26
1 أَمْ وذْفڒْ ذڭْ ؤُنبْذُو ؤُ أَمْ ونْژَارْ ذِي ثْميْرَا، أَمُّو وَارْ د-إِتِّيسْ شَّانْ أَكْ-ذ ؤُپُوهَاڒِي.
2 أَمْ ژَّاوشْ إِتّْفَارْفَارنْ، أَمْ ثْفَاڒْدْجسْثْ إِطَّاونْ سَّا ذ سَّا،
أَمُّو إِ ثڭَّا إِشْثْ ن نّعْڒثْ بْڒَا سِّيبّثْ، نتَّاثْ وَارْ ثْڒقّفْ. ▫
3 أَركُّوضْ إِ ؤُيِيسْ، سْڒِيمثْ إِ وغْيُوڒْ،
ؤُ أَعْمُوذْ إِ وعْرُورْ ن إِپُوهَاڒِييّنْ. ▪
4 وَارْ تَّارِّي خْ ؤُپُوهَاڒِي أَنشْثْ ثُوبُّوهڒْيَا نّسْ،
مَاحنْذْ ؤُڒَا ذ شكْ وَارْ ذَايسْ ثَاركّْوسذْ.
5 أَرّْ خْ ؤُپُوهَاڒِي عْلَاحْسَابْ ثُوبُّوهڒْيَا نّسْ،
مَاحنْذْ وَارْ إِتّْغِيڒْ نتَّا ذ أَمِيغِيسْ ذِي ثِيطَّاوِينْ نّسْ.
6 أَمْ ونِّي إِتّْقسّنْ إِضَارنْ ن يِيخفْ نّسْ ؤُ أَمْ ونِّي إِسّسّنْ لْعُونْفْ،
أَمُّو إِ يدْجْ ونِّي إِسّكَّانْ ثِيبْرَاثِينْ س ؤُفُوسْ ن إِجّْ ن ؤُپُوهَاڒِي.
7 ثِيمسَّاضِينْ ن ؤُنعْضَابْ أَرهْفنْثْ،
أَمُّو إِ يدْجْ ؤُڒَا ذ أَوَاڒْ إِوزْننْ ذڭْ ؤُقمُّومْ ن إِپُوهَاڒِييّنْ.
8 أَمشْنَاوْ ونِّي إِتّْشدَّانْ أَژْرُو إِغْڒَانْ ذڭْ إِدْجِييْ،
أَمُّو إِ إِدْجْ ونِّي إِتّڭّنْ شَّانْ إِ ؤُپُوهَاڒِي.
9 أَمْ إِشْثْ ن ثِيونْثْ ن ثْزڭّْوَارْثْ د-إِڭّعّْذنْ ذڭْ ؤُفُوسْ ن ؤُسْكَارْجِي،
أَمُّو إِ إِدْجْ لْمَاثَالْ ذڭْ ؤُقمُّومْ ن إِپُوهَاڒِييّنْ.
10 أَطَّاسْ إِزمَّارْ أَذْ د-إِسُّوفّغْ مَارَّا زڭْ يِيخفْ نّسْ،
مَاشَا ڒْمُونثْ ن ؤُپُوهَاڒِي ذ ونِّي ث غَا إِشْرَانْ، أَذْ خْصَارنْ.
11 أَمْ إِجّْ ن وقْزِينْ إِعقْبنْ غَارْ مِينْ إِعُوقّْ،
أَمُّو إِ إِتّْعَاوَاذْ إِجّْ ن ؤُپُوهَاڒِي ثُوبُّوهڒْيَا نّسْ. ▪
12 مَا ثژْرِيضْ عمَّارْصْ إِجّْ ن ورْيَازْ إِ إِتّڭّنْ إِخفْ نّسْ ذ أَمِيغِيسْ؟
أَقَا ذِينْ أَسِيثمْ أَطَّاسْ إِ يِيجّْ ن ؤُپُوهَاڒِي ؤُڒَا خَاسْ. ▪
13 أَمعْڭُوزْ إِقَّارْ: ”أَقَا ذِينْ إِجّْ ن وَايْرَاذْ إِزهَّارنْ ذڭْ وبْرِيذْ،
إِجّْ ن ويْرَاذْ يُويُورْ ذڭْ وَازَّاينْ!“ ▪
14 أَمْ ثوَّارْثْ ثتُّونُّوضْ إِ ثغْمَارْثْ نّسْ،
أَمُّو إِ إِتُّونُوضْ ؤُڒَا ذ أَمعْڭُوزْ ذِي قَامَا نّسْ.
15 أَمعْڭُوزْ إِسّْنُوفَّارْ أَفُوسْ نّسْ ذِي طّبْصِي،
أَقَا نتَّا يَارْخُو مَاحنْذْ أَذْ ث إِسِّيوضْ غَارْ ؤُقمُّومْ نّسْ. ▫ ▪
16 أَمعْڭُوزْ إِتّْوَاڒَا إِخفْ نّسْ ذ أَمِيغِيسْ،
زِي سبْعَا إِرْيَازنْ نِّي إِزمَّارنْ أَذْ د-أَرّنْ س ڒفْهَامثْ.
17 أَمْ ونِّي إِتّْشبَّارنْ ذڭْ إِمزُّوغنْ ن وقْزِينْ،
أَمُّو إِ يدْجْ ونِّي إِتَّاذْفنْ ذڭْ ؤُمْشُوبّشْ نِّي وَارْ إِدْجِي نّسْ.
18 أَمْ إِجّْ ن ؤُمجْنُونْ
نِّي إِشَّاثنْ إِصفْضَاونْ ذ فْڒِيثْشَاثْ ذ سّمْ إِنقّنْ،
19 أَمُّو إِ إِدْجْ ورْيَازْ نِّي إِشمْثنْ أَمْقَارّبْ نّسْ،
ؤُشَا إِقَّارْ: ”أَقَا تّْقسَّارغْ وَاهَا، نِيغْ لَّا!“
20 مَاڒَا وَارْ إِدْجِي ؤُكشُّوضْ، أَذْ ثخْسِي ثْمسِّي،
ؤُ مَاڒَا وَارْ ذِينْ إِدْجِي ؤُخْبَارْجِي، يَارسَّا ؤُمْشُوبّشْ. ▪
21 أَمْ إِدْجْ ڒفْحمْ إِ ڒفْحمْ إِتّحْذُوذُوقنْ ذ ؤُكشُّوضْ إِ ثْمسِّي،
أَمُّو إِ يدْجْ إِجّْ ن ورْيَازْ إِتّمْشُوبُّوشنْ
مَاحنْذْ أَذْ د-إِسْنكَّارْ أَمنْغِي. ▪
22 أَوَاڒنْ ن ؤُخْبَارْجِييْ أَمْ حَالَاوِيثْ،
ثِينِّي هكّْوَانْثْ ذڭْ إِخَّامنْ ن ذَاخڒْ ن ؤُعذِّيسْ. ▪
23 أَمْ كُوفُّو ن نُّوقَارْثْ خْ ؤُشدْجِيقْ ن ثْڒَاخْثْ،
أَمُّو إِ دْجَانْ إِينْشِيشنْ إِمِيزِيضنْ ن يِيجّنْ س وُوڒْ ذ أَعفَّانْ.
24 ونِّي ذِي إِدْجْ وشْرَاهْ، إِسّْنُوفَّارَا إِ-ث س يِيڒسْ نّسْ
مَاشَا ذڭْ وُوڒْ نّسْ إِتّْخَارّصْ ذِي ڒْغشّْ.
25 مَاڒَا نتَّا إِتّْحشّمْ س ثْمِيجَّا نّسْ، وَارْ ث تِّيقِّي شَا،
مَاغَارْ سبْعَا ن نّْعَاوَاثْ أَقَا ذِينْ ذڭْ وُوڒْ نّسْ.
26 ؤُڒَا مَاڒَا إِڒحّفْ وشْرَاهْ نّسْ ذڭْ وشْمَاثْ،
ثُوعفّْنَا نّسْ أَذْ ثتّْوَاعَارَّا ذڭْ وڭْرَاوْ ن ڒْڭنْسْ.
27 ونِّي إِغْزِينْ ثَاسْرَافْثْ، أَذْ ذَايسْ إِوْضَا سِيمَانْثْ نّسْ،
ؤُ ونِّي إِسّقْنُونُّوينْ إِشْثْ ن ثصْضَارْثْ، أَذْ غَارسْ د-ثذْوڒْ. ▪
28 إِڒسْ إِسّْخَارِّيقنْ إِشَارّهْ ونِّي إِتَّاردّْدْجنْ،
إِجّْ ن ؤُقمُّومْ أَڒقَّاغْ س ثحْرَايْمشْثْ إِتَّاوِي-د ڒْخَارْبثْ.