إِزْڒِي ن يسْڒِي خْ ثسْڒِيثْ
4
1 ”خْزَارْ، ثشْنِيذْ شمْ، ثَامدُّوكّتْشْ إِنُو، شمْ ثشْنِيذْ. أَوَارْنِي إِ لّْثَامْ نّمْ ثِيطَّاوِينْ نّمْ ذ ثِيذْبِيرِينْ.
أَشوَّافْ نّمْ أَمشْنَاوْ ثَاحِيمَارْثْ ن إِغَايْضنْ
إِ إِجْنَانْ خْ إِذُورَارْ ن جِيلْعَاذْ.
2 ثِيغْمَاسْ نّمْ ڭِّينْثْ أَمْ ثْحِيمَارْثْ ن وُودْجِي ڒْسِينْ ثنْ،
إِنِّي د-إِتّْڭعَّاذنْ زڭْ ومْشَانْ ن ؤُصبّنْ،
مَارَّا ثِيخسْوِينْ ؤُرْونْثْ ثَاشْنِيوِينْ،
وَارْ ثقِّيمْ إِشْثْ نْبْڒَا إِحنْجِيرنْ.
3 إِينْشِيشنْ نّمْ أَمْ ؤُفِيڒُو أَزڭّْوَاغْ إِحذْقنْ،
إِصْبحْ ؤُقمُّومْ نّمْ.
لْحنْكَاثْ نّمْ أَمْ ثْرمَّانْثْ إِبْضَانْ
سَاذُو لّْثَامْ نّمْ.
4 إِرِي نّمْ أَمْ صُّومْعثْ ن ذَاوُوذْ،
بْنَانْ ت أَمْ ثسْفِيفِينْ ن ثْسدّْيِينْ.
أَڒفْ ن ثْسدَّارِييِينْ ن ؤُعسْكَارِي ؤُيْڒنْثْ غَارسْ،
مَارَّا أَمْ ثْسدَّارِييِينْ إِقسْحنْ إِقُورَارنْ ن أَيْثْ ن بُو-ثغْرُوضْثْ.
5 إِذْمَارنْ نّمْ ڭِّينْ أَمْ ثْنَاينْ ن إِغَايْضنْ إِمژْيَاننْ،
أَمْ وَاشْنِيونْ ن ثْغَايْضثْ ن وزْغَارْ،
هدَّانْ ذِي ثْلِيلِّيشِينْ.▫
6 أَڒْ إِ غَا إِسْمضْ وَاسّْ ؤُ أَذْ أَروْڒنْثْ ثِيڒِيوِينْ،
أَذْ ؤُيُورغْ غَارْ وذْرَارْ ن ؤُمِيرُّو،
غَارْ ثوْرِيرْثْ ن جَّاوِي.
7 شمْ مَارَّا ذ أَژْرِي، ثَامدُّوكّتْشْ إِنُو،
وَارْ ذَايمْ ؤُڒَا ذ إِجّْ نْ ڒْعِيبْ.
8 هْوَا-د أَكِيذِي زڭْ إِذُورَارْ ن لُوبْنَانْ، أَ ثَاسْڒِيثْ إِنُو،
هْوَا-د أَكِيذِي زڭْ إِذُورَارْ ن لُوبْنَانْ،
صْوذْ-د زِي ثْقِيشّثْ ن أَمَانَا،
زِي ثْقِيشّثْ ن شَانِيرْ ذ هِيرْمُونْ،
زِي غَارْ ڒْمَارْڭَاحَاثْ ن وَايْرَاذنْ،
زڭْ إِذُورَارْ ن إِغِيڒَاسنْ.
9 ثُوشَارذْ أَيِي ؤُڒْ، أَ ؤُتْشْمَا، أَ ثَاسْڒِيثْ إِنُو،
وَاهْ ثُوشَارذْ أَيِي ؤُڒْ،
س إِشْثْ ن ڒْخزْرَاثْ ن ثِيطَّاوِينْ نّمْ،
س إِشْثْ ن ثْسدّشْثْ ن يِيرِي نّمْ.
10 مَامّشْ ثشْنَا ثَايْرِي نّمْ، أَ ؤُتْشْمَا، أَ ثَاسْڒِيثْ إِنُو،
مشْحَاڒْ ثصْبحْ ثَايْرِي نّمْ خْ بِينُو،
ڒفْوَاحثْ ن زّشْثْ نّمْ خْ مَارَّا ڒعْطُورْ.
11 زڭْ إِينْشِيشنْ نّمْ، أَ ثَاسْڒِيثْ إِنُو،
ثتُّوذُومْ ثَامّنْثْ ن ثغْرَاصْثْ،
ثَامّنْثْ ذ ؤُغِي سَاذُو إِڒسْ نّمْ،
ؤُ ڒفْوَاحثْ ن وَارُّوضْ نّمْ أَمْ ڒفْوَاحثْ ن إِذُورَارْ ن لُوبْنَانْ.
12 أَ ؤُتْشْمَا، أَ ثَاسْڒِيثْ إِنُو، شمْ ذ ثَاحْوِيشْثْ إِبلّْعنْ،
ذ ثَاڒَا إِقّْننْ، ذ ڒْعُونْصَارْ إِشمّْعنْ.
13 ڒفْرُوعْ إِ زَّايمْ إِسّْنطِّيينْ ذ جنّثْ ن ثْرمَّانِينْ،
س ڒْغِيدْجثْ إِصبْحنْ أَطَّاسْ، نّوَّاشْ ن ڒْحنِّي ذ صّنْبلْ.
14 صّنْبلْ ذ زّْعفْرَانْ،
أَغَانِيمْ ؤُحمُّومْ إِتّْفُوحنْ أَكْ-ذ ڒْقَارْفَا،
عْڒَامْ كُوڒْ ثِيشجِّيرَا ن جَّاوِي، مِيرُّو ذ وشْفِيڒْ،
أَكْ-ذ مَارَّا ڒعْطُورْ إِصبْحنْ قَاعْ.
15 أَ ثَاڒَا ن إِحْوِيشنْ،
أَنُو ن وَامَانْ إِدَّارنْ
إِنِّي د-إِتَّازّْڒنْ زڭْ إِذُورَارْ ن لُوبْنَانْ.“
ثَاسْڒِيثْ ثسِّيوڒْ، إِسْڒِي يَارَّا-د
16 ”كَّارْ، أَ أَسمِّيضْ ن نّجْ،
أَسْ-د، أَ أَسمِّيضْ ن سْوَادَّايْ،
صُوضْ خْ وحْوِيشْ إِنُو، أجّْ ڒفْوَاحثْ ن ڒعْطُورْ نّسْ أَذْ ثُويُورْ.
أجّْ لِّيفْ إِنُو أَذْ د-يَاسْ غَارْ وحْوِيشْ نّسْ،
أَذْ إِشّْ زِي ڒْغِيدْجثْ نّسْ إِصبْحنْ!“