118
1 قَاذَامْ سِيذِي، مَاغَارْ نتَّا ذ أَصبْحَانْ، مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.
2 أجّْ إِسْرَائِيل أَذْ يِينِي:
”ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.“
3 أجّْ ثَادَّارْثْ ن هَارُونْ أَذْ ثِينِي
”ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.“
4 أجّْ إِنِّي إِتّڭّْوذنْ سِيذِي أَذْ إِنِينْ:
”ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.“
5 ذِي ڒحْصَارثْ ڒَاغِيغْ غَارْ سِيذِي.
سِيذِي يَارَّا-د خَافِي ؤُمِي إِوْشَا أَيِي تَّاسِيعْ.
6 سِيذِي أَقَا-ث أَكِيذِي، وَارْ تّڭّْوذغْ شَا،
مَاغَارْ مِينْ إِزمَّارْ بْنَاذمْ أَذْ أَيِي إِڭّْ؟ ▪
7 سِيذِي أَقَا-ث أَكِيذِي جَارْ ينِّي ذ أَيِي إِوْشِينْ أَفُوسْ.
نشّْ أَذْ خزَّارغْ غَارْ سْوَادَّايْ خْ ينِّي ذ أَيِي إِشَارّْهنْ.
8 إِحْڒَا أَذْ أَرْزُوغْ دُّورِي غَارْ سِيذِي،
خْ ؤُثشْڒِي خْ بْنَاذمْ. ▪
9 إِحْڒَا أَذْ أَرْزُوغْ دُّورِي غَارْ سِيذِي،
خْ ؤُثشْڒِي خْ ثَارْوَا ن ثَاصِيڒثْ.
10 مَارَّا ڒڭْنُوسْ نّْضنْ أَيِي-د.
نشّْ غضْڒغْ ثنْ س يِيسمْ ن سِيذِي.
11 نّْضنْ أَيِي-د، وَاهْ، قُووَّارنْ أَيِي.
نشّْ غضْڒغْ ثنْ س يِيسمْ ن سِيذِي.
12 نِيثْنِي نّْضنْ أَيِي أَمْ ثْزِيزْوَا،
أَقَا أَمشْنَاوْ ثِيمسِّي ن إِسنَّاننْ خسْينْ.
نشّْ غضْڒغْ ثنْ س يِيسمْ ن سِيذِي.
13 شكْ ثْعَارْنذْ أَيِي س ڒقْسَاحثْ أَڒَامِي ڭُّورْ أَذْ وْضِيغْ،
مَاشَا سِيذِي إِوْشَا أَيِي أَفُوسْ.
14 سِيذِي ذ جّهْذْ إِنُو ذ أَزهّذْ إِنُو،
نتَّا إِذْوڒْ أَيِي ذ أَسنْجمْ.
15 ذڭْ إِقِيضَانْ ن إِمْسڭَّاذنْ إِتّْوَاسڒْ ڒْحسّْ ن ؤُسْڒِيوْڒوْ ذ ؤُسنْجمْ.
أَفُوسْ أَفُوسِي ن سِيذِي إِڭَّا س جّهْذْ.
16 أَفُوسْ أَفُوسِي ن سِيذِي إِتّْوَاسْڭعّذْ،
أَفُوسْ أَفُوسِي ن سِيذِي إِڭَّا س ومْحَاضْ. ▪
17 نشّْ وَارْ ثْمتِّيغْ شَا، أَذْ دَّارغْ،
أَذْ بَارّْحغْ ثِيمڭَّا ن سِيذِي.
18 سِيذِي إِوبّخْ أَيِي أَطَّاسْ،
مَاشَا وَارْ ذ أَيِي إِوْشِي إِ ڒْموْثْ.
19 أَرْزْممْ أَيِي ثِيوُّورَا ن ثْسڭْذَا،
أَذْ زَّايْسنْثْ أَذْفغْ، أَذْ قَاذِيغْ سِيذِي.
20 ثَا ذ ثَاوَّارْثْ ن سِيذِي،
إِمْسڭَّاذنْ أَذْ زَّايسْ أَذْفنْ.
21 نشّْ أَذْ أَشْ قَاذِيغْ ؤُمِي ذ أَيِي ثسْڒِيذْ،
ثْذوْڒذْ أَيِي ذ أَسنْجمْ.
22 أَژْرُو إِ وَارْ خْسنْ إِبنَّاينْ،
إِذْوڒْ ذ إِخفْ ن ثغْمَارْثْ. ▪
23 أَيَا إِتّْوَاڭّْ زِي سِيذِي،
ؤُ مَانْ أَيَا ذ ڒعْجبْ ذِي ثِيطَّاوِينْ نّغْ.
24 وَا ذ أَسّْ إِ إِڭَّا سِيذِي،
أجّْ أَنغْ أَذْ نَارْشقْ ؤُ أَذْ ذَايسْ نْفَارْحْ.
25 أَ سِيذِي، أَوِي-د أَسنْجمْ،
أَ سِيذِي، أَوِي-د أَفْڒَاحْ.
26 ذ أَمِيمُونْ ونِّي د غَا يَاسنْ س يِيسمْ ن سِيذِي!
نشِّينْ أَذْ كنِّيوْ نْبَاركْ زِي ثَادَّارْثْ ن سِيذِي.
27 أَربِّي ذ سِيذِي نِّي ذ أَنغْ إِڭِّينْ ثَافَاوْثْ.
قْنمْ ثَاغَارْصْثْ ن ڒْعِيذْ س إِسغْوَانْ غَارْ وَاشَّاونْ ن ؤُعَالْطَارْ، ڒْمذْبحْ ن وشْمَاضْ.
28 شكْ ذ أَربِّي إِنُو، س ؤُيَا أَذْ شكْ قَاذِيغْ،
أَ أَربِّي إِنُو، أَذْ شكْ سّْعُودْجغْ.
29 قَاذَامْ سِيذِي، مَاغَارْ نتَّا ذ أَصبْحَانْ،
مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.