‏1 مَاغَارْ نشّْ ڭِّيغْ مَارَّا أَيَا غَارْ وُوڒْ إِنُو مَاحنْذْ أَذْ أَرْزُوغْ ذِي مَارَّا مَانْ أَيَا، ؤُفِيغْ أَقَا إِمْسڭَّاذنْ ذ إِمِيغِيسنْ ذ ثْمڭَّا نْسنْ ذڭْ ؤُفُوسْ ن أَربِّي. ثَايْرِي ذ وشْرَاهْ وَارْ ثنْ إِسِّينْ بْنَاذمْ، أَقَا مَارَّا إِدْجْ زَّاثسْ. ‏2 مَارَّا إِدْجْ أَمْ مَامّشْ إِدْجْ غَارْ مَارَّا: ثِيرَا ذ إِشْثْ ثْڒقّفْ أَمْسڭّذْ ذ ؤُعفَّانْ، أَمْ ؤُصبْحَانْ ذ ؤُمزْذَاڭْ أَمْ ؤُمخْمُوجْ، ونِّي إِقدّْمنْ ثَاغَارْصْثْ ذ ونِّي وَارْ إِقدّْمنْ ثَاغَارْصْثْ، أَصبْحَانْ ذ ؤُمذْنُوبْ، ونِّي إِتّْجَّادْجَانْ ذ ونِّي إِتّڭْوذنْ مَاحنْذْ أَذْ إِجَّادْجْ. ^▪   ‏3 مَانْ أَيَا ذ إِجّْ ن ڒْغَارْ ذِي مَارَّا مِينْ إِمْسَارنْ سَاذُو ثْفُوشْثْ أَقَا مَارَّا إِوْذَانْ إِڒْقفْ إِ-ثنْ ثِيرَا ذ إِشْثْ، ؤُشَا ؤُڒَا ؤُڒْ نْ ثَارْوَا ن بْنَاذمْ إِشُّورْ س ڒْغَارْ، ؤُ أَقَا ذِينْ أَطمّسْ ذڭْ وُوڒْ نْسنْ ذِي ڒْوقْثْ ن ثُوذَارْثْ نْسنْ، ؤُ أَوَارْنِي إِ ؤُيَا أَذْ ؤُيُورنْ نِيثْنِي غَارْ إِمتِّيننْ. ‏4 مَاغَارْ إِ ونِّي إِقّْننْ إِ مَارَّا إِنِّي إِدَّارنْ أَقَا ذِينْ أَسِيثمْ، مِينْزِي أَقْزِينْ إِدَّارنْ حْسنْ زڭْ وَايْرَاذْ إِمُّوثنْ. ‏5 مَاغَارْ إِنِّي إِدَّارنْ سّْننْ، أَقَا نِيثْنِي أَذْ مّْثنْ، مَاشَا إِمتَّانْ وَارْ سِّيننْ وَالُو قَاعْ. نِيثْنِي وَارْ تّطّْفنْ وَالُو زِي ڒْمُونثْ، مَاغَارْ ڒِيذَارثْ خَافْسنْ ثتّْوَاتُّو. ‏6 أَقَا ثَايْرِي نْسنْ ذ وشْرَاهْ نْسنْ ذ وَاسَامْ نْسنْ فْنَانْ. إِ ڒبْذَا وَارْ غَارْسنْ بُو ثسْغَارْثْ عَاذْ ذِي مَارَّا مِينْ إِتّمْسَارنْ سَاذُو ثْفُوشْثْ.

‏7 ؤُيُورْ خنِّي، إِوَا أشّْ س ڒفْرَاحثْ أَغْرُومْ نّكْ ؤُشَا سُو س وُوڒْ إِفَارْحنْ بِينُو نّكْ، مَاغَارْ إِعْجبْ أَسْ إِ أَربِّي ثِيمڭَّا نّكْ أَطَّاسْ زڭْ وَامِي. ‏8 أجّْ أَذْ يِيڒِي أَرُّوضْ نّكْ ذ أَشمْڒَاڒْ ڒبْذَا ؤُ عمَّارْصْ وَارْ إِتّْخصِّي زّشْثْ خْ ؤُزدْجِيفْ نّكْ. ‏9 بَارّعْ خْ ثُوذَارْثْ أَكْ-ذ ثمْغَارْثْ نِّي أَكْ-ذ ثتّخْسذْ مَارَّا ؤُسَّانْ ن ثُوذَارْثْ نّكْ إِفنَّانْ نِّي ذ أَسْ إِوْشَا أَربِّي سَاذُو ثْفُوشْثْ، مَاڒَا ؤُسَّانْ نّكْ نِّي إِعدُّونْ، مَاغَارْ ثَا ذ ثَاسْغَارْثْ نّكْ ذِي ثُوذَارْثْ-أَ، ؤُ زڭْ ؤُمَارّثْ ونِّي إِ ؤُمِي ثْمَارّْثذْ سَاذُو ثْفُوشْثْ.

‏10 مَارَّا مِينْ غَا يَافْ ؤُفُوسْ نّكْ مَاحنْذْ أَذْ ث يڭّْ، أڭّْ إِ-ث عْلَاحْسَابْ ثِيزمَّارْ نّكْ، مَاغَارْ وَارْ إِدْجِي ذِي ڒَاخَارْثْ مَانِي إِ غَا ثُويُورذْ مِينْ غَا ثڭّذْ نِيغْ أَنْوَايْ نِيغْ ثُوسّْنَا ؤُڒَا ذ ثِيغِيثْ.

‏11 عَاوذْ ژْرِيغْ سَاذُو ثْفُوشْثْ أَقَا أَيْثْ ن بُو-ثَازْڒَا وَارْ غدْجْبنْ ڒبْذَا ذِي حَامَاثْ، نِيغْ أَيْثْ ن بُو-ثغْرُوضْثْ ڒبْذَا ذڭْ ؤُمنْغِي، نِيغْ إِمِيغِيسنْ ڒبْذَا أَغْرُومْ، نِيغْ إِنِّي س ڒعْقڒْ ڒبْذَا أَڭْڒَا، ؤُڒَا ذ إِنِّي س ڒفْهَامثْ ڒبْذَا أَرْضَا، مَاغَارْ ڒْحَاڒْ ذ ثِيرَا ڒقّْفنْ ؤُڒَا ذ مَارَّا نِيثْنِي.

‏12 مَاغَارْ بْنَاذمْ وَارْ إِسِّينْ ڒْمِيجَاڒْ نّسْ، أَمشْنَاوْ إِسڒْمَانْ إِنْحصْرنْ ذِي ثْرَاشَّا ن أَرْژِييّثْ، ؤُ أَمْ إِجْضَاضْ إِنّْحصْرنْ ذِي ڒْفخْ. أَمُّو ؤُڒَا ذ ثَارْوَا ن بْنَاذمْ تّْوَاطّْفنْ ذِي ڒْفخْ ذڭْ إِشْثْ ن ڒْوقْثْ ذ ثَاعفَّانْثْ، خْمِي خَاسنْ د-ثْوطَّا ثْرَاشَّا ذغْيَا.

‏13 ؤُڒَا ذ ثِيغِيثْ-أَ ژْرِيغْ ت سَاذُو ثْفُوشْثْ، ثُوسَا أَيِي-د ذ ثَامقّْرَانْثْ أَطَّاسْ.

‏14 ثُوغَا إِشْثْ ن ثنْذِينْثْ ذ ثَامژْيَانْثْ ذَايسْ ذْرُوسْ ن يوْذَانْ وَاهَا. إِفّغْ خَاسْ إِجّْ ن ؤُجدْجِيذْ ذ أَمقّْرَانْ، إِحوّسْ إِ-ت، ؤُ إِسّْبدّْ خَاسْ لْبَارَاجَاثْ ثِيمقّْرَانِينْ.

‏15 إِتّْوَافّْ ذَايسْ إِجّْ ن ورْيَازْ ذ أَمزْڒُوضْ ذ أَمِيغِيسْ ونِّي إِفكّنْ ثَانْذِينْثْ س ثِيغِيثْ نّسْ، مَاشَا ؤُڒَا ذ إِجّْ ن بْنَاذمْ إِعْقڒْ عَاذْ خْ ورْيَازْ نِّي.

‏16 خنِّي نِّيغْ نشّْ: ”ثِيغِيثْ ثحْڒَا خْ جّْهذْ!“، وَاخَّا ثتّْوَاسحْقَارْ ثِيغِيثْ ن ؤُمزْڒُوضْ ؤُ أَوَاڒنْ نّسْ وَارْ ثتّْوَاسْڒنْ. ^▪  

‏17 أَوَاڒنْ ن إِمِيغِيسنْ نِّي إِ غَارْ ثسْڒَانْ إِوْذَانْ ذِي ڒْهُوذْنثْ حْسنْ زڭْ ؤُغُويِّي نْ ڒْحَاكمْ جَارْ إِپُوهَاڒِييّنْ.

‏18 ثِيغِيثْ ثحْڒَا خْ ڒسْنَاحْ ن ؤُمنْغِي، مَاشَا إِجّْ ن ؤُمذْنُوبْ وَاهَا إِهدّمْ أَطَّاسْ.