27
1 وَارْ تّْفيّشْ زڭْ وَاسّْ ن ثِيوشَّا، مَاغَارْ وَارْ ثسِّينذْ شَا مِينْ د غَا يَاوِي وَاسّْ. ▪
2 أجّْ إِجّْ ن ؤُبَارَّانِي أَذْ شكْ إِشنّعْ، وَارْ إِدْجِي أَقمُّومْ نّكْ،
إِجّْ ن مِيدّنْ، وَارْ إِدْجِي إِينْشِيشنْ نّكْ.
3 أَژْرُو إِذْقڒْ، إِجْذِي إِوزّنْ ،
مَاشَا أَفُوڭمْ ن ؤُپُوهَاڒِي إِذْقڒْ خَاسنْ س ثْنَاينْ إِذْسنْ.
4 أَسْعَارْ ذ ؤُذُوقّزْ ن وغْضَابْ أَقَا أَثنْ قسْحنْ،
مَاشَا مَانْ ونْ إِزمَّارنْ أَذْ إِقِّيمْ إِبدّْ غَارْ ثُوسْمِي؟
5 ثحْڒَا تَّارْبِييّثْ س بْطَايْطَايْ خْ ثَايْرِي إِنُّوفَّارنْ.
6 إِيزِّيمنْ ن ونِّي شكْ إِتّخْسنْ أَقَا ذ ڒعْڒَامَاثْ ن ثصْذِيقْثْ،
مَاشَا إِسُوذِيمنْ ن يِينِّي شكْ إِشَارّْهنْ أَقَا ذ أَطَّاسْ.
7 ونِّي إِجِّيوْننْ إِعجّنْ خْ ثَامّنْثْ ن ثغْرَاصْثْ،
مَاشَا إِ ونِّي إِدْجُوژنْ مَارَّا مِينْ يَارزْڭنْ ذ أَمِيژِيذْ. ▫
8 أَمْ إِجّْ ن وجْضِيضْ إِطَّاوْ، إِڭّْوذْ زِي ڒْعُوشّْ نّسْ،
أَمُّو إِ إِدْجْ ورْيَازْ نِّي إِ غَا إِطلّْعنْ بَارَّا خْ ومْشَانْ نّسْ.
9 زّشْثْ ذ ڒبْخُورْ سّْفَارَّاحنْ ؤُڒْ،
أَمُّو عَاوذْ ثَامْسعَّافْثْ إِشْنَانْ ن إِجّْ ن ؤُمدُّوكّڒْ زِي شّْوَارْ ن وُوڒْ.
10 وَارْ سمّحْ ذڭْ ؤُمدُّوكّڒْ نّكْ، ؤُڒَا ذڭْ ؤُمدُّوكّڒْ ن بَابَاشْ،
وَارْ تِّيذفْ شَا غَارْ ثَادَّارْثْ ن ؤُمَاشْ ذڭْ وَاسّْ ن أَرْژِييّثْ نّكْ.
إِحْڒَا إِجّْ ن وَاجَّارْ يُوذسْ خْ إِجّْ ن ثوْمَاثْ يِيڭّْوجْ. ▪
11 إِڒِي ذ أَمِيغِيسْ، أَ مِّي إِنُو، ؤُ سْفَارْحْ ؤُڒْ إِنُو،
مَاحنْذْ زمَّارغْ أَذْ أَرّغْ خْ ونِّي ذ أَيِي غَا إِسّحْقَارنْ.
12 ونِّي إِفتّْننْ إِتّْوَاڒَا ڒْغَارْ ؤُشَا إِسّْنُوفَّارَا إِخفْ نّسْ،
مَاشَا إِحَافِييّنْ أَرنِّينْ ڭُّورنْ ؤُشَا إِتّْخصَّا أَذْ تّْوَاعَاقَابنْ. ▪
13 كْسِي أَرُّوضْ نّسْ، مَاغَارْ إِدَّاكّْوَاڒْ ذ أَضْمَانْ إِ يِيجّْ ن ؤُبَارَّانِي،
كْسِي ث ذ دِّييّثْ إِ يِيشْثْ ن ثمْغَارْثْ زِي بَارَّا. ▪
14 ونِّي إِتّْبَارْكنْ أَمدُّوكّڒْ نّسْ زِيشْ غَارْ ثُوفُّوثْ س ثْمِيجَّا إِجهْذنْ،
أَقَا مَانْ أَيَا أَذْ أَسْ إِتّْوَاحْسبْ ذ نّعْڒثْ.
15 أَمشْنَاوْ ثُوذِّيمْثْ وَارْ إِتّْبذِّينْ ذڭْ وَاسّْ ن ونْژَارْ إِجهْذنْ،
أَمُّو إِ ثدْجْ ثمْغَارْثْ إِتّمْشُوبُّوشنْ. ▪
16 ونِّي إِتّخْسنْ أَذْ أَسْ إِبلّعْ،
أَقَا-ث أَمْ ونِّي إِتّخْسنْ أَذْ إِقَالَا إِ ؤُسمِّيضْ،
ؤُ أَفُوسْ نّسْ أَفُوسِي أَذْ إِطّفْ زّشْثْ إِتّحْرُودْجُوضنْ.
17 أَمْ ونِّي إِسّقْضَاعنْ ؤُزَّاڒْ س وُوزَّاڒْ،
أَمُّو إِ إِسّقْضَاعْ ورْيَازْ ؤُذمْ ن ونِّي ث يُوذْسنْ.
18 ونِّي إِحطَّانْ خْ إِجّْ ن وَارْثُو، أَذْ إِشّْ ڒْغِيدْجثْ نّسْ،
ونِّي إِحطَّانْ بَابْ نّسْ، أَذْ إِتّْوَاشنّعْ.
19 أَمْ د-إِتّْبَانْ ؤُغمْپُوبْ ذڭْ ؤُغمْپُوبْ ذڭْ وَامَانْ،
أَمُّو د-إِتّْبَانْ وُوڒْ نْ بْنَاذمْ خْ بْنَاذمْ عَاوذْ.
20 أَمْ ڒَاخَارْثْ ذ ؤُسْهلّكْ وَارْ تّْيِيوِيننْ،
أَمُّو ؤُڒَا ذ ثِيطَّاوِينْ ن إِوْذَانْ وَارْ تِّيوْضنْثْ أَذْ جِّيوْننْثْ. ▪
21 أَطنْجِيرْ ن ؤُسفْسِي إِ نُّوقَارْثْ ذ ؤُفَارَّانْ إِ وُورغْ،
أَمُّو إِ إِدْجْ ؤُڒَا ذ أَرْيَازْ أَمْ مَامّشْ ث تّْمدَّاحنْ.
22 مَاڒَا ثدّْزذْ أَپُوهَاڒِي س وزْذُوزْ ذِي ڒْمهْرَازْ جَارْ ڒْحبّْ ن إِمنْذِي،
ثُوبُّوهڒْيَا نّسْ وَارْ خَاسْ ثْحيِّيذْ.
23 حْضَا مَاحنْذْ أَذْ ثسّْنذْ مَامّشْ د-إِتّْبَانْ وُودْجِي نّكْ،
وجّهْ ؤُڒْ نّكْ غَارْ ثْحِيمْرِيوِينْ.
24 مَاغَارْ ڒكْسِيبثْ وَارْ ثتّْغِيمِي إِ ڒبْذَا،
نِيغْ مَا أَذْ إِقِّيمْ تَّاجْ زِي جِّيڒْ أَڒْ جِّيڒْ نّغْنِي؟
25 مَاڒَا إِرُوحْ أَرّْبِيعْ ؤُشَا إِبَانْ-د ؤُغمُّويْ أَزِيزَا،
ؤُشَا إِتّْوَاحْثشْ ڒبْزَارْ خْ إِذُورَارْ،
26 خنِّي أَذْ إِڒِينْ إِزْمَارنْ إِ وَارُّوضْ نّكْ،
ؤُ إِغَايْضنْ ذ تَّامَانْ ن ثْمسْغِيوْثْ إِ يِيجّْ ن ييَّارْ. ▪
27 ؤُشَا أَذْ غَاركْ يِيڒِي مِينْ ثحْوَاجذْ ن ؤُغِي ن ثْغَايْطِينْ إِ مَاشَّا نّكْ،
أَذْ يِيڒِي ذ مَاشَّا إِ ثَادَّارْثْ نّكْ ؤُڒَا ذ ڒعْوتْشْ إِ ثِييَّاوِينْ نّكْ.