24
1 وَارْ تَّاسمْ زڭْ إِرْيَازنْ إِعفَّاننْ، وَارْ أَرزُّو شَا ثْمُونثْ أَكِيذْسنْ. ▪
2 مَاغَارْ ؤُڒْ نْسنْ إِتّقّرْ غَارْ ؤُردّدْجْ،
ؤُ إِينْشِيشنْ نْسنْ سَّاوَاڒنْ أَرْژِييّثْ. ▪
3 ثَادَّارْثْ ثتّْوَابْنَا س ثِيغِيثْ،
ثتّْوَاسمْثنْ س ڒفْهَامثْ،
4 س ثُوسّْنَا تّْوَاعمَّارنْ إِخَّامنْ ن ذَاخڒْ،
س مَارَّا أَڭْڒَا إِغْڒَانْ ذ وَاڭْڒَا إِڒِيقّنْ.
5 أَرْيَازْ أَمِيغِيسْ إِجْهذْ،
أَرْيَازْ ن ثُوسّْنَا يَارنِّي ذِي جّهْذْ نّسْ، ▪
6 مَاغَارْ إِتّْخصَّا أَذْ إِتّْوَانْذهْ ؤُمنْغِي س ؤُذبَّارْ،
ؤُ س ڒمْغَارثْ ن ؤُمْشَاوَارْ أَذْ يِيڒِي ؤُسنْجمْ. ▪
7 ثِيغِيثْ ثُوعْڒَا خْ ؤُپُوهَاڒِي،
نتَّا وَارْ ڭُّورْ أَذْ يَارْزمْ أَقمُّونْ نّسْ ذِي ثوَّارْثْ ن ثنْذِينْثْ. ▪
8 ونِّي إِتّْخَارِّيصنْ ذِي ڒْغَارْ،
أَذْ أَسْ ڒَاغَانْ ’أَرَّايْسْ ن بُو-ثحْڒَايْمشْثْ‘.
9 ڒمْوَايَاڒْ ن ؤُخَارّصْ ن ؤُپُوهَاڒِي ذ دّنْبْ،
ؤُ أَمسْثهْزِييْ ذ نّْعِي إِ بْنَاذمْ.
10 مَاڒَا ثَارْخُوذْ زڭْ إِخفْ نّكْ ذڭْ وَاسّْ ن ڒحْصَارثْ،
أَمُّو ؤُڒَا ذ جّْهذْ نّكْ أَذْ ثتّْوَاحْصَارْ.
11 سنْجمْ إِنِّي إِتّْوَاطّْفنْ مَاحنْذْ أَذْ تّْوَانْغنْ،
إِنِّي ثنْ إِتَّاوْينْ غَارْ مَانِي ثنْ إِ غَا نْغنْ، سْبدّْ إِ-ثنْ! ▪
12 مَاڒَا شكْ أَذْ ثِينِيذْ: ”خْزَارْ، أَقَا وَارْ نسِّينْ وَالُو خْ مَانْ أَيَا!“،
مَا ونِّي إِوزّْننْ ؤُڒَاونْ، وَارْ ث إِسَّارْڭِيبْ؟
ونِّي إِحطَّانْ ڒعْمَارْ نّكْ، إِسّنْ إِ-ث!
نتَّا أَذْ إِخدْجصْ بْنَاذمْ عْلَاحْسَابْ ڒْخذْمثْ نّسْ. ▪
13 أشّْ ثَامّنْثْ، أَ مِّي، مَاغَارْ نتَّاثْ ثصْبحْ،
ؤُ ثَامّنْثْ ن ثغْرَاسْثْ أَقَا ذ ثْمِيژِيذْثْ إِ وَانغْ نّكْ.
14 أَمُّو إِ ثدْجْ ثُوسّْنَا ن ثِيغِيثْ إِ ڒعْمَارْ نّكْ.
مَاڒَا ثُوفِيذْ ت، خنِّي ثدْجْ ثِيوشَّا، ؤُ ثْرَاجِيثْ نّكْ وَارْ ثتّْوَاقطّعْ شَا. ▪
15 أَ أَعفَّانْ، وَارْ ثتّْحَامَا خْ ثْزذِّيغْثْ ن ؤُمْسڭّذْ،
وَارْ هدّمْ أَمْشَانْ ن وَاريّحْ نّسْ!
16 مَاغَارْ أَمْسڭّذْ أَذْ إِوْضَا سبْعَا ن ثْوَاڒَاوِينْ، أَذْ د-إِكَّارْ عَاوذْ،
مَاشَا إِعفَّاننْ أَذْ نّْقَارْضنْ س ڒْغَارْ. ▪
17 وَارْ فَارّحْ إِ ؤُوطُّو ن ڒعْذُو نّكْ،
مَاڒَا نتَّا إِنْقَارْضْ، أجّْ ؤُڒْ نّكْ وَارْ إِفَارّحْ، ▪
18 مَاحنْذْ سِيذِي وَارْ ث إِژَارّْ
ؤُ مَانْ أَيَا أَذْ يِيڒِي ذ ڒْعِيبْ ذِي ثِيطَّاوِينْ نّسْ،
ؤُ نتَّا أَذْ خَاسْ إِسّْحيّذْ أَغْضَابْ نّسْ.
19 وَارْ تّْخيِّيقْ أَطَّاسْ خْ ونِّي إِتّڭّنْ ڒْغَارْ،
وَارْ تَّاسمْ زڭْ إِعفَّاننْ، ▪
20 مَاغَارْ أَقَا ونِّي إِتّڭّنْ ڒْغَارْ وَارْ غَارسْ ثِيوشَّا،
ڒفْنَارْ ن إِعفَّاننْ أَذْ إِتّْوَاسخْسِي. ▪
21 أَ مِّي، ڭّْوذْ سِيذِي ذ ؤُجدْجِيذْ،
وَارْ تّْخدْجضْ شَا إِخفْ نّكْ أَكْ-ذ ينِّي غَارْ إِدْجْ ڒْبَاڒْ نّغْنِي،
22 مَاغَارْ أَذْ د-يَاسْ ؤُضيّعْ نْسنْ ذڭْ إِجّْ ن ؤُمُورْ،
وِي إِسّْننْ أَنڭَّارُو أَعفَّانْ ن إِسڭّْوُوسَا نْسنْ؟
23 ؤُڒَا ذ يِينَا ذ أَوَاڒنْ إِوزْننْ ن إِمِيغِيسنْ.
أَسْفَارْزْ ن وُوذْمَاونْ ذِي دّعْوثْ وَارْ إِدْجِي شَا مْلِيحْ. ▪
24 ونِّي إِقَّارنْ إِ ؤُعفَّانْ: ”شكْ ذ أَمْسڭّذْ!“،
وَانِيثَا أَذْ ث نعْڒنْ ڒڭْنُوسْ، أَذْ ث شَارْهنْ شُّوعُوبْ. ▪
25 مَاشَا إِنِّي ثنْ إِ غَا إِحَاكْمنْ، أَذْ إِڒِينْ مْلِيحْ،
لْبَارَاكَا س مَارَّا ڒْخَارْ أَذْ غَارْسنْ د-ثَاسْ.
26 أَمْ إِجّنْ ونِّي إِسُّوذُومنْ إِينْشِيشنْ،
أَمُّو إِ يدْجْ ونِّي د-إِتَّارَّانْ س وَاوَاڒنْ إِسڭّْمنْ.
27 سوْجذْ ڒْخذْمثْ نّكْ بَارَّا،
ؤُشَا كمّڒْ إِ-ت إِ يِيخفْ نّكْ ذڭْ إِيَّارْ،
ؤُشَا بْنَا ثَادَّارْثْ نّكْ أَوَارْنِي مَانْ أَيَا!
28 وَارْ تِّيڒِي ذ أَشهَّاذْ بْڒَا سِّيبّثْ خْ ؤُمْقَارّبْ نّكْ.
مَا إِعدّڒْ أَذْ ثْغَارّذْ س إِينْشِيشنْ نّكْ؟
29 وَارْ قَّارْ: ”أَمْ مَامّشْ إِ ذ أَيِي إِڭَّا نتَّا،
أَمُّو إِ د-أَسْ إِ غَا ڭّغْ ؤُڒَا ذ نشّْ!“،
مَاغَارْ نشّْ أَذْ د-خڒْفغْ زِي كُوڒْ إِجّنْ عْلَاحْسَابْ ڒْخذْمثْ نّسْ. ▪
30 نشّْ كّغْ خْ ييَّارْ ن إِجّْ ن ؤُمعْڭُوزْ،
ؤُ خْ ؤُمَارْجُوعْ ن ؤُضِيڒْ ن إِجّْ ن بْنَاذمْ س وُوڒْ نّسْ وَارْ إِمْثِيننْ.
31 خْزَارْ، ثْڭعّذْ-د خَاسْ مَارَّا ثيْزِيثْ،
ثذْڒَا ثْزڭّْوَارْثْ ؤُذمْ ن ثمُّورْثْ نّسْ،
أَقَا ڒْحِيضْ نّسْ ن وژْرُو إِتّْوَاهْذمْ.
32 ڒَامِي ت ژْرِيغْ، كْسِيغْ ت غَارْ وُوڒْ إِنُو،
ژْرِيغْ ت ؤُشَا كْسِيغْ ت أَمْ إِجّْ ن ؤُوبّخْ.
33 ”أجّْ أَيِي أَذْ طّْسغْ شْوَايْثْ ذْرُوسْثْ، شْوَايْثْ ذْرُوسْثْ ن ؤُنُوذمْ،
شْوَايْثْ ذْرُوسْثْ ن ؤُپُوزّڒْ س إِفَاسّنْ ضفْصنْ، ▪
34 ذِينِّي د غَا يَاسْ زّڒْضْ نّكْ،
ؤُڒَا ذ ڒغْبنْ نّكْ أَمْ إِجّْ ن ورْيَازْ س ڒسْنَاحْ.“