119
1 أَلِيفْ. سّعْذْ نْسنْ إِ يِينِّي إِكمّْڒنْ أَبْرِيذْ ن ثُوذَارْثْ نْسنْ بْڒَا ڒْعِيبْ، إِنِّي إِڭُّورنْ خْ وبْرِيذْ ن شَّارِيعَا ن سِيذِي. ▪
2 سّعْذْ نْسنْ إِ يِينِّي إِحطَّانْ شّْهَاذَاثْ نّسْ،
إِنِّي خَاسْ يَارزُّونْ س مَارَّا ؤُڒْ نْسنْ.
3 نِيثْنِي وَارْ تّڭّنْ ڒْغشّْ،
مَاشَا ڭُّورنْ ذڭْ إِبْرِيذنْ نّسْ.
4 أَ سِيذِي، شكْ ثُومَارذْ
مَاحنْذْ بْنَاذمْ أَذْ إِحْضَا ثِيوصَّا نّكْ نِيشَانْ.
5 مْڒِي قَاعْ إِبْرِيذنْ إِنُو تّْوَاسڭّْذنْ،
مَاحنْذْ أَذْ حْضِيغْ ثِيوصَّا نّكْ،
6 خنِّي عمَّارْصْ أَذْ سضْحِيغْ
مَاڒَا خزَّارغْ غَارْ مَارَّا ثِيوصَّا نّكْ.
7 س وُوڒْ إِقُّورْ أَذْ شكْ قَاذِيغْ،
مَاڒَا نشّْ ڒمْذغْ ڒحْكَامَاثْ نّكْ إِسڭّْذنْ.
8 أَذْ حْضِيغْ ثِيوصَّا نّكْ!
وَارْ ذَايِي سمّحْ مَارَّا!
9 بِيثْ. مَامّشْ إِ غَا إِسِّيزْذڭْ إِجّْ ن ؤُبْڒِيغْ أَبْرِيذْ نّسْ؟
س ومْنَاعْ نّسْ ذڭْ وَاوَاڒْ نّكْ.
10 نشّْ أَرزُّوغْ خَاكْ س وُوڒْ إِنُو مَارَّا،
وَارْ ذ أَيِي تّجِّي أَذْ فّْغغْ خْ ڒُومُورَاثْ نّكْ.
11 مِينْ ثقَّارذْ شكْ، خمّْڒغْ ث ذڭْ وُوڒْ إِنُو،
مَاحنْذْ وَارْ كِيذكْ خطِّيغْ.
12 ثتّْوَابَارْكذْ شكْ، أَ سِيذِي،
سڒْمذْ أَيِي ثِيوصَّا نّكْ.
13 س إِينْشِيشنْ إِنُو بَارّْحغْ
مَارَّا لْفَارَايِيضْ ن ؤُقمُّومْ نّكْ.
14 أَقَا فَارْحغْ س وبْرِيذْ ن شّْهَاذَاثْ نّكْ،
أَمْ خْ مَارَّا مِينْ إِدْجَانْ إِغْڒَا.
15 أَذْ خَارّْصغْ ذِي ڒُومُورَاثْ نّكْ،
أَذْ خزَّارغْ غَارْ إِمسْرَاقْ نّكْ.
16 نشّْ ضَافَّارغْ ثِيوصَّا نّكْ،
أَوَاڒْ نّكْ وَارْ ث ثتُّوغْ.
17 ڭِيملْ. أڭّْ ثْشُونِي إِ ؤُمْسخَّارْ نّكْ،
مَاحنْذْ أَذْ دَّارغْ ؤُ أَذْ حْضِيغْ أَوَاڒْ نّكْ. ▪
18 أَرْزمْ أَيِي ثِيطَّاوِينْ إِنُو،
حِيمَا أَذْ ژَترغْ لْمُوعْجِيزَاثْ ن شَّارِيعَا نّكْ.
19 نشّْ أَقَا أَيِي ذ أَبَارَّانِي خْ ثمُّورْثْ،
وَارْ خَافِي ثفَّارْ ڒُومُورَاثْ نّكْ. ▪
20 ڒعْمَارْ إِنُو إِتّْوَافْنَا،
س ؤُوحّشْ غَارْ لْفَارَايِيضْ نّكْ.
21 شكْ ثْعَاقْبذْ إِمْعفَّارنْ إِتّْوَانعْڒنْ،
إِنِّي إِتّفّْغنْ خْ ڒُومُورَاثْ نّكْ.
22 كْسِي خَافِي ڒفْضِيحثْ ذ ؤُسحْقَارْ،
مَاغَارْ حْضِيغْ شّْهَاذَاثْ نّكْ.
23 ؤُڒَا ذ ڒْحُوكَّامْ قِّيمنْ، سَّاوَاڒنْ أَكْ-ذ وَايَاوْيَا خَافِي،
مَاشَا أَمْسخَّارْ نّكْ إِتّْخَارّصْ ذِي ثْوصَّا نّكْ.
24 شّْهَاذَاثْ نّكْ ذ مژْرِي إِنُو،
أَقَا-ثنْثْ ذ إِمْشَاوَارنْ إِنُو. ▪
25 ذَالِيثْ. ڒعْمَارْ إِنُو إِڒْصقْ غَارْ ثْعجَّاجْثْ،
أَرّْ-د ذَايِي ثُوذَارْثْ عْلَاحْسَابْ أَوَاڒْ نّكْ.
26 نشّْ نعْمغْ إِ شكْ خْ إِبْرِيذنْ إِنُو ؤُ شكْ ثسْثَاجْبذْ أَيِي.
سڒْمذْ أَيِي ثِيوصَّا نّكْ. ▪
27 أَرّْ أَيِي أَذْ فهْمغْ أَبْرِيذْ ن ڒُومُورَاثْ نّكْ،
أَذْ خَارّْصغْ ذِي لْمُوعْجِيزَاثْ نّكْ.
28 ڒعْمَارْ إِنُو إِفْسِي س وشْضَانْ،
سڭّمْ أَيِي غَارْ وبْرِيذْ ن وَاوَاڒْ نّكْ.
29 سِيڭّْوجْ أَيِي خْ وبْرِيذْ ن إِخَارِّيقنْ،
حِينّْ خَافِي س شَّارِيعَا نّكْ.
30 نشّْ إِخْضَارغْ أَبْرِيذْ ن ثِيذتّْ،
سَّارْسغْ لْفَارَايِيضْ نّكْ زَّاثِي.
31 نشّْ شبَّارغْ ذِي شّْهَاذَاثْ نّكْ، أَ سِيذِي،
وَارْ ذ أَيِي تّجِّي أَذْ سضْحِيغْ.
32 نشّْ أَذْ ضْفَارغْ أَبْرِيذْ ن ڒُومُورَاثْ نّكْ،
مَاغَارْ شكْ ثڭِّيذْ تَّاسِيعْ إِ وُوڒْ إِنُو.
33 هِي. أَ سِيذِي! سڒْمذْ أَيِي أَبْرِيذْ ن ثْوصَّا نّكْ،
خنِّي نشّْ أَذْ ذَايسْ طّْفغْ أَڒْ أَنڭَّارْ.
34 أوْشْ أَيِي ڒفْهَامثْ، خنِّي نشّْ أَذْ حْضِيغْ شَّارِيعَا نّكْ،
ؤُ أَذْ ذَايسْ طّْفغْ س وُوڒْ إِنُو مَارَّا.
35 نْذهْ أَيِي خْ وبْرِيذْ ن ڒُومُورَاثْ نّكْ،
مِينْزِي فَارّْحغْ زَّايسْ.
36 أَرّْ ؤُڒْ إِنُو غَارْ شّْهَاذَاثْ نّكْ،
وَارْ إِدْجِي غَارْ طّْمعْ ن أَرْبحْ.
37 سْهيّضْ ثِيطَّاوِينْ إِنُو خْ ڒْبَاطڒْ،
أَرّْ-د ذَايِي ثُوذَارْثْ س إِبْرِيذنْ نّكْ.
38 ضْمنْ مِينْ ثنِّيذْ إِ ؤُمْسخَّارْ نّكْ،
ونِّي شكْ إِتّڭّْوْذنْ.
39 سْحيّضْ خَافِي ڒفْضِيحثْ إِ زِي تّڭّْوذغْ،
مَاغَارْ لْفَارَايِيضْ نّكْ شْنَانْثْ.
40 خْزَارْ، تّْوحّْشغْ ڒُومُورَاثْ نّكْ،
أَرّْ أَيِي دَّارغْ س ثْسڭْذَا نّكْ.
41 وَاوْ. أجّْ أَذْ غَارِي د-ثَاسْ ثْمخْسِيوْثْ نّكْ إِشوَّارنْ، أَ سِيذِي،
أَسنْجمْ نّكْ أَقَا-ث أَمْ مَامّشْ إِ ثنِّيذْ شكْ.
42 حِيمَا زمَّارغْ أَذْ أَرّغْ خْ ونِّي زَّايِي إِسّْبهْذَاڒنْ،
مَاغَارْ تّشْڒغْ خْ وَاوَاڒْ نّكْ.
43 وَارْ تّكّسْ أَوَاڒْ ن ثِيذتّْ قَاعْ زڭْ ؤُقمُّومْ إِنُو،
مَاغَارْ تّْرَاجِيغْ لْفَارَايِيضْ نّكْ.
44 نشّْ أَذْ حْضِيغْ شَّارِيعَا نّكْ بْڒَا قطُّو،
إِ ڒبْذَا قَاعْ.
45 نشّْ ڭُّورغْ ذِي تَّاسِيعْ،
مَاغَارْ أَرْزُوغْ خْ ڒُومُورَاثْ نّكْ.
46 أَذْ سِّيوْڒغْ خْ شّْهَاذَاثْ نّكْ زَّاثْ إِ إِجدْجِيذنْ،
وَارْ زَّاثْسنْ تّْسضْحِيغْ شَا.
47 أَذْ أَرّغْ مژْرِي ذِي ڒُومُورَاثْ نّكْ،
ثِينِّي إِ تّخْسغْ.
48 نشّْ أَذْ كْسِيغْ إِفَاسّنْ إِنُو
قِيبَاڒْ إِ ڒُومُورَاثْ نّكْ، ثِينِّي إِ تّخْسغْ،
أَذْ خَارّْصغْ ذِي ثْوصَّا نّكْ.
49 زَايِينْ. عْقڒْ خْ وَاوَاڒْ إِ ثنِّيذْ إِ ؤُمْسخَّارْ نّكْ،
مِينْ خفْ ثُويْڒذْ أَسِيثمْ إِنُو.
50 ذ وَا ذ أَفوّجْ إِنُو خْ ڒمْحَاينْ إِنُو،
مَاغَارْ لْوَاعْذْ نّكْ يَارَّا-د ذَايِي ثُوذَارْثْ.
51 إِمْعفَّارنْ حشّنْ أَيِي-د أَوَاڒْ أَڒْ طَّارْفْ،
مَاشَا نشّْ وَارْ حيِّيذغْ شَا خْ شَّارِيعَا نّكْ.
52 نشّْ خَارّْصغْ ذِي لْفَارَايِيضْ نّكْ ن ڒبْذَا، أَ سِيذِي،
خنِّي أَقَا تّْوَافوّْجغْ.
53 ثَافْقحْثْ ثطّفْ أَيِي ذِي سِّيبّثْ ن إِعفَّاننْ،
إِنِّي إِسمّْحنْ ذِي شَّارِيعَا نّكْ.
54 ثِيوصَّا نّكْ ثُوغَا أَثنْثْ ذ إِزْڒَانْ إِنُو،
ذِي ثَادَّارْثْ ن ثْبَارَّانشْثْ إِنُو.
55 ذِي دْجِيڒثْ ثُوغَا تّْخَارّْصغْ ذڭْ يِيسمْ نّكْ، أَ سِيذِي،
ؤُ حْضِيغْ شَّارِيعَا نّكْ. ▪
56 أَمُّو إِ ذ أَيِي إِمْسَارْ،
مَاغَارْ حْضِيغْ ڒُومُورَاثْ نّكْ.
57 خِيثْ. سِيذِي ذ ثَاسْغَارْثْ إِنُو،
نشّْ نِّيغْ أَذْ حْضِيغْ أَوَاڒنْ نّكْ.
58 حشّْمغْ زَّاثْ إِ وُوذمْ نّكْ س مَارَّا وُوڒْ إِنُو،
حِينّْ خَافِي أَمْ مَامّشْ إِ ذ أَيِي ثنِّيذْ.
59 نشّْ خَارّْصغْ ذڭْ إِبْرِيذنْ إِنُو،
أَذْ سّْعقْبغْ إِصُورَافْ ن إِضَارنْ إِنُو غَارْ شّْهَاذَاثْ نّكْ.
60 نشّْ قدْجْقغْ، وَارْ عطَّاڒغْ شَا،
حِيمَا أَذْ حْضِيغْ ڒُومُورَاثْ نّكْ.
61 إِسغْوَانْ ن إِعفَّاننْ شَارّْفنْ أَيِي،
مَاشَا وَارْ تّتُّوغْ شَّارِيعَا نّكْ.
62 غَارْ وزْينْ ن دْجِيڒثْ تّْنكَّارغْ،
حِيمَا أَذْ شكْ قَاذِيغْ خْ لْفَارَايِيضْ نّكْ إِسڭّْذنْ.
63 نشّْ ذ أَمدُّوكّڒْ ن مَارَّا إِنِّي شكْ إِتّڭّْوذنْ،
ن يِينِّي إِحطَّانْ ڒُومُورَاثْ نّكْ.
64 زِي ثْمخْسِيوْثْ نّكْ إِشوَّارنْ ثشُّورْ ثمُّورْثْ مَارَّا، أَ سِيذِي،
سڒْمذْ أَيِي ثِيوصَّا نّكْ.
65 ثِيث. شكْ ثڭِّيذْ س ثْشُونِي إِ ؤُمْسخَّارْ نّكْ، أَ سِيذِي،
عْلَاحْسَابْ أَوَاڒْ نّكْ.
66 سڒْمذْ أَيِي مَاحنْذْ أَذْ ميّْزغْ ؤُ أَذْ سّْنغْ مْلِيحْ،
مِينْزِي تّشْڒغْ خْ ڒُومُورَاثْ نّكْ.
67 قْبڒْ مَا تّْوَاحْصَارغْ، ودَّارغْ،
مَاشَا ڒخُّو حطِّيغْ مِينْ ثقَّارذْ شكْ.
68 شكْ ذ أَصبْحَانْ ؤُ ثتّڭّذْ مِينْ إِصبْحنْ،
سڒْمذْ أَيِي ثِيوصَّا نّكْ.
69 إِمْعفَّارنْ أَرخُّونْ-د خَافِي إِخَارِّيقنْ،
مَاشَا نشّْ حطِّيغْ ڒُومُورَاثْ نّكْ س مَارَّا ؤُڒْ إِنُو.
70 ؤُڒْ نْسنْ وَارْ إِتَّاشَانْ أَمْ ثَاذُونْثْ،
مَاشَا نشّْ، أَقَا شَّارِيعَا نّكْ تَّافغْ ذَايسْ مژْرِي.
71 ثُوغَا إِ نشّْ مْلِيحْ ؤُمِي تّْوَاحْصَارغْ،
مَاغَارْ أَمُّو إِ ڒمْذغْ ثِيوصَّا نّكْ.
72 شَّارِيعَا زڭْ ؤُقمُّومْ نّكْ غَارِي إِحْڒَا أَطَّاسْ
خْ وَاڒَافْ ن ؤُقِييَّاثْ ن وُورغْ نِيغْ ن نُّوقَارْثْ. ▪
73 يُوذْ. إِفَاسّنْ نّكْ ڭِّينْ أَيِي، كوّْننْ أَيِي.
أوْشْ أَيِي ڒعْقڒْ، مَاحنْذْ أَذْ ڒمْذغْ ڒُومُورَاثْ نّكْ. ▪
74 إِنِّي شكْ إِتّڭّْوذنْ أَذْ أَيِي ژَترنْ ؤُشَا أَذْ فَارْحنْ،
مَاغَارْ تّْرَاجِيغْ أَوَاڒْ نّكْ.
75 نشّْ سّْنغْ، أَ سِيذِي، أَقَا سڭّْذنْثْ ڒحْكَامَاثْ نّكْ،
ؤُ أَقَا شكْ ثحْصَارذْ أَيِي س ڒَامَانْ.
76 أجّْ أَذْ ثِيڒِي ثْمخْسِيوْثْ نّكْ إِشوَّارنْ ذ أَفوّجْ إِ نشّْ،
أَمْ مَامّشْ إِ ثنِّيذْ إِ ؤُمْسخَّارْ نّكْ.
77 أَذْ خَافِي د-ثَاسْ أَرّحْمثْ نّكْ،
مَاحنْذْ أَذْ دَّارغْ، مَاغَارْ شَّارِيعَا نّكْ ذَايسْ مژْرِي إِنُو.
78 أجّْ أَذْ سّضْحَانْ إِمْعفَّارنْ،
مَاغَارْ س إِخَارِّيقنْ سّْفَارّْغنْ أَيِي صِّيفثْ إِنُو،
مَاشَا نشّْ ثْخمَّامغْ ذِي ڒُومُورَاثْ نّكْ.
79 أجّْ أَذْ غَارِي د-ذوْڒنْ إِنِّي شكْ إِتّڭّْوذنْ،
إِنِّي إِسّْننْ شّْهَاذَاثْ نّكْ.
80 أجّْ أَذْ يِيڒِي ؤُڒْ إِنُو إِمُونْ غَارْ ثْوصَّا نّكْ،
حِيمَا وَارْ تّْسضْحِيغْ شَا.
81 كَافْ. ڒعْمَارْ إِنُو إِسْخفْ زِي مژْرِي غَارْ ؤُسنْجمْ نّكْ،
أَقَا تّْرَاجِيغْ أَوَاڒْ نّكْ.
82 ثِيطَّاوِينْ إِنُو ذقّْڒنْثْ زِي مژْرِي غَارْ مِينْ ثقَّارذْ شكْ،
ؤُمِي نِّيغْ: ’مڒْمِي إِ خَافِي إِ غَا ثسّْفوّْجذْ؟‘
83 مَاغَارْ ذوْڒغْ أَمْ إِشْثْ ن ثْخَانْشثْ ن يِيڒمْ ثُويڒْ ذِي دّخَّانْ،
مَاشَا ثِيوصَّا نّكْ وَارْ ثنْثْ تُّوغْ.
84 مشْحَاڒْ ن وُوسَّانْ عَاذْ إِ إِقِّيمنْ إِ ؤُمْسخَّارْ نّكْ؟
مڒْمِي إِ غَا ثْشَارّْعذْ إِنِّي ذ أَيِي إِضفَّارنْ؟
85 إِمْعفَّارنْ غْزَانْ أَيِي إِحُوفَارْ،
مِينْ وَارْ د-يُوسِينْ أَكْ-ذ شَّارِيعَا نّكْ.
86 مَارَّا ڒُومُورَاثْ نّكْ ذ ثِيذتّْ.
نِيثْنِي ضفَّارنْ أَيِي-د س إِخَارِّيقنْ، أوْشْ أَيِي أَفُوسْ!
87 عْڒَاحَاڒْ إِڒِي أَقَا ثحَّانْ أَيِي زِي ثمُّورْثْ،
مَاشَا نشّْ وَارْ حيّْذغْ خْ ڒُومُورَاثْ نّكْ.
88 أَرّْ-د ذَايِي ثُوذَارْثْ عْلَاحْسَابْ ثَامخْسِيوْثْ نّكْ إِشوَّارنْ،
خنِّي أَذْ حْضِيغْ شّْهَاذثْ إِ د-إِفّْغنْ زڭْ ؤُقمُّومْ نّكْ.
89 لَامِيذْ. أَ سِيذِي، أَوَاڒْ نّكْ إِتّْغِيمَا إِ ڒبْذَا إِمْثنْ ذڭْ ؤُجنَّا.
90 ثَامخْسِيوْثْ نّكْ إِشوَّارنْ ثِيوضْ زِي جِّيڒْ أَڒْ جِّيڒْ.
شكْ ثڭِّيذْ ثَامُّورْثْ أَذْ ثْبدّْ ثمْثنْ ؤُ أَمُّو إِ غَا ثقِّيمْ ثْبدّْ. ▪
91 عْلَاحْسَابْ لْفَارَايِيضْ نّكْ أَذْ قِّيمنْثْ بدّنْثْ،
مَاغَارْ مَارَّا نِيثنْثِي ذ إِمْسخَّارنْ نّكْ.
92 مْڒِي وَارْ ثدْجِي شَّارِيعَا نّكْ ذ مژْرِي إِنُو،
إِڒِي تّْوَاهلّْكغْ ذِي ڒحْصَارثْ إِنُو.
93 عمَّارْصْ أَذْ تُّوغْ ڒُومُورَاثْ نّكْ إِ ڒبْذَا،
مَاغَارْ زَّايْسنْثْ ثَارِّيذْ-د أَيِي ثُوذَارْثْ.
94 نشّْ أَقَا أَيِي إِ شكْ، سنْجمْ أَيِي،
مِينْزِي أَرْزُوغْ خْ ڒُومُورَاثْ نّكْ.
95 إِعفَّاننْ رَاجَانْ أَيِي حِيمَا أَذْ أَيِي ثحَّانْ،
مَاشَا نشّْ خزَّارغْ غَارْ شّْهَاذَاثْ نّكْ.
96 نشّْ ژْرِيغْ أَقَا مَارَّا مِينْ ثدْجْ ڒكْمَارثْ غَارسْ أَنڭَّارْ،
مَاشَا ڒُومُورْ نّكْ غَارسْ تَّاسِيعْ أَطَّاسْ.
97 مِيمْ. مَامّشْ إِ خَافِي ثْعِيزّْ شَّارِيعَا نّكْ،
أَسّْ إِكْمڒْ تّْخَارّْصغْ ذَايسْ.
98 س ڒُومُورَاثْ نّكْ ثَارِّيذْ أَيِي ذ أَمِيغِيسْ خْ ڒْعذْيَانْ إِنُو،
مَاغَارْ أَقَا أَثنْ غَارِي إِ ڒبْذَا.
99 نشّْ غَارِي ڒعْقڒْ كْثَارْ خْ مَارَّا إِمْسڒْمَاذنْ إِنُو،
مَاغَارْ تّْخَارّْصغْ ذڭْ إِبْرِيذنْ نّكْ.
100 نشّْ غَارِي ڒفْهَامثْ كْثَارْ خْ إِوسُّورَا،
مَاغَارْ حْضِيغْ ڒُومُورَاثْ نّكْ.
101 منْعغْ إِضَارنْ إِنُو زِي قَاعْ إِبْرِيذنْ إِعفَّاننْ،
حِيمَا أَذْ حْضِيغْ أَوَاڒْ نّكْ.
102 نشّْ وَارْ حيّْذغْ شَا خْ لْفَارَايِيضْ نّكْ،
مَاغَارْ شكْ ذ ونِّي ذ أَيِي إِسّْغَارنْ.
103 مَامّشْ إِ غَا يِيڒِي ذ مِيژِيذْ مِينْ ثقَّارذْ شكْ إِ وَانغْ إِنُو،
خْ ثَامّنْثْ إِ ؤُقمُّومْ إِنُو! ▪
104 زِي ڒُومُورَاثْ نّكْ تَّارِّيغْ-د ڒعْقڒْ،
س ؤُينِّي شَارّْهغْ كُوڒْ أَمسْرُوقْ ن إِخَارِّيقنْ.
105 نُونْ. أَوَاڒْ نّكْ ذ ڒفْنَارْ إِ ؤُضَارْ إِنُو
ذ ثَافَاوْثْ إِ ؤُمسْرُوقْ إِنُو.
106 نشّْ جُّودْجغْ ؤُ خْسغْ أَذْ ت سّْقفْڒغْ،
أَقَا أَذْ حْضِيغْ مَارَّا لْفَارَايِيضْ نّكْ إِسڭّْذنْ. ▪
107 نشّْ تّْوَاحْصَارغْ أَطَّاسْ، أَ سِيذِي،
أَرّْ-د ذَايِي ثُوذَارْثْ عْلَاحْسَابْ أَوَاڒْ نّكْ.
108 تّْزَاوْڭغْ، كْسِي ثِيوْهِيبِينْ ن ڒْخَاضَارْ زڭْ ؤُقمُّومْ إِنُو، أَ سِيذِي،
ؤُ سڒْمذْ أَيِي لْفَارَايِيضْ نّكْ.
109 ثُوذَارْثْ إِنُو أَقَا-ث ڒبْذَا ذِي لْخَاطرْ،
مَاشَا عمَّارْصْ أَذْ تُّوغْ شَّارِيعَا نّكْ.
110 إِعفَّاننْ ڭِّينْ أَيِي إِجّْ ن ڒْفخْ،
مَاشَا نشّْ وَارْ فّْغغْ شَا خْ ڒُومُورَاثْ نّكْ.
111 شّْهَاذَاثْ نّكْ ذ ثَاسْغَارْثْ إِنُو إِ ڒبْذَا،
مَاغَارْ نِيثنْثِي سّْفَارّْحنْثْ ؤُڒْ إِنُو.
112 حزّْمغْ ؤُڒْ إِنُو مَاحنْذْ أَذْ ڭّغْ عْلَاحْسَابْ ثِيوصَّا نّكْ،
إِ ڒبْذَا، أَڒْ أَنڭَّارْ.
113 سَامِيخْ. أَيْثْ ن ثْنَاينْ ن إِغمْبَابْ شَارّْهغْ ثنْ،
مَاشَا تّخْسغْ شَّارِيعَا نّكْ.
114 شكْ ذ أَذُورِّي إِنُو ذ ثَاسدَّارْثْ ن ؤُسڒْقِي إِنُو،
نشّْ تّْرَاجِيغْ أَوَاڒْ نّكْ.
115 بعّذْ خَافِي، أَ إِعفَّاننْ،
حِيمَا أَذْ حْضِيغْ ڒُومُورَاثْ ن أَربِّي إِنُو.
116 سنّذْ أَيِي عْلَاحْسَابْ لْوَاعْذْ نّكْ،
مَاحنْذْ أَذْ دَّارغْ ؤُ وَارْ تّْسضْحِيغْ ذِي ڒَايَاسْ إِنُو.
117 عمّذْ أَيِي، خنِّي أَذْ تّْوَاسْنجْمغْ،
ؤُ أَذْ أَرّغْ مژْرِي ذِي ثْوصَّا نّكْ ڒبْذَا.
118 مَارَّا إِنِّي إِتَّاڭّْوجنْ خْ ثْوصَّا نّكْ، سّحْقَارغْ ثنْ،
مَاغَارْ ڒْغشّْ نْسنْ مْغِيرْ ذ إِخَارِّيقنْ.
119 أَمْ كُوفُّو ثْمحِّيذْ مَارَّا إِعفَّاننْ زِي ثمُّورْثْ،
س ؤُينِّي تّخْسغْ شّْهَاذَاثْ نّكْ.
120 زِي ثِيڭّْوُوذِي زَّايكْ ثشِّيرُّووْ أَرِّيمثْ إِنُو،
أَمُّو إِ ڭّْوذغْ زِي ڒحْكَامَاثْ نّكْ.
121 عَايِينْ. نشّْ ڭِّيغْ ڒْحقّْ ذ ثْسڭْذَا،
وَارْ ذ أَيِي تّْسلّمْ إِ ڒْمَارْڭحْ ن ينِّي ذ أَيِي إِحصَّارنْ.
122 أڭّْ ڒْعَارْپُونْ ذِي طّْوعْ ن ؤُمْسخَّارْ نّكْ،
وَارْ تّجِّي إِمْعفَّارنْ أَذْ أَيِي حْصَارنْ.
123 ثِيطَّاوِينْ إِنُو ذقّْڒنْثْ زِي مژْرِي غَارْ ؤُسنْجمْ نّكْ،
غَارْ لْوَاعْذْ ن ثْسڭْذَا نّكْ.
124 أڭّْ س ثْمخْسِيوْثْ نّكْ إِشوَّارنْ أَكْ-ذ ؤُمْسخَّارْ نّكْ،
سڒْمذْ أَيِي ثِيوصَّا نّكْ.
125 نشّْ ذ أَمْسخَّارْ نّكْ، أوْشْ أَيِي ڒعْقڒْ،
مَاحنْذْ أَذْ سّْنغْ شّْهَاذَاثْ نّكْ.
126 أَقَا يِيوضْ أَسْ-د ڒْحَاڒْ إِ سِيذِي حِيمَا أَذْ إِبدّْ خْ إِضَارنْ نّسْ،
مَاغَارْ نِيثْنِي أَرْژِينْ شَّارِيعَا نّكْ.
127 س ؤُينِّي تّخْسغْ ثِيوصَّا نّكْ خْ وُورغْ،
وَاهْ أَطَّاسْ خْ وُورغْ إِتّْوَاصفَّانْ.
128 س ؤُينِّي حسْبغْ مَارَّا ڒُومُورَاثْ نّكْ ذِي كُوڒْ ثَامسْڒَاشْثْ نِيشَانْ،
مَاشَا شَارْهغْ كُوڒْ أَمسْرُوقْ ن إِخَارِّيقنْ.
129 بِي. شّْهَاذَاثْ نّكْ ذ لْمُوعْجِيزَاثْ،
س ؤُينِّي إِحطَّا ثنْثْ وُوڒْ إِنُو.
130 أَنُورْزمْ ن وَاوَاڒنْ نّكْ إِسّْشَانْ ثَافَاوْثْ،
إِ إِحَافِييّنْ إِتِّيشْ أَسنْ ڒعْقڒْ. ▪
131 أَرْزْمغْ أَقمُّومْ إِنُو أَطَّاسْ،
ؤُ سَّاحْرَاثغْ زِي مژْرِي غَارْ ڒُومُورَاثْ نّكْ.
132 أَرّْ ؤُذمْ نّكْ غَارِي ؤُ حِينّْ خَافِي،
أَمْ مَامّشْ د-ثكَّارْ إِ ينِّي إِتّخْسنْ إِسمْ نّكْ.
133 سمْثنْ إِصُورَافْ إِنُو أَمْ مَامّشْ إِ ذ أَيِي ثنِّيذْ،
وَارْ تّجِّي أَذْ خَافِي إِحْكمْ ڒْغشّْ.
134 فكّْ أَيِي زِي ڒحْصَارثْ ن إِوْذَانْ،
مَاحنْذْ أَذْ حْضِيغْ ڒُومُورَاثْ نّكْ.
135 أجّْ ؤُذمْ نّكْ أَذْ يَارْغْ خْ ؤُمْسخَّارْ نّكْ،
سڒْمذْ أَيِي ثِيوصَّا نّكْ. ▪
136 ثِيغزْرَاثِينْ ن وَامَانْ هْوَانْثْ-إِ-د زِي ثِيطَّاوِينْ إِنُو،
مَاغَارْ نِيثْنِي وَارْ حطَّانْ شَّارِيعَا نّكْ.
137 ثْسَاذِي. أَقَا شكْ ذ أَمْسڭّذْ، أَ سِيذِي،
ؤُڒَا ذ لْفَارَايِيضْ نّكْ سڭّْذنْثْ.
138 شكْ ثُومُورذْ ثَاسڭْذَا ن شّْهَاذَاثْ نّكْ،
ڒْمَانثْ نْسنْ ذ ثَامقّْرَانْثْ أَطَّاسْ.
139 أَسمْ إِنُو إِهلّكْ أَيِي،
مَاغَارْ إِنِّي ذ أَيِي إِحصَّارنْ تُّونْ أَوَاڒنْ نّكْ.
140 لْوَاعْذْ نّكْ إِقُّورْ أَطَّاسْ،
أَمْسخَّارْ نّكْ إِتّخْسْ إِ-ث. ▪
141 نشّْ ذ أَمُوقْڒِيڒْ ؤُ تّْوَاسحْقَارغْ،
مَاشَا وَارْ تّتُّوغْ ڒُومُورَاثْ نّكْ.
142 ثَاسڭْذَا نّكْ ذ إِشْثْ ن ثْسڭْذَا إِ ڒبْذَا،
شَّارِيعَا نّكْ ذ ثِيذتّْ.
143 دِّيقثْ ذ ثڭّْوُوذِي ڒقّْفنْثْ أَيِي،
مَاشَا ڒُومُورَاثْ نّكْ ذَايْسنْثْ مژْرِي إِنُو.
144 ثَاسڭْذَا ن شّْهَاذَاثْ نّكْ إِ ڒبْذَا إِ ثدْجْ.
سفْهمْ أَيِي ثنْثْ، خنِّي أَذْ دَّارغْ.
145 قُوفْ. ڒَاغِيغْ س مَارَّا ؤُڒْ إِنُو، أَرّْ-د خَافِي، أَ سِيذِي،
خنِّي أَذْ حْضِيغْ ثِيوصَّا نّكْ.
146 نشّْ ڒَاغِيغْ-د خَاكْ، فكّْ أَيِي،
خنِّي أَذْ حْضِيغْ مَارَّا شّْهَاذَاثْ نّكْ.
147 قْبڒْ ثُوفُّوثْ ثُوغَا تّْڒَاغِيغْ حِيمَا أَذْ أَيِي د-ثوْشذْ أَفُوسْ،
رَاجِيغْ أَوَاڒْ نّكْ. ▪
148 ثِيطَّاوِينْ إِنُو فَاقنْثْ قْبڒْ ڒْوقْثْ ن وُوضُوفْ ن وشْبَارْ،
حِيمَا أَذْ خَارّْصغْ ذِي مِينْ ثقَّارذْ. ▪
149 سڒْ-د غَارْ ثْمِيجَّا إِنُو عْلَاحْسَابْ ثَامخْسِيوْثْ نّكْ إِشوَّارنْ، أَ سِيذِي،
أَرّْ-د ذَايِي ثُوذَارْثْ عْلَاحْسَابْ لْفَارَايِيضْ نّكْ.
150 إِنِّي يَارزُّونْ أَذْ ڭّنْ ڒفْضَايحْ ؤُذْسنْ أَيِي،
أَقَا نِيثْنِي ڭّْوجنْ أَطَّاسْ خْ شَّارِيعَا نّكْ.
151 شكْ ثُوذْسذْ، أَ سِيذِي،
مَارَّا ڒُومُورَاثْ نّكْ ذ ثِيذتّْ إِ دْجَانْ.
152 ؤُڒَا ذ أَطَّاسْ زڭْ وَامِي ثُوغَا سّْنغْ شّْهَاذَاثْ نّكْ،
مَاغَارْ شكْ ثڭِّيذْ ثنْثْ إِ ڒبْذَا.
153 رِيخْ. خْزَارْ غَارْ ڒغْبنْ إِنُو ؤُ ثسّْنجْمذْ أَيِي،
مَاغَارْ وَارْ تُّوغْ شَّارِيعَا نّكْ.
154 أَغْ أَيِي ثَاسْغَارْثْ ؤُشَا فكّْ أَيِي،
أَرّْ-د ذَايِي ثُوذَارْثْ أَمْ مَامّشْ إِ ذ أَيِي ثنِّيذْ.
155 إِڭّْوجْ ؤُسنْجمْ خْ إِعفَّاننْ،
مَاغَارْ وَارْ أَرزُّونْ ثِيوصَّا نّكْ.
156 أَ سِيذِي، أَرّحْمثْ نّكْ ذ أَطَّاسْ،
أَرّْ-د ذَايِي ثُوذَارْثْ عْلَاحْسَابْ لْفَارَايِيضْ ن نّكْ.
157 إِنِّي ذ أَيِي إِتّْذَارَّاشنْ ذ ينِّي ذ أَيِي إِحصَّارنْ أَقَا أَثنْ س وَاطَّاسْ،
مَاشَا نشّْ وَارْ حيّْذغْ شَا خْ شّْهَاذَاثْ نّكْ.
158 ژْرِيغْ إِنِّي ذ أَيِي إِغْذَارنْ ؤُشَا عِيفّغْ ثنْ،
مَاغَارْ نِيثْنِي وَارْ طِّيفنْ ذڭْ وَاوَاڒْ نّكْ.
159 خْزَارْ، مَامّشْ تّخْسغْ ڒُومُورَاثْ نّكْ، أَ سِيذِي،
أَرّْ-د ذَايِي ثُوذَارْثْ عْلَاحْسَابْ ثَامخْسِيوْثْ نّكْ إِشوَّارنْ.
160 بدُّو ن وَاوَاڒْ نّكْ أَقَا-ث ذ ثِيذتّْ،
كُوڒْ ڒحْكَامْ إِسڭّْذنْ زَّايكْ أَقَا-ث إِ ڒبْذَا.
161 شِينْ. ڒْحُوكَّامْ ذَارّْشنْ خَافِي خْ وَالُو،
مَاشَا ؤُڒْ إِنُو ثُوغَا إِتّڭّْوذْ زڭْ وَاوَاڒْ نّكْ.
162 نشّْ فَارْحغْ خْ لْوَاعْذْ نّكْ،
أَمشْنَاوْ إِجّنْ إِ إِتَّافْ إِشْثْ ن ثْكشَّاضْثْ ثَامقّْرَانْثْ.
163 نشّْ شَارّْهغْ أَخَارِّيقْ ؤُ عِيفّغْ ث،
مَاشَا تّخْسغْ شَّارِيعَا نّكْ.
164 سبْعَا ن ثْوَاڒَاوِينْ ذڭْ وَاسّْ صبْحغْ شكْ،
خْ ڒحْكَامَاثْ ن ثْسڭْذَا نّكْ.
165 إِنِّي إِتّخْسنْ شَّارِيعَا نّكْ، أَقَا غَارْسنْ ڒهْنَا ثَامقّْرَانْثْ،
وَارْ ذِينْ أَژْرُو ن ؤُنقْرَاضْ زَّاثْسنْ.
166 أَ سِيذِي، تّْرَاجِيغْ أَسنْجمْ نّكْ،
ؤُ تّڭّغْ عْلَاحْصَابْ ثِيوصَّا نّكْ.
167 ڒعْمَارْ إِنُو إِحطَّا شّْهَاذَاثْ نّكْ،
تّخْسغْ ثنْثْ أَطَّاسْ.
168 نشّْ حطِّيغْ ڒُومُورَاثْ نّكْ ذ شّْهَاذَاثْ نّكْ،
مَاغَارْ مَارَّا إِبْرِيذنْ إِنُو أَرْزْمنْ زَّاثكْ.
169 ثَاوْ. أَ سِيذِي، أجّْ أَذْ غَاركْ د-يَاوضْ ؤُڒَاغِي إِنُو زَّاثْ إِ وُوذمْ نّكْ،
أوْشْ أَيِي ڒعْقڒْ عْلَاحْسَابْ أَوَاڒْ نّكْ.
170 أجّْ أَذْ د-يَاسْ ؤُحشّمْ إِنُو غَارْ وُوذمْ نّكْ،
سنْجمْ أَيِي أَمْ مَامّشْ إِ ذ أَيِي ثنِّيذْ.
171 إِينْشِيشنْ إِنُو أَذْ ؤُشْرُورنْ أَصبّحْ أَمْ إِجّْ ن ڒْعُونْصَارْ،
مَاغَارْ شكْ ثسّڒْمَاذذْ أَيِي ثِيوصَّا نّكْ.
172 إِڒسْ إِنُو أَذْ يَارّْ مِينْ ثنِّيذْ شكْ،
مَاغَارْ مَارَّا ڒُومُورَاثْ نّكْ سڭّْذنْ.
173 أجّْ أَفُوسْ نّكْ أَذْ أَيِي إِڭّْ ثْوِيزَا،
مَاغَارْ إِخْضَارغْ ڒُومُورَاثْ نّكْ.
174 أَ سِيذِي، تّْمژْرغْ غَارْ ؤُسنْجمْ نّكْ،
شَّارِيعَا نّكْ أَقَا ذَايسْ مژْرِي إِنُو.
175 أجّْ ڒعْمَارْ إِنُو أَذْ إِدَّارْ، أَذْ شكْ إِصبّحْ،
أَذْ أَيِي عَاوْننْثْ لْفَارَايِيضْ نّكْ.
176 نشّْ ودَّارغْ أَمْ إِجّْ ن ؤُهُوڒِي إِودَّارنْ.
أَرْزُو خْ ؤُمْسخَّارْ نّكْ، مَاغَارْ وَارْ تُّوغْ ڒُومُورَاثْ نّكْ. ▪