14
1 ثِيغِيثْ ن ثمْغَارِينْ ثْبنَّا ثَادَّارْثْ نّسْ، مَاشَا ثُوبُّوهڒْيَا ثْهدّمْ إِ-ت س إِفَاسّنْ نّسْ.
2 ونِّي إِڭُّورنْ ذِي ڒصْفَايثْ نّسْ، إِتّڭّْوذْ سِيذِي،
مَاشَا ونِّي إِتّفّْغنْ زڭْ إِبْرِيذنْ نّسْ، إِسّحْقَارَا إِ-ث. ▪
3 ذڭْ ؤُقمُّومْ ن ؤُپُوهَاڒِي ذِينْ ڒْمشْعضْ إِ نّْفَاخثْ نّسْ،
مَاشَا إِينْشِيشنْ ن إِمِيغِيسنْ حطَّانْ ثنْ.
4 مَانِي وَارْ دْجِينْ إِفُونَاسنْ، إِتّْغِيمَا ڒْمذْوذْ إِصْفَا،
مَاشَا س جّهْذْ ن ؤُفُونَاسْ أَقَا ذِينْ صَّابثْ ثمْغَارْ.
5 أَشهَّاذْ ذ ثِيذتّْ وَارْ إِسّْخَارِّيقْ شَا،
مَاشَا أَشهَّاذْ بُو-إِخَارِّيقنْ إِتّْصُوضْ إِخَارِّيقنْ. ▪
6 إِ ؤُمسْثهْزِييْ وَارْ ذِينْ ثِيغِيثْ خْمِي ت يَارزُّو،
مَاشَا إِ ؤُفهَّامْ إِهْونْ خَاسْ، مَاحنْذْ أَذْ يَافْ ثُوسّْنَا.
7 أَڭّْوجْ خْ ورْيَازْ أَپُوهَاڒِي،
مَاغَارْ شكْ وَارْ غَارسْ ثتِّيفذْ شَا إِينْشِيشنْ إِ إِسَّاوَاڒنْ ثُوسّْنَا.
8 ثِيغِيثْ ن ونِّي إِفتّْننْ أَقَا-ت ذ ڒفْهَامثْ ن وبْرِيذْ ن يِيخفْ نّسْ،
مَاشَا ثُوبُّوهڒْيَا ن إِپُوهَاڒِييّنْ ذ أَشْمَاثْ.
9 إِپُوهَاڒِييّنْ سْثهْزَانْ س وعْذَاڒْ ن ؤُمَارْوَاسْ،
مَاشَا جَارْ إِنِّي إِڭُّورنْ نِيشَانْ إِتّْوَافْ ڒْخَاضَارْ.
10 ؤُڒْ إِسّنْ ثَارْزُوڭِي نّسْ،
ڒْبَارَّانِي وَارْ إِزمَّارْ أَذْ يَاشَا س ڒفْرَاحثْ نّسْ.
11 ثَادَّارْثْ ن إِعفَّاننْ أَذْ ثتّْوَاردّدْجْ،
مَاشَا ثَاقِيضُونْثْ ن إِنِّي إِڭُّورنْ نِيشَانْ أَذْ ثنّوَارْ.
12 أَذْ ثَاغْ إِتّْغِيڒْ أَسْ إِ شَا ن يِيجّنْ أَقَا أَبْرِيذْ نِيشَانْ،
مَاشَا أَنڭَّارْ نّسْ مْغِيرْ إِبْرِيذنْ إِتَّاوْينْ غَارْ ڒْموْثْ. ▪
13 وَاخَّا غَارْ وضْحَاشْ ؤُڒْ إِتّڭّْ ڒحْرِيقْ،
ؤُ أَنڭَّارُو ن ڒفْرَاحثْ ثتَّاكّْوَاضْ-د أَشْضَانْ. ▪
14 ونِّي غَارْ إِدْجْ وُوڒْ إِفّْغنْ زڭْ وبْرِيذْ،
أَذْ إِتّْوَاسْيِيونْ س إِبْرِيذنْ نّسْ،
ؤُ أَرْيَازْ أَصبْحَانْ س يِيخفْ نّسْ. ▪
15 ونِّي إِدْجَانْ ذ أَحَافِي، إِتَّامنْ ذِي كُوڒْ أَوَاڒْ،
مَاشَا ونِّي إِفتّْننْ إِحطَّا أَصُورِيفْ نّسْ.
16 أَمِيغِيسْ إِتّڭّْوذْ ؤُ إِتّْحيَّاذْ خْ ڒْغَارْ،
مَاشَا أَپُوهَاڒِي إِسعَّارْ، ؤُمِي إِتّْغِيڒْ أَسْ أَقَا-ث ذِي ڒَامَانْ.
17 ونِّي إِتّْخيَّاقنْ ذغْيَا، أَذْ إِڭّْ ثُوبُّوهڒْيَا،
ؤُ أَرْيَازْ إِنكّْوَانْ ثَاحْرَايْمشْثْ، أَذْ إِتّْوَاشَارْهْ.
18 إِحَافِييّنْ أَذْ وَارْثنْ ثُوبُّوهڒْيَا،
مَاشَا إِنِّي إِفتّْننْ، أَذْ ثنْ ثوّْجنْ س ثُوسّْنَا.
19 إِعفَّاننْ تَّاضَارنْ زَّاثْ إِ وُوذمْ ن إِصبْحَاننْ،
ؤُ إِعفَّاننْ زَّاثْ إِ ثوُّورَا ن إِمْسڭَّاذنْ.
20 أَمزْڒُوضْ إِشَارّهْ إِ-ث عَاذْ ؤُمدُّوكّڒْ نّسْ،
مَاشَا أَطَّاسْ ذ إِنِّي إِتّخْسنْ أَيْثْ ن بُو-وَاڭْڒَا. ▪
21 ونِّي إِسّحْقَارَانْ أَمْقَارّبْ نّسْ، إِتّڭّْ دّْنُوبْ،
مَاشَا سّعْذْ ن ونِّي إِتّْحِينَّانْ خْ إِنِّي إِتّْوَاحْصَارنْ.
22 إِنِّي د-إِخدْجْقنْ ڒْغَارْ، مَا وَارْ تّْودَّارِينْ نِيثْنِي؟
ثَامخْسِيوْثْ إِشوَّارنْ ذ ڒَامَانْ أَقَا غَارْ ينِّي إِتّْخَارَّاصنْ ذِي مِينْ إِصبْحنْ. ▪
23 ذِي مَارَّا ڒْوحْڒَانْ ن وَارْبرْ ذَايسْ ڒفْضڒْ،
مَاشَا ڒْهَارْذْ ن إِينْشِيشنْ إِندّهْ غَارْ وحْوَاجْ وَاهَا. ▫
24 تَّاجْ ن إِمِيغِيسنْ ذ أَڭْڒَا نْسنْ،
ثُوبُّوهڒْيَا ن إِپُوهَاڒِييّنْ ذ ثُوبُّوهڒْيَا وَاهَا.
25 أَشهَّاذْ أَمْثِيقِّي إِسّنْجَامْ ڒعْمُورْ،
مَاشَا ونِّي يَارخُّونْ إِ إِخَارِّيقنْ، إِشمّثْ.
26 ذِي ثِيڭّْوُوذِي ن سِيذِي ذَايسْ تِّيقثْ إِجهْذنْ،
نتَّا أَذْ يِيڒِي ذ أَمْشَانْ ن ثَاروْڒَا إِ إِحنْجِيرنْ نّسْ.
27 ثِيڭّْوُوذِي ن سِيذِي ذ ڒْعُونْصَارْ ن ثُوذَارْثْ،
إِ ؤُسنْجمْ زڭْ إِشذِّيينْ ن ڒْموْثْ. ▪
28 ذڭْ وَاطَّاسْ ن ڒْڭنْسْ إِخمّڒْ ؤُشوَّارْ ن ؤُجدْجِيذْ،
مَاشَا ذِي ذْرُوسْ ن شّعْبْ إِخمّڒْ ؤُهلّكْ نْ ڒْحَاكمْ.
29 ونِّي غَارْ إِدْجْ تَّاسِيعْ ن ڒْخَاضَارْ، غَارسْ ڒفْهَامثْ ثمْغَارْ،
مَاشَا ونِّي ذِي إِدْجْ بُوحْبڒْ إِحْصَارنْ إِسّكَّارْ ثُوبُّوهڒْيَا.
30 أَرْزَامْ ن وُوڒْ أَقَا ذ ثُوذَارْثْ إِ أَرِّيمثْ،
مَاشَا ثُوسْمِي ذ أَرصُّوضْ ن يخْسَانْ.
31 ونِّي إِحصَّارنْ أَمحْذَاجْ، إِسّحْقَارَا ونِّي ث إِ-د-إِخڒْقنْ،
مَاشَا ونِّي إِتّْحِينَّانْ خْ ؤُمزْڒُوضْ، إِتّْشنّعْ إِ-ث. ▪
32 أَعفَّانْ إِتَّاژّڒْ خْ يِيخفْ نّسْ س ڒْغَارْ نّسْ إِ إِتّڭّْ،
مَاشَا أَمْسڭّذْ إِتّْغِيمَا إِتّْشڒْ عَاذْ ذِي ڒْموْثْ نّسْ.
33 ثِيغِيثْ ثَارْسَا ذڭْ وُوڒْ ن إِفهَّامنْ،
مَاشَا مِينْ إِدْجَانْ ذَاخڒْ ذڭْ إِپُوحَارِييّنْ ڭُّورْ أَذْ إِتّْوَاسّْننْ. ▪
34 ثَاسڭْذَا ثسّْعُودْجْ ڒْڭنْسْ،
مَاشَا ڒفْضِيحثْ ن شُّوعُوبْ ذ دّْنُوبْ.
35 ڒْخَاضَارْ ن ؤُجدْجِيذْ يَارْسَا خْ ؤُمْسخَّارْ إِفهّْمنْ
مَاشَا ونِّي إِفطّْحنْ إِڒقّفْ إِ-ث ؤُذُوقّزْ نّسْ ن ؤُفُوڭمْ.