‏1 إِزْڒِي ن ؤُڭعّذْ.

أَ سِيذِي، إِذَارْ ذَاوُوذْ، إِذَارْ مَارَّا أَودّبْ نّسْ،

‏2 مَامّشْ إِجِّيدْجْ إِ سِيذِي،

إِوَاعْذْ إِ ؤُمْزمَّارْ ن يَاعْقُوبْ:

‏3 ”ؤُشْثْ، مَاڒَا أَذْ أَذْفغْ غَارْ ثَاقِيذُونْثْ ن ثَادَّارْثْ إِنُو،

أَذْ حبْشغْ خْ قَامَا ن رشْثُو إِنُو، ^▪  

‏4 أَذْ سمّْحغْ يِيضصْ إِ ثِيطَّاوِينْ إِنُو،

ؤُڒَا ذ أَنُوذمْ إِ وَابْڒِيونْ إِنُو،

‏5 قْبڒْ إِ غَا أَفغْ أَمْشَانْ إِ سِيذِي،

إِشْثْ ن ثْزذِّيغْثْ إِ سِيذِي، أَمْزمَّارْ ن يَاعْقُوبْ!“

‏6 خْزَارْ، نسْڒَا خْ تَّاپُوثْ ذِي إِفْرَاثَا،

نُوفَا إِ-ت ذڭْ إِيَّارنْ ن يَاعَارْ. ^▫  

‏7 أَذْ نَاذفْ غَارْ ثْزذِّيغِينْ نّسْ،

أَذْ نَاضَارْ زَّاثْ إِ ثْنبْذَاثْ ن إِضَارنْ نّسْ.

‏8 كَّارْ، سِيذِي، ؤُيُورْ غَارْ أَرَّاحثْ نّكْ،

شكْ ذ تَّاپُوثْ ن جّهْذْ نّكْ.

‏9 أجّْ إِكهَّاننْ نّكْ أَذْ يَارْضنْ س ثْسڭْذَا،

إِمْثِيقَّانْ نّكْ أَذْ سْڒِيوڒْونْ.

‏10 وَارْ د-ثَارِّي ؤُذمْ ن ؤُمذْهُونْ نّكْ ذِي طّْوعْ ن ؤُمْسخَّارْ نّكْ ذَاوُوذْ.

‏11 سِيذِي إِجِّيدْجْ إِ ذَاوُوذْ س ڒَامَانْ،

عمَّارْصْ أَذْ إِحيّذْ نتَّا خْ ثْجَادْجِيثْ نّسْ:

”زِي ڒْغِيدْجثْ ن ؤُعذِّيسْ نّكْ أَذْ سّْغِيمغْ إِجّْ خْ ڒْعَارْشْ نّكْ. ^▪  

‏12 مَاڒَا إِحنْجِيرنْ نّكْ أَذْ حْضَانْ ڒْعَاهْذْ إِنُو ذ شّْهَاذَاثْ إِنُو،

ثِينِّي ذ أَسنْ إِ غَا سّْڒمْذغْ،

خنِّي ؤُڒَا ذ إِحنْجِيرنْ نْسنْ أَذْ قِّيمنْ خْ ڒْعَارْشْ نّكْ إِ ڒبْذَا.“

‏13 مَاغَارْ سِيذِي إِفَارْزْ صِيهْيُونْ،

إِمژْرِي ت ذ ثَازذِّيغْثْ إِ يِيخفْ نّسْ.

‏14 ”وَا ذ أَمْشَانْ ن أَرَّاهثْ إِنُو إِ ڒبْذَا،

ذَا إِ خْسغْ أَذْ زذْغغْ، نشّْ خْسغْ ث. ^▪  

‏15 أَذْ بَارْكغْ نِّيعْمثْ ن صِيهْيُونْ،

أَذْ سّْجِيوْنغْ إِمزْڒَاضْ نّسْ س وغْرُومْ.

‏16 أَذْ سّْيَارْضغْ إِكهَّاننْ نّسْ س ؤُسنْجمْ أَمْ س ورُّوضْ،

إِمْثِيقَّانْ نّسْ أَذْ سْڒِيوڒْونْ س جّهْذْ. ^▪  

‏17 ذِينِّي أَذْ سّْغمّْيغْ إِجّْ ن ؤُيِيشّْ إِ ذَاوُوذْ،

إِجّْ نْ ڒفْنَارْ إِ ؤُمذْهُونْ إِنُو سّْوجْذغْ ث ذِينْ.^▪  

‏18 أَذْ سّْيَارْضغْ ڒْعذْيَانْ نّسْ س ؤُسضْحِي،

مَاشَا أَذْ خَاسْ ثنُّووَارْ ثمْرِيسْثْ نّسْ.“