‏1 بِينُو ذ إِجّْ ن ؤُمسْثهْزِييْ، شّْرَابْ ذ بُو-سّْضعْ،

كُوڒْ إِجّنْ ونِّي زَّايسْ إِ غَا إِودَّارنْ، عمَّارْصْ وَارْ إِذِّيكّْوِيڒْ ذ أَمِيغِيسْ.

‏2 أَهُوذِّي ن ؤُجدْجِيذْ أَمْ زّْهِيرْ ن وَايْرَاذْ:

ونِّي ث إِسّعَارنْ، إِخطَّا أَكْ-ذ ڒعْمَارْ نّسْ.^▪  

‏3 أَسْمَاحْ ذڭْ ؤُمْشُوبّشْ أَقَا ذ شَّانْ إِ ورْيَازْ،

مَاشَا كُوڒْ أَپُوهَاڒِي ڭُّورْ أَذْ إِدُّوقّزْ. ^▪  

‏4 أَمعْڭُوزْ وَارْ إِشَارّزْ ذِي ڒْمشْثَا،

خنِّي أَذْ إِتَّارْ ذِي ڒْوقْثْ ن ثْميْرَا، مَاشَا وَارْ إِتِّيفْ وَالُو.

‏5 إِخَارِّيصنْ ذڭْ وُوڒْ ن بْنَاذمْ أَمَانْ يُودْجْغنْ،

مَاشَا إِجّْ ن ورْيَازْ س ڒفْهَامثْ إِسّنْ أَذْ ثنْ يَايمْ. ^▪  

‏6 أَطَّاسْ ن إِوْذَانْ تّْڒَاغَانْ خْ شَا ن إِجّنْ ’أَمدُّوكّڒْ ذ أَمْثِيقِّي‘،

مَاشَا أَرْيَازْ ذ أَمْثِيقِّي، مَانْ ونْ ث إِ غَا يَافنْ؟

‏7 أَمْسڭّذْ إِڭُّورْ ذِي ڒصْفَايثْ نّسْ،

سّعْذْ ن إِحنْجِيرنْ نّسْ إِ إِتّجَّا أَوَارْنِي أَسْ.

‏8 إِجّْ ن ؤُجدْجِيذْ نِّي إِتّْغِيمَانْ خْ ڒْكُورْسِي ن شّْرعْ،

إِتّْصفَّا مَارَّا ڒْغَارْ س ثِيطَّاوِينْ نّسْ. ^▪  

‏9 وِي إِزمَّارنْ أَذْ يِينِي: ”نشّْ سِّيزذْڭغْ ؤُڒْ إِنُو،

نشّْ إِزْذِيڭغْ زِي دّْنُوبْ إِنُو!“؟ ^▪  

‏10 إِجّْ ن ڒوْزنْ ذ إِجّْ ن ڒوْزنْ نّغْنِي، إِجّْ ن إِفَا ذ إِجّْ ن إِفَا نّغْنِي،

أَقَا-ثنْ س ثْنَاينْ إِذْسنْ ذ نّْعِي إِ سِيذِي. ^▪  

‏11 أَحُوذْرِي إِتّْبَانْ ذِي ثْمڭَّا نّسْ،

مَا ڒْخذْمثْ نّسْ ثصْفَا نِيغْ أَقَا نِيشَانْ إِ ثدْجْ.

‏12 أَمزُّوغْ إِتّسْڒَانْ ذ ثِيطّْ إِتّْوَاڒَانْ،

سِيذِي إِڭَّا إِ-ثنْ س ثْنَاينْ إِذْسنْ. ^▪  

‏13 وَارْ تّخْسْ إِضصْ مَاحنْذْ وَارْ ثذِّيكّْوِيڒذْ ذ أَمزْڒُوضْ،

أَرْزمْ ثِيطَّاوِينْ نّكْ، سّْيِيونْ إِخفْ نّكْ س وغْرُومْ. ^▪  

‏14 ’وَارْ إِحْڒِي، وَارْ إِحْڒِي!‘، إِقَّارْ ؤُمْسوّقْ،

مَاشَا مَاڒَا يُويُورْ، أَمُّو إِ إِتّْشنّعْ إِخفْ نّسْ.

‏15 ؤُرغْ إِدْجْ، ؤُڒَا ذ أَطَّاسْ ن ڒْمَارْجَانْ،

مَاشَا إِينْشِيشنْ شُّورنْ س ثُوسّْنَا ذ إِشْثْ ن ڒْقشْعثْ إِغْڒَانْ أَطَّاسْ. ^▪  

‏16 مَاڒَا إِجّنْ إِدَّاكّْوَاڒْ ذ أَضْمَانْ إِ يِيجّْ ن ؤُبَارَّانِي،

خنِّي كْسِي أَرُّوضْ نّسْ ؤُ كْسِي ث ذ دِّييّثْ إِ ينِّي وَارْ إِتّْوَاسّْننْ. ^▪  

‏17 ذ أَمِيژِيذْ إِ بْنَاذمْ أَغْرُومْ نِّي إِطّفْ س إِخَارِّيقنْ،

أَوَارْنِي أَسْ مَاشَا أَذْ إِشُّورْ ؤُقمُّومْ نّسْ س إِقَايَاسنْ. ^▪  

‏18 إِخمِّيمنْ تّكْمِيڒنْ س ؤُشَاوَارْ،

خْ ؤُينِّي نْذهْ أَمنْغِي س ؤُذبَّارْ. ^▫  

‏19 ونِّي إِڭُّورنْ ذَا ذ ذِيهَا س ثخْبَارْجِيثْ، إِسّْعَارَّا مِينْ إِنُّوفَّارنْ،

وَارْ ثْسبّبْ أَكْ-ذ ونِّي إِسّْحِينِّيبنْ س إِينْشِيشنْ نّسْ إِصبْهنْ. ^▪  

‏20 ونِّي إِ غَا إِنعْڒنْ خْ بَابَاسْ ذ يمَّاسْ،

ڒفْنَارْ نّسْ أَذْ إِتّْوَاسخْسِي ذِي ثَادْجسْثْ ثَابَارْشَانْثْ. ^▪  

‏21 مَاڒَا ثَاسْغَارْثْ ثتّْوَاكْسبْ ذغْيَا س ثَازْڒَا ذڭْ ؤُمزْوَارُو،

وَارْ د-ثِيوضْ ذ لْبَارَاكَا غَارْ ؤُنڭَّارْ. ^▪  

‏22 وَارْ قَّارْ: ”نشّْ أَذْ خڒْفغْ ڒْغَارْ!“

مَاشَا ثْشڒْ خْ سِيذِي ؤُ نتَّا أَذْ شكْ إِسّنْجمْ. ^▪  

‏23 إِجّْ ن ڒوْزنْ ذ إِجّْ ن ڒوْزنْ نّغْنِي، أَقَا أَثنْ ذ نّْعِي إِ سِيذِي،

ڒْمِيزَانَاثْ إِغشّنْ وَارْ دْجِينْ شَا مْلِيحْ. ^▪  

‏24 إِصُورَافْ ن إِجّْ ن ورْيَازْ أَقَا أَثنْ ن سِيذِي،

خنِّي مَامّشْ إِ غَا يڭّْ بْنَاذمْ أَذْ إِسّنْ أَبْرِيذْ نّسْ؟ ^▪  

‏25 أَقَا-ت ذ ثَاخْشفْثْ إِ بْنَاذمْ إِ غَا إِڒَاغَانْ س ؤُقدْجقْ ’أَمْقدّسْ‘،

ؤُ عَاذْ أَوَارْنِي لْوُوعُوذْ نّسْ إِ إِڭَّا أَذْ إِخَارّصْ.

‏26 إِجّْ ن ؤُجدْجِيذْ أَمِيغِيسْ إِتّْصفَّا إِعفَّاننْ،

ؤُ إِتّجَّا ثْجَارَّارِينْ ن ثڒْوِيحْثْ إِتّحْڒُودْجُوضنْ إِ ؤُسَارْوثْ أَذْ خَاسنْ إِعْقبْ.

‏27 ثْوَارِّيثْ ن نّفْسْ ن بُوحْبڒْ ن بْنَاذمْ ذ ڒفْنَارْ ن سِيذِي،

إِنِّي يَارزُّونْ ذِي ذَاخڒْ ن إِخَّامنْ ن ؤُعذِّيسْ.

‏28 ثَامخْسِيوْثْ إِشوَّارنْ ذ ڒَامَانْ هطَّانْ أَجدْجِيذْ،

ؤُ ڒْعَارْشْ نّسْ إِسّجْهذْ إِ-ث س ثْمخْسِيوْثْ إِشوَّارنْ.

‏29 ثَالْوِيزْثْ ن إِحُوذْرِييّنْ ذ جّهْذْ نْسنْ،

ؤُ لْعَاضَامَا ن إِوسُّورَا ذ أَشوَّافْ إِشَابنْ. ^▪  

‏30 إِيزِّيمنْ إِتَّازّْڒنْ س إِذَامّنْ سِّيزْذِيڭنْ بْنَاذمْ زِي ڒْغَارْ،

ؤُ ثِييِّيثَا صفَّانْثْ ؤُڒَا ذ ثَاكْرِيشْثْ.^▪