‏1 إِزَانْ إِنقّنْ تَّارَّانْ زّشْثْ ن وذْهَانْ ن ؤُعطَّارْ أَذْ ثَارْصُوضْ ؤُ أَذْ ثسْممْ. ذْرُوسْ ن ثُوبُّوهڒْيَا ثْوزّنْ أَطَّاسْ خْ ثِيغِيثْ ذ شَّانْ. ‏2 ؤُڒْ ن ؤُمِيغِيسْ أَقَا-ث إِ نتَّا أَفُوسْ نّسْ أَفُوسِي، مَاشَا ؤُڒْ ن ؤُپُوهَاڒِي إِ وَانِيثَا أَفُوسْ نّسْ أَزڒْمَاضْ. ‏3 ؤُڒَا ذڭْ وبْرِيذْ مِينْ خفْ إِڭُّورْ ؤُپُوهَاڒِي، إِتّْخصَّا أَسْ وُوڒْ نّسْ، إِقَّارْ إِ مَارَّا أَقَا نتَّا ذ أَپُوهَاڒِي. ‏4 مَاڒَا خَاكْ إِخيّقْ بُوحْبڒْ ن بُو-جّهْذْ، وَارْ تّڭّْوِيجْ خْ ومْشَانْ نّكْ، مَاغَارْ مَانْ أَيَا ذ دّْوَا، يَارسَّا دّْنُوبْ إِمقّْرَاننْ.

‏5 أَقَا ذِينْ إِجّْ نْ ڒْغَارْ نّغْنِي نِّي ژْرِيغْ سَاذُو ثْفُوشْثْ، أَقَا-ث ذ إِجّْ ن ؤُودَّارْ إِ د-إِفّْغنْ زڭْ أَيْثْ ن صُّولْطَا. ‏6 ثتّْوَاسّْڭعَّاذْ ثُوبُّوهڒْيَا أَطَّاسْ، أَمْ تّْغِيمَانْ أَيْثْ ن بُو-وَاڭْڒَا سْوَادَّايْ. ‏7 نشّْ ژْرِيغْ إِمْسخَّارنْ نْيِينْ خْ ييْسَانْ ؤُڒَا ذ ڒْحُوكَّامْ نِّي إِڭُّورنْ أَمْ إِمْسخَّارنْ خْ إِضَارنْ نْسنْ خْ ثمُّورْثْ.

‏8 ونِّي إِتّقَّازنْ أَحْفُورْ، أَذْ ذَايسْ إِوْضَا س يِيخفْ نّسْ، ونِّي إِهدّْمنْ ڒْحِيضْ، إِزمَّارْ أَذْ أَسْ إِقّسْ ؤُفِيغَارْ. ^▪  

‏9 ونِّي يَاربُّونْ إِژْرَا، أَذْ زَّايْسنْ إِيْزمْ إِخفْ نّسْ، ونِّي إِتّْقدَّارنْ أَكشُّوضْ، أَذْ يِيڒِي ذِي لْخَاطَارْ.

‏10 مَاڒَا ؤُزَّاڒْ ن شَّاقُورْ إِذْوڒْ إِحْفَا ؤُ بَابْ نّسْ وَارْ ث إِسّقْضعْ، خنِّي إِتّْخصَّا أَسْ جّْهذْ كْثَارْ، مَاشَا ثِيغِيثْ ذ ثنِّي ن يمَّاثْسنْ حِيمَا أَذْ إِفْڒحْ بْنَاذمْ.

‏11 مَاڒَا إِزْعفْ ؤُفِيغَارْ قْبڒْ أَعزّمْ، وَارْ ذِينْ ڒفْضڒْ إِ ؤُعزَّامْ.

‏12 أَوَاڒنْ زڭْ ؤُقمُّومْ ن ؤُمِيغِيسْ خْسنْ سَّارْ، مَاشَا إِينْشِيشنْ ن ؤُپُوهَاڒِي صَارْضنْ ث سِيمَانْثْ نّسْ.

‏13 بدُّو ن وَاوَاڒنْ زڭْ ؤُقمُّومْ نّسْ ذ ثُوبُّوهڒْيَا ؤُ أَنڭَّارُو ن مِينْ د-إِفّْغنْ زڭْ ؤُقمُّومْ نّسْ ذ أَطمّسْ أَعفَّانْ.

‏14 أَپُوهَاڒِي إِتّْكتَّارْ ڒْهَارْضْ أَطَّاسْ، مَاشَا بْنَاذمْ وَارْ إِسِّينْ مِينْ غَا إِمْسَارنْ. ؤُ مِينْ غَا إِمْسَارنْ أَوَارْنِي أَسْ، وِي ذ أَسْ ث إِ غَا إِعَاوْذنْ؟

‏15 أَرْبرْ ن إِپُوهَاڒِييّنْ إِتَّارَّا-ثنْ ؤُحْڒنْ، مَاغَارْ نِيثْنِي وَارْ سِّيننْ مَامّشْ إِ غَا يُويُورنْ غَارْ ثنْذِينْثْ.

‏16 ؤُشْثْ خَامْ، أَ ثَامُّورْثْ، أَجدْجِيذْ نّسْ ذ أَحنْجِيرْ عَاذْ ؤُ ڒْحُوكَّامْ نّسْ غَارْ ثفُّوثْ تّتّنْ! ^▪  

‏17 سّعْذْ نّمْ، أَ ثَامُّورْثْ، أَجدْجِيذْ نّسْ ذ مِّيسْ ن ثَارْوَا ن ثَاصِيڒثْ نّسْ ؤُ ڒْحُوكَّامْ نّسْ تّتّنْ غَارْ ڒْوقْثْ إِتّْوَاڭّنْ، مَاحنْذْ أَذْ تّْوَامحْذنْ، وَارْ إِدْجِي مَاحنْذْ أَذْ سْكَارنْ.

‏18 س ڒعْڭزْ إِ د-ثْهكّْوَا ڒْخذْمثْ ن ثْزقَّا ؤُ س إِفَاسّنْ يَارهْفنْ ڭُّورْ أَذْ ثُوذُومْ ثَادَّارْثْ.

‏19 بْنَاذمْ إِتّڭّْ أَغْرُومْ مَاحنْذْ أَذْ إِضْهشْ، ؤُ بِينُو إِسّْفَارَّاحْ إِنِّي إِدَّارنْ ؤُ تّْمنْيَاثْ نفّْعنْثْ إِ مَارَّا مِينْ إِدْجَانْ.

‏20 وَارْ نعّڒْ أَجدْجِيذْ وَاخَّا غَارْ ذِي ڒْبَاڒْ نّشْ، ذڭْ وخَّامْ ن يِيضسْ وَارْ نعّڒْ بُو-وَاڭْڒَا، مَاغَارْ إِجْضَاضْ ن ؤُجنَّا زمَّارنْ أَذْ سُّويُورنْ ڒْحسّْ ن وَاوَاڒنْ نّكْ ؤُ أَمُّو مَارَّا وِي غَارْ دْجَانْ وَافْرِيونْ إِزمَّارْ أَذْ إِسّعْذُو أَوَاڒْ. ^▪