‏1 ”مَانِي يُويُورْ لِّيفْ نّمْ،

أَ شمْ إِشْنَانْ قَاعْ خْ ثمْغَارِينْ؟

مَانِي يَارَّا س ؤُزدْجِيفْ لِّيفْ نّمْ؟

نشِّينْ نخْسْ أَذْ خَاسْ نَارْزُو أَكِيذمْ!“

‏2 ”لِّيفْ إِنُو إِهْوَا غَارْ ؤُحْوِيشْ نّسْ،

غَارْ ثْپُوذَا س ڒعْطُورْ،

حِيمَا أَذْ يَارْوسْ ذڭْ إِحْوِيشنْ،

حِيمَا أَذْ إِسّْمُونْ ثِيلِيلِّيشِينْ. ^▫  

‏3 نشّْ زڭْ لِّيفْ إِنُو،

ؤُ لِّيفْ إِنُو أَقَا-ث إِنُو،

نتَّا ذ ونِّي يَاركّْوْسنْ جَارْ ثْلِيلِّيشِينْ.“

‏4 ”شمْ ثْصبْحذْ، أَ ثَامدُّوكّتْشْ إِنُو،

أَمشْنَاوْ ثِيرْصَا،

ثشْنِيذْ أَمْ ؤُرْشَالِيمْ،

ثسَّاڭّْوَاذذْ أَمْ إِسذِّييّنْ ن ڒْعسْكَارْ س ثْعدْجَانِينْ نْسنْ.

‏5 كّسْ ثِيطَّاوِينْ زَّايِي،

مَاغَارْ نِيثنْثِي غضْڒنْثْ أَيِي إِفَادّنْ أَطَّاسْ.

أَشوَّافْ نّمْ أَمشْنَاوْ ثَاحِيمَارْثْ ن إِغَايْضنْ

إِ إِجْنَانْ خْ إِذُورَارْ ن جِيلْعَاذْ.

‏6 ثِيغْمَاسْ نّمْ ڭِّينْثْ أَمْ ثْحِيمَارْثْ ن وُودْجِي،

إِ د-إِتّْڭعَّاذنْ زڭْ ومْشَانْ ن ؤُصبّنْ،

مَارَّا ثِيخسْوِينْ ؤُرْونْثْ ثَاشْنِيوْثْ،

وَارْ ثقِّيمْ إِشْثْ نْبْڒَا إِحنْجِيرنْ.

‏7 لْحنْكَاثْ نّمْ أَمْ ثْرمَّانْثْ إِبْضَانْ

أَوَارْنِي إِ لّْثَامْ نّمْ.

‏8 أَقَا ذِينْ ستِّينْ ن ثْجدْجِيذِينْ ذ ثْمنْيِينْ ن ثِييَّا،

ؤُڒَا ذ ثِيعْزَارِييِّينْ بْڒَا ڒحْسَابْ.

‏9 وحّْذسْ نتَّاثْ، ثَاذْبِيرْثْ إِنُو، ثنِّي إِكمّْڒنْ إِنُو،

أَينِّي ن يسِّيسْ ن يمَّاسْ،

نتَّاثْ ذ ثنِّي إِفَارْزنْ غَارْ ثنِّي إِ ذ أَسْ د-يُورْونْ.

مَاڒَا زْڒِينْثْ ت ثْيسِّيثْ، أَذْ ت سّْعُودْجَانْثْ،

ثِيجدْجِيذِينْ ذ ثِييَّا أَذْ ت شنّْعنْثْ س إِزْڒَانْ.“

‏10 ”مِينْ ثعْنَا ثنِّي د-إِسِّيجّنْ أَمْ ثْفَاوْثْ ن ڒفْجَارْ،

ثشْنَا أَمْ ثْزِيرِي إِقفْڒنْ، ثصْفَا أَمْ ثْفُوشْثْ يَارقّنْ،

ثسَّاڭّْوَاذْ أَمْ إِسذِّييّنْ ن ڒْعسْكَارْ س ثْعدْجَانِينْ؟“

‏11 ”نشّْ حْوِيغْ غَارْ ثحْوِيشْثْ ن ثْشجِّيرَا ن ثغْيَاشْثْ

حِيمَا أَذْ خْزَارغْ أَغمُّويْ إِبدّنْ ذِي ثغْزُورْثْ،

حِيمَا أَذْ خْزَارغْ مَا ثَازَايَارْثْ ثسُّوفّغْ-د،

مَا ثِيشجِّيرَا ن أَرمَّانْ تّْنوَّارنْثْ.

‏12 ثُوغَا وَارْ د-أَرِّيغْ ثَايْنِيثْ أَقَا ڒعْمَارْ إِنُو إِنْضَارْ أَيِي

ذڭْ إِكَارُّوثنْ ن ڒْڭنْسْ إِنُو، ن إِجّْ ن وشْرِيمْ.“