أَرْشَامْ ن ثسْڒِيثْ
2
1 ”نشّْ ذ ثَانوَّاشْثْ ن شَارُونْ، ذ ثَالِيلّشْثْ ن ثيْسَارِينْ.“ ▫
2 ”أَمْ ثْلِيلّشْثْ جَارْ ثْزڭّْوَارْثْ،
أَمُّو إِ ثدْجْ ثَامدُّوكّتْشْ إِنُو جَارْ ثْيدْجِيثِينْ.“
أَرْشَامْ ن يسْڒِي
3 ”أَمْ ثْشجَّارْثْ ن تّفَّاحْثْ جَارْ ثْشجِّيرَا ن وزْغَارْ،
أَمُّو إِ يدْجْ لِّيفْ إِنُو جَارْ وَارَّاونْ.
نشّْ أَقَا أَيِي مّژْرغْ أَذْ قِّيمغْ ذِي ثِيڒِي نّسْ.
ڒْغِيدْجثْ نّسْ ذ مِيژِيذْ إِ وَانغْ إِنُو.▫
4 نتَّا إِنْذهْ أَيِي ذِي ثَادَّارْثْ ن بِينُو،
ؤُ ثَايْرِي ذ ثَاعدْجَانْثْ نّسْ خَافِي.
5 سْجهْذمْ أَيِي س غَارْيِيثَا ن زّْبِيبْ،
سْبَارّْذمْ أَيِي س تّفَّاحِينْ،
مَاغَارْ نشّْ هڒْشغْ س ثَايْرِي.
6 أَفُوسْ أَزڒْمَاضْ نّسْ سَاذُو ؤُزدْجِيفْ إِنُو،
أَفُوسِي نّسْ إِذَارّعْ أَيِي-د.
7 نشّْ أَذْ كنِّينْثْ أَرّغْ تّْجَادْجَانْثْ، أَ يسِّيسْ ن ؤُرْشَالِيمْ،
غَارْ ثْغَايْضِينْ ن وزْغَارْ ؤُ غَارْ ثُوذَاذِينْ ذڭْ إِيَّارْأنْ،
أَقَا كنِّينْثْ وَارْ هكّْوْڒنْثْ ثَايْرِي،
وَارْ ت-إِ-د-سّكَّارَانْثْ أَڒْ ثتّخْسْ سِيمَانْثْ نّسْ.“
ثَاوَاسِيثْ ن يسْڒِي
8 ”ڒْحسّْ ن لِّيفْ إِنُو!
أَقَا ذَا، إِتَّاسْ-د،
إِنطُّو خْ إِذُورَارْ،
إِنڭّزْ خْ ثوْرِيرِينْ!
9 لِّيفْ إِنُو يَارْوسْ ذڭْ إِغَايْضْ ن وزْغَارْ،
نِيغْ ذڭْ إِجّْ ن ؤُمژْيَانْ ن وُوذَاذنْ.
أَقَا-ث ذَا، إِبدّْ أَوَارْنِي إِ ڒْحِيضْ نّغْ،
إِخزَّارْ زِي ڒكْوَازِي،
إِتّْشيّعْ زِي شّبَّاشْ.“
ثَاسْڒِيثْ ثسِّيوڒْ خْ ڒعْرُوضْ ن يسْڒِي
10 ”لِّيفْ إِنُو إِتَّارَّا-د ؤُشَا إِنَّا أَيِي:
’كَّارْ، بدّْ، أَ ثَامدُّوكّتْشْ إِنُو، أَژْرِي إِنُو،
ؤُشَا أَسْ-د!
11 مَاغَارْ أَقَا ذَا، ثَاڭرْسْثْ ثعْذُو،
إِكْسِي ونْژَارْ، أَقَا إِرُوحْ.
12 بَاننْ-د إِنُووَّارنْ ذِي ثمُّورْثْ،
ڒْحَاڒْ ن ونْزِيزْ أَقَا-ث ذَا،
ؤُشَا ثْمِيجَّا ن ثْجْلِيلّحْثْ نسْڒَا إِ-ت عَاوذْ ذِي ثمُّورْثْ نّغْ.
13 أَرْثُو ن ثَازَارْثْ إِتّْخمَّاڒْ ڒْبَاشُورْ نّسْ،
ؤُشَا ثِيزَايَارِينْ إِتّْنوَّارنْ أَرْخُونْ إِ ڒفْوَاحْ.
كَّارْ، بدّْ، ثَامدُّوكّتْشْ إِنُو، أَژْرِي إِنُو،
ؤُشَا أَسْ-د!‘ “
إِسْڒِي يَارنِّي ذِي ڒعْرُوضْ
14 ”ثَاذْبِيرْثْ إِنُو ذڭْ إِمُوشَانْ ن ؤُذُورِّي ذِي ڒجْرُوفْ،
ذڭْ إِجّْ ن ومْشَانْ إِنُّوفَّارنْ ذِي ثْسَاونْثْ ن وذْرَارْ،
أجّْ أَيِي أَذْ ژَترغْ أَغمْپُوبْ نّمْ، أَذْ سْڒغْ إِ ثْمِيجَّا نّمْ،
مَاغَارْ ذ ثْمِيژِيذْثْإِ ثدْجْ ثْمِيجَّا نّمْ، إِصْبحْ ؤُغمْپُوبْ نّمْ.“
ثَاسْڒِيثْ ثخْسْ أَذْ ثِيڒِي إِ يسْڒِي وَاهَا
15 ”طّْفمْ أَنغْ-د إِشعْبَاونْ، إِشعْبَاونْ إِمژْيَاننْ،
إِنِّي إِتَّارْيْثَارنْ أَنغْ إِمَارْجَاعنْ ن ؤُضِيڒْ،
مَاغَارْ ثِيزَايَارِينْ ذڭْ إِمَارْجَاعنْ نّغْ تّْنوَّارنْثْ عَاذْ.
16 لِّيفْ إِنُو أَقَا-ث إِنُو ؤُ نشّْ نّسْ،
ذ ونِّي يَاركّْوْسنْ جَارْ ثْلِيلِّيشِينْ.
17 أَڒْ إِ غَا إِسْمضْ وَاسّْ،
ؤُ أَذْ أَروْڒنْثْ ثِيڒِيوِينْ.
نّضْ-د، أَ لِّيفْ إِنُو،
إِڒِي أَمْ إِجّْ ن إِغَايْضْ ن وزْغَارْ
نِيغْ أَمْ إِجّْ ن ؤُمژْيَانْ ن وُوذَاذنْ
خْ إِذُورَارْ ن ڒجْرُوفْ.“