‏1 ”أَرْزُوغْ خَاسْ ذِي دْجْيَاڒِي أَمْ دْجِيغْ خْ ثَاسُّوثْ إِنُو،

أَرْزُوغْ خْ ونِّي إِتّخْسْ ڒعْمَارْ إِنُو.

نشّْ أَرْزُوغْ خَاسْ،

مَاشَا نشّْ وَارْ ث ؤُفِيغْ.

‏2 نشّْ نِّيغْ: ’أَذْ كَّارغْ، أَذْ سُوحغْ ذِي ثنْذِينْثْ،

ذڭْ إِبْرِيذنْ ؤُ خْ إِزَّارِيينْ.

نشّْ أَذْ خَاسْ أَرْزُوغْ، أَذْ أَرْزُوغْ خْ ونِّي إِتّخْسْ ڒعْمَارْ إِنُو.‘

نشّْ أَرْزُوغْ خَاسْ، مَاشَا وَارْ ث ؤُفِيغْ.

‏3 ؤُفِينْ أَيِي إِعسَّاسنْ أَمْ تّنّْضنْ ذِي ثنْذِينْثْ.

نشّْ نِّيغْ: ’مَا ثژْرِيمْ كنِّيوْ ونِّي إِتّخْسْ ڒعْمَارْ إِنُو؟‘

‏4 ڒَامِي ثُوغَا عَاذْ وَارْ خَاسنْ عْذُوغْ، ؤُفِيغْ ث،

ونِّي إِتّخْسنْ ڒعْمَارْ إِنُو.

نشّْ طّْفغْ ث، وَارْ زَّايسْ أَرخُّوغْ

أَڒَامِي ث-إِ-د إِوْيغْ غَارْ ثَادَّارْثْ ن يمَّا،

ذڭْ وخَّامْ ن ذَاخڒْ ن ثنِّي إِ د أَيِي يُورْونْ.

‏5 نشّْ أَذْ كنِّينْثْ أَرّغْ أَذْ تّْجَّادْجَانْثْ، أَ يسِّيسْ ن ؤُرْشَالِيمْ،

غَارْ ثْغَايْضِينْ ن وزْغَارْ ؤُ غَارْ ثُوذَاذِينْ ذڭْ إِيَّارْأنْ،

أَقَا كنِّينْثْ وَارْ هكّْوْڒنْثْ ثَايْرِي،

وَارْ ت-إِ-د-سّكَّارَانْثْ غَارسْ أَڒْ ثخْسْ سِيمَانْثْ نّسْ.“

‏6 ”مِينْ ثعْنَا ثنِّي إِ د-إِڭعّْذنْ زِي ڒخْڒَا،

أَمْ إِقلِّيجنْ ن دّخَّانْ،

ذڭْ إِجّْ ن ؤُسيْنُو ن مِيرُّو ذ ڒبْخُورْ،

ؤُ س مَارَّا ڒبْزَارْ إِتّْفُوحنْ ن ؤُسبَّابْ؟

‏7 خْزَارْ، رشْثُو ن ثْربُّوثْ ن سُولِيمَانْ،

تّنّْضنْ أَسْ-د ستِّينْ ن أَيْثْ ن بُو-ثغْرُوضْثْ،

زڭْ أَيْثْ ن بُو-ثغْرُوضْثْ ن إِسْرَائِيل،

‏8 مَارَّا إِنِّي إِتّطّْفنْ سِّيفْ، إِنِّي إِڒمّْذنْ أَمنْغِي،

كُوڒْ إِجّْ س سِّيفْ نّسْ غَارْ ثْمصَّاضْثْ نّسْ

زِي سِّيبّثْ ن مِينْ إِسَّاڭّْوَاذنْ ذِي دْجِيڒثْ.

‏9 أَجدْجِيذْ سُولِيمَانْ إِڭَّا إِجّْ ن رشْثُو إِ ثْربُّوثْ إِ يِيخفْ نّسْ

س ؤُكشُّوضْ ن لُوبْنَانْ.

‏10 إِعُومَاذْ غَارْ ثغْمَارْثْ إِڭَّا إِ-ثنْ س نُّوقَارْثْ،

أَعمّذْ ن وعْرُورْ ن وُورغْ ؤُشَا أَغِيمِي ن أَرْجُووَانِي.

ذَاخڒْ نّسْ يَارْضنْ ث

س ثَايْرِي ن يسِّيسْ ن ؤُرْشَالِيمْ.“

‏11 ”فّْغنْثْ ؤُ خْزَارنْثْ، كنِّينْثْ يسِّيسْ ن صِيهْيُونْ،

أَقَا ذَا أَجدْجِيذْ سُولِيمَانْ أَكْ-ذ تَّاجْ إِ زِي ث ثْڭلّذْ يمَّاسْ

ذڭْ وَاسّْ ن وُورَارْ نّسْ،

ذڭْ وَاسّْ ن ڒفْرَاحثْ يُوژْغنْ ذڭْ وُوڒْ نّسْ.“