25
1 ؤُڒَا ذ إِنَا ذ أَوَاڒنْ إِوزْننْ ن سُولِيمَانْ نِّي إِتّْعَاوَاذنْ ؤُرِينْ ثنْ إِرْيَازنْ ن حِيزْقِييَا، أَجدْجِيذْ ن يَاهُوذَا.
2 أَقَا ذ شَّانْ ن أَربِّي مَاحنْذْ أَذْ إِسَّارْ إِشْثْ ن ثْمسْڒَاشْثْ،
مَاشَا شَّانْ ن إِجدْجِيذنْ أَنْبَاشْ ذڭْ إِشْثْ ن ثْمسْڒَاشْثْ. ▪
3 ڒُوعْڒَا ن ؤُجنَّا ذ ڒَادْجَاغْ ن ثمُّورْثْ،
ذ وُوڒْ ن إِجدْجِيذنْ وَارْ دْجِينْ إِ ؤُبقّشْ.
4 كّسْ كُوفُّو زِي نُّوقَارْثْ،
ؤُ ڭُّورْ أَذْ د-ثفّغْ إِشْثْ نْ ڒْقشْعثْ إِ ومْزِيڒْ.
5 سْبعّذْ إِعفَّاننْ زِي زَّاثْ ن وُوذمْ ن ؤُجدْجِيذْ،
ؤُشَا خنِّي أَذْ إِتّْوَاسّمْثنْ ڒْعَارْشْ نّسْ س ثْسڭْذَا. ▪
6 وَارْ ثْفيّشْ زَّاثْ إِ وُوذمْ ن ؤُجدْجِيذْ،
وَارْ تّْبذِّي مَانِي تّْبدَّانْ إِمقّْرَاننْ.
7 مَاغَارْ إِحْڒَا، أَذْ أَشْ إِنِينْ: ”ڭَاعّذْ-د ذَا!“،
ؤُڒَا مَا أَذْ شكْ سّهْوَانْ زَّاثْ إِ وُوذمْ ن إِجّْ ن ؤُمْشنّعْ
نِّي ژْرِينْ ثِيطَّاوِينْ نّكْ. ▪
8 وَارْ تّْقدْجِيقْ أَذْ ثذْعِيذْ،
مَاغَارْ مِينْ ثخْسذْ أَذْ ثڭّذْ غَارْ ؤُنڭَّارْ نّسْ،
مَاڒَا أَمْقَارّبْ نّكْ أَذْ شكْ إِسّفْضحْ؟ ▪
9 شَارّعْ أَكْ-ذ ؤُمْقَارّبْ نّكْ،
مَاشَا وَارْ سُّوفُّوغْ سِّيرّْ ن ونّغْنِي،
10 حِيمَا ونِّي ذ أَسْ إِتّسْڒَانْ وَارْ شكْ إِسّْحشّمْ شَا،
مَاغَارْ ڒخْذنِّي وَارْ إِزمَّارْ أَذْ ثتّْوَاسْبعّذْ ڒفْضِيحثْ نّكْ عَاذْ.
11 أَمْ تّفَّاحِينْ ن وُورغْ خْ طّْبَاسَا ن نُّوقَارْثْ،
أَمُّو دْجَانْ وَاوَاڒنْ سِّيوْڒنْ ثنْ س ڒقْيَاسْ نّسْ.
12 أَمْ إِشْثْ ن ثْخَاذنْثْ ن وُورغْ ؤُ أَمْ إِشْثْ ن ثْسدّشْثْ ن وُورغْ إِغْڒَانْ قَاعْ،
أَمُّو إِ إِدْجْ ؤُوبّخْ أَمِيغِيسْ غَارْ ؤُمزُّوغْ إِتّسْڒَانْ.
13 أَمْ وذْفڒْ أَسمَّاضْ ذڭْ إِجّْ ن وَاسّْ ن ثْميْرَا،
أَمُّو إِ إِدْجْ ؤُمْسخَّارْ إِتَّامْننْ ذڭْ ونِّي ث إِسّكَّانْ،
مَاغَارْ إِسّْفَاقَا ڒعْمَارْ ن بَابْ نّسْ. ▪
14 أَمْ إِسيْنُوثنْ ذ ؤُسمِّيضْ بْڒَا أَنْژَارْ،
أَمُّو أَرْيَازْ نِّي إِتّْعفَّارْ ذڭْ إِشْثْ ن ثرْزفْثْ وَارْ إِسكّْوِينْ.
15 س تَّاسِيعْ ن ڒْخَاضَارْ إِتّْوَاسقْنعْ ڒْحَاكمْ،
إِجّْ ن يِيڒسْ أَمِيژِيذْ إِتَّارژَّا إِخْسَانْ. ▪
16 مَاڒَا ثُوفِيذْ ثَامّنْثْ، أشّْ مِينْ ثحْوَاجذْ وَاهَا،
نِيغْ أَذْ ثَافّْ ثشِّيذْ كْثَارْ زِي مِينْ ثحْوَاجذْ،
ؤُ بَالَاكْ أَذْ ت-إِ-د ثْعُوقّذْ.
17 وَارْ سّْرُوسَا أَضَارْ نّكْ أَطَّاسْ ذِي ثَادَّارْثْ ن ؤُمْقَارّبْ نّكْ،
نِيغْ أَذْ شكْ إِجِّيونْ ؤُ أَذْ شكْ إِعِيفّْ.
18 أَمْ وفْضِيسْ ذ سِّيفْ ذ فْڒِيثْشَا إِقضْعنْ،
أَمُّو إِ إِدْجْ ورْيَازْ نِّي إِشهّْذنْ س ژُورْ خْ ؤُمْقَارّبْ نّسْ. ▪
19 أَمْ ثِيغْمسْثْ يَارْژنْ ؤُ أَمْ ؤُضَارْ إِنْقْرَاضنْ،
أَمُّو إِ إِدْجْ ؤُثشْڒِي خْ ونِّي وَارْ ذِي إِدْجِي تِّيقثْ ذڭْ وَاسّْ ن ڒحْصَارثْ.
20 أَمْ ونِّي إِتّكّْسنْ أَبَارْثسُّو نّسْ ذڭْ إِجّْ ن وَاسّْ إِسْمضْ
ؤُ أَمْ ڒْخدْجْ إِ تّڭّنْ خْ نِيطْرُونْ،
أَمُّو إِ إِدْجْ ونِّي إِتّْغنَّاجنْ إِزْڒَانْ زَّاثْ إِ يِيجّنْ س وُوڒْ إِشْضنْ. ▪
21 مَاڒَا إِدْجُوژْ ونِّي شكْ إِشَارّْهنْ، خنِّي أوْشْ أَسْ أَغْرُومْ،
مَاڒَا إِفُّوذْ، أوْشْ أَسْ أَذْ إِسُو، ▪
22 مَاغَارْ أَمُّو إِ ثْيَارّْوذْ شكْ ڒفْحمْ إِتّحْذُوذُوقنْ خْ ؤُزدْجِيفْ نّسْ،
ؤُ سِيذِي أَذْ شكْ إِخدْجصْ.
23 أَسمِّيضْ زِي شَّامَالْ إِتَّاوِي-د أَنْژَارْ،
إِڒسْ أَغدَّارْ إِتَّاوِي-د إِجّْ ن وُوذمْ إِخيّْقنْ.
24 إِحْڒَا أَذْ ثْزذْغذْ ذڭْ إِشْثْ ثغْمَارْثْ ن ثْزقَّا،
ؤُڒَا خْ ثَازذِّيغْثْ أَكْ-ذ إِشْثْ ن ثمْغَارْثْ إِتّمْشُوبُّوشنْ
ذڭْ إِشْثْ ن ثَادَّارْثْ ثْشَارْشْ. ▪
25 أَمْ وَامَانْ إِصمَّاضنْ إِ يِيجّْ ن ڒعْمَارْ يُوحڒْ،
أَمُّو إِ إِدْجْ ڒخْبَارْ أَصبْحَانْ زڭْ إِشْثْ ن ثمُّورْثْ ثِيڭّْوجْ.
26 أَمْ إِجّْ ن ڒْعُونْصَارْ إِتّْوَافسْذنْ ؤُ أَمْ إِجّْ ن وَانُو غشّنْ ث،
أَمُّو إِ إِدْجْ ؤُمْسڭّذْ إِتّْزعْزِيعنْ زَّاثْ إِ وُوذمْ ن إِعفَّاننْ.
27 مَاشَّا ن وَاطَّاسْ ن ثَامّنْثْ وَارْ إِدْجِي شَا مْلِيحْ،
مَاشَا ثَارزُّوثْ ذِي ثْمسْڒَايِينْ يوْعَارنْ ذ شَّانْ.
28 أَمْ إِشْثْ ن ثنْذِينْثْ إِهذْمنْ بْڒَا ڒْحِيضْ،
أَمُّو إِ إِدْجْ إِجّْ ن ورْيَازْ وَارْ إِتّطّفْ بُوحْبڒْ نّسْ. ▪