19
1 إِحْڒَا إِجّْ ن ؤُمزْڒُوضْ إِڭُّورنْ ذِي ڒصْفَايثْ نّسْ، خْ ونِّي غَارْ إِدْجَانْ إِينْشِيشنْ فَارْغنْ، ؤُ أَقَا ث ذ أَپُوهَاڒِي إِ يدْجْ. ▪
2 بْڒَا ثُوسّْنَا ؤُڒَا ذ ڒعْمَارْ وَارْ إِدْجِي شَا مْلِيحْ،
ونِّي إِتّْقدْجْقنْ س إِضَارنْ نّسْ، أَذْ إِخْضَا.
3 ثُوبُّوهڒْيَا ن بْنَاذمْ إِسّْفَارَّاغْ أَبْرِيذْ نّسْ،
ؤُ خنِّي ؤُڒْ نّسْ أَذْ إِسْعَارْ خْ سِيذِي. ▪
4 أَڭْڒَا إِتَّاوِي-د أَطَّاسْ ن إِمدُّوكَّاڒْ،
مَاشَا أَمزْڒُوضْ إِتّْرَاحْ ؤُمدُّوكّڒْ نّسْ إِسمّحْ ذَايسْ. ▪
5 أَشهَّاذْ بُو-إِخَارِّيقنْ وَارْ إِتّْوَاحسّبْ شَا ذ أَمزْذَاڭْ،
ونِّي د-يَارخُّونْ إِ إِخَارِّيقنْ، وَارْ ڭُّورْ أَذْ إِنْجمْ. ▪
6 أَطَّاسْ تّْزَاوْڭنْ زَّاثْ إِ وُوذمْ ن ؤُمْشنّعْ،
كُوڒْ إِجّْ إِتّخْسْ أَذْ يِيڒِي ذ أَمدُّوكّڒْ نْ ورْيَازْ إِ غَارْ إِدْجْ ثرْزِيفِينْ.
7 مَارَّا أَيْثْمَاسْ ن ؤُمزْڒُوضْ شَارّْهنْ ث،
مشْحَاڒْ تِّيڭّْوجّنْ خَاسْ إِمدُّوكَّاڒْ نّسْ!
نتَّا إِضفَّارْ أَوَاڒنْ، إِنِّي وَارْ إِسكّْوِينْ وَالُو. ▪
8 ونِّي إِتَّاربَّانْ ؤُڒْ نّسْ، إِتّخْسْ ڒعْمَارْ نّسْ،
ونِّي إِحطَّانْ ڒفْهَامثْ، أَذْ يَافْ مِينْ إِشْنَانْ.
9 إِجّْ ن ؤُشهَّاذْ بُو-إِخَارِّيقنْ وَارْ إِتّْوَاحسّبْ شَا ذ أَمزْذَاڭْ،
ونِّي يَارخُّونْ إِ إِخَارِّيقنْ، أَذْ إِتّْوَاهلّكْ.
10 أَفيّشْ وَارْ د-يُوسِي خْ ؤُپُوهَاڒِي،
مَامّشْ عَاذْ خْ ؤُمْسخَّارْ مَاحنْذْ أَذْ إِسلّطْ خْ ڒْحُوكَّامْ. ▪
11 ڒعْقڒْ ن بْنَاذمْ إِتَّارَّا إِ-ث أَذْ إِڭّْ س تَّاسِيعْ ن ڒْخَاضَارْ
ثُوسَا-د خَاسْ مَاحنْذْ أَذْ إِميّكْ خْ ؤُخطُّو نّسْ.
12 أَسْخضْ ن ؤُجدْجِيذْ أَمْ زّْهِيرْ ن ويْرَاذْ ذِي ثمْژِي نّسْ،
مَاشَا أَرْضَا نّسْ أَمْ نّْذَا خْ أَرّْبِيعْ. ▪
13 مِّيسْ أَپُوهَاڒِي ذ أَرْژِييّثْ إِ بَابَاسْ،
أَمْشُوبّشْ ن ثمْغَارْثْ إِڭَّا أَمْ ثُوذِّيمْثْ ن ثْزقَّا وَارْ إِقطِّينْ. ▪
14 ثَادَّارْثْ ذ وَاڭْڒَا أَقَا أَثنْ ذ ڒْوَارْثْ ن إِبَابَاثنْ،
مَاشَا إِشْثْ ن ثمْغَارْثْ إِفهّْمنْ أَقَا-ت ن سِيذِي. ▪
15 ڒعْڭزْ يَارَّا بْنَاذمْ أَذْ إِوْضَا ذڭْ إِضصْ يُودْجْغنْ،
ؤُ ڒعْمَارْ إِشُّورْ س ڒْغشّْ أَذْ إِدْجَاژْ. ▪
16 ونِّي إِحطَّانْ ثَاوْصيّثْ، إِحطَّا ڒعْمَارْ نّسْ،
ونِّي وَارْ إِحطِّينْ إِبْرِيذنْ نّسْ، أَذْ إِمّثْ. ▪
17 ونِّي إِتّْحِينَّانْ خْ ؤُمزْڒُوضْ، يَارطّڒْ إِ سِيذِي،
ؤُ نتَّا أَذْ أَسْ إِخدْجصْ ڒْخذْمثْ نّسْ.
18 وبّخْ مِّيشْ، مَاڒَا عَاذْ ذِينْ شَا ن ڒَايَاسْ،
مَاشَا وَارْ ث نقّْ شَا، وَارْ تّجِّي شَا أَذْ إِكْسِي-د أَيَا ڒعْمَارْ نّكْ. ▪
19 ونِّي إِسْعَارنْ أَطَّاسْ، أَذْ إِتّْوَاخدْجصْ إِ مَانَاينِّي،
مَاغَارْ مَاڒَا ثخْسذْ أَذْ خَاسْ ثسّْبعّْذذْ، خنِّي أَذْ ذَايْسنْثْ ثَارنْيذْ.
20 سڒْ شكْ غَارْ ؤُشَاوَارْ ؤُشَا قْبڒْ تَّارْبِييّثْ،
مَاحنْذْ أَذْ ثْذوْڒذْ ذ أَمِيغِيسْ غَارْ ؤُنڭَّارْ.
21 أَقَا ذِينْ أَطَّاسْ ن إِخمِّيمنْ ذڭْ وُوڒْ ن ورْيَازْ،
مَاشَا شّْوَارْ ن سِيذِي إِتّْغِيمَا إِبدّْ. ▪
22 ثَامخْسِيوْثْ إِشوَّارنْ ن بْنَاذمْ ذ ڒضْرَافثْ نّسْ،
أَمُّو إِ إِدْجْ إِجّْ ن ؤُمزْڒُوضْ حْسنْ خْ إِجّْ ن بُو-إِخَارِّيقنْ.
23 ثِيڭّْوُوذِي ن سِيذِي ثْندّهْ غَارْ ثُوذَارْثْ،
مَاغَارْ إِتّطّصْ إِجِّيونْ،
وَارْ ڭُّورْ أَذْ غَارسْ د-يَاسْ شَا مِينْ وَارْ إِحْڒِينْ. ▪
24 أَمعْڭُوزْ إِسّْنُوفَّارْ أَفُوسْ نّسْ ذِي طّبْصِي،
وَارْ ث-إِ-د-إِتَّارِّي عَاوذْ غَارْ ؤُقمُّومْ نّسْ. ▫ ▪
25 وّثْ أَمسْثهْزِييْ، أَمُّو إِ غَا إِفْثنْ ونِّي وَارْ غَارسْ بُو ڒفْهَامثْ،
ؤُ عَاقبْ أَفهَّامْ، خنِّي أَذْ إِكْسبْ ڒفْهَامثْ. ▪
26 ونِّي إِتّڭّنْ غزُّو ذِي بَابَاسْ نِيغْ ونِّي إِسُّوفُّوغنْ يمَّاسْ،
أَقَا ذ مِّيسْ نْ ڒفْضِيحثْ نِّي يَارَّانْ بْنَاذمْ أَذْ إِسّضْحَا.
27 سْبدّْ-د، أَ مِّي، مَاحنْذْ أَذْ ثسْڒذْ غَارْ ؤُوبّخْ،
مَاڒَا ثخْسذْ أَذْ ثْحيّْذذْ خْ وَاوَاڒنْ إِشُّورنْ س ثُوسّْنَا.
28 إِجّْ ن ؤُشهَّاذْ إِ وَارْ إِسكّْوِينْ إِغطّڒْ زِي ڒْحقّْ،
ؤُشَا أَقمُّومْ ن إِعفَّاننْ إِصَارّضْ ڒْغشّْ.
29 إِمسْثهْزَاينْ ثتّْرَاجَا أَثنْ ڒحْكَامثْ،
ؤُ ثِييِيتَّا ذڭْ وعْرُورْ إِ إِپُوهَاڒِييّنْ.