21
1 ؤُڒْ ن ؤُجدْجِيذْ أَمْ ثِيغزْرَاثِينْ ن وَامَانْ ذڭْ ؤُفُوسْ ن سِيذِي. نتَّا إِندّهْ إِ-ث، مَانِي مَا إِخْسْ نتَّا.
2 مَارَّا إِبْرِيذنْ ن بْنَاذمْ نِيشَانْ ذِي ثِيطَّاوِينْ نّسْ،
مَاشَا سِيذِي إِتّْقدْجَابْ ؤُڒَاونْ. ▪
3 ثِيمڭَّا ن ثْسڭْذَا ذ ڒْحقّْ،
ذ ثِينَا إِ سِيذِي حْسنْ زِي ثوْهِيبْثْ ن ثْغَارْصْثْ. ▪
4 نّْفَاخثْ ن ثِيطَّاوِينْ ذ ؤُڒْ إِشنْعنْ،
أَڒْبَارْ ن إِعفَّاننْ ذ دّنْبْ.
5 إِخمِّيمنْ ن ونِّي إِمحْضنْ تَّاوْينْ مْغِيرْ غَارْ ؤُفيّضْ،
مَاشَا مَارَّا ونِّي إِتّْقدْجِيقنْ إِتَّاوِي غَارْ ڒحْوجْ وَاهَا. ▪
6 أَسْمُونِي ن وَاڭْڒَا س يِيڒسْ إِسّْخَارِّيقنْ،
أَمُّو إِ ثدْجْ ثْوَارِّيثْ ن نّفْسْ إِعدُّونْ ذغْيَا ن يِينِّي يَارزُّونْ ڒْموْثْ. ▪
7 لْعُونْفْ ن إِعفَّاننْ إِتّْجَارَّا إِ-ثنْ،
مَاغَارْ تَّاڭِينْ أَذْ ڭّنْ مِينْ إِسڭّْمنْ.
8 أَبْرِيذْ ن بُو-ؤُمَارْوَاسْ إِتّفْرِيغْ،
مَاشَا أَمزْذَاڭْ إِتّڭّْ مِينْ إِدْجَانْ نِيشَانْ.
9 إِحْڒَا أَذْ ثْزذْغذْ ذڭْ إِشْثْ ثغْمَارْثْ ن ثْزقَّا،
خْ ثْزذِّيغْثْ أَكْ-ذ إِشْثْ ن ثمْغَارْثْ إِتّمْشُوبُّوشنْ ذڭْ إِشْثْ ن ثَادَّارْثْ ثْشَارْشْ. ▪
10 ڒعْمَارْ ن إِعفَّاننْ إِتّْمژْرِي ذِي ڒْغَارْ،
أَمْقَارّبْ نّسْ وَارْ غَارسْ إِتِّيفْ أَرْضَا ذِي ثِيطَّاوِينْ نّسْ.
11 مَاڒَا إِتّْوَاخدْجصْ ؤُمسْثهْزِييْ،
إِدَّاكّْوَاڒْ ونِّي وَارْ غَارسْ بُو ڒفْهَامثْ ذ أَمِيغِيسْ،
مَاڒَا سّْڒمْذنْ أَمِيغِيسْ، إِكسِّي نتَّا ثُوسّْنَا. ▪
12 أَمْسڭّذْ إِتّْبقّشْ مْلِيحْ ثَادَّارْثْ ن ؤُعفَّانْ،
إِغطّڒْ إِعفَّاننْ ذِي أَرْژِييّثْ.
13 ونِّي إِتّْبلَّاعنْ أَمزُّوغْ نّسْ غَارْ إِغُويَّانْ ن ؤُمزْڒُوضْ،
ؤُڒَا ذ نتَّا أَذْ إِسْغُويّْ مَاشَا وَارْ خَاسْ د-تَّارَّانْ.
14 صّذْقثْ ذِي ثْنُوفّْرَا ثصْڒحُّو وغْضَابْ،
ثَارْزفْثْ إِمّوْشنْ ذڭْ وحْسِينْ ن وَارُّوضْ ثصْڒحُّو أَخيّقْ إِمْغَارنْ. ▪
15 أَقَا ذ ڒفْرَاحثْ إِ ؤُمْسڭّذْ مَاحنْذْ أَذْ إِڭّْ مِينْ إِدْجَانْ نِيشَانْ،
مَاشَا ذ أَشڒْوَاوْ إِ ينِّي إِتّڭّنْ ڒْغشّْ.
16 بْنَاذمْ نِّي إِتّفّْغنْ زڭْ وبْرِيذْ ن ڒعْقڒْ،
أَذْ يَاريّحْ ذڭْ وڭْرَاوْ ن ڒخْيَاڒَاثْ ن إِمتَّانْ.
17 ونِّي إِتّخْسنْ أَفَارَّاجْ، ڭُّورْ أَذْ إِحْوَاجْ،
ونِّي إِتّخْسنْ بِينُو ذ زّشْثْ، وَارْ إِذِّيكّْوِيڒْ ذ بُو وَاڭْڒَا.
18 أَعفَّانْ ذ دّيّثْ إِ إِمْسڭَّاذنْ،
أَغدَّارْ إِ ينِّي إِڭُّورنْ نِيشَانْ. ▪
19 إِحْڒَا أَذْ ثْزذْغذْ ذِي ثمُّورْثْ إِخْڒَانْ،
خْ ثَازذِّيغْثْ أَكْ-ذ إِشْثْ ن ثمْغَارْثْ إِتّمْشُوبُّوشنْ ؤُ إِتّقّْسنْ. ▪
20 إِجّْ ن ڒْكنْزْ إِتّْوَاحْوَاجنْ ذ زّشْثْ أَقَا أَثنْ ذِي ثْزذِّيغْثْ ن إِمِيغِيسنْ،
مَاشَا بْنَاذمْ أَپُوهَاڒِي إِصَارّضْ إِ-ث.
21 ونِّي يَارزُّونْ خْ ثْسڭْذَا ذ ثْمخْسِيوْثْ إِشوَّارنْ،
إِتَّافْ ثُوذَارْثْ ذ ثْسڭْذَا ذ شَّانْ.
22 أَمِيغِيسْ إِتّْڭعَّاذْ ثنْذِينْثْ ن أَيْثْ ن بُو-ثغْڒُوضْثْ،
إِغطّڒْ جّهْذْ ن تِّيقثْ نْسنْ ذِي ثمُّورْثْ.
23 ونِّي إِحطَّانْ أَقمُّومْ ذ يِيڒسْ نّسْ،
إِحطَّا ڒعْمَارْ نّسْ زِي ڒحْصَارَاثْ. ▪
24 ونِّي ذ بُو-نّْفَاخثْ إِفُّوشّْحنْ تّْڒَاغَانْ أَسْ ’أَمسْثهْزِييْ‘،
نتَّا إِتّڭّْ س نّْفَاخثْ بْڒَا ڒقْيَاسْ.
25 شّهْوثْ ن ؤُمعْڭُوزْ ثْنقّْ إِ-ث،
مَاغَارْ إِفَاسّنْ نّسْ ؤُڭِينْ أَذْ خذْمنْ.
26 أَسّْ إِمُونْ إِتّْشهَّا ثِيمسْڒَايِينْ ن ؤُشهِّي،
مَاشَا أَمْسڭّذْ أَذْ إِوْشْ ؤُ وَارْ إِتّْغِيمِي إِتّطّفْ ذِي شَا إِ يِيخفْ نّسْ. ▪
27 ثَاغَارْصْثْ ن ؤُعفَّانْ ذ نّْعِي،
مَاهُو مَاڒَا نِيثْنِي أَذْ ت أَوْينْ س ؤُنكّْوِي إِغشّنْ. ▪
28 أَشهَّاذْ إِسّْخَارِّيقنْ ڭُّورْ أَذْ إِتّْوَاهلّكْ،
مَاشَا أَرْيَازْ نِّي إِتّسْڒَانْ، ڭُّورْ أَذْ إِسِّيوڒْ ثِيذتّْ ڒبْذَا. ▪
29 أَرْيَازْ أَعفَّانْ إِسّجْهذْ إِخفْ نّسْ أَكْ-ذ وُوذمْ نّسْ،
مَاشَا ونِّي إِڭُّورنْ نِيشَانْ إِسّمْثنْ إِبْرِيذنْ نّسْ.
30 وَارْ ثدْجِي ثِيغِيثْ ؤُڒَا ذ ڒفْهَامثْ،
ؤُ وَارْ ذِينْ إِدْجِي بُو ؤُشَاوَارْ قِيبَاتْشْ إِ سِيذِي.
31 أَيِيسْ أَذْ أَسْ حزّْمنْ إِ وَاسّْ ن ؤُمنْغِي،
مَاشَا ڒغْڒبْ غَارْ سِيذِي.▪