‏1 أَ أَربِّي ن ؤُنْثَاقمْ، أَ سِيذِي، أَربِّي ن ؤُنْثَاقمْ،

بَانْ-د ذِي ثِيسِّيقْثْ!

‏2 أَ، ڒْقَاضِي ن ثمُّورْثْ، سْڭعّذْ إِخفْ نّكْ،

أَرّْ ثَاسْغَارْثْ إِ إِمْعفَّارنْ أَمْ مِينْ سّْذَاحدْجنْ نِيثْنِي.

‏3 مشْحَاڒْ إِ غَا كّنْ عَاذْ إِعفَّاننْ، أَ سِيذِي،

مشْحَاڒْ إِ غَا كّنْ نڭّْزنْ إِعفَّاننْ س ڒفْرَاحثْ،

‏4 أَذْ قِّيمنْ سَّاوَاڒنْ أَوَاڒنْ إِقسْحنْ،

مشْحَاڒْ إِ غَا قِّيمنْ مَارَّا إِنِّي إِتّڭّنْ ڒْمُوعْصِييّثْ أَذْ سّمْغَارنْ إِخفْ نْسنْ؟

‏5 أَ سِيذِي، نِيثْنِي ڒبّْزنْ ڒْڭنْسْ نّكْ،

حصَّارنْ ثَاسْغَارْثْ ن ڒْوَارْثْ نّكْ.

‏6 نِيثْنِي نقّنْ ثَاجَّاتْشْ ذ ؤُبَارَّانِي،

غَارّْصنْ إِ إِيُوجِيڒنْ.

‏7 نِيثْنِي قَّارنْ: ”سِيذِي وَارْ ت إِتّْوِيڒِي،

أَربِّي ن يَاعْقُوبْ وَارْ ذ أَسْ إِتّْحكَّارْ.“ ^▪  

‏8 فثْنمْ كنِّيوْ إِقفُّوحنْ ذِي ڒْڭنْسْ جْمِيعْ أَكْ-ذ إِپُوهَاڒِييّنْ،

مڒْمِي إِ غَا ثْذوْڒمْ ثْفهّْممْ؟ ^▪  

‏9 مَا وَارْ إِتّسْڒِي ونِّي إِژُّونْ أَمزُّوغْ؟

مَا وَارْ إِژَارّْ ونِّي إِڭِّينْ ثِيطّْ؟ ^▪  

‏10 مَا وَارْ إِتّْعَاقبْ ونِّي إِتّْوبّْخنْ ڒڭْنُوسْ،

ونِّي إِسّڒْمَاذنْ ثُوسّْنَا إِ بْنَاذمْ؟

‏11 سِيذِي يَارڭّبْ خْ إِخَارِّيصنْ ن إِوْذَانْ،

أَقَا-ثنْ أَمْ إِجّْ ن ؤُصُوضِي وَاهَا. ^▪  

‏12 سّعْذْ ن ورْيَازْ نِّي ثتّْوبّْخذْ، أَ سِيذِي،

ونِّي ثسّڒْمَاذذْ زِي شَّارِيعَا نّكْ،

‏13 حِيمَا أَذْ ث ثسَّاريّحذْ زڭْ وُوسَّانْ إِعفّْننْ،

أَڒْ غَا إِتّْوَاحْفَارْ وحْفُورْ إِ إِعفَّاننْ.

‏14 مَاغَارْ سِيذِي وَارْ إِنطَّارْ ڒْڭنْسْ نّسْ،

وَارْ إِسمّحْ ذِي ثسْغَارْثْ نّسْ. ^▪  

‏15 مَاغَارْ ڒْحُوكْمْ أَذْ د-إِذْوڒْ غَارْ ثْسڭْذَا،

مَارَّا إِنِّي غَارْسنْ ؤُڒْ إِسڭّْمنْ أَذْ ت-إِ-د ضفَّارنْ.

‏16 مَانْ ونْ كِيذِي إِ غَا إِبدّنْ ضِيدّْ إِ إِعفَّاننْ؟

مَانْ ونْ إِ خَافِي إِ غَا إِوْثنْ ضِيدّْ إِ ينِّي إِتّڭّنْ ڒْغشّْ؟

‏17 مْڒِي وَارْ إِدْجِي سِيذِي ذ ثْوِيزَا إِنُو،

إِڒِي إِزْذغْ ڒعْمَارْ إِنُو عْڒَاحَاڒْ ذڭْ وسْغَاضْ. ^▫  

‏18 مَاڒَا نِّيغْ: ’أَضَارْ إِنُو إِتّفْرِيغْ!‘،

خنِّي ثطّفْ أَيِي ثْمخْسِيوْثْ نّكْ إِشوَّارنْ، أَ سِيذِي!

‏19 مَاڒَا مَّارْنِينْ ذَايِي إِخَارِّيصنْ أَڒْ طَّارْفْ،

ثُوغَا ڒعْمَارْ إِنُو إِتَّارّْ مژْرِي ذڭْ ؤُسْفوّجْ نّكْ.

‏20 مَا ثخْسذْ أَذْ كِيذكْ إِسّْمُونْ ڒْكُورْسِي ن ؤُهلّكْ،

ونِّي إِسِّيوْضنْ ڒغْبنْ خْ ذْسَاسْ ن ثوْصيّثْ؟

‏21 نِيثْنِي حصَّارنْ ڒعْمَارْ ن ؤُمْسڭَّاذْ،

شهّْذنْ خْ إِذَامّنْ إِمزْذَاڭنْ س ڒْغَارْ.

‏22 سِيذِي ثُوغَا أَيِي ذ إِجّْ ن لْپُورْجْ يُوعْڒَانْ،

أَربِّي إِنُو ذ ثَاصْضَارْثْ ن ثَاروْڒَا إِنُو.

‏23 نتَّا أَذْ خَاسنْ إِسّعْقبْ ڒْمُوعْصِييّثْ نْسنْ،

أَمْ تّڭّنْ ڒْغَارْ نْسنْ أَذْ ثنْ إِثحَّا.

سِيذِي، أَربِّي نّغْ، أَذْ ثنْ إِثحَّا.