5
1 ”نشّْ ؤُسِيغْ-د غَارْ وحْوِيشْ إِنُو، أَ ؤُتْشْمَا، أَ ثَاسْڒِيثْ إِنُو، ڒقْضغْ مِيرُّو إِنُو أَكْ-ذ ڒعْثُورْ،
شِّيغْ أَغْرُومْ ن ثْزِيزْوَا أَكْ-ذ ثَامّنْثْ،
سْوِيغْ بِينُو إِنُو ذ ؤُغِي.
إِمدُّوكَّاڒْ، شّمْ، سْومْ، سّْشَارمْ، أَ إِمْعِيزّنْ!“ ▫
ثَاسْڒِيثْ ثْزهْزَا أَذْ ثَارْزمْ إِ يسْڒِي
2 ”نشّْ طّْسغْ، مَاشَا ؤُڒْ إِنُو إِفَاقْ.
أَقَا ذَا ثْمِيجَّا ن لِّيفْ إِنُو ونِّي إِسّْقَارْقْبنْ
’أَرْزمْ أَيِي، أَ ؤُتْشْمَا، ثَامدُّوكّتْشْ إِنُو،
ثَاذْبِيرْثْ إِنُو، أَ كُوڒْشِي إِنُو،
مَاغَارْ أَزدْجِيفْ إِنُو إِشُّورْ س نّْذَا،
إِمُوزَارنْ إِنُو شُّورنْ س ثُوذِّيمِينْ ن دْجِيڒثْ!‘
3 أَقَا كّْسغْ أَرُّوضْ إِنُو،
مَامّشْ إِ ث غَا يَارْضغْ عَاوذْ؟
إِضَارنْ سِّيرْذغْ ثنْ،
مَا أَذْ ثنْ سّْخمْجغْ عَاوذْ؟
4 لِّيفْ إِنُو إِسّكّْ-د أَفُوسْ نّسْ زڭْ ؤُنُوقِّيبْ ن ثوَّارْثْ،
ؤُشَا إِنْهزّْ وُوڒْ إِنُو زَّايسْ.
5 نشّْ بدّغْ حِيمَا أَذْ أَرْزْمغْ إِ لِّيفْ إِنُو،
إِفَاسّنْ إِنُو ؤُذُومنْ س مِيرُّو،
ؤُ زڭْ إِضوْضَانْ إِنُو إِسِّيزّڒْ مِيرُّو
خْ إِفَاسّنْ ن زّكْرُونْ.
6 نشّْ أَرْزْمغْ إِ لِّيفْ إِنُو،
مَاشَا لِّيفْ إِنُو ثُوغَا يُويُورْ، إِعْذُو.
إِفّغْ ڒعْمَارْ إِنُو ؤُمِي ثُوغَا إِسَّاوَاڒْ!
نشّْ أَرْزُوغْ خَاسْ، مَاشَا وَارْ ث ؤُفِيغْ.
نشّْ ڒَاغِيغْ أَسْ، نتَّا وَارْ خَافِي د-يَارِّي.
7 ؤُفِينْ أَيِي إِعسَّاسنْ غَارْ ونّضْ نْسنْ ذِي ثنْذِينْثْ،
نِيثْنِي وْثِينْ أَيِي، يزْمنْ أَيِي،
أَقنْذُورْ إِنُو كّْسنْ أَيِي ث إِعسَّاسنْ ن ڒحْيُوضْ.“
إِزْڒِي ن ثسْڒِيثْ أَكْ-ذ يسِّيسْ ن ؤُرْشَالِيمْ
8 ”نشّْ أَذْ كنِّينْثْ أَرّغْ تّْجَّادْجَانْثْ، أَ يسِّيسْ ن ؤُرْشَالِيمْ،
مَاڒَا كنِّينْثْ ثُوفِينْثْ لِّيفْ إِنُو، مِينْ ذ أَسْ غَا ثِينِينْثْ؟
أَقَا ثسّحْڒشْ أَيِي ثَايْرِي.“
9 ”مِينْ غَارسْ غَارْ لِّيفْ نّمْ كْثَارْ خْ لِّيفْ نّغْنِي،
أَ شمْ إِ ذِي إِدْجْ وَاژْرِي قَاعْ زِي ثمْغَارِينْ؟
مِينْ غَارسْ غَارْ لِّيفْ نّمْ كْثَارْ خْ إِنّغْنِي،
أَقَا شمْ أَمُّو إِ ذ أَنغْ ثَارِّيذْ نتّْجَّادْجْ؟“
10 ”لِّيفْ إِنُو ذ أَشمْڒَاڒْ إِتِّيسِّيقنْ ذ أَزڭّْوَاغْ أَمْ إِذَامّنْ،
إِتّْبَانْ أَمْ ثْعدْجَانْثْ سنّجْ خْ عشْرَا ن ڒُوڒُوفْ.
11 أَزدْجِيفْ نّسْ ذ ؤُرغْ إِقُّورْ إِصْفَانْ،
إِمُوزَارنْ ن ؤُشوَّافْ نّسْ ذ ثِيوْرِيرِينْ إِ إِتّڭّنْ أَمْ ڒمْوَاجْ،
ذ إِبَارْشَاننْ أَمْ إِبَاغْڒِيونْ.
12 ثِيطَّاوِينْ نّسْ ڭِّينْثْ أَمْ ثذْبِيرِينْ غَارْ ثْسدْجْيَاوِينْ ن وَامَانْ،
تّْوَاسِيرْذنْثْ س ؤُغِي،
قِّيمنْثْ ذِي ثْشُويَارْ نْسنْ أَمْ إِژْرَا إِغْڒَانْ.
13 إِمڭِّيزنْ نّسْ ڭِّينْ أَمْ إِحْوِيشنْ ن ڒعْطُورْ،
جَارْ ڒعْشُوبْ إِتّْفُوحنْ،
إِينْشِيشنْ نّسْ أَمْ ثْلِيلِّيشِينْ،
تُّوذُومنْ س مِيرُّو إِفسْينْ. ▫
14 إِفَاسّنْ نّسْ أَمْ ثبْرِيقِينْ ن وُورغْ،
عمَّارنْثْ س إِژْرَا زِي ثَارْشِيشْ،
أَعذِّيسْ نّسْ إِڭَّا أَمْ ڒْعَاجْ إِتِّيسِّيقنْ،
ڒحّْفنْ ث س ثْيَاقُوثِينْ ن صَافِّيرْ.
15 إِمسْضَانْ نّسْ ذ إِبِيلَارنْ ن ڒْمَارْمُورْ،
خْ ذْسُوسَا ن وُورغْ إِتّْوَاصفَّانْ.
إِبَانْ-د نتَّا أَمْ لُوبْنَانْ،
إِتّْوَافَارْزْ أَمْ ثْشجَّارْثْ ن ثنْڭلْثْ.
16 أَنغْ نّسْ إِشُّورْ س ثَاژْيُوذِي،
ؤُشَا مَارَّا مِينْ غَارسْ إِشُووَّارْ.
وَا ذ لِّيفْ إِنُو،
وَا ذ أَمدُّوكّڒْ إِنُو،
أَ كنِّينْثْ يسِّيسْ ن ؤُرْشَالِيمْ!“