16
1 بْنَاذمْ غَارسْ إِخَارِّيصنْ ذڭْ وُوڒْ نّسْ، مَاشَا ثَامْوَارِّيثْ ن يِيڒسْ ثتَّاسْ-د زِي سِيذِي. ▪
2 مَارَّا إِبْرِيذنْ ن ورْيَازْ صْفَانْ ذِي ثِيطَّاوِينْ نّسْ،
مَاشَا سِيذِي إِتّْقدْجَابْ بُوحْبڒَاثْ. ▪
3 سَارْسْ ڒخْذَايمْ نّكْ إِ سِيذِي،
ؤُشَا خنِّي أَذْ تّْوَاسْمتّْننْ إِنْوَاينْ نّكْ. ▪
4 سِيذِي إِخْڒقْ-د مَارَّا إِ لْغَارَاضْ نّسْ،
عَاذْ ؤُڒَا ذ أَعفَّانْ إِڭَّا إِ-ث إِ وَاسّْ ن ڒْغَارْ.▪
5 كُوڒْ أَمْعفَّارْ ذ نّْعِي إِ سِيذِي،
أَفُوسْ خَاسْ، نتَّا وَارْ إِتّتّْوَابَارِّي عمَّارْصْ. ▪
6 س ثْمخْسِيوْثْ إِشوَّارنْ ذ ڒَامَانْ أَذْ إِتّْوَاصْڒحْ ڒْغشّْ،
ؤُ س ثِيڭّْوُوذِي ن سِيذِي إِتّْحيَّاذْ ورْيَازْ خْ ڒْغَارْ.
7 مَاڒَا ؤُسِينْ-د إِبْرِيذنْ ن إِجّْ ن ورْيَازْ خْ ڒْخَاضَارْ ن سِيذِي،
أَذْ يَارّْ نتَّا ؤُڒَا ذ ڒْعذْيَانْ نّسْ أَذْ كِيذسْ ڭّنْ ڒهْنَا.
8 إِحْرَا ذْرُوسْ أَكْ-ذ ثْسڭْذَا
خْ وَاطَّاسْ ن ڒْغِيدْجثْ بْڒَا ڒْحقّْ. ▪
9 ؤُڒْ ن بْنَاذمْ إِتّْخَارّصْ أَبْرِيذْ نّسْ،
مَاشَا سِيذِي إِندّهْ إِصُورَافْ نّسْ. ▫
10 ڒْحُوكْمْ بْڒَا أَذْوَاڒْ خْ إِينْشِيشنْ ن ؤُجدْجِيذْ،
أَقمُّومْ نّسْ وَارْ إِخطِّي ذڭْ وحْكَامْ.
11 ڒْمِيزَانْ نِيشَانْ ذ طَّاوْيَاثْ ن ڒْمِيزَانْ نِيشَانْ أَقَا أَثنْ ن سِيذِي،
مَارَّا إِژْرَا ن ڒوْزنْ ذِي ثشْيَارْثْ ذ ڒْخذْمثْ نّسْ. ▪
12 ذ نّْعِي إِ إِجدْجِيذنْ خْمِي إِ غَا ڭّنْ ڒْغَارْ،
مَاغَارْ ڒْعَارْشْ إِتّْوَاسّمْثنْ زِي ثْسڭْذَا.
13 إِينْشِيشنْ إِ إِشُّورنْ س ثْسڭْذَا تّعْجِيبنْ إِ ؤُجدْجِيذْ،
ؤُ ونِّي إِسَّاوَاڒنْ نِيشَانْ، إِتّخْسْ إِ-ث نتَّا.
14 أَسْعَارْ ن ؤُجدْجِيذْ أَمْ لْمَالَاكَاثْ نْ ڒْموْثْ،
مَاشَا أَرْيَازْ أَمِيغِيسْ إِزمَّارْ أَذْ غَارسْ ت إِ-د يَارّْ. ▪
15 ذِي ثْفَاوْثْ ن وُوذمْ إِتِّيسِّيقنْ ن ؤُجدْجِيذْ ثدْجْ ثُوذَارْثْ،
أَرْضَا نّسْ أَمْ ؤُسيْنُو ن ونْژَارْ ذِي ثفْسُوثْ. ▪
16 أَقَا ثحْڒَا ثَارزُّوثْ ن ثِيغِيثْ خْ وُورغْ إِتِّيسِّيقنْ،
ؤُ مشْحَاڒْ كْثَارْ أَذْ ثِيڒِي ثْوَافِيثْ ن ڒفْهَامثْ سنّجْ خْ ثْوَافِيثْ ن نُّوقَارْثْ. ▪
17 إِتّْوَاسّْڭعّذْ وبْرِيذْ ن يِينِّي إِڭُّورنْ نِيشَانْ مَاحنْذْ أَذْ إِحيّذْ خْ ڒْغَارْ.
ونِّي إِحطَّانْ أَبْرِيذْ نّسْ، إِحطَّا ڒعْمَارْ نّسْ.
18 ثَانفْسشْثْ ثتِّيزْوَارْ-د إِ أَرْژِّييّثْ،
ؤُ نّْفَاخثْ ثتَّاسْ-د قْبڒْ إِ ؤُوطُّو. ▪
19 إِحْڒَا أَقْنَاعْ ن بُوحْبڒْ أَكْ-ذ إِنِّي إِتّْوَاحْصَارنْ،
خْ ؤُبطُّو ن ثْكشَّاضْثْ أَكْ-ذ أَيْثْ-نّْفَاخثْ.
20 ونِّي إِتّْخَارَّاصنْ مْلِيحْ ذِي شَا ن ثْمسْڒَاشْثْ، أَذْ يَافْ ڒْخَارْ،
سّعْذْ ن ونِّي إِتّْشَاڒَانْ خْ سِيذِي.▪
21 ونِّي غَارْ إِدْجْ وُوڒْ ذ أَمِيغِيسْ، أَذْ ث سمَّانْ بُو-وفْثَانْ،
ؤُ ثَاژْيُوذِي ن ڒْهَارْذْ ن إِينْشِيشنْ ثَارنِّي ذِي ڒفْهَامثْ.
22 ڒعْقڒْ ذ ڒْعُونْصَارْ ن ثُوذَارْثْ إِ بَابْ نّسْ،
مَاشَا تَّارْبِييّثْ إِ إِپُوهَاڒِييّنْ ذ ثُوبُّوهڒْيَا وَاهَا.▪
23 ؤُڒْ ن ؤُمِيغِيسْ إِتَّارَّا أَقمُّومْ نّسْ إِفهّمْ،
زڭْ إِينْشِيشنْ نّسْ أَذْ فهْمنْ كْثَارْ.
24 أَوَاڒنْ إِشوَّارنْ ڭِّينْ أَمْ ثَامّنْثْ ن ثغْرَاسْثْ،
أَقَا-ثنْ ذ إِمِيژِيذنْ إِ ڒعْمَارْ ذ ؤُڭنْفُو إِ يخْسَانْ.
25 أَذْ ثَاغْ إِتّْغِيڒْ أَسْ إِ شَا ن يِيجّنْ أَقَا أَبْرِيذْ نّسْ نِيشَانْ،
مَاشَا أَنڭَّارْ نّسْ مْغِيرْ إِبْرِيذنْ إِتَّاوْينْ غَارْ ڒْموْثْ. ▪
26 ڒَاژْ ن ؤُشوَّارْ إِخدّمْ أَسْ إِ نتَّا،
مَاغَارْ أَقمُّومْ نّسْ إِندّهْ إِ-ث.
27 أَرْيَازْ إِ وَارْ إِسكّْوِينْ إِغزَّا ڒْغَارْ،
خْ إِينْشِيشنْ نّسْ أَمشْنَاوْ إِشْثْ ن ثْمسِّي إِتّْشعَّاڒنْ. ▪
28 أَرْيَازْ إِشُّورنْ س ڒخْذَاعَاثْ إِسّكَّارَا أَمنْغِي،
ؤُ أَخْبَارْجِي إِتَّاوِي-د عَاذْ أَبطُّو أَكْ-ذ ؤُمدُّوكّڒْ إِصبْحنْ أَطَّاسْ. ▪
29 أَرْيَازْ بُو-ڒخْشُونثْ إِتّْغَارَّا أَمْقَارّبْ نّسْ،
إِندّهْ إِ-ث غَارْ إِجّْ ن وبْرِيذْ وَارْ إِدْجِينْ مْلِيحْ.
30 نتَّا إِتّقّنْ ثِيطَّاوِينْ نّسْ مَاحنْذْ أَذْ إِخَارّصْ مَارَّا دَّارْبَاثْ ن ڒخْذَاعثْ،
إِتّْكمّشْ إِينْشِيشنْ نّسْ، أَقَا ذَا إِڭَّا ڒْغَارْ. ▪
31 أَشوَّافْ إِشَابنْ ذ إِشْثْ ن ثمْرِيسْثْ إِزوّْقنْ،
ثْزمَّارذْ أَذْ ت ثَافذْ خْ وبْرِيذْ ن ثْسڭْذَا.
32 إِحْڒَا بُو-تَّاسِيعْ ن ڒْخَاضَارْ خْ إِجّْ ن ورْيَازْ إِجهْذنْ
ؤُ ونِّي إِتّبَّاثنْ بُوحْبڒْ نّسْ إِحْڒَا خْ ونِّي إِحوّْسنْ إِشْثْ ن ثنْذِينْثْ.
33 ثَاقدُّوحْثْ ثمّنْضَارْ ذڭْ وحْسِينْ،
مَاشَا مْكُوڒْ أَرَّايْ إِتَّاسْ-د زِي سِيذِي.