أَوَاڒنْ إِوزْننْ ن أَجُورْ
30
1 أَوَاڒنْ ن أَجُورْ، مِّيسْ ن يَاكِي. ثَامسْڒَاشْثْ إِقسْحنْ. أَوَاڒْ ن ورْيَازْ إِجهْذنْ إِ إِثِييِيلْ، إِ إِثِييِيلْ ذ ؤُكَالْ.
2 نِيشَانْ، أَقَا نشّْ ذ أَقفُّوحْ ن ورْيَازنْ،
ؤُ ڒفْهَامثْ ن بْنَاذمْ وَارْ غَارِي ثدْجِي،
3 ؤُ نشّْ وَارْ ڒْمِيذغْ ثِيغِيثْ،
مَاحنْذْ أَذْ غَارِي ثِيڒِي ثُوسّْنَا ن ؤُمْقدَّاسْ أَمقّْرَانْ.
4 وِي إِڭعّْذنْ غَارْ ؤُجنَّا ؤُشَا إِهْوَا-د؟
مَانْ ونْ إِيَارّْونْ أَصمِّيضْ ذڭْ إِفَاسّنْ نّسْ؟
وِي إِسّنّْضنْ أَمَانْ ذڭْ وَارُّوضْ؟
وِي يَاركّْننْ مَارَّا ثِينڭُّورَا ن ثمُّورْثْ؟
مَانْ إِسمْ نّسْ ؤُ مَانْ إِسمْ ن مِّيسْ،
مَاڒَا شكْ ثسّْنذْ ث؟ ▪
5 مَارَّا أَوَاڒنْ ن أَربِّي تّْوَاصفَّانْ،
أَقَا نتَّا ذ أَذُورِّي إِ ينِّي خَاسْ إِتّْشَاڒَانْ. ▪
6 وَارْ أَرنِّي غَارْ وَاوَاڒنْ نّسْ،
حِيمَا نتَّا وَارْ شكْ إِتّْوبّخْ،
ؤُ أَذْ ثْبَانذْ-د شكْ ذ بُو-إِخَارِّيقنْ. ▪
7 نشّْ تَّارغْ أَشْ ثْنَاينْ ن ثْمسْڒَايِينْ،
وَارْ خَافِي ثنْثْ قطّعْ قْبڒْ إِ غَا مّْثغْ.
8 سِيڭّْوجْ خَافِي مِينْ إِبضْڒنْ ذ ڒْهَارْضْ إِخَارِّيقنْ،
وَارْ ذ أَيِي تِّيشْ زّڒْضْ ؤُڒَا ذ وَاڭْڒَا،
سعْذُو أَيِي-د ثَاسْغَارْثْ إِنُو إِ ذ أَيِي د-إِتَّاسنْ زڭْ وغْرُومْ،
9 مَاڒَا لَّا، خْمِي إِ غَا جِّيوْنغْ، أَذْ ثَاغْ أَذْ شكْ نْكَارغْ،
أَذْ إِنِيغْ ’وِي إِدْجَانْ سِيذِي؟‘،
نِيغْ خنِّي، مَاڒَا زڒْضغْ، أَذْ أَشَارغْ،
ؤُ أَذْ ڭّغْ ڒْعِيبْ ذڭْ يِيسمْ ن أَربِّي إِنُو.
10 وَارْ شقّفْ ذڭْ إِجّْ ن ؤُمْسخَّارْ غَارْ سِيذِيسْ نّسْ،
حِيمَا نتَّا وَارْ شكْ إِنعّڒْ ؤُ خنِّي شكْ أَذْ ذَايكْ يِيڒِي ڒْعِيبْ.
11 أَقَا ذِينْ إِجّْ ن جِّيڒْ إِ إِنعّْڒنْ بَابَاسْ،
ؤُ وَارْ إِتّْبَاركْ يمَّاسْ،
12 إِجّْ ن جِّيڒْ إِ يدْجَانْ ذ أَمزْذَاڭْ ذِي ثِيطَّاوِينْ نّسْ،
مَاشَا وَارْ إِتّْوَاسِيرْذْ زِي ڒخْمجْ نّسْ،
13 إِجّْ ن جِّيڒْ س ڒْخزْرَاثْ إِنفْخنْ،
س وَابْڒِيونْ نّسْ إِڭعّْذنْ، ▪
14 إِجّْ ن جِّيڒْ س ثغْمَاسْ أَمْ ڒسْيُوفْ ذ ثغْمَاسْ ن ثغْمَارْثْ أَمْ ڒمْوَاسْ،
حِيمَا أَذْ صَارْضنْ إِنِّي إِتّْوَاحْصَارنْ زِي ثمُّورْثْ ذ إِمزْڒَاضْ زڭْ إِوْذَانْ. ▪
15 ثَادَّا غَارسْ ثْنَاينْ ن يسِّيسْ ’أوْشْ!‘ ’أوْشْ!‘
أَقَا ذِينْ ثْڒَاثَا نِّي عمَّارْصْ أَذْ جِّيوْننْ.
أَربْعَا عمَّارْصْ أَذْ إِنِينْ: ”شْفَا!“
16 ڒَاخَارْثْ ذ ڒمْڒَاوثْ إِبلّْعنْ،
ثَامُّورْثْ إِ وَارْ إِجِّيوْننْ عمَّارْصْ زڭْ وَامَانْ،
ؤُڒَا ذ ثْمسِّي وَارْ قَّارنْثْ عمَّارْصْ: ”شْفَا!“
17 ثِيطّْ إِ إِسّْثهْزَانْ زِي بَابَاسْ،
ؤُ ثسّحْقَارْ طَّاعثْ إِ يمَّاسْ،
أَذْ ت قڒْعنْ إِبَاغْڒِيونْ غَارْ ثغْزَارْثْ،
ؤُ إِمژْيَاننْ ن ؤُڭِيذرْ أَذْ ت شّنْ.
18 ثْڒَاثَا أَيَا ن ثْمسْڒَايِينْ عْذُونْثْ أَيِي س ڒعْجبْ،
أَربْعَا وَارْ ثنْثْ سِّينغْ:
19 أَبْرِيذْ ن ؤُڭِيذرْ ذڭْ ؤُجنَّا،
أَبْرِيذْ ن ؤُفِيغَارْ خْ ثصْضَارْثْ،
أَبْرِيذْ ن ؤُغَارَّاپُو ذڭْ وُوڒْ ن ڒبْحَارْ
ؤُ أَبْرِيذْ ن ورْيَازْ أَكْ-ذ ثعْزَارشْثْ.
20 أَمُّو إِ إِتّڭّْ أَبْرِيذْ ن إِشْثْ ن ثمْغَارْثْ إِزنَّانْ:
نتَّاثْ ثتّتّْ، ثسِّيرِيذْ أَقمُّومْ نّسْ،
ثقَّارْ: ”نشّْ وَارْ ڭِّيغْ وَالُو ذ ڒْغشّْ!“
21 سَاذُو ثْڒَاثَا ن ثْمسْڒَايِينْ-أَ ثنْهزّْ ثمُّورْثْ،
سَاذُو أَربْعَا إِ وَارْ ثْزمَّارْ أَذْ ثَارْپُو:
22 سَاذُو إِجّْ ن ؤُمْسخَّارْ مَاڒَا نتَّا إِذْوڒْ ذْ أَجدْجِيذْ،
سَاذُو إِجّْ ن ؤُپُوهَاڒِي مَاڒَا نتَّا إِجِّيونْ أَغْرُومْ،
23 سَاذُو إِشْثْ ن ثمْغَارْثْ ثتّْوَاشَارْهْ مَاڒَا نتَّاثْ ثتّْوَاسّمْڒشْ،
ؤُ سَاذُو إِشْثْ ن ثسْمغْثْ مَاڒَا ثطّفْ ڒْوَارْثْ ن لَالَّاسْ.
24 أَربْعَا أَيَا ذ إِمژْيَاننْ قَاعْ خْ ثمُّورْثْ،
عَاذْ نِيثْنِي ذ إِمِيغِيسنْ قَاعْ.
25 ثِيكضْفِينْ وَارْ دْجِينْثْ ذ ڒْڭنْسْ إِجهْذنْ،
مَاشَا عَاذْ نِيثنْثِي سّوْجَاذنْثْ مَاشَّا نْسنْ ذڭْ ؤُنبْذُو. ▪
26 إِكَاوْكَاونْ ن ثصْضَارْثْ ذ إِجّْ ن ڒْڭنْسْ نْهْڒَا جّْهذْ،
مَاشَا نِيثْنِي بنَّانْ ثَازذِّيغْثْ نْسنْ خْ ثصْضَارْثْ.
27 ثَامُوغْرِي وَارْ غَارسْ بُو أَجدْجِيذْ،
وَاخَّا أَمنِّي إِفّغْ س ؤُستّفْ مَارَّا،
28 أَزرْمُومِّي ثْزمَّارذْ أَذْ ث ثطّْفذْ س ثْنَاينْ ن إِفَاسّنْ،
عَاذْ أَقَا-ث نتَّا ذِي ڒقْصُورْ ن إِجدْجِيذنْ.
29 ثْڒَاثَا أَيَا صُّورُوفنْ س ڒْعزّْ،
أَربْعَا ڭُّورنْ س ثشْڒِي ثشْنعْ.
30 أَيْرَاذْ، بُو-ثغْرُوضْثْ جَارْ ڒْمَارْ،
ونِّي وَارْ إِتّْوخِّيرنْ زَّاثْ إِ حذْ،
31 إِجّْ ن ؤُغِيڒَاسْ س ثجْعِينَّاثِينْ نّسْ بيْسنْثْ، نِيغْ إِجّْ ن ؤُمْيَانْ،
ؤُ إِجّْ ن ؤُجدْجِيذْ ونِّي غَارْ إِدْجْ ؤُڒَاغِي ن ؤُمنْغِي. ▪
32 مَاڒَا شكْ ثڭِّيذْ س ثُوبُّوهڒْيَا ؤُمِي ثسّْڭعّْذذْ إِخفْ نّكْ،
نِيغْ ثْخمّمذْ ذِي ثحْرَايْمشْثْ: سَارْسْ أَفُوسْ خْ ؤُقمُّومْ! ▪
33 مَاغَارْ أَسنْذُو ن ؤُغِي إِتَّاوِي-د ثْرُوسِّي،
ؤُ أَسنْذُو ن ونْزَارنْ إِتَّاوِي-د إِذَامّنْ،
ؤُ أَسنْذُو ن ؤُخيّقْ، إِتَّاوِي-د أَمْشُوبّشْ.