23
1 مَاڒَا ثقِّيمذْ غَارْ طَّابْڒَا غَارْ إِجّْ ن ڒْحَاكمْ مَاحنْذْ أَذْ ثشّذْ أَكِيذسْ،
حْضَا مْلِيحْ مِينْ إِدْجَانْ زَّاثكْ.
2 أڭّْ إِجّْ ن ڒْمُوسْ خْ يِيڒِي نّكْ،
مَاڒَا شكْ ذ إِجّْ ن بُو-ڒمْغَارثْ ن ؤُعذِّيسْ.
3 وَارْ تّڭّْ مژْرِي ذِي مَاشَّا نّسْ إِشْنَانْ،
مَاغَارْ أَقَا-ث ذ مَاشَّا ن ثُوخُّونَا.
4 وَارْ سِّيحِيڒْ إِخفْ نّكْ حِيمَا أَذْ ثْذوْڒذْ ذ بُو-وَاڭْڒَا،
أجّْ ڒفْهَامثْ ن يِيخفْ نّكْ أَذْ ثَارْسَا.
5 مَاڒَا طَّاونْثْ ثِيطَّاوِينْ غَارسْ، أَقَا وَارْ ذِينْ أَڭْڒَا عَاذْ!
مَاغَارْ أَذْ إِڭّْ أَفْرِيونْ إِ يِيخفْ نّسْ،
أَذْ إِضْوَا غَارْ ؤُجنَّا أَمشْنَاوْ إِجّْ ن ؤُڭِيذرْ.
6 وَارْ تّتّْ أَغْرُومْ ن ونِّي ذِي ثدْجْ ثِيطّْ ثَاعفَّانْثْ،
وَارْ مژْرِي ذِي مَاشَّا نّسْ إِشْنَانْ.
7 مَاغَارْ أَمْ مَامّشْ ث ثُوغَا إِتّْخَارَّاصْ،
أَمُّو إِ ث إِتّڭّْ.
إِقَّارْ: ”أشّْ، ثسْوذْ!“،
مَاشَا ؤُڒْ نّسْ وَارْ أَكِيذكْ إِدْجِي.
8 أَزعِّيفْ إِ ثشِّيذْ، أَذْ ث-إِ-د-ثْعُوقّذْ،
أَوَاڒنْ إِصبْحنْ نّكْ ثْضيّْعذْ ثنْ.
9 وَارْ سَّاوَاڒْ ذڭْ ؤُمزُّوغْ ن إِجّْ ن ؤُپُوهَاڒِي،
مَاغَارْ نتَّا أَذْ إِسّحْقَارْ أَوَاڒنْ ن وفْثَانْ نّكْ. ▪
10 وَارْ سْمُوطُّويْ أَيْمِيرْ ن وشْحَاڒْ ؤُيَا،
وَارْ تَّاذفْ ذڭْ إِيَّارنْ ن إِيُوجِيڒنْ، ▪
11 مَاغَارْ أَمْفكِّي نْسنْ ذ أَمقّْرَانْ،
نتَّا أَذْ د-يَاغْ ثَاسْغَارْثْ نْسنْ زَّايكْ.
12 أَرّْ ؤُڒْ نّكْ غَارْ ؤُوبّخْ،
ؤُڒَا ذ إِمزُّوغنْ نّكْ غَارْ وَاوَاڒنْ ن ثُوسّْنَا.
13 وَارْ ثطّفْ تَّارْبِييّثْ خْ ؤُحُوذْرِي،
وَاخَّا ثشَّاثذْ ث س وعْمُوذْ، وَارْ إِتّْمتِّي. ▪
14 شكْ ڭُّورْ أَذْ ث ثوْثذْ س وعْمُوذْ،
ؤُ أَذْ ثسّْنجْمذْ ڒعْمَارْ نّسْ زِي ڒَاخَارْثْ.
15 مِّي إِنُو، مَاڒَا ؤُڒْ نّكْ ذ أَمِيغِيسْ،
أَذْ إِفَارْحْ ؤُڒَا ذ ؤُڒْ إِنُو أَكِيذسْ.
16 ثِيژَّاڒْ إِنُو أَذْ نڭْزنْثْ س ڒفْرَاحثْ،
مَاڒَا إِينْشِيشنْ نّكْ سِّيوْڒنْ مِينْ إِدْجَانْ إِسڭّْذنْ. ▫
17 أجّْ ؤُڒْ نّكْ وَارْ إِتِّيسِيمْ زڭْ إِمذْنَابْ،
مَاشَا أجّْ إِ-ث أَذْ يَارّْ أَزدْجِيفْ غَارْ ثِيڭّْوُوذِي ن سِيذِي أَسّْ إِمُونْ! ▪
18 مَاغَارْ خنِّي أَقَا ذِينْ ثِيوشَّا،
ؤُ ڒَايَاسْ نّكْ وَارْ إِتَّارژِّي. ▪
19 سڒْ-د شكْ، أَ مِّي، إِڒِي ذ أَمِيغِيسْ،
ؤُشَا نْذهْ ؤُڒْ نّكْ غَارْ وبْرِيذْ.
20 وَارْ تّْغِيمِي غَارْ إِسْكَارْجِييّنْ،
ؤُڒَا غَارْ إِنِّي إِلهّْفنْ ذڭْ ويْسُومْ، ▪
21 مَاغَارْ أَسْكَارْجِييْ ذ أَملْهُوفْ أَذْ ذوْڒنْ ذ إِمزْڒَاضْ،
ؤُ أَنُوذمْ إِسّْيِيرِيضْ ذڭْ إِحْڒُوشنْ.
22 سڒْ-د شكْ غَارْ بَابَاشْ ونِّي شكْ إِ د-إِجِّينْ،
ؤُ وَارْ سّحْقِيرِي يمَّاشْ مَاڒَا ثوْسَارْ. ▪
23 سغْ-دّْ ثِيذتّْ، وَارْ ت ثزْنُوزَا شَا،
أَمُّو ؤُڒَا ذ ثِيغِيثْ ذ ؤُوبّخْ ذ ڒفْهَامثْ. ▪
24 بَابَاسْ ن ؤُمْسڭّذْ أَذْ إِفَارْحْ س وَاطَّاسْ،
ونِّي د-إِجِّينْ إِجّْ مِّيسْ ذ أَمِيغِيسْ، أَذْ أَسْ إِفَارْحْ. ▪
25 أجّْ أَذْ إِفَارْحْ بَابَاشْ ؤُڒَا ذ يمَّاشْ،
أجّْ ثنِّي شكْ إِ د-يُورْونْ أَذْ ثْفَارْحْ.
26 أوْشْ أَيِي ؤُڒْ نّكْ، أَ مِّي،
أجّْ ثِيطَّاوِينْ نّكْ أَذْ أَفنْثْ أَرْضَا ذڭْ إِبْرِيذنْ إِنُو.
27 مَاغَارْ ثَامْغَارْثْ فَارْقْ-شّْغڒْ ذ إِشْثْ ن ثسْرَافْثْ يُودْجْغنْ،
ؤُ ثَامْغَارْثْ زِي بَارَّا ذ إِجّْ ن ڒْعُونْصَارْ إِحْسَارْ أَڒْ طَّارْفْ. ▪
28 وَاهْ، نتَّاثْ ثتّْحَامَا أَمْ إِجّْ ن ؤُخوَّانْ،
نتَّاثْ ثَارنِّي ذڭْ إِغدَّارنْ جَارْ إِوْذَانْ.
29 وِي إِ غَارْ إِدْجْ وشْضَانْ؟ وِي إِ غَارْ إِدْجْ زّڒْضْ؟
وِي إِ غَارْ إِدْجْ ؤُمْشُوبّشْ؟ وِي إِ غَارْ إِدْجْ ؤُشثْشِي؟
وِي إِ غَارْ إِدْجَانْ إِيزِّيمنْ بْڒَا سِّيبّثْ؟
وِي إِ غَارْ دْجَانْثْ ثِيطَّاوِينْ بَّاروْينْثْ؟
30 غَارْ إِنِّي إِتّْغِيمَانْ غَارْ بِينُو أَڒْ ثَامذِّيثْ،
غَارْ ينِّي د-يُوسِينْ حِيمَا أَذْ قَّاسنْ بِينُو إِخدْجْضنْ. ▪
31 وَارْ خزَّارْ غَارْ بِينُو، خْمِي إِتّزْوِيغْ،
إِتّْڒِيقْڒِيقْ ذِي ڒْكَاسْ ؤُ نتَّا إِهْونْ إِ ثِيسِّيثْ.
32 غَارْ ؤُنڭَّارْ إِتّْغِيمَا إِزعّفْ أَمْ إِجّْ ن ؤُفِيغَارْ،
إِتّْرُوشَّا سّمْ أَمْ ثْڒفْسَا.
33 ثِيطَّاوِينْ نّكْ أَذْ ثْوَاڒَانْثْ ثِيمْغَارِينْ ثِيبَارَّانِييِّينْ،
ؤُ ؤُڒْ نّكْ أَذْ إِسِّيوڒْ س ؤُخَارْوضْ.
34 شكْ أَذْ ثِيڒِيذْ أَمشْنَاوْ إِجّنْ إِ إِتّطّْصنْ ذِي ڒْوسْثْ ن ڒبْحَارْ،
أَمْ إِجّنْ إِ إِتّطّْصنْ ذِي ثْقِيشَّاثْ ن ثحْنَاشْثْ ن ؤُغَارَّاپُو
35 أَذْ ثِينِيذْ: ”وْثِينْ أَيِي، مَاشَا وَارْ يزْمغْ،
ذخْمنْ أَيِي، مَاشَا وَارْ ؤُشِيغْ أَكْ-ذ وَالُو.
مڒْمِي إِ د غَا فَاقغْ؟ نشّْ أَذْ أَرْزُوغْ عَاوذْ غَارْ بِينُو!“