‏1 ”ذڭْ وَاسّْ نِّي أَذْ إِخْڒفْ سِيذِي زِي ’لِيبِييَاثَانْ‘، أَفِيغَارْ إِتّحْرُودْجُوضنْ س ثَازْڒَا، س سِّيفْ نّسْ إِقْسحْ ؤُ إِمْغَارْ ؤُ إِجْهذْ، وَاهْ أَذْ إِخْڒفْ زِي ’لِيبِييَاثَانْ‘، أَفِيغَارْ إِتّحْرُورُوذنْ، ؤُشَا أَذْ إِنغْ ڒْهَايْشثْ نِّي إِدْجَانْ ذِي ڒبْحَارْ.“

‏2 ”ذڭْ وَاسّْ نِّي ...

أَذْ ذِينْ يِيڒِي إِجّْ ن ؤُمَارْجُوعْ ن ؤُضِيڒْ س بِينُو إِشْنَانْ.

غنّْجمْ خَاسْ س نُّوبْثَاثْ.

‏3 نشّْ، سِيذِي، أَذْ ت إِحْضَا،

أَذْ ت سّْبزّْڭغْ،

حِيمَا وَارْ ت إِجَارّحْ حذْ،

نشّْ أَذْ خَاسْ عسّغْ س وَاسّْ ذ دْجِيڒثْ.

‏4 ثَافْقحْثْ وَارْ ذَايِي ثدْجِي قَاعْ،

مَاشَا مَاڒَا شَا ن يِيجّنْ إِزْعمْ أَذْ إِسَّارْسْ زَّاثِي ثَازڭّْوَارْثْ ذ إِسنَّاننْ،

نشّْ أَذْ كِيذْسنْ مّنْغغْ، أَذْ ثنْ سَّارْغغْ مُوننْ!

‏5 غَارْ مَاڒَا إِطّفْ بْنَاذمْ ذِي جّهْذْ إِنُو،

ؤُشَا أَذْ يڭّْ ڒهْنَا أَكِيذِي،

أَذْ يڭّْ ڒهْنَا أَكِيذِي!“

‏6 ”ذڭْ وُوسَّانْ إِ د غَا يَاسنْ أَذْ إِوّثْ يَاعْقُوبْ أَژْوَارْ، إِسْرَائِيل أَذْ إِنُّووَارْ، أَذْ إِغمِّي، ؤُ نِيثْنِي أَذْ شُّورنْ ثَامُّورْثْ س ڒْغِيدْجثْ.“ ^▪  

‏7 ”مَا إِوْثَا إِ-ث نتَّا، أَمْ مَامّشْ ونِّي إِوْثِينْ، إِوْثَا إِ-ث؟ مَا إِتّْوَانغْ نتَّا، أَمْ مَامّشْ تّْوَانْغنْ إِنِّي زَّايسْ إِتّْوَانْغنْ؟ ^▫   ‏8 شكْ ثَاربِّيذْ ت س ڒقْيَاسْ ڒَامِي ت ثنْضَارذْ، نتَّا إِسُّوزَّارْ إِ-ت س ؤُسمِّيضْ نّسْ إِقسْحنْ، ذڭْ إِجّْ ن وَاسّْ ن ؤُسمِّيضْ زِي مَانِيسْ إِ د-ثْنقَّارْ ثْفُوشْثْ. ^▪   ‏9 س ؤُينِّي أَذْ ثتّْوَافْذِي ڒْمُوعْصِييّثْ ن يَاعْقُوبْ س مَانْ أَيَا ؤُشَا أَذْ يِيڒِي أَيَا ذ ڒْغِيدْجثْ ثكْمڒْ زڭْ ؤُحيّذْ خْ دّْنُوبْ نّسْ: أَقَا نتَّا أَذْ يَارّْ مَارَّا إِژْرَا ن إِعَالْطَارنْ ذ إِژْرَا ن جَّارْ تّْوَاڒبْزنْ ؤُ وَارْ ذِينْ تّْبذِّينْثْ عَاذْ ثْربِّينْ ن شْوَارْثِي ذ إِبِيلَارنْ ن أَربِّي ن ثْفُوشْثْ.“

‏10 ”مَاغَارْ ثَانْذِينْثْ إِتّْوَاسْجهْذنْ أَذْ ثذْوڒْ حَافِي، أَمْ إِشْثْ ن ثْزذِّيغْثْ إِتّْوَاجّنْ، إِخْڒَانْ أَمْ ڒخْڒَا. ذِينِّي أَذْ هْذَانْ إِينْذُوزنْ أَذْ ذِينْ جْنَانْ، أَذْ شّنْ قَاعْ ثِيسضْوِينْ نّسْ. ^▫  

‏11 خْمِي إِ غَا يَاژْغنْ ڒفْرُوعْ نّسْ، أَذْ تّْوَاقضْعنْ. أَذْ د-أَسنْثْ ثمْغَارِينْ، أَذْ ثنْ سَّارْغنْثْ، مَاغَارْ وَارْ إِدْجِي ذ إِجّْ ن ڒْڭنْسْ ذَايسْ ڒفْهَامثْ. س ؤُيَا ونِّي ث إِڭِّينْ، وَارْ ذ أَسنْ إِزِّيدْجِيزْ، ؤُ ونِّي ث إِكوّْننْ، وَارْ ذ أَسْ يَارطَّا.“

‏12 ”ذڭْ وَاسّْ نِّي أَذْ إِزْوضْ سِيذِي ثِيذْرِينْ زِي مَانِي إِدْجْ يغْزَارْ ن لْفُورَاطْ أَڒْ ثغْزَارْثْ ن مِيصْرَا. مَاشَا كنِّيوْ أَذْ تّْوَاڒقْضمْ، إِجّنْ أَوَارْنِي إِ ونّغْنِي، أَ أَيْثْ ن إِسْرَائِيل. ^▪  

‏13 ذڭْ وَاسّْ نِّي أَذْ صُوضنْ ذڭْ ؤُيِيشّْ أَمقّْرَانْ ن إِشَارِّي. خنِّي أَذْ د-أَسنْ إِنِّي إِسّْوجْذنْ أَذْ هلّْكنْ ذِي أَشُّورْ ؤُڒَا ذ ينِّي إِتّْوَاعَارّْننْ غَارْ ثمُّورْثْ ن مِيصْرَا. نِيثْنِي أَذْ سجْذنْ إِ سِيذِي ذڭْ وذْرَارْ إِقدّْسنْ ذِي ؤُرْشَالِيمْ.“