15
1 ثْوَارِّيثْ إِفْسُوسنْ ثسّسْمَاضْ أَخيّقْ، مَاشَا أَوَاڒْ إِتّقّْسنْ إِسّكَّارَا-د أَخيّقْ. ▪
2 إِڒسْ ن إِمِيغِيسنْ إِجبّذْ ثُوسّْنَا غَارْ زَّاثْ،
مَاشَا أَقمُّومْ ن إِپُوهَاڒِييّنْ إِتَّازّڒْ س ثُوبُّوهڒْيَا. ▪
3 ثِيطَّاوِينْ ن سِيذِي ذِي كُوڒْ أَمْشَانْ،
تّْحكَّارنْثْ إِ إِصبْحَاننْ ذ إِعفَّاننْ. ▪
4 إِڒسْ نِّي إِسّْڭنْفَانْ ذ ثَاشجَّارْثْ ن ثُوذَارْثْ،
مَاشَا أَرّْهَاجْ نّسْ إِتَّارژَّا بُوحْبڒْ. ▫ ▪
5 أَپُوهَاڒِي إِنطَّارْ تَّارْبِييّثْ ن بَابَاسْ،
مَاشَا ونِّي إِتّْحكَّارَانْ إِ ؤُوبّخْ، أَقَا إِفْثنْ.
6 ذِي ثَادَّارْثْ ن ؤُمْسڭَّاذْ ذِينْ ڒْكنْزْ إِمْغَارْ،
مَاشَا ذِي مِينْ د-إِتَّاوِي ؤُعفَّانْ ذَايسْ ثَامَارَا.
7 إِينْشِيشنْ ن إِمِيغِيسنْ تّْبزَّاعنْ ثُوسّْنَا،
مَاشَا وَارْ إِدْجِي أَمنِّي ؤُڒْ ن إِپُوهَاڒِييّنْ.
8 ثَاغَارْصْثْ ن إِعفَّاننْ ذ نّْعِي إِ سِيذِي،
مَاشَا ثَاژَادْجِيثْ ن إِنِّي إِڭُّورنْ نِيشَانْ أَقَا-ت إِ نتَّا ذ أَرْضَا. ▪
9 أَبْرِيذْ ن ؤُعفَّانْ ذ نّْعِي إِ سِيذِي،
مَاشَا ونِّي إِضفَّارَانْ ثَاسڭْذَا، إِتّخْسْ إِ-ث نتَّا.
10 ثَارْبِييّثْ إِقسْحنْ ثْڒقّفْ ونِّي إِسمْحنْ ذڭْ وبْرِيذْ،
ؤُ ونِّي إِشَارّْهنْ أَوبّخْ، أَذْ إِمّثْ.
11 ڒَاخَارْثْ ذ ثسْرَافْثْ أَقَا ذِينْ أَرزْمنْ زَّاثْ إِ سِيذِي،
مشْحَاڒْ عَاذْ وُوڒَاونْ ن ثَارْوَا ن بْنَاذمْ؟ ▪
12 أَمسْثهْزِييْ وَارْ إِتّخْسْ ونِّي ث إِ غَا إِوبّْخنْ،
وَارْ إِتّْرِيحْ شَا غَارْ إِمِيغِيسنْ.
13 ؤُڒْ إِفَارْحنْ إِتّڭّْ ؤُذمْ إِشْنَانْ،
مَاشَا أَمْنُوسْ ذڭْ وُوڒْ إِسكّفْ بُوحْبڒْ. ▪
14 ؤُڒْ إِفهّْمنْ يَارزُّو ثُوسّْنَا،
مَاشَا أَقمُّومْ ن إِپُوهَاڒِييّنْ إِسّشَّا إِخفْ نّسْ س ثُوبُّوهڒْيَا.
15 إِ ينِّي إِتّْوَاحْصَارنْ مَارَّا ؤُسَّانْ نْسنْ أَقَا إِعفّْننْ،
مَاشَا ؤُڒْ إِفَارْحنْ أَمْ مَاشَّا وَارْ إِقطِّينْ.
16 إِحْڒَا ذْرُوسْ أَكْ-ذ ثڭّْوُوذِي ن سِيذِي،
خْ إِجّْ ن ڒْكنْزْ ذ أَمقّْرَانْ س ڒحْوڒْ. ▪
17 إِحْڒَا إِجّْ ن طّبْصِي ن ڒْخُوضَارْثْ مَانِي ثْحكّمْ ثَايْرِي،
خْ إِجّْ ن ؤُفُونَاسْ إِمسْڒنْ س وشْرَاهْ. ▪
18 أَرْيَازْ إِسعَّارنْ ذغْيَا إِسّكَّارَا إِمنْغِييّنْ،
مَاشَا ونِّي غَارْ إِدْجْ تَّاسِيعْ ن ڒْخَاضَارْ إِسّخْسَايْ أَمنْغِي. ▪
19 أَبْرِيذْ ن ؤُمعْڭُوزْ أَمْ شْبَارْقْ أَكْ-ذ إِسنَّاننْ،
مَاشَا أَمسْرُوقْ ن يِينِّي إِڭُّورنْ نِيشَانْ أَقَا إِتّْوَاسّْڭعّذْ.
20 مِّيسْ أَمِيغِيسْ إِسّْفَارّحْ بَابَاسْ،
مَاشَا بْنَاذمْ أَپُوهَاڒِي إِسّحْقَارَا يمَّاسْ. ▪
21 ثُوبُّوهڒْيَا أَقَا-ت ذ ڒفْرَاحثْ إِ ونِّي وَارْ غَارْ إِدْجِي بُو وُوڒْ إِمْثنْ،
مَاشَا إِجّْ ن ورْيَازْ ن ڒفْهَامثْ إِڭُّورْ نِيشَانْ. ▪
22 إِنْوَاينْ فشّْڒنْ مَاڒَا وَارْ ذِينْ إِدْجِي شّْوَارْ،
مَاشَا س وَاطَّاسْ ن إِمْشَاوَارنْ أَذْ يِيڒِي ونْوَايْ. ▫ ▪
23 أَرْيَازْ غَارسْ ڒفْرَاحثْ ذِي ثْوَارِّيثْ إِصبْحنْ زڭْ ؤُقمُّومْ نّسْ،
ؤُ مشْحَاڒْ إِصْبحْ وَاوَاڒْ ذِي ڒْوقْثْ نّسْ.
24 أَبْرِيذْ ن ثُوذَارْثْ إِندّهْ غَارْ سنّجْ إِ ؤُفهَّامْ،
مَاحنْذْ نتَّا أَذْ إِحيّذْ خْ ڒَاخَارْثْ سْوَادَّايْ.
25 ثَادَّارْثْ ن بُو-نّْفَاخثْ أَذْ ت إِقْڒعْ سِيذِي،
مَاشَا أَيْمِيرْ ن ييَّارْ ن ثَاجَّاتْشْ إِسّمْثَانْ إِ-ث نتَّا. ▪
26 إِخمِّيمنْ ن ؤُعفَّانْ ذ نّْعِي إِ سِيذِي،
مَاشَا أَوَاڒنْ إِشوَّارنْ ذ إِمزْذَاڭنْ. ▪
27 ونِّي يَارزُّونْ خْ أَرْبحْ إِغطّڒْ ثَادَّارْثْ نّسْ ذِي أَرّْژِييّثْ،
مَاشَا ونِّي إِشَارّْهنْ ثَارْزِيفِينْ، أَذْ إِدَّارْ. ▪
28 ؤُڒْ ن إِمْسڭَّاذنْ إِتّْخَارَّاصْ مَاحنْذْ أَذْ د-يَارّْ،
مَاشَا أَقمُّومْ ن إِعفَّاننْ إِتّْفيّضْ س عْڒَامْ كُوڒْ ڒْغَارْ.
29 إِڭّْوجْ سِيذِي خْ إِعفَّاننْ،
مَاشَا ثَاژَادْجِيثْ ن إِمْسڭَّاذنْ إِتّسْڒَا أَسْ. ▪
30 ثَافَاوْثْ ذِي ثِيطَّاوِينْ ثسّْفَارّحْ ؤُڒْ،
ڒخْبَارْ أَصبْحَانْ إِسّْيُومَا إِخْسَانْ. ▪
31 أَمزُّوغْ إِتّسْڒَانْ غَارْ ؤُوبّخْ إِ ثُوذَارْثْ،
أَذْ إِسّنْسْ ذِي ڒْوسْثْ ن إِمِيغِيسنْ.
32 ونِّي إِنطَّارنْ تَّارْبِييّثْ، إِسّحْقَارَا إِخفْ نّسْ،
مَاشَا ونِّي إِتّسْڒَانْ غَارْ ؤُوبّخْ، إِسّْيَاوَانْ ؤُڒْ نّسْ.
33 ثِيڭّْوُوذِي ن سِيذِي ذ تَّارْبِييّثْ غَارْ ثِيغِيثْ،
ؤُ أَوَاضعْ إِتِّيزْوَارْ إِ شَّانْ. ▪