‏1 أَرْيَازْ، ونِّي، أَوَارْنِي ڒَامِي ث عَاقْبنْ أَطَّاسْ ن ثْوَاڒَاوِينْ،

إِسّقْسْحنْ يِيرِي نّسْ، أَذْ يَارْژْ ذڭْ إِجّْ ن ؤُمُورْ،

خنِّي وَارْ ذِينْ إِدْجِي عَاذْ ؤُڭنْفُو.

‏2 مَاڒَا ذوْڒنْ إِمْسڭَّاذنْ س صُّولْطَا، خنِّي إِفَارّحْ ڒْڭنْسْ،

مَاشَا مَاڒَا إِحكّمْ ؤُعفَّانْ، أَذْ إِزْهَارْ ڒْڭنْسْ. ^▪  

‏3 بْنَاذمْ إِتّخْسنْ ثِيغِيثْ، إِسّْفَارَّاحْ بَابَا أَسْ،

مَاشَا ونِّي إِتّْمُونَانْ أَكْ-ذ ثمْغَارِينْ ن فَارْقْ-شّْغڒْ،

إِتّْزدْجَاعْ أَڭْڒَا نّسْ. ^▪  

‏4 أَجدْجِيذْ إِسّْبدَّا ثَامُّورْثْ س ڒْحقّْ،

مَاشَا أَرْيَازْ نِّي إِسّْڭعَّاذنْ ضَّارِيبَا أَطَّاسْ ن ثْوَاڒَاوِينْ،

إِهدّمْ إِ-ت.

‏5 أَرْيَازْ نِّي إِسّْوَاطَانْ أَمْقَارّبْ نّسْ،

إِتّْبزَّاعْ إِشْثْ ن ثْرَاشَّا إِ إِضَارنْ نّسْ.

‏6 ذڭْ ؤُعذِّي ن إِجّْ ن ورْيَازْ أَعفَّانْ إِنُّوفَّارْ ذَايسْ إِجّْ ن ڒْفخْ،

مَاشَا أَمْسڭّذْ إِتّسْڒِيوْڒوْ ؤُ إِفَارّحْ.

‏7 أَمْسڭّذْ إِسّنْ دّعْوثْ ن إِمَارْخَا،

أَعفَّانْ مَاشَا وَارْ إِفهّمْ وَالُو ذِي ثُوسّْنَا. ^▪  

‏8 إِمسْثهْزَايّنْ سّكَّارَانْ أَغوّغْ ذِي ثنْذِينْثْ،

مَاشَا إِمِيغِيسنْ سّْنقْڒَابنْ أَغْضَابْ.

‏9 مَاڒَا أَمِيغِيسْ إِكْسِي-د ثَانْفُوتْشْ إِ يِيجّْ ن ؤُپُوهَاڒِي،

خنِّي نتَّا ڭُّورْ أَذْ إِخيّقْ وَانِيثْ ؤُ أَذْ إِضْحشْ بْڒَا قطُّو.

‏10 إِرْيَازنْ ؤُمِي إِتّعْجِيبْ إِذَامّنْ شَارّْهنْ أَمزْذَاڭْ،

مَاشَا إِنِّي إِڭُّورنْ نِيشَانْ خزَّارنْ غَارْ ڒعْمَارْ نّسْ.

‏11 أَپُوهَاڒِي إِضدْجقْ إِ مَارَّا بُوحْبڒْ نّسْ،

مَاشَا أَمِيغِيسْ إِتّْقمّعْ إِ-ث. ^▪  

‏12 ڒْحَاكمْ نِّي إِتِّيشنْ ثَايْنِيثْ إِ ڒْهَارْذْ ن إِخَارِّيقّنْ،

زَّايسْ أَذْ إِڒِينْ مَارَّا إِمْسخَّارنْ نّسْ ذ إِعفَّاننْ.

‏13 أَمزْڒُوضْ ذ إِجّْ ن ورْيَازْ إِتّْوَاحْسَارنْ ڒبْذَا، مْسَاڭَارنْ،

سِيذِي إِسّْنوَّارْ ثِيطَّاوِينْ نْسنْ س ثْنَاينْ إِذْسنْ. ^▪  

‏14 أَجدْجِيذْ نِّي إِتِّيشنْ ثَاسْغَارْثْ إِ إِمَارْخَا ذِي شّْرعْ،

ڒْكُورْسِي نّسْ أَذْ إِقِّيمْ إِبدّْ إِ ڒبْذَا. ^▪  

‏15 أَعْمُوذْ ذ ؤُوبّخْ تِّيشنْ ثِيغِيثْ،

مَاشَا أَحنْجِيرْ جِّينْ ث إِ يِيخفْ نّسْ،

يَارَّا يمَّاسْ أَذْ ثسّضْحَا. ^▪  

‏16 مَاڒَا ذوْڒنْ إِعفَّاننْ جهْذنْ، خنِّي يَارنِّي ؤُخطُّو،

مَاشَا إِمْسڭَّاذنْ أَذْ ژَترنْ وطُّو نْسنْ. ^▪  

‏17 أَربَّا مِّيشْ ؤُ نتَّا ڭُّورْ أَذْ شكْ إِسَّاريّحْ،

نتَّا أَذْ إِوْشْ لْبَارَاكَاثْ ثِيمِيژِيذِينْ. ^▪  

‏18 مَاڒَا وَارْ ذِينْ ثَامژْرِيوْثْ، إِتّْفُوشُّوحْ ڒْڭنْسْ،

مَاشَا سّعْذْ ن ونِّي إِحطَّانْ شَّارِيعَا.

‏19 إِجّْ ن إِسْمغْ وَارْ إِتّجِّي أَذْ ث أَرّبَّانْ س وَاوَاڒنْ،

مَاغَارْ وَاخَّا نتَّا إِفهّمْ خَاكْ، وَارْ خَاكْ إِتَّارِّي شَا.

‏20 مَا شكْ عمَّارْصْ وَارْ ثژْرِيذْ إِجّْ ن ورْيَازْ إِتّْقدْجِيقْ س وَاوَاڒنْ نّسْ؟

أَقَا ذِينْ أَسِيثمْ كْثَارْ إِ ؤُپُوهَاڒِي ؤُڒَا خَاسْ. ^▪  

‏21 مَاڒَا إِجّنْ إِسُّوبضْ إِسْمغْ نّسْ زِي ثمْژِي،

أَذْ إِذْوڒْ غَارْ ؤُنڭَّارْ وَارْ ث إِتّْقِيذِي.

‏22 أَرْيَازْ إِتَّارُّوجْذُوذنْ إِسّكَّارَا-د أَمْشُوبّشْ،

ؤُ بَابْ ن وسْعَارْ إِتّڭّْ أَطَّاسْ ن إِخطَّانْ. ^▪  

‏23 نّْفَاخثْ ن بْنَاذمْ ڭُّورْ أَذْ ث إِسّْوَاضعْ،

مَاشَا أَمْوَاضعْ ن بُوحْبڒْ أَذْ أَسْ إِتّْوَاڭّْ شَّانْ. ^▪  

‏24 ونِّي إِبطَّانْ أَكْ-ذ ؤُخوَّانْ، إِشَارّهْ إِخفْ نّسْ،

مَاغَارْ نتَّا إِتّسْڒَا إِ ثْجَادْجِيثْ، مَاشَا وَارْ ث إِقَّارْ شَا. ^▪  

‏25 ثِيڭّْوُوذِي زڭْ إِوْذَانْ ثْندّهْ غَارْ ڒْفخْ،

مَاشَا ونِّي إِتّْشَاڒَانْ خْ سِيذِي، أَذْ إِتّْوَاسْڭعّذْ ذِي ڒَامَانْ.

‏26 أَطَّاسْ أَرزُّونْ ؤُذمْ ن ڒْحَاكمْ،

وَاخَّا ثَاسْغَارْثْ ن كُوڒْ إِجّْ ثتَّاسْ-د زِي سِيذِي. ^▪  

‏27 أَرْيَازْ أَغشَّاشْ ذ نّْعِي إِ إِمْسڭَّاذنْ،

مَاشَا ونِّي إِڭُّورنْ نِيشَانْ ذڭْ وبْرِيذْ نّسْ، أَقَا-ث ذ نّْعِي إِ ؤُعفَّانْ.