‏1 أَوَاڒنْ ن لَامُويِيلْ، أَجدْجِيذْ.

أَوَاڒنْ إِقسْحنْ إِ زِي ث ثْعڒْمذْ يمَّاسْ.

‏2 مِينْ ذِينْ، أَ مِّي إِنُو، مِينْ ذِينْ، أَ مِّي ن وحْسِينْ إِنُو؟

مِينْ إِ غَا ثڭّذْ، أَ مِّي ن لْوُوعُوذْ إِنُو؟

‏3 وَارْ تِّيشْ ثِيزمَّارْ نّكْ إِ ثمْغَارِينْ،

ؤُڒَا إِبْرِيذنْ نّكْ إِ ثِينِّي إِتّْهلَّاكنْ إِجدْجِيذنْ. ^▪  

‏4 وَارْ د-ثُوسِي إِ إِجدْجِيذنْ، أَ لَامُويِيلْ، وَارْ د-ثُوسِي إِ إِجدْجِيذنْ مَاحنْذْ أَذْ سْونْ بِينُو،

ؤُڒَا إِ أَيْثْ ن جّهْذْ مَاحنْذْ أَذْ مژْرنْ ذِي شّْرَابْ.

‏5 نِيغْ أَذْ إِسُووْ ؤُ أَذْ إِتُّو لْفَارِيضَا

ؤُ خنِّي أَذْ إِسّْفَارْغْ ثَانْفُوتْشْ ن مَارَّا إِمْخيّْبنْ.

‏6 أوْشْ شّْرَابْ إِ ينِّي إِ غَا إِتّْوَاهلّْكنْ،

ؤُڒَا ذ بِينُو إِ ينِّي ذِي إِدْجْ وشْضَانْ أَمرْزَاڭْ ذِي ڒعْمَارْ نْسنْ.

‏7 أجّْ إِ-ث أَذْ إِسُووْ ؤُ أَذْ إِتُّو زّڒْضْ نّسْ،

ؤُ أجّْ إِ-ث وَارْ تّْخَارَّاصْ ذِي ثَامَارَا نّسْ عَاذْ.

‏8 أَرْزمْ أَقمُّومْ نّكْ إِ إِزِييْنَانْ،

إِ دّعْوثْ ن مَارَّا إِنِّي إِتّْوَاجّنْ.

‏9 أَرْزمْ أَقمُّومْ نّكْ، حْكمْ س ڒْحُوكْمْ نِيشَانْ،

ؤُشَا أَغْ ثَاسْغَارْثْ إِ ؤُمزْڒُوضْ. ^▪  

‏10 أَلِيفْ. مَانْ ونْ إِ غَا يَافنْ إِشْثْ ن ثمْغَارْثْ إِمحْضنْ؟

تَّامَانْ نّسْ إِعْذُو مَارَّا ڒْمَارْجَانْ. ^▪  

‏11 بِيثْ. خَاسْ إِ إِتّْشَاڒَا وُوڒْ ن سِيذِي نّسْ،

وَارْ ذ أَسْ إِتّْخصِّي ڒفْضڒْ.

‏12 ڭِيملْ. نتَّاثْ ثتّڭّْ أَسْ مِينْ إِصبْحنْ ؤُ مَاشِي ڒْغَارْ،

مَارَّا ؤُسَّانْ ن ثُوذَارْثْ نّسْ.

‏13 ذَالِيثْ. نتَّاثْ ثَارزُّو ثَاضُوفْثْ ذ ثِيفّسْثْ،

ؤُ ثْخدّمْ س إِفَاسّنْ نّسْ إِمحْضنْ.

‏14 هِي. نتَّاثْ ثڭَّا أَمْ ثْغَارُّوبَا ن ؤُسبَّابْ،

زِي ڒَاڭّْوَاجْ ثتَّاوِي-د مَاشَّا نّسْ.

‏15 وَاوْ. نتَّا ثتّْنَاكَّارْ ؤُمِي عَاذْ ثدْجْ دْجِيڒثْ،

ثتِّيشْ مَاشَّا إِ ثَادَّارْثْ نّسْ،

ؤُ ثَاسْغَارْثْ نْسنْثْ إِ ثمْسخَّارِينْ ثِيبْڒِيغِينْ نّسْ.

‏16 زَايِينْ. نتَّاثْ ثتّْخَارَّاصْ ذڭْ إِيَّارْ ؤُ ثتّطّفْ إِ-ث،

زِي ڒْغِيدْجثْ ن إِفَاسّنْ نّسْ ثژُّو ثِيزَايَارِينْ ذڭْ ؤُمَارْجُوعْ.

‏17 خِيثْ. نتَّاثْ ثْبكّسْ ثِيجْعِينَّاثِينْ نّسْ س جّهْذْ،

ؤُ ثسّمْحَاضْ إِغَادْجنْ نّسْ.

‏18 ثِيث. نتَّاثْ ثْحكَّارْ إِ ڒفْضڒْ ن ثْسبَّابْثْ نّسْ،

ڒفْنَارْ نّسْ وَارْ إِخسِّي ذِي دْجِيڒثْ.

‏19 يُوذْ. نتَّاثْ ثسّْوِيژّضْ إِفَاسّنْ نّسْ غَارْ ثْرُوكَّا،

ؤُ إِفَاسّنْ نّسْ طّْفنْ ثَازْضَا.

‏20 كَافْ. نتَّاثْ ثَارزّمْ أَفُوسْ نّسْ إِ ؤُمحْذَاجْ،

ؤُ ثسّْوَاژَّاضْ إِفَاسّنْ نّسْ إِ ؤُمزْڒُوضْ.

‏21 لَامِيذْ. نتَّاثْ وَارْ ثتّڭّْوذْ زِي ثَادَّارْثْ نّسْ ذِي سِّيبّثْ ن وذْفڒْ،

مَاغَارْ مَارَّا ثَادَّارْثْ نّسْ غَارسْ أَرُّوضْ أَرْجُووَانِي.

‏22 مِيمْ. نتَّاثْ ثڭَّا ثِيسُونْثَاوِينْ ن زْوَاقْ إِ يِيخفْ نّسْ،

أَرُّوضْ نّسْ س ڒقْطنْ أَزْذَاذْ ؤُ س ؤُفِيڒُو أَرْجُووَانِي.

‏23 نُونْ. أَرْيَازْ نّسْ إِتّْوَاسّنْ ذِي ثوُّورَا،

خْمِي إِتّْغِيمَا نتَّا أَكْ-ذ إِمْغَارنْ ن ثمُّورْثْ.

‏24 سَامِيخْ. نتَّاثْ ثتّڭّْ أَرُّوضْ ن ڒقْطنْ ؤُشَا ثزّْنُوزَا إِ-ث،

نتَّاثْ ثزّْنُوزَا إِپُويَاسْ إِ ؤُسبَّابْ زِي كنْعَانْ.

‏25 عَايِينْ. ثِيزمَّارْ ذ ڒْعزّْ ذ أَرُّوضْ نّسْ،

نتَّاثْ ثْضحّشْ ثسْفَارْنِينْ خْ وَاسّْ إِ د غَا يَاسنْ.

‏26 بِي. نتَّاثْ ثَارزّمْ أَقمُّومْ نّسْ س ثِيغِيثْ،

أَقَا ذِينْ ثَاغُورِي س ثْمخْسِيوْثْ إِشوَّارنْ خْ يِيڒسْ نّسْ.

‏27 ثْسَاذِي. نتَّاثْ ثْحطَّا خْ مِينْ إِتّمّْسَارَانْ ذِي ثَادَّارْثْ،

أَغْرُومْ ن ڒعْڭزْ وَارْ ثتّتّْ .

‏28 قُوفْ. إِحنْجِيرنْ نّسْ تّكَّارنْ، سّمْغَارَانْ ت س ڒفْرَاحثْ،

ؤُڒَا ذ أَرْيَازْ نّسْ إِتّْمدّحْ إِ-ت.

‏29 رِيخْ. أَطَّاسْ ن ثْيسِّيثْ ڭِّينْثْ ثِيمڭَّا جهْذنْثْ،

مَاشَا شمْ ثعْذُوذْ-د ثنْ مَارَّا.

‏30 شِينْ. ڒبْهُوثْ ثْشمّثْ ؤُ أَژْرِي إِفنَّا،

مَاشَا ثَامْغَارْثْ نِّي إِتّڭّْوْذنْ سِيذِي، إِتّْخصَّا أَذْ ت سّمْغَارنْ.

‏31 ثَاوْ. وْشمْ أَسْ زِي ڒْغِيدْجثْ ن إِفَاسّنْ نّسْ،

جّمْ ثِيمڭَّا نّسْ أَذْ أَسْ صبّْحنْثْ غَارْ ثوُّورَا.