
مَانِي ثسَّاريَّاحذْ ثَاحِيمَارْثْ غَارْ طْحَا ن ؤُزِيڒْ،
مِينْزِي إِ ؤُمِي غَا إِڒِيغْ أَمْ ثنِّي إِحجْبنْ
غَارْ ثْحِيمْرِيوِينْ ن إِمْعَاشَارنْ نّكْ؟“
8 ”مَاڒَا شمْ وَارْ ث ثسِّينذْ،
شمْ ثنِّي إِشْنَانْ قَاعْ جَارْ ثمْغَارِينْ،
خنِّي فّغْ، ضْفَارْ ڒَاثَارْ ن وُودْجِي
ؤُ أَرْوسْ ثِيغَاضْثِينْ نّمْ مَانِي زدّْغنْ إِمكْسَاونْ.“ ▫
ڒغْنُوجْ ن يسْڒِي ذ ثسْڒِيثْ س نُّوبْثَاثْ
9 ”سّمْقُوذِّيغْ شمْ أَكْ-ذ ؤُيِيسْ زَّاثْ إِكَارُّوثنْ ن فِيرْعُونْ،
أَ ثَامدُّوكّتْشْ إِنُو.
10 مشْحَاڒْ صبْحنْ إِمڭِّيزنْ نّمْ جَارْ ثْسدّْيِينْ،
إِرِي نّمْ جَارْ إِفِيڒَانْ س ثْيَاقُوثِينْ.
11 أَذْ أَمْ نڭّْ ثِيسدّْيِينْ ن وُورغْ،
أَكْ-ذ ثْنقِّيضِينْ ن نُّوقَارْثْ.“
12 ”مِينْ غَا يكّْ ؤُجدْجِيذْ إِقِّيمْ غَارْ طَّابْڒَا نّسْ ثَاقُورَارِيثْ،
إِتِّيشّْ صّنْبلْ إِنُو ڒفْوَاحثْ نّسْ.
13 لِّيفْ إِنُو إِتّڭّْ أَيِي أَمْ ثشْيَارْثْ ن مِيرُّو،
ثنِّي إِسّنْسنْ جَارْ إِذْمَارنْ إِنُو.
14 لِّيفْ إِنُو إِ نشّْ أَمْ ثْقبِّيضْثْ ن نوَّاشْ ن ڒْحنِّي،
ذڭْ إِمَارْجَاعنْ ن ؤُضِيڒْ ن عَايْنْ-جَاذِي.“
15 ”خْزَارْ، ثشْنِيذْ شمْ، ثَامدُّوكّتْشْ إِنُو!
خْزَارْ، شمْ ثشْنِيذْ، ثِيطَّاوِينْ نّمْ ذ إِذْبِيرنْ.“
16 ”أَقَا ذَايكْ أَژْرِي، أَ لِّيفْ إِنُو، وَاهْ، ثْضَارْفذْ،
ثُوزِّيزوْثْ ذ ثَاسُّوثْ نّغْ،
17 ثِيحنْيَا ن ثُوذْرِينْ نّغْ ذ ثِينڭْلِينْ،
ثِيحنْيَا ن ثْزقَّا أَقَا أَثنْثْ ذ ثِيشجِّيرَا ن ؤُمرْزِي.“